2 Crónicas 2:1-18
2 Nüma ga Charomóü̃ rü nanaxunagü nax Cori ya Tupanapata ya taxü̃ne naxüxü̃. Rü yexgumarüxü̃ ta nanaxunagü nax naxüaxü̃ca̱x ga wüxi ga ĩpata ya ãẽ̱xgacüpata ixĩxü̃ne.
2 Rü yema puracüca̱x nüxü̃ naxuneta ga 70,000 ga nugütaeruü̃gü, rü 80,000 ga nutagüarü mexẽẽcüwaruü̃gü ga ma̱xpǘneanewa puracüexü̃, rü 3,600 nax yema puracümaxã inacua̱xgüxü̃ca̱x.
3 Rü yemawena ga Charomóü̃ rü ĩane ga Tíruarü ãẽ̱xgacü ga Iráü̃xü̃tawa namuga rü ñanagürü: —Cuxna chaca nax choxü̃ curüngü̃xẽẽxü̃ yema chaunatü ga Dabíxü̃ curüngü̃xẽẽgurüxü̃ ga yexguma mürapewagü ga ocayiwanaxca̱x núma cumugügu nax naxüaxü̃ca̱x ga ãẽ̱xgacüpata.
4 Rü dücax, choma rü tá chanaxü ya wüxi ya chorü Cori ya Tupanapata ya taxü̃ne. Rü tá nüxna chanaxã ya yima napata nax nüma nawa nangẽxmaxü̃ca̱x rü ngéma naxca̱x ítanaguxü̃ca̱x i pumarate̱xegü, rü guxü̃guma nape̱xegu tananuxü̃ca̱x i paũ i üünexü̃, rü ngéma naxca̱x ítanaguxü̃ca̱x i torü ãmaregü i guxü̃ i ngunexü̃gu i pa̱xmama rü yáuanecü. Rü ngẽxgumarüxü̃ ta ngéma tá naxca̱x ítanagu i torü ãmaregü i ngẽxguma ngü̃xchigaarü ngunexü̃wa nanguxgu, rü ngẽxguma ngexwacaxü̃cü ya tauemacüarü petachigawa nanguxgu rü ngẽxguma nawa nanguxgu i toamachigü i peta ya Tupana naxwa̱xexü̃ i toma i Iraétanüxü̃ nax tanaxüchigaxü̃.
5 Rü yima Tupanapata ya taxü̃ne i tá chaxüxü̃ne rü tá nataxüchi rü namexẽchi, erü yimá torü Tupana rü naporaxüchi rü nape̱xewa rü guxü̃ma i ngẽma duü̃xü̃gü namaxã tupanaã́xü̃ rü taxuxü̃ma nixĩgü.
6 Natürü wüxi ya napata ya taxü̃ne rü tama nagu name nax ngéma namaxü̃xü̃. Rü ngẽma dauxü̃guxü̃ i naane rü woo nataxüchi natürü naxca̱x rü naxíraxüchi. ¿Rü ñu̱xũchi texé tümamaxã nanguxü̃ nax nüxü̃́ tanaxüxü̃ ya wüxi ya napata ya taxü̃ne? ¿Rü nüma nax nataxüchixü̃ rü texé chixĩ i choma nax nüxü̃́ chanaxüxü̃ ya wüxi ya napata ya taxü̃ne ya pumarate̱xe naxca̱x nawa iguxü̃newaxicatama name?
7 Rü ngẽmaca̱x chanaxwa̱xe nax nua cunamuxü̃ i wüxi i yatü i meama nüxü̃ cuáxü̃ nax úiruwa rü diẽrumüwa rü bróũchewa rü fieruwa ta̱xacü naxüxü̃. Rü ngẽxgumarüxü̃ ta chanaxwa̱xe nax nüxü̃ cuáxü̃ nax naxümatüaxü̃ i naxchiru i yáuxcharaxü̃ rü naxchiru i daucharaxü̃ rü naxchiru i waxracharaxü̃. Rü chanaxwa̱xe nax wüxigu namaxã napuracüxü̃ i chorü puracütanüxü̃ i Yudáanewa rü Yerucharéü̃wa chaunatü ga Dabí nüxü̃ unetaxü̃.
8 Rü ngẽxgumarüxü̃ ta chanaxwa̱xe i nua cunamugü i Líbanucüã̱x i ocayiwapütagü rü chiprepütagü rü cháü̃darupütagü. Erü ngẽma curü duü̃xü̃gü rü nüxü̃ nicua̱x nax ñuxãcü Líbanuanewa nadeaxü̃ i ngẽma naixpütagü. Rü choma rü tá ngéma chanamugü i chorü puracütanüxü̃ nax curü puracütanüxü̃xü̃ nangü̃xẽẽgüxü̃ca̱x.
9 Rü ngẽmaãcü tá choxü̃́ namu i ngẽma mürapewagü, erü yima Tupanapata ya taxü̃ne i tá chaxüxü̃ne rü taxü̃ne rü mexẽchine tá nixĩ.
10 Rü choma rü tá cuxna chanana i 4’400,000 litrugü i trigu, rü 4’400,000 litrugü i chebáda. Rü 440,000 litrugü ya bínu, rü 440,000 litrugü i chíxü̃ nax ngẽmamaxã naxãwemügüxü̃ca̱x i ngẽma puracütanüxü̃ —ñanagürü ga Charomóü̃.
11 Rü yexguma ga nüma ga Tíruarü ãẽ̱xgacü ga Iráü̃ rü Charomóü̃ca̱x yéma nanamu ga popera ga ñaxü̃ nagu ümatüxü̃: —Cori ya Tupana rü Iraétanüxü̃arü ãẽ̱xgacüwa cuxü̃ nanguxẽxẽ erü norü duü̃xü̃güxü̃ nangechaü̃ —ñaxü̃.
12 Rü yexgumarüxü̃ ta yexma nanaxümatü ga ñaxü̃: —Nüxü̃ chicua̱xüxü̃ ya Cori ya Iraétanüxü̃arü Tupana ga naxücü ga dauxü̃guxü̃ ga naane rü ñoma ga naane. Erü nüma ya Tupana rü ãẽ̱xgacü ga Dabína nanamu ya wüxi ya nane ya cua̱x nüxü̃́ ngẽxmacü, rü aixcüma naãẽxü̃ cuácü. Rü nüma tá nixĩ i naxüaxü̃ ya Cori ya Tupanapata ya taxü̃ne rü wüxi ya ĩpata ya ãẽ̱xgacüpata ixĩxü̃ne.
13 Rü ñu̱xmax rü cuxca̱x tá ngéma chanamu i wüxi i yatü i guxü̃ i ngẽmaxü̃güarü üxü̃ cuáxü̃ rü aixcüma naãẽxü̃ cuáxü̃, rü naéga nixĩ i Iráü̃-abí.
14 Rü nüma rü wüxi i nge i Dáü̃tanüxü̃ ngĩne tixĩ rü nanatü rü Tírucüã̱x tixĩ. Rü nüma rü meama nüxü̃ nacua̱x nax ñuxãcü úiruwa, rü diẽrumüwa, rü bróũchewa, rü fieruwa, rü nutawa rü mürapewawa naxüaxü̃ i naguxü̃raü̃xü̃ i meruü̃gü. Rü ngẽxgumarüxü̃ ta nüxü̃ nacua̱x nax ñuxãcü naxchiru i yáuxcharaxü̃wa, rü daucharaxü̃wa, rü waxracharaxü̃wa rü línuchiwa ta̱xacü naxüxü̃. Rü ngẽxgumarüxü̃ ta nüxü̃ nacua̱x nax naxümatüaxü̃ rü naguxü̃raü̃xü̃ i naxchicüna̱xãgü naxüxü̃. Rü nüma rü tá namaxã napuracü i ngẽma curü duü̃xü̃gü i nüxü̃ icuáxü̃ nax ñuxãcü naguxü̃raü̃xü̃ íyaxüxü̃güxü̃ ga cunatü ga chorü cori ga Dabíaxü̃́ puracüexü̃.
15 Rü ngẽmaca̱x, Pa Corix, Pa Charomóü̃x, ¡nua chorü puracütanüxü̃ca̱x namugü i ngẽma nüxü̃ quixuxü̃ i trigu rü chebáda rü chíxü̃ rü bínu!
16 Rü ngẽxguma nua nangugügu i ngẽma rü toma rü tá Líbanuwa tanade i ngẽma naixpütagü i cuma cunaxwa̱xexü̃. Rü toma rü tá nügüwa tayana̱i̱xgü i ngẽma naixpütagü rü ngẽmaãcü tá márgu tayana ñu̱xmatáta Yópearü türewa nangugü. Rü ngẽxguma ngéma nangugügu, rü cuma tá Yerucharéü̃wa cunana —ñanagürü ga Tíruarü ãẽ̱xgacü ga Iráü̃ norü poperawa.
17 Rü yemawena rü nüma ga ãẽ̱xgacü ga Charomóü̃ rü nayaxugü ga yema duü̃xü̃gü ga to ga nachixü̃anecüã̱x ga Iraéarü naanewa maxẽxü̃, yema nanatü ga Dabí ü̃pa duü̃xü̃güxü̃ ixugüxü̃rüxü̃. Rü guxü̃wama rü 153,600 nixĩ ga norü mu.
18 Rü yema 153,600 wa rü 70,000 nixĩ ga nugütaeruü̃gü, rü 80,000 nixĩ ga ma̱xpǘnewa nutaarü mexẽẽcüwawa puracüexü̃. Rü 3,600 nixĩ ga namaxã icua̱xgüxü̃ ga yema puracütanüxü̃.
