2 Crónicas 12:1-16
12 Rü yexguma marü mea íyaxũxgu nax ãẽ̱xgacü yixĩxü̃ ga Roboáü̃ rü nügü nacua̱xgu nax naporaxü̃ rü nügümaxãtama inacuáxchaü̃ rü nüxü̃ narüxo nax Cori ya Tupanaarü mugügu yaxũxü̃. Rü guxü̃ma ga yema Iraétanüxü̃ rü ta yematama naxügü.
2 12:2-3 Rü yema nax tama Cori ya Tupanaga naxĩnüexü̃gagu rü norü wüxime̱e̱xpü̱x ga taunecü nax ãẽ̱xgacü yixĩxü̃ ga Roboáü̃, rü Chicháx ga Equítuanearü ãẽ̱xgacü rü Yerucharéü̃ca̱x ínayagoõchi namaxã ga 1,200 ga norü carugü ga dairuü̃gü rü ñu̱xũchi 60,000 ga norü churaragü ga cowarugu ĩxü̃ rü muxü̃ma ga churaragü ga Equítuanecüã̱x rü Líbiaanecüã̱x, rü Chuquiénucüã̱x rü Etiopíaanecüã̱x.
3 Nüü̃ nadau 12:2
4 Rü guma Yudáanearü ĩanegü ga meama ípoxegugüne rü nanapuxü̃, rü ñu̱xmata Yerucharéü̃wa nangu.
5 Rü yemaca̱x Tupanaarü orearü uruxü̃ ga Chemaía rü Roboáü̃xü̃tawa naxũ ga ngextá Yudáanearü ãẽ̱xgacügümaxã ínangutaque̱xexü̃wa ga Yerucharéü̃wa, yerü Equítuanearü ãẽ̱xgacü ga Chicháx rü marü ningaica. Rü nüma ga Chemaía rü ñanagürü nüxü̃: —Cori ya Tupana rü ñanagürü: “Pemax rü marü choxna pixĩgachitanü, rü ngẽmaca̱x i choma rü pexna chixũgachi i ñu̱xma nax Chíchame̱xẽgu peyixü̃ca̱x” —ñanagürü.
6 Rü yexguma ga Roboáü̃ rü ñu̱xũchi yema Iraéanemaxã icua̱xgüxü̃ ga ãẽ̱xgacügü rü nüxü̃ nicua̱xãchitanü nax aixcüma chixexü̃ inaxügüxü̃ rü ñanagürügü: —Tagagu nixĩ ya Cori ya Tupana tüxna naxũgachixü̃ —ñanagürügü.
7 Rü Cori ya Tupana rü nüxü̃ nadau nax nape̱xewa nügü inaxixragüxü̃, rü yemaca̱x Chemaíamaxã ñanagürü: —Ngẽma nax chope̱xewa nügü inaxíragüxü̃ca̱x, rü taxũtáma chanadai. Rü paxa tá nawa íchananguxü̃xẽxẽ i ngẽma ãũcümaxü̃. Rü marü taxũtáma Chicháxü̃ chamu nax Yerucharéü̃étügu nanguxü̃ca̱x i chorü nu.
8 Natürü Chíchame̱xẽwa tá pexü̃ changexmagüxẽxẽ nax ngẽmaãcü nüxü̃ pecuáxü̃ca̱x rü ngẽxguma to i nachixü̃anearü ãẽ̱xgacüme̱xẽwa pengẽxmagügu rü tama cho̱xme̱xwa pengexmagügurüxü̃ nixĩ —ñanagürü ga Tupana.
9 Rü nüma ga Chicháx ga Equítuanearü ãẽ̱xgacü rü Yerucharéü̃gu naxücu rü nanade ga Tupanapata ga taxü̃nearü yemaxü̃gü rü ãẽ̱xgacüpataarü yexmagüxü̃ ga imexẽchixü̃. Rü guxü̃ma nade rü nayana. Rü yema poxü̃ruü̃gü ga úirunaxca̱x ga Charomóü̃ íxüxü̃xü̃ rü ta nayana.
10 Rü yema poxü̃ruü̃gü ga úirunaxca̱x ga Chicháx inaxü̃ rü yemachicüxü rü nüma ga ãẽ̱xgacü ga Roboáü̃ rü poxü̃ruü̃gü ga bróũchenaxca̱x inaxüxü̃. Rü yema poxü̃ruü̃gü ga bróũchenaxca̱x rü yema churaragü ga ãẽ̱xgacüpataarü ĩã̱xna daxugüxü̃na nüxü̃ nadauxẽxẽ.
11 Rü guxü̃guma ga yexguma Tupanapata ga taxü̃newa naxũxgu ga ãẽ̱xgacü ga Roboáü̃ rü yema churaragü ga norü dauruü̃gü rü nawe narüxĩ rü ínayana ga yema poxü̃ruü̃gü. Rü yexguma ínanguxü̃güxü̃gu rü churarapatagu nayanuuxü̃ ga yema poxü̃ruü̃gü.
12 Rü yema nax Tupanape̱xegu nügü inaxíxraxü̃ ga Roboáü̃ rü yemaca̱x Cori ya Tupana rü namaxã narüngüxmü ga nax nanuxü̃. Rü yemaca̱x tama nayu, rü Yudáanewa rü meaü̃ra nixũ.
13 Rü Roboáü̃ rü yexeraãcü napora nax ãẽ̱xgacü yixĩxü̃ ga Yerucharéü̃wa. Rü yexguma inaxügüãgu nax ãẽ̱xgacü yixĩxü̃ ga Yerucharéü̃wa rü nüma ga Roboáü̃ rü nüxü̃́ nayexma ga 41 ga taunecü. Rü 17 ga taunecü nixĩ ga Yerucharéü̃wa ãẽ̱xgacü yixĩxü̃. Rü guma ĩane nixĩ ga Cori ya Tupana nüxü̃ unetane natanüwa ga naigü ga Iraétanüxü̃arü ĩane nax napata nawa yexmaxü̃ca̱x. Rü Roboáü̃ naé rü Naamá nixĩ ga ngĩéga. Rü ngĩma rü Amóü̃tanüxü̃ iyixĩ.
14 Natürü yema nacüma ga nüma ga Roboáü̃ rü nachixe, yerü tama aixcüma Tupanaga naxĩnü.
15 Rü guxü̃ma ga ãẽ̱xgacü ga Roboáü̃chiga rü noxri yangucuchigucürüwa rü ñu̱xmata nayu̱x, rü nagu naxümatü ga yema popera ga yema popera ga Tupanaarü orearü uruxü̃ ga Chemaía ümatüxü̃ rü yema popera ga Tupanaarü orearü uruxü̃ ga Idú ümatüxü̃. Rü yexgumarüxü̃ ta natanüxü̃arü poperagu naxümatü ga Roboáü̃chiga. Rü yexguma ãẽ̱xgacü yixĩxgu rü guxü̃guma Yeruboáü̃maxã nügü nadaiecha.
16 Rü yexguma nayu̱xgu ga Roboáü̃, rü Dabíarü Ĩanegu nanata̱xgü. Rü nawena rü nane ga Abiáü̃ ningucuchi nax ãẽ̱xgacü iyixĩxü̃.
