2 Crónicas 10:1-19
10 Rü nüma ga Charomóü̃ nane ga Roboáü̃ rü ĩane ga Chiquéü̃wa naxũ yerü guxü̃ma ga Iraéanecüã̱xgü yéma naxĩ nax yéma ãẽ̱xgacüxü̃ yangucuchixẽẽgüãxü̃ca̱x.
2 Natürü Nabáx nane ga Yeruboáü̃ ga ü̃pa Charomóü̃cha̱xwa Equítuanewa ñaxü̃, rü nüxü̃ nacuáchiga nax ãẽ̱xgacüxü̃ yangucuchixü̃ ga Roboáü̃, rü yemaca̱x nataegu ga Equítuanewa.
3 Rü natanüxü̃ rü Yeruboáü̃ca̱x nangemagü rü Iraéaneca̱x nataegu. Rü nüma ga Yeruboáü̃ rü guxü̃ma ga yema Iraétanüxü̃ ga nórtecüã̱xmaxã rü ãẽ̱xgacü ga Roboáü̃xü̃tawa naxĩ nax namaxã yadexagüxü̃ca̱x. Rü ñanagürügü nüxü̃:
4 —Gumá cunatü ga Charomóü̃ rü poraãcü toxü̃ napuracüexẽxẽ rü taxü̃ ga diẽru toxü̃tawa nayaxu. Rü ñu̱xma i cuma rü tama tanaxwa̱xe i cunatürüxü̃ quixĩ. Rü tanaxwa̱xe i toxü̃́ ícunaxĩxẽẽxü̃ i ngẽma. Rü ngẽxguma tomaxã cumecümagu rü toxü̃́ ícunaxĩxẽẽgu rü mea tomaxã icucua̱xgu, rü tá cuga taxĩnüe rü cuxü̃́ tapuracüe —ñanagürügü.
5 Rü nüma ga Roboáü̃ nanangãxü̃ rü ñanagürü: —¡Ípixĩ rü tomaepü̱x i ngunexü̃wena nua pexĩ! —ñanagürü. Rü nüma ga duü̃xü̃gü rü nawoegu.
6 Rü yexgumayane ga nüma ga ãẽ̱xgacü ga Roboáü̃ rü naxca̱x nangema ga yema ucu̱xẽruü̃gü ga nanatü ga Charomóü̃axü̃́ puracüexü̃ ga yexguma namaxü̱̃xgux. Rü nüxna naca rü ñanagürü: —¿Ta̱xacümaxã i choxü̃ pixucu̱xẽxü̃ i pemax, rü ñuxãcü tá ichanangãxü̃gagüxü̃ i ngẽma duü̃xü̃gü? —ñanagürü.
7 Rü nümagü rü nanangãxü̃gü rü nüxü̃ ñanagürügü: —Ngẽxguma chi mea quixĩxgu namaxã i ngẽma duü̃xü̃gü rü mexü̃ i dexamaxã cunangãxü̃gu, rü nümagü rü guxü̃gutáma cuxü̃́ napuracüe —ñanagürügü.
8 Natürü nüma ga Roboáü̃ rü tama yema nanatüarü ucu̱xẽruü̃güaxü̃́ inaxĩnü. Rü naxca̱x nangema ga yema namücügü ga wüxigu namaxã yaexü̃ rü nüxü̃́ puracüexü̃.
9 Rü nüxna naca rü ñanagürü: —¿Ta̱xacümaxã i choxü̃ pixucu̱xẽxü̃ i pemax? ¿Rü ñuxãcü tá ichanangãxü̃gagüxü̃ i ngẽma duü̃xü̃gü i choxna cagüxü̃ nax namaxã íchanaxĩxẽẽxü̃ca̱x i ngẽma diẽru i natanüwa chayaxuxü̃ rü tama chaunatürüxü̃ poraãcü taxü̃ i diẽru natanüwa chayaxuxü̃ca̱x? —ñanagürü.
10 Rü nümagü ga yema namücügü ga namaxã wüxigu yaexü̃ rü nanangãxü̃gü rü ñanagürügü: —Ngẽma duü̃xü̃gü i cuxna cagüxü̃ nax tama cunatürüxü̃ taxü̃ i diẽru natanüwa cuyaxuxü̃ca̱x rü ñaãcü tá cunangãxü̃xü̃: “Gumá chaunatü rü poraãcü pexü̃ namu natürü i choma rü tá norü yexera poraãcü pexü̃ chamu.
11 Rü aixcüma nixĩ ga chaunatü rü poraãcü taxü̃ ga diẽru petanüwa nayaxuxü̃, natürü i choma rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, natürü i choma rü tá cua̱i̱xruü̃gü i fierumaxã ãpe̱xexü̃maxã tá pexü̃ chicua̱i̱xgü” —ñanagürügü nüxü̃.
12 Rü yema ãẽ̱xgacü ga Roboáü̃ nüxü̃ ixuxü̃rüxü̃, rü tomaepü̱x ga ngunexü̃ ngupetüguwena rü wenaxarü Roboáü̃ca̱x nataegu ga Yeruboáü̃ namaxã ga guxü̃ma ga norü duü̃xü̃gü.
13 Natürü ga nüma ga ãẽ̱xgacü ga Roboáü̃ rü nanuãcüma nanangãxü̃. Rü tama naga naxĩnü ga yema nanatüarü ucu̱xẽruü̃gü ga yaexü̃.
14 Rü duü̃xü̃gümaxã nüxü̃ nixu ga yema ore ga namücügü ga namaxã wüxigu yaexü̃ nüxü̃ ixugüxü̃, rü ñanagürü: —Aixcüma nixĩ ga chaunatü rü poraãcü pexü̃ napuracüexẽxẽ rü taxü̃ ga diẽru petanüwa nayaxuxü̃, natürü i choma rü tá yexeraãcü pexü̃ chapuracüexẽxẽ rü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, natürü i choma rü tá cua̱i̱xruxü̃ i fierumaxã ãpe̱xexü̃maxã pexü̃ chicua̱i̱xgü —ñanagürü.
15 Rü yemaacü ga nüma ga ãẽ̱xgacü ga Roboáü̃ rü tama yema duü̃xü̃güga naxĩnü yerü ga Cori ya Tupana rü woetama yemaacü nanaxuegu nax yanguxü̃ca̱x ga norü ore ga Nabáx nane ga Yeruboáü̃maxã nüxü̃ yaxuxü̃ naã̱xwa ga norü orearü ngeruxü̃ ga Aía ga Chilócüã̱x.
16 10:16-17 Rü yexguma yema Iraétanüxü̃ nüxü̃ icua̱xãchitanügu nax nüma ga ãẽ̱xgacü rü tama naya̱u̱xãxü̃ ga yema naxca̱x ínacagüxü̃, rü inanaxügüe nax yaxáichaxü̃ rü ñanagürügü: —Taxuwama tüxü̃́ name i Ichaxí nane ya Dabítanüxü̃ erü nataxuma i ta̱xacü i tüxna naxãgü. ¡Ngĩxã tachiü̃ca̱x tawoegu! ¡Rü Roboáü̃ rü Dabítanüxü̃arü ãẽ̱xgacü yixĩ! —ñanagürügü. Rü yexguma ga guxü̃ma ga yema Iraétanüxü̃ rü napataca̱x nawoegu. Natürü yema Iraétanüxü̃ ga Yudáanearü ĩanegügu ãchiü̃güxü̃ rü Roboáü̃tama nixĩ ga norü ãẽ̱xgacü.
17 Nüü̃ nadau 10:16
18 Rü nüma ga ãẽ̱xgacü ga Roboáü̃ rü nanamu ga norü ngü̃xẽẽruxü̃ ga Aduráü̃ ga norü puracümaxã icuácü. Rü namaxã nüxü̃ nixu nax norü puracüca̱x nangutaque̱xexẽẽãxü̃ca̱x ga yema Iraétanüxü̃ ga nórtecüã̱x ga tama naga ĩnüechaü̃xü̃. Natürü nüma ga yema duü̃xü̃gü rü nanueama rü nutamaxã Adoráü̃xü̃ nima̱xgü. Rü yexguma yemaxü̃ nacua̱xgu ga ãẽ̱xgacü ga Roboáü̃ rü paxa naweü̃ ga cowaru itúchigünegu nixüe rü Yerucharéü̃wa naña.
19 Rü yemaacü ga yema nórtecüã̱x ga Iraétanüxü̃ rü Roboáü̃maxã nanue rü guxü̃ma ga Dabítanüxü̃maxã nanue. Rü ñu̱xma rü ta ngẽmaãcü nixĩ.
