2 Crónicas 15:1-19
15 Cori ya Tupanaãxẽ nüxna naxĩnü ga Acharía ga Odé nane.
2 Rü yemaca̱x ãẽ̱xgacü ga Acháxü̃tawa naxũ rü ñanagürü nüxü̃: —¡Pa Acháx, choxü̃ irüxĩnü i cuma rü guxü̃ma i ngẽma Yudáanecüã̱xgü rü Bẽyamíü̃anecüã̱xgü! Rü nüma ya Cori ya Tupana rü pexü̃tawa nangẽxma ega pema rü naga pexĩnüegu. Rü ngẽxguma naxca̱x pedaugügu rü nüxü̃ tá ipeyangau, natürü ngẽxguma tá nüxna pixĩgachitanügu, rü nüma rü tá ta pexna nixũgachi.
3 Rü nũxcüma ga Iraétanüxü̃ rü mucüma ga taunecü nüxna nixĩgachi ya yimá aixcüma Tupana ixĩcü rü tama nüxü̃ nacua̱xgü ga norü ore yerü nataxuma ga chacherdótegü ga nangúexẽẽxü̃.
4 Natürü yexguma guxchaxü̃wa nayexmagügu ga Iraétanüxü̃ rü Cori ya Tupanaca̱x nawoegu rü naxca̱x nadaugü. Rü nüma rü naxca̱x nügü nango̱xẽxẽ.
5 Rü yema ngunexü̃gügu rü nataxuma ga duü̃xü̃ ga taãẽwa yexmaxü̃. Rü guxü̃ma ga nachixü̃anegüwa rü naxãũcüma nax ngextá naxĩxü̃ ga duü̃xü̃gü, yerü guxü̃wama nayexma ga ngĩ́ta̱xagüxü̃.
6 Rü nachixü̃anegü rü togü ga nachixü̃anegümaxã nügü nadai rü ĩanegü rü naigü ga ĩanegümaxã nügü nadai. Yerü Cori ya Tupana rü duü̃xü̃güca̱x ínananguxẽxẽ ga naguxü̃raü̃xü̃ ga guxchaxü̃gü ga ãũcümaxü̃.
7 ¡Natürü i pema rü peporaeama̱x, rü taxṹ i perümaãchitanüxü̃! Erü ngẽma mexü̃ i perü puracü i pexüxü̃ rü tá pexü̃́ naxãtanü —ñanagürü ga Acharía.
8 Rü yexguma yema Tupanaarü orearü uruxü̃arü orexü̃ naxĩnügu ga Achá rü pora nayaxu nax iyanaxoxẽẽãxü̃ca̱x ga yema tupananetachicüna̱xãgü ga Tupana naxchi aixü̃ ga guxü̃wama yexmagüxü̃ ga Yudáanewa rü Bẽyamíü̃anewa rü nawa ga guma ĩanegü ga nüma napuxü̃ne ga Efraíü̃anearü máxpü̱xanexü̃wa. Rü nanamexẽxẽ ga yema ãmarearü guruxü̃ ga Tupanapata ga taxü̃nearü ĩã̱x ga nawa ixücuxü̃pe̱xewa yexmaxü̃.
9 Rü yemawena rü nüma ga Achá rü nanangutaque̱xexẽxẽ ga guxü̃ma ga duü̃xü̃gü ga Yudátanüxü̃, rü Bẽyamíü̃tanüxü̃ rü ñu̱xũchi duü̃xü̃gü ga tóxnamana ne ĩxü̃ ga Efraíü̃tanüxü̃ rü Manachétanüxü̃ rü Chimeóü̃tanüxü̃ ga Yudátanüwa yexmagüxü̃. Yerü yexguma nüxü̃ nadaugügu nax Cori ya Tupana rü Achámaxã nayexmaxü̃, rü yemaca̱x ga muxü̃ma ga Iraéanecüã̱xgü ga Efraíü̃tanüxü̃ rü Manachétanüxü̃ rü Chimeóü̃tanüxü̃ rü Acháwa nachoxü̃.
10 Rü yexguma marü 15 ga taunecü rü naétü tomaepü̱x ga tauemacü nax ãẽ̱xgacü yixĩxü̃ ga Achá, rü Yerucharéü̃gu naxĩtaque̱xe ga guxü̃ma ga yema duü̃xü̃gü.
11 Rü yema ga ngunexü̃gu rü Cori ya Tupanaca̱x nanadai ga 700 ga wocagü, rü 7,000 ga carnérugü ga norü uanügüna napuxü̃güxü̃.
12 Rü yemawena rü wüxigu nüxü̃ nixugüe nax guxü̃nema ya norü maxü̃negümaxã tá naga naxĩnüexü̃ ya Cori ya norü o̱xigüarü Tupana.
13 Rü wüxi ga uneta inaxügü naxca̱x ga duü̃xü̃ ga tama Tupanaga ĩnüexü̃ nax noxtacüma yama̱xgüãxü̃ca̱x rü woo yaxü̃ rü woo buxü̃ rü woo yatüxü̃ rü woo ngexü̃.
14 Rü tagaãcü rü taãẽãcü rü norü cornétagügu rü wocachata̱xcuregügu yacuegüãcü Cori ya Tupanamaxã nüxü̃ nixugüe nax naga tá naxĩnüexü̃.
15 Rü guxü̃ma ga Yudáanecüã̱xgü rü nataãẽgü namaxã ga yema norü uneta ga aixcüma norü maxü̃nemaxã rü norü ngúchaü̃maxã Cori ya Tupanamaxã nüxü̃ yaxugüexü̃. Rü nataãẽgü yerü nüma ga Cori ya Tupana rü nüxü̃́ nanatauxchaxẽxẽ nax naxca̱x nawoeguxü̃, rü nüxü̃ nax nangü̃xẽẽxü̃ nax tama togü ga nachixü̃anegümaxã nügü nada̱i̱xü̃ca̱x.
16 Rü Achá rü norü noxẽ ga Maacána nanayaxu nax ãẽ̱xgacü tixĩxü̃, yerü wüxi ga Acheráchicüna̱xã duü̃xü̃güxü̃ taxüxẽxẽ. Rü nüma ga Achá rü nagu napogü ga yema Acheráchicüna̱xã rü íxraxü̃gu inanapoxü̃gü. Rü natü ga Chedróü̃wa nayanagu.
17 Rü woo ga Yudáanewa rü tama guxü̃ narüxo ga tupananetachicüna̱xãgü, natürü nüma ga Achá rü guxü̃guma mea Cori ya Tupanaga naxĩnü.
18 Rü Tupanapata ga taxü̃negu nananu ga guxü̃ma ga Tupanaarü yemaxü̃gü ga úirunaxca̱x rü diẽrumünaxca̱x ga nüma rü nanatü marü Cori ga Tupanana naxü̃.
19 Rü Achá rü 35 ga taunecü ãẽ̱xgacü nixĩ ga Yudáanewa rü gumá taunecügügu rü taguma nügü nadai togü ga nachixü̃anegümaxã.
