2 Corintios 1:1-24
1 Pa Chauenexẽgü i Tupanaaxü̃́ Yaxõgüxü̃ i Coríntiuwa, rü Guxü̃ma i Acáyaanewa Ngẽxmagüxü̃, choma i Pauru nixĩ i pexü̃ charümoxẽxü̃ rü pexca̱x chanaxümatüxü̃ i ñaa popera wüxigu namaxã i taenexẽ i Timutéu. Rü choma nixĩ ya Tupana norü ngúchaü̃maxã choxü̃ unetaxü̃ nax Ngechuchu ya Cristu choxü̃ imuxü̃ca̱x nax norü orexü̃ chixuxü̃ca̱x.
2 Rü tanaxwa̱xe i Tanatü ya Tupana rü tórü Cori ya Ngechuchu ya Cristu pexü̃ nangechaxü̃ rü pexna nanaxã i norü taãxẽ.
Pauru rü ngúxü̃ ninge
3 Rü toma rü nüxü̃ ticua̱xüü̃gü ya Tupana ya Nanatü ya tórü Cori ya Ngechuchu ya Cristu. Erü nüma nixĩ i Tanatü i nüxü̃́ ingechaü̃tümüxü̃güxü̃ rü nüma nixĩ i tórü Tupana ya guxü̃guma tüxü̃ taãẽxẽẽcü.
4 Rü ngẽxguma ngúxü̃ tingegügu, rü nüma ya Tupana nixĩ i toxü̃ nataãẽxẽẽxü̃ nax toma rü ta tanataãẽxẽẽgüxü̃ca̱x i ngẽma ngúxü̃ ingegüxü̃. Rü ngẽmatama taãxẽ ya Tupana toxna naxãxü̃maxã tanataãẽxẽẽgü i ngẽma togü.
5 Rü ñu̱xma nax Cristurüxü̃ poraãcü ngúxü̃ tingegüxü̃, rü ngẽxgumarüxü̃ ta nixĩ nax nümatama poraãcü toxü̃ nataãẽxẽẽxü̃.
6 Rü ñu̱xma nax ngúxü̃ tingegüxü̃, rü ngẽmaãcü toxü̃ nangupetü nax pema rü ta pexü̃́ nangẽxmaxü̃ca̱x i perü taãxẽ rü perü maxü̃ i taguma gúxü̃. Rü ñu̱xma nax Tupana toxü̃ taãẽxẽẽxü̃, rü ngẽmaãcü tomaxã nanaxü nax pema rü ta pexü̃́ nangẽxmaxü̃ca̱x i perü taãxẽ rü yáxna namaxã pexĩnüexü̃ca̱x i ngẽmatama ngúxü̃ i toma tingegüxü̃.
7 Toma rü aixcüma tayaxõgü nax pema rü tagutáma nüxü̃ perüxoexü̃ i Tupanaarü ore, erü nüxü̃ tacua̱x rü ñu̱xma nax toxrüxü̃ ngúxü̃ pingegüxü̃, rü ngẽxgumarüxü̃ ta pexü̃́ nangẽxma i ngẽmatama taãxẽ i toxü̃́ ngẽxmaxü̃.
8 Pa Toenexẽgüx, tanaxwa̱xe i nüxü̃ pecua̱x nax ñuxre ga guxchaxü̃gü toxü̃ ngupetüxü̃ ga Áchiaanewa. Rü yema nax poraãcü ngúxü̃ tingegüxü̃, rü nagu tarüxĩnüe nax marü tama namaxã taporaexü̃, rü düxwa nagu tarüxĩnüe nax marü taũtáma tamaxẽxü̃.
9 Rü marü nagu tarüxĩnüe rü ñoma yu tomaxã naxuegugüxü̃rüxü̃ tixĩgü. Natürü yemaacü toxü̃ naxüpetü, nax toxü̃ nangúexẽẽxü̃ca̱x nax tama namexü̃ nax togünatama tarüyoü̃güxü̃ rü namexü̃ nax nüxü̃́ tayaxõxü̃ ya Tupana ya ínadagüxẽẽcü i yuexü̃.
10 Rü Tupana rü toxü̃ ínanguxü̃xẽxẽ nawa ga yema guxchaxü̃ ga yuwa toxü̃ gagüchaü̃xü̃. Rü ngẽxgumarüxü̃ tá ta toxü̃ ínanguxü̃xẽxẽ nawa i ñaa taxü̃ i guxchaxü̃ i ñu̱xma toxü̃́ ngẽxmaxü̃. Rü aixcüma tayaxõgü nax nüma rü guxü̃gutáma ngẽmaãcü toxü̃ nangü̃xẽẽxü̃.
11 Natürü tanaxwa̱xe i pema rü perü yumüxẽmaxã toxü̃ perüngü̃xẽxẽ. Rü ngẽxguma ngẽmaãcü penaxü̱xgux, rü muxü̃ma i duü̃xü̃gü rü tá Tupanana moxẽ naxãgü naxca̱x i ngẽma ngü̃xẽxẽ i nüma toxna naxãxü̃.
Tü̱xcüü̃ tama Coríntiuwa naxũ ga Pauru
12 Rü ngẽma toxü̃ taãẽxẽẽxü̃ nixĩ nax toõxẽwa nüxü̃ tacuáxü̃ nax ñoma i naanewa rü aixcüma Tupana naxwa̱xexü̃ãcüma mea tamaxẽxü̃. Rü pepe̱xewa nixĩ ga guxü̃arü yexera yemaacü mea tamaxẽxü̃. Natürü tocüma rü tama ñoma i naanecüã̱xarü cua̱xwa ne naxũ, erü Tupana ya toxü̃ ngechaü̃cü nixĩ ya nüxü̃́ tayaxõcü.
13 Rü yema poperagü ga pexca̱x taxümatüxü̃wa, rü nataxuma ga ta̱xacü ga pexü̃́ guxchaxü̃ nax nüxü̃ pedaumatüxü̃ rü nüxü̃ pecuáxü̃. Rü chierüx meama nüxü̃ pecua̱xgu i guxü̃ma i ngẽma pexca̱x taxümatüxü̃.
14 Rü ñu̱xma nax marü íxrarüwa toxü̃ pecuáxü̃ nax ñuxãcü tixĩgüxü̃, rü ngẽxguma ínanguxgu ya tórü Cori ya Ngechuchu rü pema rü tá tomaxã petaãẽgü rü ngẽxgumarüxü̃ i toma rü tá ta pemaxã tataãxẽgü.
15 1:15-16 Rü yemagu charüxĩnüãcü nixĩ ga noxri nagu charüxĩnü nax petanüwaxíra chaxũxü̃ nax pexü̃ íchayadauxü̃ca̱x rü ngẽmaãcü pexü̃ nax charüngü̃xẽẽxü̃ca̱x. Rü nagu charüxĩnü rü ngẽxguma Machedóniaanewa chaxũxgu nax petanügu íchidauxü̃, rü ngẽxguma chataeguxgu rü wenaxarü petanügu íchidauxü̃. Rü ngẽxguma tá ningu nax taxree̱xpü̱xcüna petanüwa chaxũxü̃ nax ngẽmaãcü pexü̃́ natauxchaxü̃ca̱x nax choxü̃ perüngü̃xẽẽxü̃ nax Yudéaanewa chaxũxü̃ca̱x.
16 Nüü̃ nadau 1:15
17 Bexmana pema nagu perüxĩnüegu rü tama mea nagu charüxĩnüãcü nixĩ i pemaxã nüxü̃ chixuxü̃ nax petanüwa chaxũxchaü̃xü̃. ¿Ẽ̱xna pema nagu perüxĩnüegu rü ñoma wüxi i duü̃xü̃ i tama Tupanaaxü̃́ yaxõxü̃ãcü nagu charüxĩnü rü “Ngü̃”, ñachagürü rü ngẽxgumatama “Tama”, ñachagürü?
18 Natürü Tupana toxü̃ nacua̱x nax aixcüma yixĩxü̃ i ngẽma nüxü̃ tixuxü̃. Rü toma rü tama “Ngü̃”, ñatagürü rü ngẽxgumatama “Tama”, ñatagürü.
19 Erü yimá Ngechuchu ya Cristu ya Tupana Nane ya Chilbánu rü Timutéu rü choma pemaxã nüxü̃ tixuchigacü, rü tama “Ngü̃”, ñanagürü rü ngẽxgumatama “Tama”, ñanagürü. Rü nüma rü aixcüma nayanguxẽxẽ i ngẽma nüxü̃ yaxuxü̃.
20 Rü Cristu nixĩ ya yimá yanguxẽẽcü ga guxü̃ma ga yema unetagü ga Tupana nũxcüma nüxü̃ ixuxü̃. Rü ngẽmaca̱x ngẽxguma Tupanaxü̃ icua̱xüü̃gügu, rü Ngechuchuégagu: “Ameü̃”, ñatagürügü.
21 Rü Tupana nixĩ ya toxü̃ poraexẽẽcü rü pexü̃ poraexẽẽcü nax tama Cristuna ixĩgachixü̃ca̱x. Rü nümatama nixĩ ga nügüxü̃́ tüxü̃ nadexü̃ nax noxrü ixĩgüxü̃ca̱x.
22 Rü nüma ya Tupana rü tagu nanaxümatü i naéga erü tórü yora nixĩ. Rü nüma rü tüxna nanamu i Naãxẽ ya Üünexü̃ nax ngẽmawa nüxü̃ icuáxü̃ca̱x nax aixcüma tá tüxna naxããxü̃ i ngẽma tamaxã inaxunetaxü̃.
23 Rü chorü maxü̃égagu pemaxã nüxü̃ chixu nax ñu̱xma rü ta taxũta Coríntiuwa chaxũxü̃, yerü tama chanaxwa̱xe nax pexü̃ changechaü̃güxẽẽxü̃. Rü Tupana nüxü̃ nacua̱x nax aixcüma yixĩxü̃ ga yema.
24 Rü toma rü tama pexü̃ taxucu̱xegüecha nax Tupanaaxü̃́ peyaxõgüxü̃, erü pema rü marü meama peyaxõgü. Natürü ngẽma tanaxwa̱xexü̃ nixĩ nax pexü̃ tarüngü̃xẽẽgüxü̃ nax yexeraãcü peporaexü̃ca̱x i perü õwa.
