2 Crónicas 14:1-15
14 Rü yexguma nayu̱xgu ga Abiáü̃ rü Dabíarü Ĩanegu nanata̱xgü. Rü nawena rü nane ga Achá nixĩ ga ãẽ̱xgacü ixĩcü. Rü yexguma ãẽ̱xgacü yixĩxgu rü 10 ga taunecü taãẽwa nayexma ga nachixü̃ane rü taguma norü uanügümaxã nügü nadai.
2 Rü nüma ga Achá rü Tupanaga naxĩnü rü norü Cori ga Tupanape̱xewa mexü̃ naxü.
3 Rü nayanaxoxẽẽgü ga yema tupananetagüarü ãmarearü guruü̃gü. Rü yexgumarüxü̃ ta nagu napogüe ga guma ĩpatagü ga nawa duü̃xü̃gü tupananetagüxü̃ icua̱xüü̃güne ga ma̱xpǘnegüwa. Rü nagu napogüe ga guma nutagü ga duü̃xü̃gü namaxã tupanaã̱xgücü. Rü yexgumarüxü̃ ta nagu napogüe ga tupananeta ga Acheráchicüna̱xãgü.
4 Rü ñu̱xũchi guxü̃ma ga Yudáanecüã̱xgüxü̃ namu nax norü o̱xigüarü Tupanaxü̃ yacua̱xüü̃güxü̃ca̱x rü naga naxĩnüexü̃ca̱x i norü mugü.
5 Rü guxü̃nema ga Yudáanearü ĩanegüwa nayanaxoxẽxẽ ga yema nachicagü ga nawa tupananetagüxü̃ yacua̱xüü̃güxü̃, rü yema norü ãmarearü guruü̃gü ga ma̱xpǘnegüwa yexmagüxü̃. Rü yexguma Achá ãẽ̱xgacü ixĩxgu rü taãẽwa nayexma ga nachixü̃ane.
6 Rü nüma ga Achá rü nayoxnie nax mea íyapoxegugüãxü̃ ga Yudáanearü ĩanegü yerü Tupana nüxü̃ narüngü̃xẽxẽ nax nataxuxü̃ma ga ta̱xacürü guxchaxü̃ rü tama ta̱xacürü uanümaxã nügü nada̱i̱xü̃.
7 Rü yemaca̱x Yudáanearü duü̃xü̃güxü̃ ñanagürü: —Ñu̱xma nax Tupanaga ixĩnüexü̃ rü nüma tüxü̃ nangü̃xẽẽxü̃ nax tama to i nachixü̃anemaxã yigü ida̱i̱xü̃, rü ngĩxã mea ítayapoxegugü ya tórü ĩanegü. Rü ngĩxã tanaxü i norü dauxü̃taechicagü rü norü ĩã̱xgü rü norü tairuü̃gü —ñanagürü ga Achá. Rü nüma ga yema duü̃xü̃gü rü norü me nixĩ ga yema Achá nüxü̃ ixuxü̃. Rü yemaacü taãẽãcü nanaxügü ga yema puracü rü ínayapoxegugü ga guma ĩanegü.
8 Rü nüma ga Achá rü nüxü̃́ nayexma ga 300,000 ga churaragü ga Yudátanüxü̃ ixĩgüxü̃. Rü guxü̃ma ga yemagü rü wocaemaxã nixãxne rü ñu̱xũchi nüxü̃́ nayexma ga norü poxü̃ruü̃gü. Rü nüxü̃́ nayexma ta ga 280,000 ga churaragü ga Bẽyamíü̃tanüxü̃ ixĩgüxü̃. Rü nümagü rü würamaxã nixãxne rü nüxü̃́ nayexma ga norü poxü̃ruü̃gü. Rü guxü̃ma ga yemagü rü churaragü ga iporaexü̃ rü tama muü̃wa̱xegüxü̃ nixĩgü.
9 Natürü ga Chéra ga Etiopíaanearü ãẽ̱xgacü rü Acháca̱x ínayaxü̃achi namaxã ga 1’000,000 ga norü churaragü. Rü nüxü̃́ nayexma ga 300 ga carugü ga cowaru itúgüne. Rü nüma rü marü Marecháwa nangu.
10 Rü yexguma nüma ga Achá rü inaxũachi namaxã ga norü churaragü. Rü Marecháarü ngaicamawa yexmaxü̃ ga Chepátaarü doxonexü̃wa nangugü. Rü yexma nügü ininu nax yexma nügü nada̱i̱xü̃ca̱x.
11 Rü naxü̃pa ga nax nügü nada̱i̱xü̃ rü nüma ga Achá rü nayumüxẽ rü Tupanamaxã nidexa rü ñanagürü: —Pa torü Tupanax, namaxã tá togü tadai i ñaa muxũchixü̃ i churaragü i torü uanü ixĩgüxü̃. Rü ngẽmaca̱x curü ngü̃xẽẽca̱x ítaca erü cuxü̃́ tayaxõgü. Rü nataxuma i to i cuxrüxü̃ nüxü̃ rüngü̃xẽẽxü̃ i ngẽma rüturamaexü̃ nax ngẽma rüporamaexü̃me̱xẽwa ínanguxuchixü̃ca̱x. Rü cuma nixĩ i torü Tupana quixĩxü̃. Rü nüxü̃ tacua̱x nax taxúema cuxü̃ rüporamaexü̃ —ñanagürü ga Achá.
12 Rü yexguma nüma ga Cori ya Tupana rü Acháxü̃ rü Yudáanearü churaragüxü̃ narüngü̃xẽxẽ nax yema Etiopíaanecüã̱xgüxü̃ naporamaegüxü̃ca̱x. Rü nüma ga Etiopíaanecüã̱xgü rü nibuxmü.
13 Rü nüma ga Achá rü yema norü churaragümaxã nawe nangẽgü ñu̱xmata Gueráxwa nangugü. Rü yexma yema Etiopíaanecüã̱xgüxü̃ nadai ñu̱xmata guxü̃ma yue. Rü yemawena nanade ga norü yemaxü̃gü.
14 Rü nümagü ga Yudáanearü churaragü rü naxca̱x ínayaxüãchi ga guxü̃nema ga guma ĩanegü ga Gueráxarü ngaicamana yexmagüne. Rü yexguma yemaxü̃ nadaugügu ga yema duü̃xü̃gü rü poraãcü Tupanape̱xewa namuü̃e. Rü nümagü ga Yudáanearü churaragü rü nanapuxü̃ ga muxü̃ma ga norü yemaxü̃gü.
15 Rü yexgumarüxü̃ ta naxca̱x ínayaxüãchi ga yema naanegü ga naxü̃nagü nawa yexmagüxü̃. Rü nayagagü ga muxü̃ma ga carnérugü rü caméyugü. Rü yemawena rü Yerucharéü̃ca̱x nawoegu.
