2 Crónicas 19:1-11
19 Rü Yochapáx ga Yudáanearü ãẽ̱xgacü rü taxuxü̃ma nüxü̃ ngupetüãcüma napataca̱x nataegu ga Yerucharéü̃wa.
2 Natürü Tupanaarü orearü uruxü̃ ga Yeú ga Ananí nane rü naxca̱x nixũ rü nüxna naca rü ñanagürü: —¿Tü̱xcüü̃ nüxü̃ curüngü̃xẽxẽ i ngẽma chixexü̃ üxü̃ rü namaxã cuxãmücü i ngẽma Tupanaarü uanügü? Rü ngẽmaca̱x nixĩ ya Cori ya Tupana i cumaxã nanuxü̃.
3 Natürü nayexma ga ta̱xacü ga mexü̃ ga cuxüxü̃ ga Tupana naxca̱x cumaxã taãẽxü̃. Rü yema nixĩ nax nagu quipogügüxü̃ ga yema Acheráchicüna̱xãgü ga ñaa nachixü̃anewa yexmagüxü̃. Rü ñu̱xũchi nagu curüxĩnü nax Tupanaca̱x cudauxü̃ —ñanagürü.
Yochapáx rü nüxü̃ naxuneta i ãẽ̱xgacügü i guxchagüarü mexẽxẽruü̃gü
4 Rü nüma ga Yochapáx rü Yerucharéü̃wa nixĩ ga nayexmaxü̃. Natürü nagu naxãcüma nax norü duü̃xü̃gütanügu naxũaneãxü̃ nax yemaacü Cori ya norü o̱xigüarü Tupanaca̱x nawoeguxẽẽãxü̃ca̱x. Rü Bechébawa inanaxügü rü ñu̱xmata Efraíü̃arü máxpü̱xanexü̃wa nangu.
5 Rü ñu̱xũchi guxü̃nema ga guma Yudáanearü ĩanegü ga ípoxegugünewa nüxü̃ naxuneta ga ãẽ̱xgacügü ga guxchaxü̃arü mexẽẽruxü̃gü.
6 Rü ñanagürü nüxü̃ ga yema ãẽ̱xgacügü ga guxchaxü̃arü mexẽẽruü̃gü: —Rü mea nagu perüxĩnüe i ngẽxguma guxchaxü̃ pemexẽẽgügu, erü tama duü̃xü̃égagu nixĩ i penamexẽẽxü̃, natürü Tupanaégagu nixĩ i penamexẽẽxü̃ i ngẽma guxchaxü̃gü. Rü nüma ya Tupana tá nixĩ i pexü̃tawa nangẽxmaxü̃ rü tá pexü̃ nangü̃xẽẽxü̃ i ngẽxguma ta̱xacürü guxchaxü̃ pemexẽẽgügu.
7 Rü ngẽmaca̱x penaxwa̱xe nax aixcüma Cori ya Tupanaga pexĩnüexü̃. ¡Rü pexuãxẽgü i ngẽxguma guxchaxü̃gü pemexẽxẽgu! Erü nüma ya Cori ya Tupana rü tama yáxna pexuãẽgü namaxã naxĩnü i ta̱xacürü chixexü̃. Rü tama nanaxwa̱xe nax texé tümaétüwa üxü̃ ya yíxema chixexü̃ üxe, rü tama norü me nixĩ nax texé naxütanüxü̃ i guxchaxü̃arü mexẽxẽ —ñanagürü.
8 Rü ñu̱xũchi ga nüma ga Yochapáx rü Yerucharéü̃wa nüxü̃ naxuneta ga ñuxre ga Lebítanüxü̃ rü chacherdótegü nax guxchaxü̃arü mexẽẽruü̃gü yixĩgüxü̃ca̱x. Rü nüxü̃ naxuneta ga ñuxre ga Iraétanüxü̃arü ãẽ̱xgacügü nax Yerucharẽü̃arü duü̃xü̃güarü guxchaxü̃arü mexẽẽruü̃gü yixĩgüxü̃ca̱x.
9 Rü nayaxucu̱xẽ rü ñanagürü: —Pema rü penaxwa̱xe nax Cori ya Tupana naxwa̱xexü̃ãcüma pepuracüexü̃. Rü ngẽmaãcü penaxwa̱xe nax aixcüma nawe̱xguxü̃ i guxü̃ma i ngẽma pexüxü̃ rü aixcüma Tupanape̱xewa nax namexü̃ i perü maxü̃.
10 Rü ngẽxguma chi naigü ya ĩanegüwa ne naxĩxgu i duü̃xü̃gü nax pema nüxü̃́ penamexẽẽxü̃ca̱x i norü guxchaxü̃gü i máetachiga rüe̱xna Tupanaarü mugüchiga rüe̱xna ta̱xacürü to i mugüchiga rü penaxwa̱xe nax peyaxucu̱xẽgü nax tama Cori ya Tupanape̱xewa ta̱xacürü chixexü̃ naxügüxü̃ca̱x nax nüma ya Tupana rü tama namaxã rü pemaxã nanuxü̃ca̱x. Rü ngẽxguma ngẽmaãcü penaxügügu rü taxũtáma nipeguãchi i ngẽma chixexü̃.
11 Rü yima chacherdóte ya Amaría tá nixĩ ya namaxã icuácü i guxü̃ma i ta̱xacü i Tupanaarü mugüchiga ixĩxü̃. Rü Chebadía ya Ismaé nane ya Yudátanüxü̃arü ãẽ̱xgacü tá nixĩ ya namaxã icuácü i guxü̃ma i ta̱xacü i ñoma i naanearü mugüchiga ixĩxü̃. Rü ngẽma Lebítanüxü̃ tá nixĩ i perü ngü̃xẽẽruü̃gü. ¡Rü piporaãxẽtanücüxü̱x, rü peyapuracüe! Rü Cori ya Tupana rü tá tümamaxã nangẽxma ya yíxema mea naxǘxe i ngẽma puracü —ñanagürü.
