2 Corintios 5:1-21
5 Nüxü̃ tacua̱x rü ngẽxguma iyanaxoxgu i ñaa toxone i paxaãchi toxü̃́ ngẽxmaxü̃, rü daxũguxü̃ i naanewa tá tanayaxu i wüxi i toxone i tagutáma iyarüxoxü̃ i Tupanatama toxca̱x mexẽẽxü̃ rü tama i duü̃xü̃gü.
2 Rü ngẽmaca̱x i ñu̱xma i ñaa toxonewa tamaxẽyane rü yáxna tarüngü rü tama aixcüma tataãẽgü. Erü tanaxwa̱xe nax paxa toxü̃́ nangẽxmaxü̃ i ngẽma toxone i daxũguxü̃ i naanewa tá toxü̃́ ngẽxmaxü̃.
3 Rü ngẽma toxone i daxũguxü̃ i naanewa tá toxü̃́ ngẽxmaxü̃, rü ñoma wüxi i naxchirurüxü̃ tá nagu ticu̱xcuchi nax ngẽmaãcü tama tangẽxchiruxü̃ca̱x.
4 Rü ñaa toxone i ñu̱xma toxü̃́ ngẽxmaxü̃wa tamaxẽyane rü tanaxĩ̱xãchiãẽgü rü yáxna tarüngü rü tama aixcüma tataãẽgü. Rü tama ítanatáxchaü̃ i toxone i ñoma i naanewa toxü̃́ ngẽxmaxü̃, natürü tanaxwa̱xegü nax tanayaxuxü̃ i toxone i ngexwaca̱xü̃xü̃ nax ngẽmaãcü ngẽma maxü̃ i ngexwaca̱xü̃xü̃ iyanaxoxẽẽxü̃ca̱x i toxone i ñu̱xma toxü̃́ ngẽxmaxü̃.
5 Rü Tupana nixĩ ya toxü̃ imexẽẽcü naxca̱x i ngẽma ngexwaca̱xü̃xü̃ i maxü̃ rü ngẽma ngexwaca̱xü̃xü̃ i toxone. Rü toxna nanamu ga Naãxẽ ya Üünexü̃ nax ngẽmawa nüxü̃ tacuáxü̃ca̱x nax aixcüma tá tanayaxuxü̃ i ngẽma ngexwaca̱xü̃xü̃ i maxü̃ rü ngẽma ngexwaca̱xü̃xü̃ i toxone.
6 Rü ngẽmaca̱x taxuca̱xma taxoegaãẽgü. Erü nüxü̃ tacua̱x rü ñu̱xma nax ñaa toxonewa tangexmagüxü̃ rü taxucürüwama tórü Corixü̃tawa tangexmagü i daxũguxü̃ i naanewa.
7 Rü woo tama nüxü̃ tadaugügu ya yimá tórü Cori i ñu̱xmax, natürü tayaxõgü nax wüxi i ngunexü̃ rü tá nüxü̃ tadaugüxü̃.
8 Rü ngẽmaca̱x taxuca̱xma taxoegaãẽgü ega tayuegu. Erü toxca̱x rü narümemae nixĩ nax nüxna ítachoxü̃xü̃ i ñaa toxone, nax tórü Corixü̃tawa tangexmagüxü̃ca̱x.
9 Rü ngẽmaca̱x, woo ñoma i toxonewa tangexmagügu rüẽ̱xna tama nawa tangexmagügu, rü tanaxwa̱xe nax guxü̃guma tórü Coriarü ngúchaü̃ taxügüxü̃. Rü ngẽmaca̱x naxca̱x tadaugü nax tanaxüxü̃ i ngẽma nanaxwa̱xexü̃ i nümax.
10 Erü guxãtáma i yixema rü Cristupe̱xewa tá tangugü nax wüxichigü nayaxuxü̃ca̱x i ngẽma tüxna üxü̃. Rü ngẽxgumarüxü̃ nax ñuxãcü mea imaxẽxü̃ rüe̱xna chixexü̃gu imaxẽxü̃ ga yexguma ñoma ga taxünewa iyexmagügu, rü ngẽmaãcü tá tüxna nanaxã ya wüxichigü.
Cristu rü Tupanaca̱x tüxü̃ nigagü
11 Toma rü aixcüma torü Corixü̃ tangechaxü̃ rü naga taxĩnüe. Rü ngẽmaca̱x norü orearü uwa tapuracüe rü tayaxucu̱xẽgü i duü̃xü̃gü nax yaxõgüãxü̃ca̱x. Rü nüma ya Tupana rü meama toxü̃ nacua̱x, rü chierüna pema rü ta toxü̃ pecua̱xgügux.
12 Rü tama tanaxwa̱xe i wenaxarü pepe̱xewa togüétüwa tidexagü, natürü pexü̃ tarüngü̃xẽẽchaü̃ nax pexü̃́ nangẽxmaxü̃ca̱x nax ta̱xacüca̱x tomaxã petaãẽgüxü̃ rü ngẽmaãcü penangãxü̃xü̃ i ngẽma duü̃xü̃gü i pepe̱xewa nügü írümegünetaxü̃ natürü norü maxü̃wa rü tama ixaixcümagüxü̃.
13 Rü woo duü̃xü̃gü toxü̃ daugügu nax Tupanagu taxãũãẽgüxü̃, rü nüetama nixĩ i ngẽma erü nümatama ya Tupana rü meama toxü̃ nacua̱x. Natürü i pema rü meama toxü̃ pecua̱x nax meama toõxẽxü̃ tacuáãcüma pemaxã nüxü̃ tixuxü̃ ga norü ore.
14 Rü Cristu ya poraãcü toxü̃ ngechaü̃cü nixĩ ya ñu̱xma tomaxã icuácü, erü tayaxõgü nax nüma rü guxãarü pecaduca̱x nayuxü̃ nax yexma nayuxü̃ca̱x ga nũxcümaxü̃xü̃ ga tacüma ga chixexü̃.
15 Rü yemaacü guxü̃ma ga duü̃xü̃güca̱x nayu ga Cristu, nax ngẽma duü̃xü̃gü i maxẽxü̃, rü tama nümatama nagu naxĩnüexü̃gu namaxẽxü̃ca̱x, natürü naxca̱x nax namaxẽxü̃ca̱x ya Cristu ya naxca̱x yucü rü wena írüdacü.
16 Rü ngẽmaca̱x i toma rü tama ñoma i naanecüã̱x i duü̃xü̃gü nagu rüxĩnüexü̃ãcü nixĩ i nagu tarüxĩnüexü̃. Rü woo ga ü̃pa rü duü̃xü̃gü nagu rüxĩnüexü̃ãcü chixri Cristumaxã nagu tarüxĩnüe, natürü i ñu̱xma rü tama ngẽmaãcü namaxã nagu tarüxĩnüe.
17 Rü ngẽxguma texé Cristuaxü̃́ yaxõ̱xgu, rü ngexwaca̱xü̃xü̃ i duü̃xü̃ tixĩ. Rü nũxcümaü̃xü̃ ga tümacüma rü marü tüxna inayarüxo, rü ngexwaca̱xü̃xü̃ i maxü̃ tüxü̃́ nangẽxma.
18 Rü guxü̃ma i ngẽma rü Tupana nixĩ ya naxücü rü Cristugagu nixĩ ga nügümaxã tüxü̃ iyanangüxmüexẽẽxü̃. Rü ñu̱xma rü toxü̃ namu nax duü̃xü̃gümaxã nüxü̃ tixuxü̃ nax nümagü rü ta Tupanamaxã inangüxmüẽxü̃ca̱x.
19 Yerü ga Tupana rü Cristugagu nügümaxã duü̃xü̃güxü̃ narüngüxmüexẽxẽ. Rü nüma rü tama duü̃xü̃güarü pecadugü naxĩnüãcüma nanaxü ga yema. Rü ñu̱xma rü toxü̃ namu nax ngẽmachigaxü̃ duü̃xü̃gümaxã tixuxü̃.
20 Rü ngẽmaãcü Cristuarü orearü ngeruü̃gü tixĩgü, rü towa nixĩ ya Tupana pexü̃ ca̱a̱xü̃xü̃ nax namaxã iperüngüxmüexü̃ca̱x. Rü ngẽmaca̱x Cristuégagu pexü̃ taca̱a̱xü̃gü nax Tupanamaxã iperüngüxmüexü̃ca̱x.
21 Cristu rü taguma pecadu naxü. Natürü tagagu nixĩ ga Tupana ga Cristuxü̃ naxütanüxẽẽãxü̃ i guxü̃ma i tórü pecadugü nax yemaacü nagagu tüxü̃ ínanguxü̃xẽẽxü̃ca̱x nawa i tórü pecadugü nax nape̱xewa imexü̃ca̱x ya Tupana.
