2 Crónicas 16:1-14
16 Natürü yexguma norü 36 ga taunecüwa nanguxgu nax ãẽ̱xgacü yixĩxü̃ ga Achá, rü yema Iraéanearü ãẽ̱xgacü ga Baachá rü Yudáaneca̱x ínayagoõchi. Rü ínanapoxegu ga ĩane ga Ramá nax yemaacü taxuxü̃ma Yudáarü ãẽ̱xgacüxü̃ rüngü̃xẽẽxü̃ca̱x.
2 Rü yexguma ga Achá rü nanade ga yema úiru rü diẽrugü ga Tupanapata ga taxü̃negu rü ãẽ̱xgacüpatagu nuxü̃. Rü ñu̱xũchi Chíriaanearü ãẽ̱xgacü ga Ben-adáxü̃ ga Damácuwa yexmacüxü̃tawa nanamugü namaxã ga ñaa ore:
3 —¡Ngĩxã wüxi i uneta yigümaxã taxü i cuma rü choma, yexguma tanatügü nügümaxã naxügügurüxü̃! Rü ngéma cuxca̱x chanamu i úiru rü diẽru. ¡Rü iyanaxoxẽxẽ i ngẽma uneta i Iraéanearü ãẽ̱xgacü i Baachámaxã cuxüxü̃! Rü ngẽmaãcü taxũtáma cha̱u̱xca̱x ínayagoõchi i Baachá —ñanagürü.
4 Rü nüma ga Ben-adáxü̃ rü nanayaxu ga yema ãẽ̱xgacü ga Acháarü dexa. Rü yema norü churaragüerugüxü̃ namu nax Iraéanearü ĩanegüca̱x íyaxü̃ãchixü̃ca̱x. Rü yemaacü nanapuxü̃ ga ĩanegü ga Ióü̃, rü Dáü̃, rü Abé-maíü̃ rü ñu̱xũchi guxü̃nema ga guma Netaríanearü ĩanegü ga nawemügü nawa yemagüne.
5 Rü yexguma Baachá nüxü̃ cua̱xgu nax norü ĩanegu nachocuxü̃ ga Chíriaarü churaragü rü yemaca̱x ínayachaxãchi nax ínapoxeguãxü̃ ga guma ĩane ga Ramá. Rü yexma nayacua̱xẽxẽ ga yema puracü.
6 Rü yexgumayane ga ãẽ̱xgacü ga Achá rü guxü̃ma ga Yudáanecüã̱xgümaxã Ramáwa naxũ, rü nayato ga nutagü rü mürapewagü ga Baachá guma ĩane namaxã ípoxeguchaxü̃ne. Rü gumamaxã nixĩ ga ínapoxegugüãxü̃ ga ĩanegü ga Guebá rü Mispá.
7 Rü yema ngunexü̃gügu rü Tupanaarü orearü uruxü̃ ga Ananí rü Yudáanearü ãẽ̱xgacü ga Acháxü̃tawa naxũ nax namaxã nüxü̃ yanaxuxü̃ca̱x ga ñaa ore ga ñaxü̃: —Ñu̱xma nax cuxme̱xwa yabuxmüxü̃ i ngẽma Chíriaanearü churaragü, rü cugagu nixĩ erü Chíriaanearü ãẽ̱xgacüga cuxĩnü rü tama curü Cori ya Tupanaga cuxĩnü.
8 ¿Rü tama ẽ̱xna nüxna cucua̱xãchi ga yema namaxã ngupetüxü̃ ga yema Etiopíaanecüã̱xgü rü Líbiaanecüã̱xgüarü churaragü ga iporaxüchixü̃ ga yexguma guxü̃ma ga norü cowarugümaxã rü carugü ga cowaru itúgünemaxã cuxca̱x íyaxüãchigu? Natürü nüma ga Cori ya Tupana rü cuxü̃ narüngü̃xẽxẽ rü cuxme̱xgu nanayixẽxẽ, yerü nüxü̃́ cuyaxõ.
9 Erü nüma ya Cori ya Tupana rü nüxü̃ nadau i guxü̃ma i ñoma i naanewa ngupetüxü̃, nax ngẽmaãcü pora tüxna naxãxü̃ca̱x ya yíxema aixcüma nüxü̃́ yaxõxe. Natürü i cumax rü ñoma wüxi i duü̃xü̃ i tama naãẽxü̃ cuáxü̃rüxü̃ quixĩ erü Chíriaanearü ãẽ̱xgacüaxü̃́ cuyaxõ. Rü ngẽmaca̱x i ñu̱xma rü daiwa tá cungexmaecha —ñanagürü.
10 Rü yexguma yemaxü̃ naxĩnügu ga Achá rü poraãcü gumá orearü uruxü̃maxã nanu. Rü norü churaragüxü̃ namu nax napoxcugüãxü̃ca̱x. Rü ñu̱xũchi yema ngunexü̃gügu rü poraãcü tümamaxã nachixecüma ga ñuxre ga duü̃xẽgü ga yémacüã̱xgü.
Acháarü yuxchiga
11 Rü norü ügüwa inaxügü rü ñu̱xmata norü gu̱xwa nangu rü guxü̃ma ga nachiga ga ãẽ̱xgacü ga Achá rü nagu naxümatü ga yema popera ga Yudáanearü ãẽ̱xgacügüchiga rü Iraéanearü ãẽ̱xgacügüchiga nagu ümatüxü̃.
12 Rü yexguma marü 39 ga taunecü ãẽ̱xgacü yixĩxgu ga Achá rü poraãcü nacutügüwa nida̱xawe. Natürü yexguma poraãcü yada̱xawegu rü tama Cori ya Tupanaarü ngü̃xẽẽca̱x nüxna ínaca, rü duturugüxü̃tawaama naxũ.
13 Rü yexguma marü 41 ga taunecü ãẽ̱xgacü yixĩxgu ga Achá rü nayu.
14 Rü norü o̱xigü íta̱xgüxü̃gu nanata̱xgü. Rü wüxi ga nachiü̃gu nayaxǘcuchi ga naxü̃ne. Rü nüxü̃ nananucu ga naguxü̃raü̃xü̃ ga pumaragü ga iyixichixü̃. Rü yema yuetamaxü̃ ga Dabíarü Ĩanegu duü̃xü̃güxü̃ naxüxẽẽxü̃gu nanata̱xgü. Rü yemawena rü naégagu nayanaixẽẽgü ga wüxi ga taxü̃ ga üxü.
