2 Crónicas 1:1-17
1 Tupana nüxü̃ narüngü̃xẽxẽ ga Charomóü̃ ga Dabí nane, rü yemaca̱x yexeraãcü niporachigü nax ãẽ̱xgacü yixĩxü̃.
2 Rü yexguma nüma ga Charomóü̃ rü naxca̱x nangema ga guxü̃ma ga Iraéanearü ãẽ̱xgacügü: rü yema churaragüerugü ga 1,000 ga churaragümaxã icua̱xgüxü̃, rü yema churaragüerugü ga 100 ga churaragümaxã icua̱xgüxü̃, rü guxü̃ma ga yema Iraétücumügüarü ãẽ̱xgacügü, rü yema ãẽ̱xgacügü ga natanüxü̃maxã icua̱xgüxü̃ ga Iraéanewa.
3 Rü yexguma marü yexma nangutaque̱xegügu ga yema ãẽ̱xgacügü, rü nüma ga Charomóü̃ rü namaxã Gabaóü̃wa naxũ, yerü yéma nayexma ga guma Tupanapata ga naxchirunaxca̱x ga nũxcüma Tupanaarü duü̃ ga Moiché chianexü̃gu naxüxü̃ne.
4 Natürü marü tama Gabaóü̃wa nayexma ga yema baú ga Tupanaarü mugü nagu nuxü̃, yerü nüma ga Dabí rü ü̃paacü marü Quiriáx-yearíü̃wa nayayaxu rü Yerucharéü̃wa nanange, rü nagu nayaxǘcuchi ga guma ĩpata ga naxchirunaxca̱x ga yema baúca̱x naxüxü̃ne.
5 Natürü Gabaóü̃watama nayexma ga yema ãmarearü guruxü̃ ga bróũchenaxca̱x ga naxüxü̃ ga Becharé ga Urí nane ga Úrutaxa ixĩcü. Rü yema ãmarearü guruxü̃ rü Cori ya Tupanapatape̱xewa nayexma ga Gabaóü̃wa. Rü nüma ga Charomóü̃ rü guxü̃ma ga yema duü̃xü̃gü ga íyaxümücügüxü̃ rü yéma naxĩ nax Tupanaarü ucu̱xẽca̱x íyacagüxü̃ca̱x.
6 Rü nüma ga Charomóü̃ rü naxca̱x nixũ ga yema ãmarearü guruxü̃ ga bróũchenaxca̱x ga Tupanapatape̱xewa yexmaxü̃. Rü yemawa ínanagu ga 1,000 ga ãmaregü ga naxü̃nagü ga Tupanaca̱x daixü̃.
7 Rü yematama chütaxü̃gu, rü nüma ga Tupana rü Charomóü̃ca̱x nango̱x rü ñanagürü nüxü̃: —¡Choxna naxca̱x naca i ngẽma cunaxwa̱xexü̃! Rü choma rü tá cuxna chanaxã —ñanagürü.
8 Rü nüma ga Charomóü̃ rü Tupanaxü̃ nangãxü̃ rü ñanagürü: —Cumax, Pa Tupanax, rü poraãcü chaunatü ga Dabí cuxü̃́ nangechaü̃tümüxü̃. Rü ñu̱xma rü chaunatüchicüxü ãẽ̱xgacüxü̃ choxü̃ quingucuchixẽxẽ.
9 Rü ñu̱xmax, Pa Cori Pa Tupanax ¡ẽcü yanguxẽxẽ ga yema chaunatü ga Dabímaxã nüxü̃ quixuxü̃ rü tá nüxü̃ curüngü̃xẽxẽ i nanegü rü nataagü! Erü ñu̱xma rü marü ãẽ̱xgacüxü̃ choxü̃ cuxuneta natanüwa i ngẽma muxũchixü̃ i curü duü̃xü̃gü i ñoma naxnecüte̱xerüxü̃ imuxü̃.
10 ¡Rü ẽcü choxna naxã i cua̱x nax chauãẽxü̃ chacuáxü̃ca̱x rü mea namaxã ichacuáxü̃ca̱x i ñaa curü duü̃xü̃gü i muxũchixü̃! ¿Erü texé tüxü̃́ natauxcha nax namaxã itacuáxü̃ i guxü̃ma i ñaa curü duü̃xü̃gü? —ñanagürü.
11 Rü nüma ga Tupana rü Charomóü̃xü̃ nangãxü̃ rü ñanagürü: —Ñu̱xma nax chauxü̃tawa naxca̱x ícuca̱xaxü̃ i cua̱x nax mea chorü duü̃xü̃gümaxã icucuáxü̃ca̱x, rü chataãxẽ erü tama naxca̱x ícuca nax cumuarü ngẽmaxü̃ã́xü̃ rüe̱xna cuxü̃ chatachigaxẽẽxü̃, rü tama naxca̱x ícuca nax chanadaixü̃ca̱x i curü uanügü, rü tama naxca̱x ícuca nax cumáarü maxü̃ã́xü̃ca̱x. Natürü ngẽma naxca̱x ícuca̱xaxü̃ nixĩ i cua̱x rü cuãẽxü̃ nax cucuáxü̃ nax ngẽmaãcü mea namaxã icucuáxü̃ca̱x i chorü duü̃xü̃gü i naxca̱x ãẽ̱xgacüxü̃ cuxü̃ chingucuchixẽẽxü̃.
12 Rü ñu̱xma rü cuxna chanaxã i cua̱x nax mea cuãẽxü̃ cucuáxü̃ca̱x. Natürü naétü cuxna chanaxã i diẽru rü ngẽmaxü̃gü rü yema nüxíraxü̃güxü̃ ga ãẽ̱xgacügüarü yexera cuxü̃ chatachigaxẽxẽ. Rü ngẽma cuwena ãẽ̱xgacügü ixĩgüxü̃ rü taxũtáma ngẽxgumarüxü̃ chanatachigaxẽxẽ —ñanagürü ga Tupana.
13 Rü yemawena rü nüma ga Charomóü̃ rü nataegu nawa ga guma Tupanapata ga Gabaóü̃wa yexmane. Rü Yerucharéü̃wa naxũ rü yéma Iraéanearü ãẽ̱xgacü nixĩ.
Charomóü̃ rü carugü ga dairuxü̃maxã rü cowarugümaxã nataxe
14 Charomóü̃ rü nananutaque̱xe ga caru ga dairuü̃wexü̃ rü churaragü ga cowarugu ĩxü̃. Rü nüxü̃́ nayexma ga 1,400 ga carugü rü 12,000 ga churaragü ga cowarugu ĩxü̃. Rü gumá carugü ga dairuü̃gü rü yema churaragü ga cowarugu ĩxü̃, rü ñuxre ga ĩanegü ga churaragü nawa yexmagünegu nayanu, rü naigü rü churaragü ga ãẽ̱xgacüna daugüxü̃xü̃ nayanu ga Yerucharéü̃wa.
15 Rü nüma ga ãẽ̱xgacü rü Yerucharéü̃gu nananutaque̱xe ga muxũchixü̃ ga diẽrumü rü úiru ga ñoma nutagürüxü̃ muxũchixü̃. Rü gumá ocayiwa rü namuxũchi ñoma igunecügü ga metachinüanexü̃wa rüxügüxü̃rüxü̃.
16 Rü yema Charomóü̃arü cowarugü rü Equítuanewa rü Chiríchiaanewa nixĩ ga naxca̱x nataxexü̃ ga Charomóü̃arü taxetanüxü̃.
17 Rü wüxi ga caru ga Equítuanecüã̱x rü 600 ga diẽrutachinü naxãtanü. Rü wüxi ga cowaru rü 150 tachinü ga diẽru naxãtanü. Rü guxü̃ma ga yema Itítanüxü̃arü ãẽ̱xgacügü rü Chíriaanearü ãẽ̱xgacügü rü yema Charumóü̃arü taxetanüxü̃xü̃tawa nixĩ ga naxca̱x nataxegüxü̃ ga carugü rü cowarugü.
