2 Corintios 4:1-18
4 Rü ngẽmaca̱x taguma nüxü̃ tarüchau i ñaa puracü, erü Tupana ya nüxü̃́ tangechaü̃tümüü̃cü nixĩ ga toxü̃ mucü nax tanaxüxü̃ca̱x i ñaa puracü nax nüxü̃ tixuxü̃ca̱x i norü ore.
2 Rü yemaca̱x nüxü̃ tarüxoe ga guxü̃ma ga yema chixexü̃ i ãne tüxna ãxü̃ rü yema cúãcü üxü̃. Rü tama tanawomüxẽẽãcüma nixĩ i namaxã nüxü̃ tixuxü̃ i ore rü tama tanaxüchicüü i ngẽma ore. Rü yema ore i aixcüma ixĩxü̃xicatama nixĩ i nüxü̃ tixuxü̃. Rü ngẽmaãcü Tupanape̱xewa rü duü̃xü̃güpe̱xewa togü itawe̱x nax nüxü̃ nacua̱xgüxü̃ca̱x nax aixcüma yixĩxü̃ i ngẽma nüxü̃ tixuxü̃.
3 Rü ngẽxguma chi texéca̱x naguxchagu i ngẽma ore i mexü̃ i nüxü̃ tixuxü̃, rü ngẽma duü̃xü̃gü i iyarütauxexü̃ca̱xicatama nixĩ i naguxchaxü̃.
4 Erü nümagü nax tama yaxõgüãxü̃, rü ñoma i naanearü ãẽ̱xgacü i Chataná nixĩ i nüxü̃́ naguxchaxẽẽxü̃ nax tama nüxü̃ nacua̱xgüxü̃ca̱x i Cristu ya Üünecüarü ore i ñoma omürüxü̃ poraãcü nangóonexẽẽxü̃. Rü Cristuwa nixĩ i nügü nawéxü̃ ya Tupana.
5 Rü toma rü tama tochigaxü̃tama nixĩ i tixugüxü̃. Natürü nüxü̃ tixu nax Ngechuchu ya Cristu rü tórü Cori yixĩxü̃, rü toma rü Ngechuchugagu perü ngü̃xẽẽruü̃gümare tixĩgüxü̃.
6 Erü nümatama ya Tupana ga noxri naane naxü̱xgux rü ẽanexü̃wa nanango̱xẽxẽ ga ngóonexü̃. Rü nümatama nixĩ i ñu̱xma i tüxü̃ yango̱xnaãẽxẽẽgüxü̃ nax ngẽmawa nüxü̃ icuáxü̃ca̱x nax nüma rü naxüünexü̃. Rü ngẽma norü üüne rü Ngechuchu ya Cristuchiwewa nixĩ i nangóxü̃.
Tayaxõgüama ega woo ngúxü̃ ingegügu
7 Rü ñu̱xma nax Ngechuchu ya Cristuxü̃ icuáxü̃, rü ngẽma cua̱x rü taxü̃ne i mairaxü̃naxca̱xwa nangẽxma, nax nangóxü̃ca̱x nax Tupanawa ne naxũxü̃ i ngẽma pora i tüxü̃́ ngẽxmaxü̃ rü tama i tawa.
8 Rü guxü̃wama toxü̃́ nangẽxma i guxchaxü̃gü, natürü taguma nüxü̃ tarüchau i ñaa puracü. Rü woo poraãcü taxoegaãẽgügu, natürü taguma ítanange̱x i ñaa puracü.
9 Rü woo towe ingẽxü̃tanügu i torü uanügü, natürü ya Tupana rü taguma toxü̃ ínawogü. Rü woo duü̃xü̃gü toxü̃ napíexẽẽgu, natürü tama tayue.
10 Rü guxü̃wama i ngextá ítaxĩxü̃wa rü guxü̃guma Ngechuchurüxü̃ yuwa tangexmagü, natürü ngẽmaãcü itanawe̱x nax towa namaxü̃xü̃ ya Ngechuchu.
11 Rü ñu̱xma nax tamaxẽxü̃, rü guxü̃ i ngunexü̃gu rü Ngechuchugagu yuwa tangexmagü. Natürü ngẽmaãcü toxü̃ naxüpetü nax Ngechuchu inawéxü̃ca̱x i norü maxü̃ nawa i ñaa toxone i yuxwa̱xexü̃.
12 Rü ngẽmaãcü yuwa tangexmagü, natürü i pema rü maxü̃ i taguma gúxü̃wa pengẽxmagü.
13 Tupanaarü ore i ümatüxü̃wa rü ñanagürü:“Tupanaaxü̃́ chayaxõ rü yemaca̱x chidexa”,
ñanagürü. Rü ngẽxgumarüü̃tama tixĩgü i toma nax tayaxõgüxü̃ rü Tupanachiga tidexagüxü̃.
14 Rü nüxü̃ tacua̱x rü Tupana ga yuwa Cori ya Ngechuchuxü̃ írüdaxẽẽcü, rü yimátama Tupana tá nixĩ ya wüxigu Ngechuchumaxã yuwa toxü̃ írüdagüxẽẽcü. Rü wüxigu pemaxã tá nügüxü̃tawa toxü̃ nagagüxü̃.
15 Rü guxü̃ma ga yema toxü̃ ngupetüxü̃ rü perü mexü̃ca̱x nixĩ nax yexeraãcü yamuetanüxü̃ca̱x i ngẽma duü̃xü̃gü ya Tupana nüxü̃ rüngü̃xẽẽgüxü̃. Rü ngẽmaãcü tá düxwa namuxũchi i ngẽma duü̃xü̃gü i moxẽ Tupanana ãgüxü̃ rü nüxü̃ icua̱xüü̃güxü̃.
16 Rü ngẽmaca̱x taguma nüxü̃ tarüxoe nax nüxü̃ tixuxü̃ i ngẽma ore. Rü woo yayachigügu rü yaturachigügu i toxone, natürü toõxẽwa rü guxü̃ i ngunexü̃gu rü yexeraãcü tiporaetanü.
17 Erü ngẽma ngúxü̃ i ñu̱xma torü maxü̃wa tingexü̃, rü wüxi i paxaãchimare nixĩ rü paxa tá nangupetü. Natürü ngẽma ngúxü̃gagu rü tá tanayaxu i wüxi i maxü̃ i mexẽchixü̃ i tagutáma gúxü̃.
18 Rü tama ngẽma ñu̱xma nüxü̃ idauxü̃gu nixĩ itarüxĩnüexü̃, natürü nagu tarüxĩnüe i ngẽma ñu̱xma tama nüxü̃ idauxü̃. Erü ngẽma ñu̱xma nüxü̃ idauxü̃ rü tama natai, natürü ngẽma ñu̱xma tama nüxü̃ idauxü̃, rü guxü̃gutáma nangẽxmaecha.
