2 Crónicas 11:1-23
11 Rü yexguma Yerucharéü̃wa nanguxgu ga Roboáü̃ rü nayadexechi ga 180,000 ga churaragü ga Yudátanüxü̃ rü Bẽyamíü̃tanüxü̃ ixĩgüxü̃. Rü yexma nanaxĩtaque̱xexẽxẽ nax yema nórtecüã̱x ga Iraétanüxü̃maxã nügü nada̱i̱xü̃ca̱x nax wena naxme̱xwa nayexmagüxü̃ca̱x ga yema duü̃xü̃gü.
2 Natürü nüma ga Cori ya Tupana rü norü duü̃ ga Chemaíamaxã nidexa rü ñanagürü:
3 11:3-4 —¡Namaxã nüxü̃ ixu i Roboáü̃ i Charomóü̃ nane rü guxü̃ma i Yudátanüxü̃ rü Bẽyamíü̃tanüxü̃, rü tama chanaxwa̱xe nax nügüenexẽgümaxãtama nügü nada̱i̱xü̃! ¡Rü namaxã nüxü̃ ixu rü napataca̱x nawoegu i guxü̃ma erü chorü mu nixĩ! —ñanagürü. Rü yexguma yemaxü̃ naxĩnüegu rü napataca̱x nawoegu ga guxü̃ma. Rü yemaacü tama Yeruboáü̃maxã nügü nadai.
4 Nüü̃ nadau 11:3
Roboáü̃ rü ínayapoxegugü ga Yudáarü ĩanegü
5 11:5-6 Rü yexguma nüma ga Roboáü̃ rü Yerucharéü̃wa nayexma. Rü ínayapoxegugü ga ñuxre ga Yudáanearü ĩanegü. Rü yemaacü ínayapoxegugü ga ĩanegü ga Beréü̃, rü Etáü̃, rü Tecóa,
6 Nüü̃ nadau 11:5
7 11:7-10 rü Bex-chú, rü Chocó, rü Aduráü̃, rü Gáx, rü Marechá, rü Chíx, rü Adoraíü̃, rü Láqui, rü Achecá, rü Chorá, rü Ayaróü̃, rü Ebróü̃. Rü gumagü nixĩ ga Yudátanüxü̃ rü Bẽyamíü̃tanüxü̃arü ĩanegü ga íyapoxegugüne.
8 Nüü̃ nadau 11:7
9 Nüü̃ nadau 11:7
10 Nüü̃ nadau 11:7
11 Rü wüxichigü ga guma ĩanegüwa nanamexẽxẽ ga naxtapü̱xgü rü yéma nanamugü ga churaragüerugü nax nüxna nadaugüxü̃ca̱x. Rü yéma nanamugü ga nawemügü rü chíxü̃gü rü bínugü.
12 Rü guxü̃nema ga guma ĩanegü rü nayaxüxne namaxã ga wocaegü rü poxü̃ruü̃gü. Rü yemaacü meama nanaporaxẽxẽ ga guma ĩanegü. Rü yemaacü ga Roboáü̃ rü nügüme̱xẽwa nanayexmagüxẽxẽ ga Yudátanüxü̃ rü Bẽyamíü̃tanüxü̃.
Roboáü̃wa naxügü ga chacherdótegü rü Lebítanüxü̃
13 Rü yema chacherdótegü rü Lebítanüxü̃ rü guxü̃ma ga Iraéanewa ne naxĩ nax Roboáü̃wa naxügüxü̃ca̱x.
14 Rü yema Lebítanüxü̃ rü naxĩgü rü yéma nanawogü ga norü carnérugüchitaxü̃gü rü togü ga norü yemaxü̃gü nax Yerucharéü̃wa rü naigü ga Yudáanearü ĩanegüwa naxĩxü̃ca̱x. Yerü nüma ga Yeruboáü̃ rü natanüxü̃ rü tama nanaxwa̱xegü nax yéma nórtewa Tupanaarü puracü naxügüxü̃ ga yema chacherdótegü.
15 Rü yemaca̱x ga nüma ga Yeruboáü̃ rü nüxü̃ naxuneta ga to ga chacherdótegü nax namaxã inacua̱xgüxü̃ca̱x ga ãmarearü guruü̃gü nax norü tupananetachicüna̱xãgüxü̃ nawa yacua̱xüü̃güxü̃ca̱x. Rü nüma ga Yeruboáü̃ nanamu ga yema chacherdótegü nax namaxã inacua̱xgüxü̃ca̱x ga yema ngutaque̱xegü ga nawa nüxü̃ yacua̱xüü̃güxü̃ ga yema chíbuchicüna̱xãgü rü yema wocachicüna̱xãgü ga nüma ga Yeruboáü̃ duü̃xü̃güxü̃ íxüxüxẽẽxü̃.
16 Natürü yema Iraétanüxü̃ ga nórtecüã̱x ga aixcüma Cori ya Iraétanüxü̃arü Tupanaca̱x maxẽchaü̃xü̃ rü nüxü̃ nayadauxü̃gü ga yema chacherdótegü rü Lebítanüxü̃ rü Yerucharéü̃wa naxĩ nax yéma norü o̱xigüarü Tupanaca̱x ãmare íyagugüxü̃ca̱x.
17 Rü yemaacü ga yema duü̃xü̃gü rü tomaepü̱x ga taunecü Yudáanexü̃ naporaxẽẽgü rü Roboáü̃ ga Charomóü̃ nanexü̃ narüngü̃xẽẽgü. Rü yemaacü tomaepü̱x ga taunecüxica nagu naxĩ ga yema mexü̃ ga nacüma ga Dabí rü Charomóü̃ nagu ĩxü̃.
Roboáü̃ naxma̱xgü rü naxacügüchiga
18 Rü nüma ga Roboáü̃ rü Maaráx ga Yerimóxacümaxã naxãxma̱x. Rü nüma ga Yerimóx rü Dabí nane nixĩ. Rü naé rü Abiái ga Eriáxacü iyixĩ. Rü ngĩrü o̱xi nixĩ ga Ichaxí.
19 Rü nüma ga Roboáü̃ rü nüxü̃́ nayexma ga tomaepü̱x ga nanegü ga Maaráxwáü̃güxü̃. Rü ñagü nixĩ ga yemagü: Yeú rü Chemaría rü Cháaü̃.
20 Rü yemawena rü ngĩmaxã naxãxma̱x ga Maacá ga Acharóü̃xacü. Rü yema naxma̱x ga Maacáwa rü ãgümücü nixĩ ga nanegü: Abiáü̃ rü Atái rü Chichá rü Cheromíx.
21 Rü nüma ga Roboáü̃ rü 18 iyixĩ ga naxma̱xgü. Rü 60 iyixĩ ga naxma̱xabagü. Natürü nüma rü yema naigüarü yexera Maacá ga Acharóü̃xacüxü̃ nangechaxü̃. Rü 28 nixĩ ga nanegü rü 60 ga naxacügü.
22 Rü nüma rü nüxü̃ naxuneta ga nane ga Abiáü̃ ga Maacáwáü̃cü nax naenexẽgümaxã inacuáxü̃ca̱x. Yerü ãẽ̱xgacüwa nananguxẽẽchaü̃.
23 Rü nüma ga Roboáü̃ rü wüxi ga yatü ga naãẽxü̃ cuáxü̃ nixĩ. Rü yemaca̱x naigü ga ĩanegüwa nanamugü ga yema togü ga nanegü ga Yudáanewa rü Bẽyamíü̃anewa. Rü ñu̱xũchi yema nanegüxü̃ naxuneta nax nümagü namaxã inacua̱xgüxü̃ca̱x ga guma ĩanegü ga íyapoxegugüne. Rü nüxna nanana ga muxü̃ma ga nawemügü rü nüxna ngĩxü̃ namugü ga mucüma ga naxma̱xgü.
