2 Corintios 12:1-21
12 Taxuwama name nax yigü icua̱xüü̃xü̃. Natürü tá pemaxã nüxü̃ chixuama nax ñuxãcü tórü Cori choxü̃ nango̱xetüxẽẽxü̃ rü choxü̃ nüxü̃ nacua̱xẽẽxü̃ ga ta̱xacü ga ẽxü̃guxü̃.
2 Rü 14 ga taunecü marü nangupetü nax Tupana daxũguxü̃ ga naanewa ga nüma ínayexmaxü̃wa nagaãxü̃ ga wüxi ga yatü ga Cristuaxü̃́ puracüxü̃. Natürü tama nüxü̃ chacua̱x rü naãxẽwaxicatama nixĩ ga yéma nagaãxü̃, rüe̱xna guxü̃ ga naxü̃nemaxã. Rü Tupanaxicatama nixĩ ya nüxü̃ nacuácü i ngẽma.
3 12:3-4 Rü aixcüma meama nüxü̃ chacua̱x nax daxũguxü̃ ga naanewa nagaãxü̃ ga Tupana ga nüma ínayexmaxü̃wa, natürü tama nüxü̃ chacua̱x rü guxü̃ ga naxü̃nemaxã yéma nagaãxü̃ rüe̱xna naãxẽwa yéma nagaãxü̃. Rü Tupanaxicatama nixĩ ya nüxü̃ cuácü i ngẽma. Rü yéma daxũguxü̃ ga naanewa nüxü̃ naxĩnü ga ore ga ẽxü̃guxü̃ ga duü̃xü̃güna chu̱xuxü̃ nax nüxü̃ yaxugüxü̃.
4 Nüü̃ nadau 12:3
5 Rü choma rü chi tüxü̃ chicua̱xüxü̃ ya yíxema Tupana daxũwa tüxü̃ gaxe, natürü taũtáma chaugütama chicua̱xüxü̃. Rü ngẽma ngúxü̃ nax chingexü̃maxãxicatama nixĩ i tá chaugü chicua̱xüxü̃.
6 Natürü ngẽxguma chi chaugü chicua̱xüxü̃gu, rü taxũchima wüxi i ngeãẽmare nixĩ i ngẽma, erü aixcüma nixĩ i ngẽma nüxü̃ chixuxü̃. Natürü tama chaugü chicua̱xüxü̃ nax taxúema nagu rüxĩnüxü̃ca̱x nax ngẽma chowa nüxü̃ naxĩnüexü̃arü yexera chixĩxü̃ rü ngẽma chowa nüxü̃ nadaugüxü̃arü yexera chixĩxü̃.
7 Natürü tórü Cori rü tama nanaxwa̱xe i chaugü namaxã chicua̱xüxü̃ ga yema ẽxü̃guxü̃ ga mexẽchixü̃ ga choxü̃ nüxü̃ nacua̱xẽẽxü̃. Rü yemaca̱x chaxunewa nangu ga wüxi ga choxü̃́ ngúxü̃ ñoma wüxi ya tuxu chaxunewa ingaxixü̃rüxü̃. Rü yema rü ñoma wüxi ga Chatanáarü chuxchirüxü̃ choxna nangu nax choxü̃ nachixewexü̃ca̱x nax tama chaugü chicua̱xüxü̃xü̃ca̱x.
8 Rü tomaepü̱xcüna tórü Corina chaca nax choxü̃́ iyanaxoxẽẽãxü̃ca̱x ga yema choxü̃́ ngúxü̃.
9 Natürü nüma ya tórü Cori rü ñanagürü choxü̃: “Choma cuxü̃ changechaü̃, rü ngexicatama nixĩ i cunaxwa̱xexü̃. Rü choma rü ngẽma duü̃xü̃gü i tama poraexü̃wa nixĩ i chanango̱xẽẽxü̃ i chorü pora”, ñanagürü choxü̃. Rü ngẽmaca̱x chataãxẽ ega tama chaporagu. Erü ngẽxguma tama chaporagu rü ngẽxguma nixĩ i chowa inawéãxü̃ i norü pora ya Cristu.
10 Rü ngẽma nax Cristuxü̃ nax changechaü̃xü̃gagu nixĩ i yáxna namaxã chaxĩnüxü̃ ega woo chaturagu rü woo ta̱xacü chomaxã yaxugüegu i duü̃xü̃gü. Rü woo choxü̃́ nataxuxgu i chorü ngẽmaxü̃gü, rü woo duü̃xü̃gü rü chowe yangexü̃tanügu, rü woo guxchaxü̃gü choxü̃́ ngẽxmagu rü Cristuca̱x rü yáxna namaxã chaxĩnü i guxü̃ma i ngẽma. Erü ngẽxguma chaturagu, rü ngẽxguma nixĩ i yexeraãcü Cristu choxü̃ poraxẽẽxü̃.
Pauru rü naxca̱x naxoegaãxẽ ga yema yaxõgüxü̃ ga Coríntiuwa yexmagüxü̃
11 Bexmana ñoma wüxi i ãũãẽxü̃rüxü̃ chidexa, natürü pegagutama nixĩ i düxwa ngẽmaãcü chaugüétüwa chidexaxü̃. Natürü pema chi nixĩ ga chauétüwa pidexagüxü̃ rü tama i chomax. Rü woo taxuwama chame i chomax, natürü taxuwama choxü̃ narüyexeragü i ngẽma orearü uruü̃güneta i nawe perüxĩxü̃.
12 Rü yexguma petanüwa chayexmagu, rü yáxna pemaxã chaxĩnüãcüma pexü̃ nüxü̃ chadauxẽxẽ nax aixcüma Cristu choxü̃ muxü̃ nax nüxü̃ chixuxü̃ca̱x ga norü ore. Rü cua̱xruü̃gümaxã rü mexü̃gü ga Tupanaarü poramaxã üxü̃ pexü̃ nüxü̃ chacua̱xẽxẽ nax aixcüma Cristu choxü̃ muxü̃.
13 Rü yexguma petanüwa chayexmagu rü pemaxã chamecüma, yema guxü̃ma ga togü ga yaxõgüxü̃maxã nax chamecümaxü̃rüü̃tama. Natürü wüxiwaxicatama nixĩ ga íchatüxü̃ yerü petanüwa rü tama ngĩxü̃ chayaxu ga diẽru yema togü ga yaxõgüxü̃tanüwa ngĩxü̃ chayaxuxü̃rüxü̃. Rü chanaxwa̱xe i choxü̃́ nüxü̃ perüngü̃ma i ngẽma.
14 Rü ñu̱xma rü marü íchamemare nax norü tomaepü̱xcüna pexü̃ íchayadauxü̃. Rü taxũtáma ta̱xacüca̱x pexna chayaca. Erü tama perü diẽruca̱x petanüwa chaxũ, natürü pexca̱xüchi nixĩ i ngéma chaxũxü̃. Pema rü chauxacügü pixĩgü i Tupanaarü orewa. Rü tama naxacügü nixĩ i nanatügüca̱x nanutaque̱xexü̃ i diẽru. Natürü papagü nixĩ i naxacügüca̱x nanutaque̱xexü̃ i diẽru.
15 Rü choma rü íchamemare nax chorü ngúchaü̃maxã pexca̱x ichanaxãxü̃ i guxü̃ma i ta̱xacü i choxü̃́ ngẽxmaxü̃ rü woo chaugütama rü ta nax ichaxãxü̃ nax aixcüma peyaxõgüxü̃ca̱x. Natürü cha̱u̱xca̱x rü ngẽxguma yexeraãcü pexü̃ changechaü̃gu, rü pema rü yexeraãcü choxü̃ perüxoetanü.
16 Rü nangẽxma i duü̃xü̃gü i petanüwa, rü woo nüxü̃ nacua̱xgü nax taguma ta̱xacüca̱x petanüwa íchaca̱xaxü̃, natürü nüxü̃ nixugüama nax pexü̃ chawomüxẽẽãcüma perü diẽru ngĩxü̃ chayaxuxü̃.
17 ¿Ẽ̱xna pema nagu perüxĩnüegu rü yema duü̃xü̃gü ga petanüwa chamugüxü̃wa pexü̃ chawomüxẽxẽ rü diẽru íchaca?
18 Rü Títomaxã nüxü̃ chixu nax petanüwa íyadauxü̃ca̱x. Rü namaxã yéma chanamu ga yema to ga taenexẽ. ¿Ẽ̱xna pema nagu perüxĩnüegu ga Títo rü diẽruca̱x pexü̃ yéma nayawomüxẽxẽ? ¿Tama ẽ̱xna aixcüma yixĩxü̃ nax chauxrüxü̃ pemaxã namecümaxü̃ rü mexü̃gu naxĩnüxü̃ ga Títox?
19 Bexmana nagu perüxĩnüegu nax ngẽmaãcü tidexagüxü̃ erü togüétüwatama tachogüchaü̃. Natürü tama ngẽmagu tarüxĩnüe. Rü Tupanape̱xewa Cristuégagu pemaxã nüxü̃ tixu i norü ore nax yexeraãcü Tupanaaxü̃́ peyaxõgüxü̃ca̱x rü yexeraãcü mea nax pemaxẽxü̃ca̱x, Pa Toenexẽgü ya Pexü̃ Tangechaü̃güxex.
20 Erü chaxoegaãxẽ rü ngẽxguma wena pexü̃ íchayada̱u̱xgu, rü ngürüãchi taxũtáma choma chanaxwa̱xexü̃ãcüma pexü̃ ichayangau, rü pema rü taxũtáma penaxwa̱xexü̃ãcüma choxü̃ pedaugü. Rü chaxoegaãxẽ erü ngürüãchi tá pexü̃ ichayangau nax pegüchi ípexaiexü̃, rü pegüarü ngẽmaxü̃güca̱x pixãũxãchigüxü̃, rü pegümaxã penuexü̃, rü pegüguxicatama íperüxĩnüexü̃, rü pexoregüta̱a̱xgüxü̃, rü toguã̱xü̃ pixuxü̃, rü pegü picua̱xüü̃güxü̃, rü chixexü̃ ípexüexü̃, rü ngẽmaãcü chixri ípemaxẽxü̃.
21 Rü chaxoegaãxẽ erü ngẽxguma wena petanüwa chaxũxgu, rü ngürüãchi Tupana tá pegagu choxü̃ naxãnexẽxẽ rü choxü̃ naxauxẽxẽ nagagu nax muxü̃ma i pemax rü marü ñuxgumama pecadu pexügüechaxü̃, rü tama nüxü̃ perüxoechaü̃xü̃ nax Tupanape̱xewa chixexü̃ pexügüxü̃, rü nai i ngexü̃maxã nax pemaxẽxü̃, rü togü i chixexü̃ nax pexügüxü̃.
