2 Crónicas 13:1-22
13 Rü Abiáü̃ inanaxügü ga ãẽ̱xgacü nax yixĩxü̃ ga Yudáanewa ga yexguma Yeruboáü̃ ga Nabáx nane marü 18 ga taunecü ãẽ̱xgacü yixĩxgu ga Iraéane ga nórtewa.
2 Rü tomaepü̱x ga taunecü nixĩ ga Yerucharéü̃wa ãẽ̱xgacü nax yixĩxü̃. Rü yema naé rü Micaía iyixĩ ga ngĩéga. Rü Urié ga Guibeácüã̱x nixĩ ga ngĩnatü. Rü yexguma Abiáü̃ ãẽ̱xgacü yixĩxgu, rü Yeruboáü̃maxã nügü nadai.
3 Rü nüma ga Abiáü̃ rü yema daica̱x nayadexechi ga 400,000 ga norü churaragü. Rü nüma ga Yeruboáü̃ rü nayadexechi ga 800,000 ga norü churaragü.
4 Rü yexguma guma Efraíü̃arü mápü̱xanexü̃wa yexmane ga ma̱xpǘne ga Chemaraíü̃wa nanguxgu ga Abiáü̃ rü naxĩnagü nagu ga guma ma̱xpǘne rü tagaãcü ñanagürü: —Pa Yeruboáü̃x rü Guxü̃ma i Iraétanüxü̃ ¡rü choxü̃ iperüxĩnüe!
5 ¿Rü tama ẽ̱xna nüxü̃ pecua̱x nax Cori ya Iraétanüxü̃arü Tupana rü Dabímaxã rü nataagümaxã naxueguãxü̃ nax nüma tá guxü̃guma Iraéanearü ãẽ̱xgacügü yixĩgüxü̃ca̱x?
6 Natürü Charomóü̃arü ngü̃xẽẽruxü̃ ga Yeruboáü̃ ga Nabáx nane, rü norü ãẽ̱xgacü ga Dabí nane ga Charomóü̃maxã nanu.
7 Rü Yeruboáü̃wa naxügü ga ñuxre ga yatügü ga naxĩpetüanemarexü̃ rü naechitamare maxẽxü̃. Rü nümagü rü tama Charomóü̃ nane ga Roboáü̃ga naxĩnüe. Rü nüma ga Roboáü̃ rü nangextü̱xüchi rü tama poraãcü cua̱x nüxü̃́ nayexma nax ãẽ̱xgacü yixĩxü̃, rü yemaca̱x ga Yeruboáü̃ rü tama Roboáü̃ga naxĩnü.
8 Natürü ñu̱xma i pema rü tama naga pexĩnüechaü̃ ga yema Tupana Dabímaxã ueguxü̃ nataagüca̱x, erü pema rü pimu rü pexü̃́ nangẽxma i ngẽma wocaxacüchicüna̱xãgü ga Yeruboáü̃ pexca̱x üxü̃ nax yemamaxã petupanaã̱xgüxü̃ca̱x.
9 ¿Rü tama ẽ̱xna aixcüma yixĩxü̃ nax pema rü ípenawoxü̃xü̃ ga yema Cori ya Tupanaarü chacherdótegü ga Aróü̃taagü, rü yema Lebítanüxü̃ nax pema rü penamucuxü̃ca̱x ga perütama chacherdótegü ngẽma togü ga nachixü̃anegü i tama Tupanaxü̃ cuáxü̃ naxügüxü̃rüxü̃? Rü ngẽmaca̱x i ñu̱xma i pema rü chacherdóteca̱x tüxü̃ pexuneta ya ngexerüxüxemare ya duü̃xẽ ya nua nagaxe i wüxi i wocaxacü rü 7 i carnérugü nax ãmare naxca̱x tiguxü̃ca̱x i ngẽma tupananetagü i tama aixcüma Tupana ixĩgüxü̃.
10 Natürü toxca̱x rü yima Cori ya Tupana nixĩ i aixcüma torü Tupana ixĩcü, rü taguma nüxna tixĩgachitanü. Rü ngẽma chacherdótegü i Cori ya Tupanape̱xewa ngẽxmagüxü̃ rü Aróü̃taagü nixĩ, rü ngẽma Tupanapataarü puracügümaxã icua̱xgüxü̃ rü Lebítanüxü̃ nixĩ.
11 Rü ngẽmagü nixĩ i ẽxü̃wa rü yáuanecü Cori ya Tupanaca̱x ínaguxü̃ i ãmaregü rü pumaragü i iyixichixü̃. Rü ngẽmagü nixĩ i mechawa mea yanuxü̃ i ngẽma paũgü i üünexü̃. Rü ngẽmagü nixĩ i guxü̃ma i yáuanecü nawa nanangixichigü i ngẽma omügü i úirumaxã ãxpaweruxü̃. Rü ngẽmaãcü i toma rü aixcüma tayanguxẽxẽ i Cori ya Tupanaarü mugü. Natürü i pema rü marü nüxna pixĩgachi.
12 ¡Rü nagu perüxĩnüe rü tope̱xewa nangẽxmaxü̃ ya Cori ya Tupana! Rü ñu̱xũchi norü chacherdótegü rü marü ínamemaregü nax yacuegüãxü̃ca̱x ya norü cornétagü nax ngẽmaãcü inaxügüxü̃ca̱x nax pemaxã togü tadaixü̃. Rü ngẽmaca̱x, Pa Iraétanüxü̃x, ¡rü taxṹ i namaxã pegü pedaixü̃ ya yima Cori ya nũxcümaü̃güxü̃ i perü o̱xigüarü Tupana ixĩcü! Erü taxũtáma nüxü̃ perüyexeramae —ñanagürü ga Abiáü̃.
13 Rü nüma ga Yeruboáü̃ rü ñuxre ga norü churaragüxü̃ namu nax Yudáarü churaragüweama ne naxĩxü̃ca̱x nax nügü namaxã nada̱i̱xü̃ca̱x. Rü nanamu ga yema rümumaexü̃ ga norü churaragü nax yema Yudáarü churaragüpe̱xewaama ne naxĩxü̃ nax namaxã nügü nada̱i̱xü̃ca̱x, rü yoxni ga yema naweama yexmagüxü̃ rü ta namaxã nügü nadai.
14 Rü yexguma nügü íyadaugügu ga yema Yudáarü churaragü rü nüxü̃ nicua̱xãchitanü nax nape̱xewaama rü naweama ne naxĩxü̃. Rü yexguma ga yema Yudáarü churaragü rü Cori ya Tupanana ngü̃xẽẽca̱x nacagü. Rü yema chacherdótegü rü nayacuegü ga norü cornétagü.
15 Rü yexguma yema Yudáanearü churaragü tagaãcü dai naxunagügu, rü Tupana rü Yeruboáü̃xü̃ rü guxü̃ma ga yema Iraéanecüã̱xgüxü̃ nibuxmüxẽxẽ nape̱xewa ga Abiáü̃arü churaragü ga Yudáanecüã̱xgü.
16 Rü yemaacü ga yema Iraéanecüã̱xgü rü Yudáanearü churaragücha̱xwa nibuxmü, yerü ga Tupana rü Yudáanecüã̱xme̱xẽgu nanayixẽxẽ.
17 Rü nüma ga Abiáü̃ rü yema norü churaragü rü muxü̃ma yexma nadai. Rü yexma nayue ga 500,000 ga Iraéanearü churaragü ga yadexechixü̃.
18 Rü yemaacü ga yema ngunexü̃gügu ga Iraéanecüã̱x rü narümaachitanü, natürü ga yema Yudáanearü churaragü rü nügü ínarüporagü, yerü nüxü̃́ nayaxõgü ga Cori ga norü o̱xigüarü Tupana.
19 Rü nüma ga Abiáü̃ rü Yeruboáü̃we nangẽ rü nüxna nanapuxü̃ ga ĩanegü ga Beté, rü Yechaná, rü Efraíü̃ namaxã ga norü ĩanexacügü.
20 Rü nüma ga Yeruboáü̃ rü taguma wena napora ga yexguma Abiáü̃ maxü̃gu. Rü nüma ga Cori ya Tupana rü düxwa Yeruboáü̃xü̃ nida̱xawexẽxẽ, rü nayu.
21 Rü yemaacü ga Abiáü̃ rü yexera niporachigü. Rü 14 ga naxma̱x nüxü̃́ iyexma, rü 22 nixĩ ga nanegü, rü 16 ga naxacügü ga ingexü̃.
22 Rü ngẽma to ga nachiga ga Abiáü̃ rü guxü̃ma ga yema naxüxü̃ ga yexguma namaxü̃gu, rü ngẽma popera ga Tupanaarü orearü uruxü̃ ga Idú ümatüxü̃gu nixĩ i naxümatüxü̃.
