2 Corintios 6:1-18
6 Rü ñu̱xma nax Tupanaarü ngü̃xẽẽruü̃gü tixĩgüxü̃, rü pexü̃ taca̱a̱xü̃ nax tama nüxü̃ pexoexü̃ca̱x ga yema ngechaü̃ ga Tupana pexca̱x ixãxü̃.
2 Erü Tupana rü norü ore i ümatüxü̃wa, rü ñanagürü:“Yexguma meama yema ngunexü̃wa nanguxgu nax choxü̃ peyaxuxü̃, rü yexguma nixĩ ga pexü̃ chaxĩnüxü̃.Rü yexguma nawa nanguxgu nax pexna chaxãxü̃ i maxü̃ i taguma gúxü̃, rü yexguma nixĩ ga pexü̃ charüngü̃xẽẽxü̃”,
ñanagürü. Rü ñu̱xma nixĩ i namexü̃ nax Tupanaxü̃ peyaxuxü̃, rü ñu̱xma nixĩ i ngẽma ngunexü̃ i pexna naxuaxü̃ãxü̃ i maxü̃ i taguma gúxü̃.
3 Rü toma rü taguma texépe̱xewa chixri tamaxẽ nax taxuca̱xma texé chixri torü puracüchiga idexaxü̃ca̱x.
4 6:4-5 Rü guxü̃guma duü̃xü̃güxü̃ nüxü̃ tadauxẽxẽ nax aixcüma Tupanaarü duü̃xü̃gü tixĩgüxü̃. Rü ngẽmaca̱x yáxna namaxã taxĩnüe i ngẽxguma woo ngúxü̃ tingegügu, rüe̱xna ta̱xacü toxü̃́ taxu̱xgu, rüe̱xna ta̱xacürü guxchaxü̃ toxü̃́ ngẽxmagu, rüe̱xna toxü̃ yacua̱i̱xgügu, rüe̱xna toxü̃ napoxcuegu, rü ẽ̱xna tomaxã nanuegu nax toxü̃ nada̱i̱xü̃ca̱x. Rü poraãcü tapuracüe, rü ñuxguacü rü tama tapee, rü ñuxguacü rü taiya toxü̃́ nangu̱x. Natürü yáxna namaxã taxĩnüe i guxü̃ma i ngẽma.
5 Nüü̃ nadau 6:4
6 Rü ngẽxgumarüxü̃ ta duü̃xü̃güxü̃ nüxü̃ tadauxẽxẽ nax aixcüma mexü̃gu tarüxĩnüexü̃, rü mea nüxü̃ tacuáxü̃ i Tupanaarü ore i aixcüma ixĩxü̃, rü yáxna duü̃xü̃gümaxã taxĩnüexü̃, rü namaxã tamecümaxü̃. Rü duü̃xü̃güxü̃ nüxü̃ tadauxẽxẽ nax towa nangẽxmaxü̃ i Tupanaãxẽ ya Üünecü rü ngẽmaca̱x aixcüma guxü̃ i duü̃xü̃güxü̃ tangechaxü̃.
7 Rü duü̃xü̃güxü̃ nüxü̃ tadauxẽxẽ nax aixcüma mea namaxã nüxü̃ tixu i ngẽma ore i aixcüma ixĩxü̃, rü itanawe̱x i Tupanaarü pora i towa ngẽxmaxü̃. Rü ngẽma toxne ixĩxü̃, rü ngẽma nixĩ i torü maxü̃ i aixcüma mexü̃. Rü ngẽmamaxã nixĩ i togü ítapoxü̃xü̃ i torü uanügüpe̱xewa.
8 Rü duü̃xü̃gü rü ñuxguacü toxü̃ nicua̱xüü̃gü, rü ñuxguacü rü chixexü̃ tomaxã nixugüe. Rü ñuxguacü rü mea tochiga nidexagü, rü ñuxguacü rü chixri tochiga nidexagü. Rü ñoma dorata̱xáxü̃ toxü̃ nawogü, woo aixcüma yixĩxgu i ngẽma ore i nüxü̃ tixugüxü̃,
9 Rü ngẽma duü̃xü̃gü rü tama toxü̃ nacuáxü̃rüxü̃ tomaxã nixĩgü, woo nax meama toxü̃ nacua̱xgüchiréxü̃. Rü guxü̃guma ãũcümaxü̃wa tangexmagü, erü toxü̃ nadaixchaü̃, natürü naétüwa namaxẽama. Rü toxü̃ napoxcue, natürü tama toxü̃ nadaixichi.
10 Rü woo tangechaü̃gügu, natürü guxü̃guma tataãẽgü. Rü woo ñoma i naanewa tama tamuarü ngẽmaxü̃ã̱xgügu, natürü togagu muxü̃ma i duü̃xü̃gü nanayauxgü i maxü̃ i taguma gúxü̃. Rü woo taxuxü̃ma toxü̃́ nangẽxma i ñoma i naanewa, natürü aixcüma toxü̃́ nangẽxma i guxü̃ma.
11 Pa Chauenexẽgü Pa Coríntiucüã̱xgüx, ngẽma ore i pemaxã nüxü̃ tixuxü̃ rü aixcüma nixĩ. Rü toma rü aixcüma pexü̃ tangechaü̃gü i torü maxü̃newa.
12 Rü toma rü tama pexü̃ taxoe, natürü pemawaxi nixĩ i tama toxü̃ pengechaxü̃güxü̃.
13 Rü dücax, Pa Chauenexẽgüx, choma rü ñoma wüxi i papa naxacügüxü̃ ca̱a̱xü̃xü̃rüxü̃ pexü̃ chaca̱a̱xü̃ nax choxü̃ pengechaü̃güxü̃ca̱x ngẽma choma pexü̃ changechaü̃xü̃rüxü̃.
Tupana ya Maxü̃cüpata tixĩgü
14 ¡Rü taũtáma namaxã pexãmücü i ngẽma duü̃xü̃gü i tama yaxõgüxü̃! Erü ngẽxguma chi namaxã pexãmücügu rü taxũtáma mea wüxigu perüxĩnüe. ¿Rü ñuxãcü nawüxiguxü̃ i ngẽma mexü̃ namaxã i ngẽma chixexü̃? ¿Rü ñuxãcü nawüxiguxü̃ i ngóonexü̃ namaxã i ẽanexü̃?
15 ¿Rü ñuxãcü nawüxiguxü̃ ya Cristu namaxã i Chataná? ¿Rü ñuxãcü nawüxiguxü̃ i wüxi i duü̃xü̃ i yaxõxü̃ namaxã i wüxi i duü̃xü̃ i tama yaxõxü̃?
16 ¿Rü ñuxãcü Tupanapatawa nangẽxmaxü̃ i tupananetachicüna̱xãgü? Erü yixema rü Tupana ya Maxü̃cüpata tixĩgü, rü tawa namaxü̃ i nümax. Rü nümatama ya Tupana rü ñanagürü:“Ngẽma duü̃xü̃gütanüwa tá chamaxü̃, rü natanügu tá chayarüxũũxü̃.Rü norü Tupana tá chixĩ, rü nümagü rü tá chorü duü̃xü̃gü nixĩgü”,
ñanagürü.
17 Rü yemaca̱x ñanagürü ta ga tórü Cori:“¡Ípechoxü̃ i natanüwa i ngẽma duü̃xü̃gü i tama chorü duü̃xü̃gü ixĩgüxü̃!¡Rü taxṹ i nüxü̃ pingógüxü̃ i ngẽma chope̱xewa ãũãchixü̃!Rü choma rü tá pexü̃ chayaxu.
18 Rü choma rü Penatü tá chixĩ, rü pemax rü tá chaunegü rü chauxacügü pixĩgü”,
ñanagürü ya tórü Cori ya Tupana ya Guxü̃étüwa Ngẽxmacü.
