2 Corintios 10:1-18
10 Rü ñu̱xma rü Cristuarü mecümagagu rü norü ngechaü̃gagu, rü choma i Pauru rü pexü̃ chaca̱a̱xü̃ nax choxü̃ íperüxĩnüexü̃ca̱x. Erü nangẽxma i duü̃xü̃gü i nüxü̃ ixugüxü̃ nax pexü̃ chamuü̃xü̃ ega pexü̃tawa changexmagu natürü ngẽxguma pexna chayáxü̃gu rü chaugü ícharüpora.
2 Natürü ngẽxguma ngéma petanüwa chaxũxgu, rü chierüx nataxuxguma nax ta̱xacüca̱x namaxã chaporagaxü̃ i ngẽma duü̃xü̃gü i petanüwa toxü̃ ixuxü̃ nax ñoma tama yaxõgüxü̃rüxü̃ tamaxẽxü̃. Erü choma rü íchamemare nax namaxã chaporagaxü̃ i ngẽma toxü̃ ixuxü̃.
3 Rü ngẽmáacü duü̃xü̃gü tixĩgü, natürü tama ñoma i naanecüã̱xrüxü̃ togü tadai i ngẽxguma ítanapoxü̃gu i Tupanaarü ore.
4 10:4-5 Erü ngẽma toxne i namaxã ítanapoxü̃xü̃ i Tupanaarü ore rü tama ñoma i naanecüã̱x namaxã ãxnexü̃ nixĩ. Erü toma rü toxü̃́ nangẽxma i Tupanaarü pora nax ngẽmamaxã itayanaxoxẽẽxü̃ca̱x i Chatanáarü pora rü itayanaxoxẽẽxü̃ca̱x i guxü̃ma i ngẽma ore i duü̃xü̃güaxü̃́ naguxchaxẽẽxü̃ nax tama Tupanaaxü̃́ yaxõgüãxü̃ca̱x. Rü guxü̃ma i ta̱xacü i nagu naxĩnüexü̃ i ngẽma duü̃xü̃gü i chixexü̃, rü Cristuna tanaxuaxü̃ nax nüma namaxã inacuáxü̃ca̱x.
5 Nüü̃ nadau 10:4
6 Rü ngẽxguma marü mea Cristuga pexĩnüegu, rü toma rü ítamemare nax tüxü̃ ítarüwe̱xãchixẽẽxü̃ ya guxãma ya yíxema tama Cristuga ĩnüxe.
7 ¡Mea penangugü i ngẽma nüxü̃ pedauxü̃! Rü ngẽxguma texé tügü cua̱xgu nax Cristuarü duü̃xü̃ tixĩxü̃, rü name nixĩ i nüxü̃ tacua̱x nax toma rü ta Cristuarü duü̃xü̃gü tixĩgüxü̃.
8 Rü woo írarüwa chanangupetüxẽxẽ nax chaugü chicua̱xüxü̃xü̃ namaxã i ngẽma nax Tupana toxü̃ muxü̃, natürü taxuca̱xma naxca̱x chaxãne. Erü aixcüma nüma ya Cori nixĩ ya toxü̃ mucü nax pexü̃ tarüngü̃xẽẽgüxü̃ca̱x nax yexeraãcü mea peyaxõgüxü̃ca̱x. Rü tama ta̱xacürü chixexü̃gu nax pexü̃ tayixẽẽxü̃ca̱x nixĩ i toxü̃ namuxü̃.
9 Rü tama chanaxwa̱xe i nagu perüxĩnüe nax pexü̃ íchabaixgüchaü̃xü̃ namaxã i ngẽma poperagü i pexca̱x chaxümatüxü̃.
10 Rü nangẽxma i duü̃xü̃gü i nüxü̃ nixugüxü̃ nax chorü poperawaxicatama pexü̃ íchabaixgüxü̃, natürü ngẽxguma pexü̃tawa changexmagu rü taxúexü̃ma ichabáixgü nax chauga taxĩnüxü̃ca̱x, ñaxü̃maxã choxü̃ nixugüe.
11 Natürü texé ya ngẽmaãcü idexáxe rü tanaxwa̱xe i mea nagu tarüxĩnü rü ngẽxguma pexna tayáxü̃gu torü poperawa pemaxã nüxü̃ tixuxü̃rüxü̃ tátama tixĩgü i ngẽxguma petanüwa tangexmagügu.
12 Toma rü tama tanaxwa̱xe i togü namaxã tawüxiguxẽxẽ rü ẽ̱xna nagu togü tangugü i ngẽma duü̃xü̃gü i nügütama icua̱xüü̃güxü̃. Nümagü rü nügütama nawomüxẽẽgü, erü nügügutama nügü nangugü rü nügümaxã nügü nawüxiguxẽxẽ.
13 Natürü toma rü tama togü namaxã ticua̱xüü̃gü i ngẽma yaxõgüxü̃ i tama toxme̱xwa ngẽxmagüxü̃. Yerü Tupana nixĩ ga tomaxã nüxü̃ ixucü nax ngextá nanaxwa̱xexü̃ nax tapuracüexü̃. Rü nüma nixĩ ga noxri Coríntiuwa ga petanüwa toxü̃ nangugüxẽẽxü̃.
14 Rü yemaacü toxíra nixĩ ga noxri petanüwa tangugüxü̃ nax pemaxã nüxü̃ tixuxü̃ca̱x ga yema Cristuarü ore. Rü ngẽmaca̱x i ñu̱xma nax petanüwa taxĩxü̃, rü tama tanangupetüxẽxẽ ga yema Tupana tomaxã nüxü̃ ixuxü̃, yerü nüma nixĩ ga toxü̃ namuxü̃ nax pexü̃ tarüngü̃xẽẽgüxü̃ca̱x.
15 Rü ngẽmaca̱x tama togüarü puracümaxãmare nixĩ i togü ticua̱xüü̃güxü̃. Rü tama nüxü̃ tachopetüchaü̃ i ngẽma Tupana nagu tomaxã unetaxü̃, rü ngẽmaca̱x nixĩ i pexü̃ tangúexẽẽxü̃. Rü ngẽma pexü̃́ tanaxwa̱xexü̃ nixĩ nax yexeraãcü nüxü̃ pecuáxü̃ i Tupanaarü ore nax ngẽmaãcü yexera peyaxõgüxü̃ca̱x.
16 Rü ngẽxguma marü petanüwa tangugüguwena rü tanaxwa̱xe i ngẽma duü̃xü̃gü i perü yéamaxü̃ra ngẽxmagüxü̃ i ngextá taguma texé nüxü̃ íixuxü̃wa taxĩ nax ngẽmamaxã rü ta nüxü̃ tixuxü̃ca̱x i ore i mexü̃. Erü tama tanaxwa̱xe i togüarü puracümaxã togü ticua̱xüü̃gü.
17 Erü Tupanaarü ore i ümatüxü̃wa rü ñanagürü:“Rü ngẽxguma texé tügü icua̱xüxü̃chaü̃gu, rü name nixĩ i tórü Corixü̃ ticua̱xüxü̃, erü nüma nixĩ i tüxü̃ nangü̃xẽẽxü̃”,
ñanagürü i ngẽma ore.
18 Rü tama yíxema tügütama icua̱xüxü̃xe tixĩ ya Tupanape̱xewa mexe, natürü yíxema tórü Cori tüxü̃ icua̱xüxü̃xe tixĩ ya aixcüma Tupanape̱xewa mexe.
