2 Crónicas 18:1-34
18 Rü nüma ga Yochapáx rü namuarü yemaxü̃xã̱x rü natachiga. Rü Yochapáx nane rü Acáxacümaxã naxã̱xma̱x.
2 Rü nawena nax ñuxre ga taunecü ngupetüxü̃ rü nüma ga Yochapáx rü Acáxü̃tagu nanaxũane. Rü nüma ga Acáx rü Iraéanearü ãẽ̱xgacü nixĩ ga yexguma ga Chamáriawa. Rü yexguma ga nüma ga Acáx rü wüxi ga peta naxü. Rü Yochapáca̱x rü yema namücügüca̱x nanadai ga muxü̃ma ga carnérugü rü wocagü. Rü nüma ga Acáx rü Yochapáxü̃ naca̱xaxü̃ nax nawe naxũxü̃ca̱x nax ĩane ga Ramóx ga Garaáxanewa yexmaneca̱x íyaxü̃ãchixü̃ca̱x. Rü guma ĩane rü Chíriaarü ãẽ̱xgacüme̱xẽwa nayexma.
3 Rü nüma ga Iraéanearü ãẽ̱xgacü ga Acáx rü Yudáanearü ãẽ̱xgacü ga Yochapáxü̃ ñanagürü: —¿Taxũ ẽ̱xna cuxü̃́ namexü̃ nax choxü̃ curüngüxẽxẽxü̃ nax Chíriaarü ãẽ̱xgacüna yapuxü̃ca̱x ya ĩane ya Ramóx ya Garaáxanewa ngẽxmane? —ñanagürü Rü nüma ga Yochapáx rü nanangãxü̃ rü ñanagürü: —Chomax, rü ngẽma chorü churaragümaxã rü wüxigu curü churaragümaxã tá cuxü̃ tarüngü̃xẽxẽ nax daiwa ixĩxü̃ca̱x.
4 Natürü naxü̃pa i ngẽma rü ngĩxã nüxna taca ya Cori ya Tupana rü norü ngúchaü̃ yixĩ i ngẽma —ñanagürü.
5 Rü yexguma ga Iraéanearü ãẽ̱xgacü ga Acáx rü nanaxĩtaque̱xexẽxẽ ga 400 ga norü duü̃xü̃gü ga orearü uruü̃gü. Rü nüxna naca, rü ñanagürü: —¿Namexü̃ i naxca̱x ítayaxüãchixü̃ ya ĩane ya Ramóx ya Garaáxanewa ngẽxmane, rüe̱xna tama? —ñanagürü. Rü yexguma ga nümagü ga orearü uruü̃gü rü nanangãxü̃gü rü ñanagürügü: —¡Ẽcü naxca̱x íyagoõchi! Erü Tupana rü tá cuxna nanaxã —ñanagürügü.
6 Natürü ga Yochapáx rü ñanagürü: —¿Ẽ̱xna nataxuma i nua i to i Tupanaarü orearü uruxü̃ nax ngẽma rü ta nüxna ica̱xaxü̃ca̱x? —ñanagürü.
7 Rü yexguma ga nüma ga Iraéanearü ãẽ̱xgacü rü Yochapáxü̃ nangãxü̃ rü ñanagürü: —Nangexma i wüxi i to i Tupanaarü orearü uruxü̃ i namexü̃ nax nüxna ica̱xaxü̃. Rü nüma nixĩ i Micaía i Imrá nane. Natürü i choma rü naxchi chaxai, erü taguma mexü̃ i orexü̃ chomaxã nixu. Rü guxü̃guma ore i tama chauãẽguxü̃ nixĩ i chomaxã nüxü̃ yaxuxü̃ —ñanagürü. Natürü ga Yochapáx rü nanangãxü̃ rü nüxü̃ ñanagürü: —¡Taxṹ i ngẽma ñacuxü̃! —ñanagürü.
8 Rü yexguma ga nüma ga Iraéanearü ãẽ̱xgacü rü wüxi ga norü churaragüeruca̱x naca, rü nüxü̃ ñanagürü: —¡Paxa naxca̱x yaca i Micaía i Imrá nane! —ñanagürü.
9 Rü nüma ga Acáx ga Iraéanearü ãẽ̱xgacü rü Yochapáx ga Yudáanearü ãẽ̱xgacü rü nagu nicu̱xgü ga norü ãẽ̱xgacüchirugü. Rü wüxi ga naxta̱xmüxü̃ ga Chamáriaca̱x íxücuxü̃wa yexmaxü̃wa narütogü nawa ga norü toruü̃gü. Rü guxü̃ma ga yema 400 ga orearü uruü̃gü rü nape̱xewa nüxü̃ nixugüe ga norü dexagü.
10 Rü nüma ga Chedequía ga Quenaaná nane rü fieruwa nanaxü ga taxre ga naxchata̱xcuregü. Rü yexma nicaechigü ñaxü̃maxã: —¡Tupana rü ñanagürü: “¡Pa Acáx, ñaa naxchata̱xcuremaxã tá cunadai i ngẽma Chíriaanecüã̱xgü ñu̱xmatata guxü̃ma yue!” —ñaxü̃maxã yexma ínacaeanexü̃ ga Chedequía.
11 Rü guxü̃ma ga yema togü ga orearü uruü̃gü rü yemaxü̃tama nixugü. Rü ãẽ̱xgacü ga Acáxü̃ ñanagürügü —¡Naxca̱x íyagoõchi ya yima ĩane ya Ramóx i Garaáxanewa ngẽxmane! Rü Tupana rü tá cuxü̃ narüporamaexẽxẽ. Rü cuxna tá nanaxã ya yima ĩane! —ñanagürügü.
12 Rü nüma ga yema churaragüeru ga Micaíaca̱x yacaxü̃ rü yoxni Micaíaxü̃ ñanagürü: —Guxü̃ma i ngẽma togü i orearü uruü̃gü rü nüxü̃ nixugüe nax Acáx rü tá narüporamaexü̃. Rü chanaxwa̱xe nax ngẽma togürüxü̃ mexü̃ i orexü̃ namaxã quixuxü̃ ya ãẽ̱xgacü —ñanagürü.
13 Natürü nüma ga Micaía rü nanangãxü̃ rü ñanagürü: —Tupanaégagu tá nüxü̃ chixu i ngẽma nüma choxü̃ nüxü̃ yaxuxẽẽxü̃xicatama —ñanagürü.
14 Rü yemawena rü nüma ga Micaía rü ãẽ̱xgacüpe̱xewa naxũ. Rü ãẽ̱xgacü rü nüxna naca rü ñanagürü: —¿Pa Micaíax, namexü̃ nax namaxã togü tadaixü̃ ya ĩane ya Ramóx ya Garaáxanewa ngẽxmane, rüe̱xna tama? —ñanagürü. Rü yexguma ga nüma ga Micaía rü nanangãxü̃ rü ñanagürü: —¡Ẽcü namaxã pegü peda̱i̱x rü pemax rü tá perüporamaegü! Rü Tupana rü tá cuxna nanaxã ya yima ĩane! —ñanagürü.
15 Natürü nüma ga ãẽ̱xgacü rü ñanagürü nüxü̃: —¿Ñuxree̱xpü̱xcüna tá i cumaxã nüxü̃ chixuxü̃ nax aixcümaxü̃ chomaxã quixuxü̃ca̱x naégagu ya Cori ya Tupana? —ñanagürü.
16 Rü yexguma ga nüma ga Micaía nanangãxü̃ rü ñanagürü: —Nüxü̃ chadau nax guxü̃ma i Iraéanecüã̱xgü rü máxpü̱xanexü̃gu nawoanemarexü̃ ñoma carnérugü i ngearü dauruü̃xã̱xgüxü̃rüxü̃. Rü Tupana rü ñanagürü: “Ñaa duü̃xü̃gü rü taxúema namaxã itacuax. ¡Rü ngẽmaca̱x i pema rü wüxichigü mea pepataca̱x pewoegu!” —ñanagürü ga Micaía.
17 Rü yexguma ga nüma ga Acáx rü Yochapáxü̃ ñanagürü: —¿Tama ẽ̱xna i marü cumaxã nüxü̃ chixuxü̃ rü ñaa yatü rü taguma mexü̃ i orexü̃ chomaxã yaxuxü̃ rü guxü̃guma ore i tama chauãẽguxü̃ nixĩ i chomaxã nüxü̃ yaxuxü̃? —ñanagürü.
18 Rü yexguma ga nüma ga Micaía rü ñanagürü: —¡Nüxü̃ pexĩnüe i Tupanaarü ore! Choma rü nüxü̃ chadau ya Cori ya Tupana ya norü tochicaxü̃wa rütocü, rü nüxü̃ chadau i guxü̃ma i daxũcüã̱x i orearü ngeruü̃gü i norü tügünecüwagu rü norü to̱xwecüwagu chigüxü̃.
19 Rü yexguma ga nüma ga Cori ya Tupana rü ínaca rü ñanagürü: “¿Texé tá tixĩ ya nüxü̃́ nangúchaü̃xeẽ́xẽ ya Acáx nax naxca̱x íyagoõchixü̃ca̱x ya yima ĩane ya Ramóx ya Garaáxanewa ngẽxmane nax ngẽmaãcü ngẽxma nayuxü̃ca̱x?” ñanagürü. Rü ñuxre ga norü orearü ngeruü̃gü rü nüxü̃ nixugüe ga wüxi ga ĩnü, rü togü ga natoraxü̃xü̃ ga ĩnü.
20 Natürü wüxi ga naãxẽ rü Cori ya Tupanaca̱x nixũ, rü ñanagürü nüxü̃: “Choma tá nixĩ i ngéma chaxũxü̃ nax dora naãẽwa cuyanguxẽẽxü̃ca̱x i ngẽma orearü uruü̃gü”, ñanagürü. Rü nüma ga Cori ya Tupana rü nüxna naca rü ñanagürü: “¿Ñuxãcü tá cunaxüxü̃ i ngẽma?” ñanagürü.
21 Rü yexguma ga nüma ga yema naãxẽ rü Tupanaxü̃ nangãxü̃ rü ñanagürü: “Choma rü tá doramare i ore naãẽwa íchanguxẽxẽ i ngẽma orearü uruü̃gü i Acáxü̃tawa ngẽxmagüxü̃”, ñanagürü. Rü yexguma ga nüma ga Cori ya Tupana rü ñanagürü nüxü̃: “Cuma i nüxü̃ cucuáxü̃ nax ngẽma cuxüxü̃” —ñanagürü.
22 Rü yexguma ga Micaía rü Acáxü̃ ñanagürü: —Ñu̱xmawaxix nixĩ i nüxü̃ cucuáxü̃ nax nüma ya Cori ya Tupana rü curü orearü uruü̃gügu naxüaxü̃ i wüxi i naãxẽ i doramaxã idexaxü̃ rü curü yuchigaxü̃ cumaxã ixumarexü̃ —ñanagürü.
23 Rü yexguma ga Chedequía ga Quenaaná nane rü Micaíaca̱x nixũ rü nayapechiwe rü ñanagürü nüxü̃: —¿Ñuxgu nixĩ i Tupanaãxẽ i choxna yaxũgachixü̃ nax cuxchama cumaxã yadexaxü̃ca̱x? —ñanagürü.
24 Rü nüma ga Micaía rü nanangãxü̃ rü ñanagürü: —Rü ngẽxguma yanguxgu i ngẽma nüxü̃ chixuxü̃ rü tá nüxü̃ cucua̱x nax aixcümaxü̃ chixuxü̃. Rü ngẽxguma i cuma rü tá ĩpatagügu quicúchigü na̱xcha̱xwa i ngẽma cuxü̃ ima̱xgüchaü̃xü̃ —ñanagürü.
25 Rü yexguma ga nüma ga ãẽ̱xgacü ga Acáx rü norü purichíaxü̃ namu nax Micaíaxü̃ yayauxgüxü̃ca̱x rü ñanagürü: —¡Peyayaxu i Micaía rü daa ĩanearü ãẽ̱xgacü ya Amóü̃xü̃tawa rü chaune ya Yoáxü̃tawa penaga!
26 ¡Rü namaxã nüxü̃ pixu ya ãẽ̱xgacü rü poxcupataü̃gu namua! ¡Rü íxraxü̃ i paũ rü dexáxica nüxna naxãgü rü ñu̱xmatáta mea íchangu nax daiwa ne chaxũxü̃! —ñanagürü.
27 Rü yexguma ga nüma ga Micaía rü nanangãxü̃ rü ñanagürü: —Ngẽxguma cuma tá maxü̃ãcü cutaegu̱xgu, rü ngẽmawa tá nüxü̃ cucua̱x nax Tupana rü tama chowa yadexaxü̃ —ñanagürü. Rü yemawena rü guxü̃ma ga yéma yexmagüxüxü̃ ñanagürü: —¡Nüxü̃ pexĩnü i ngẽma nüxü̃ chixuxü̃! —ñanagürü.
28 Rü yemaacü nüma ga Iraéanearü ãẽ̱xgacü ga Acáx rü Yudáanearü ãẽ̱xgacü ga Yochapáx rü naxca̱x inaxĩãchi ga guma ĩane ga Ramóx ga Garaáxanewa yexmane.
29 Rü nüma ga Iraéanearü ãẽ̱xgacü rü Yochapáxü̃ ñanagürü: —Choma rü tá tomare i naxchirugu chicu̱x i ngẽxguma ichocuxgux nax ngẽma Chíriaanecüã̱xgümaxã yigü ida̱i̱xü̃ca̱x, natürü cuma rü tá ãẽ̱xgacüchirugu quicu̱x —ñanagürü. Rü yemaacü ga Iraéanearü ãẽ̱xgacü rü tomare ga naxchirugu nicu̱x. Rü wüxigu daiwa naxĩ.
30 Natürü nüma ga Chíriaanearü ãẽ̱xgacü, rü nüxna naxãga ga norü capitáü̃gü ga norü carugü ga daiwexü̃maxã icua̱xgüxü̃ rü ñanagürü nüxü̃: —Iraéanearü ãẽ̱xgacümaxãxica tá nixĩ i pegü pedaixü̃ —ñanagürü.
31 Rü yexguma Yochapáxü̃ nadaugügu ga yema capitáü̃gü, rü nagu narüxĩnüe nax nüma yixĩxü̃ ga Iraéanearü ãẽ̱xgacü. Rü yemaca̱x nüxü̃ ínachomaeguãchi nax yama̱xgüãxü̃ca̱x. Natürü nüma ga Yochapáx rü aita naxü rü ngü̃xẽẽca̱x ínaca. Rü nüma ga Cori ya Tupana rü nüxü̃ narüngü̃xẽxẽ, rü yemaca̱x nüxna nixĩgachi ga norü uanügü.
32 Rü yexguma yema capitáü̃gü nüxü̃ icua̱xãchitanügu nax tama Iraéanearü ãẽ̱xgacü nax yixĩxü̃, rü nüxna nixĩgachitanü rü marü tama nawe nangẽgü.
33 Natürü wüxi ga Chíriaanearü churara rü Iraétanüxü̃arü churaratanügu nanama̱xmare ga norü würa. Rü meama Iraéanearü ãẽ̱xgacü ga Acáxca̱x niña rü norü daixchirucuchitamaxã namexchinü, rü poraãcü nanapi̱x. Rü yemaca̱x ga nüma ga Acáx rü naweü̃arü ũxẽẽruü̃xü̃ namu, rü ñanagürü: —¡Chomaxã nataegu, rü ñaa daiwa choxü̃ ínagaxüchi erü marü poraãcü chanapi̱x! —ñanagürü.
34 Rü yema ngunexü̃gu rü yéma natai ga yema dai. Rü ñuxre ga norü churaragü rü norü carugu nanachixẽẽgü ga ãẽ̱xgacü nax yema Chíriaanecüã̱xgümaxã nügü nada̱i̱xü̃ca̱x. Natürü yexguma marü yanaxücu̱xgu ga üa̱xcü rü nayu ga Acáx.
