2 Crónicas 20:1-37
20 Rü yemawena ga Moátanüxü̃ rü Amóü̃tanüxü̃ rü Meṹtanüxü̃ rü nügü nanutaque̱xegü nax Yochapámaxã nügü nada̱i̱xü̃ca̱x.
2 Rü yema Yochapáarü ngü̃xẽẽruü̃gü rü namaxã nüxü̃ nayarüxugüe rü ñanagürügü: —Pa Ãẽ̱xgacüx, Edóü̃anewa i Már i Ngearü Maxü̃ã́xü̃arü tocutüwa cuxca̱x inaxĩãchi i muxü̃ma i churaragü. Rü marü ĩane ya Achechóü̃-tamáwa nangẽxmagü —ñanagürügü.*
3 Rü yexguma nüma ga Yochapáx rü poraãcü namuü̃, rü yemaca̱x Tupanaarü ngü̃xẽẽca̱x ínaca. Rü nanaxunagü nax nayumüxẽgüxü̃ca̱x rü tama nachibüexü̃ca̱x ga duü̃xü̃gü ga guxü̃ma ga Yudáarü naanewa.
4 Rü guxü̃ma ga naigü ga ĩanegü ga Yudáanewa yexmagünewa ne naxĩ ga duü̃xü̃gü rü Yerucharéü̃gu naxĩtaque̱xe nax Tupanana ngü̃xẽẽca̱x nacagüxü̃ca̱x.
5 Rü yema duü̃xü̃gü ga Yudáanecüã̱x ga Yerucharéü̃wa ĩxü̃ rü Tupanapata ga taxü̃nea̱xtü ga yexwaca̱xü̃xü̃pe̱xegu nangutaque̱xegü. Rü nüma ga Yochapáx rü norü ngãxü̃tanügu nachi.
6 Rü nayumüxẽ rü ñanagürü: —Pa Cori Pa Torü O̱xigüarü Tupanax, cuma rü daxũguxü̃ i naanewa cungexma rü cuma nixĩ i namaxã icucuáxü̃ i guxü̃ma i nachixü̃anegü. Cuma rü guxü̃étüwa cungexma rü guxü̃arü yexera cupora. Rü ngẽmaca̱x tataxuma ya texé ya cuxü̃ rüyexeraxe.
7 Pa Tórü Tupanax, cuma nixĩ ga curü duü̃xü̃gü ga Iraétanüxü̃pe̱xewa ícunawoxü̃xü̃ ga yema duü̃xü̃gü ga nüxíra ñaa naanewa maxẽxü̃. Rü ñaa naane rü cuma rü toxna cunaxã nax guxü̃guma toxrü yixĩxü̃ca̱x, erü curü duü̃ ga Abraáü̃taagü tixĩgü.
8 Rü yexguma marü nua ñaa nachicawa tamaxẽgu ga torü o̱xigü rü cuxca̱x tanaxü ga wüxi ga cupata ga taxü̃ne nax nawa cumaxã tidexagüxü̃ca̱x. Rü ñatagürügü:
9 “Rü ngẽxguma tá to̱xca̱x ínanguxgu i guxchaxü̃gü i namaxã tá toxü̃ cupoxcuxü̃ rü woo dai rü woo da̱xaweane rü woo taiya, rü ngẽxguma daa cupata ya taxü̃ne ya nawa cungexmanepe̱xewa tayumüxẽgügu rü ngü̃xẽẽca̱x ítacaxgu, rü cuma rü tá toxü̃ cuxĩnü rü tá toxü̃ ícupoxü̃”, ñatagürügü.
10 Rü yexguma Equítuanewa ínachoxü̃gu ga torü o̱xigü ga Iraétanüxü̃, rü cuma rü tama cunaxwa̱xe nax Amóü̃anegu rüe̱xna Moáanegu rüe̱xna Cheíarü máxpü̱xanexü̃gu nachocuxü̃. Rü yemaca̱x tomare ga namagu cunaxĩxẽxẽ ga torü o̱xigü nax tama yema nachixü̃anecüã̱x ga duü̃xü̃güxü̃ nada̱i̱xü̃ca̱x.
11 Natürü i ñu̱xma i nümagü rü ngẽma norü churaragü rü toxca̱x ínayachoõchi nax toxü̃ nada̱i̱xü̃ca̱x rü nawa toxü̃ ínawoxü̃xü̃ca̱x i ñaa naane ga toxna cuxãxü̃.
12 Pa Torü Tupanax, ¿Ẽ̱xna taxũtáma cunapoxcue? Erü toma rü taxuacüma namaxã togü tadai erü ngẽma norü churaragü rü namuxũchi rü tama nüxü̃ tacua̱x nax ta̱xacü tá taxüxü̃. Rü ngẽmaca̱x curü ngü̃xẽẽca̱x ítaca —ñanagürü ga Yochapáx.
13 Rü yexguma rü guxü̃ma ga Yudáanecüã̱xgü ga yatüxü̃gü rü ngexü̃gü rü buxü̃gü rü Tupanapatape̱xegu nachigü.
14 Rü yéma nayexma ga wüxi ga chacherdótegüarü ngü̃xẽẽruxü̃ ga Yaachiégu ãégaxü̃. Rü nüma ga Yaachié rü Chacaría nane nixĩ. Rü yema Yaachiéarü o̱xigü rü ñaagü nixĩ: Achá rü Matanía rü Yeié rü Benaía rü Chacaría. Rü nüma ga Yachié rü Tupanaãxẽ nawa nidexa rü ñanagürü:
15 —Pa Ãẽ̱xgacü Pa Yochapáx, rü Pa Yudáanecüã̱xgü rü Pa Yerucharéü̃cüã̱xgüx, ¡rü mea iperüxĩnüe i ñaa ore i pemaxã tá nüxü̃ chixuxü̃! Rü Tupana rü ñanagürü pexü̃: “¡Taxṹ i pemuü̃exü̃ rü peba̱i̱xãchiexü̃ nape̱xewa i ngẽma muxũchixü̃ i churaragü! Rü ngẽma dai rü taxũtáma pemaxã nixĩ erü choma tá nixĩ i togü namaxã tadaixü̃.
16 Rü moxü̃arü ngunexü̃gu rü tá perüchoxü̃ nax naxca̱x ípeyaxüãchixü̃ca̱x. Rü nümagü rü tá Chixarü ma̱xpǘnewa ínachoõchi. Rü pemax rü Yeruéxarü naxnecüanearü to̱xma̱xtawa ngẽxmaxü̃ i natügu tá nüxü̃ ipeyangau.
17 ¡Natürü taxṹ i namaxã pegü pedaixü̃! ¡Rü ngéma peyachaxãchitanü! Rü tá nüxü̃ pedau nax ñuxãcü ya Tupana rü tá namaxã nügü nada̱i̱xü̃ rü pexü̃ ínapoxü̃xü̃. Pa Yudáanecüã̱xgü rü Pa Yerucharéü̃cüã̱xgüx, ¡taxṹ i pemuü̃exü̃ rü peba̱i̱xãchiexü̃! ¡Rü moxü̃ naxca̱x perüchoxü̃ erü Cori ya Tupana rü tá pemaxã nangẽxma!” —ñanagürü ga Yachié.
18 Rü yexguma ga nüma ga Yochapáx rü nacaxã́pü̱xü rü ñaxtüanegu nanangücuchi. Rü yexgumarüxü̃ ta guxü̃ma ga yema duü̃xü̃gü ga Yudáanecüã̱xgü rü ĩane ga Yerucharéü̃cüã̱xgü rü Tupanape̱xegu nanangücuchitanü rü nüxü̃ nicua̱xüü̃gü.
19 Rü yexguma ga yema Queáxtanüxü̃ rü yema Corétanüxü̃ ga Lebítanüxü̃ rü inachigü rü tagaãcü Cori ya Iraétanüxü̃arü Tupanaxü̃ nicua̱xüü̃gü.
20 Rü moxü̃ãcü ga pa̱xmamaxü̃chi ínarüdagü rü nügü namexẽẽgü nax yema naxnücüane ga Tecoáwaama naxĩxü̃ca̱x. Rü yexguma Yerucharéü̃wa inaxĩãchigu, rü nüma ga Yochapáx rü inachi rü ñanagürü: —¡Choxü̃́ iperüxĩnüe ya guxãma ya Yerucharéü̃cüã̱x rü Yudáanecüã̱x! ¡Rü nüxü̃́ peyaxõ ya tórü Tupana rü ngẽma norü orearü uruü̃gügu! Rü ngẽmaãcü taxũtáma ta̱xacü tüxü̃ nangupetü rü guxü̃táma rü mea tá ínanguxuchi —ñanagürü ga Yochapáx.
21 Rü yexguma marü duü̃xü̃gümaxã yadexa̱xguwena rü nüxü̃ naxuneta ga ñuxre ga wiyaetanüxü̃ nax nagu yacu̱xgüxü̃ca̱x ga naxchirugü ga üünexü̃. Rü ñu̱xũchi yema churaragüpe̱xegu naxĩ. Rü yemaacü Tupanaxü̃ nicua̱xüü̃güetanü namaxã ga ñaa wiyae ga ñaxü̃: —¡Moxẽ nüxna pexãgü ya Tupana! Erü nüma rü guxü̃guma tüxü̃ nangechaü̃ —ñaxü̃.
22 Rü yexguma inaxügügu ga nax nawiyaegüxü̃, rü nüma ga Cori ya Tupana rü ínanatüexẽxẽ ga yema Amóü̃tanüxü̃ rü Moátanüxü̃ rü yema ma̱xpǘne ga Cheícüã̱xgü ga yéma ĩxü̃ nax Yudátanüxü̃maxã nügü nada̱i̱xü̃ca̱x. Rü yemaacü ga yema Yudátanüxü̃arü uanügü rü nügütama nadai.
23 Rü yema Amóü̃tanüxü̃ rü Moátanüxü̃ rü yema duü̃xü̃gü ga ma̱xpǘne ga Cheícüã̱xmaxã nügü nadai rü ñu̱xmata nayue ga guxü̃ma ga yema Cheícüã̱xgü. Rü yemawena ga yema Amóü̃tanüxü̃ rü yema Moátanüxü̃maxã nügütama nadai ñu̱xmata nayue ga guxü̃ma.
24 Rü yexguma yema Yudátanüxü̃arü churaragü nawa ngugügu ga yema nachica ga nawa nüxü̃ idauxü̃ ga naxnecüanexü̃, rü norü uanügüca̱x nagu narüdaunü. Natürü duü̃xü̃gü ga yuexü̃xü̃ ga yexma naanegu nuquegüxü̃xicatama yéma nadaugü, rü bai ga wüxi ga maxü̃xü̃.
25 Rü ñu̱xũchi nüma ga Yochapáx rü norü churaragümaxã yéma naxĩ rü nanade ga norü uanügüarü yemaxü̃gü. Rü nanade ga muxũchixü̃ma ga nawemügü rü naxnegü rü naxchirugü rü ngã̱xãẽruü̃gü. Rü yema nax namuxũchixü̃ ga yema yemaxü̃gü rü yemaca̱x tomaepü̱x ga ngunexü̃ ningegü nax nanutaque̱xegüãxü̃ ga guxü̃ma. Natürü woo yemaacü rü tama guxü̃ nina.
26 Rü yema norü ãgümücü ga ngunexü̃gu rü Beracáarü doxonexü̃gu nangutaque̱xegü, rü yéma Cori ya Tupanaxü̃ nicua̱xüü̃gü. Rü yemaca̱x ga yema doxonexü̃ rü Beracágu nanaxüégagü. Rü woo ñu̱xma rü ta rü ngẽmatama nixĩ i naéga.*
27 Rü yemawena nüma ga ãẽ̱xgacü ga Yochapáx rü guxü̃ma ga Yudáanecüã̱xgü rü Yerucharéü̃cüã̱xgü rü taãẽãcü Yerucharéü̃ca̱x nawoegu. Rü nümagü rü nataãẽgü, yerü Cori ya Tupana rü norü uanügüme̱xẽwa ínanapoxü̃.
28 Rü yexguma Yerucharéü̃wa nangugügu rü Tupanapata ga taxü̃newa naxĩ, rü árpagü rü árpaxacügü rü cornétagümaxã nipaxetatanü.
29 Rü yexguma nüxü̃ nacuáchigagügu nax Tupana nada̱i̱xü̃ ga yema Iraétanüxü̃arü uanügü, rü guxü̃ma ga yema togü ga nachixü̃anegü rü poraãcü Tupanaxü̃ namuü̃e.
30 Rü yemaacü yexguma ãẽ̱xgacü yixĩxgu ga Yochapáx rü taãxẽwa nayexma ga nachixü̃ane yerü Tupana rü nanangüxmüxẽxẽ namaxã ga yema togü ga nachixü̃anegü ga nüxna ngaicamagüxü̃.
Ãẽ̱xgacü ga Yochapáchiga
31 Rü yexguma Yudáanearü ãẽ̱xgacüxü̃ yangucuchigu ga Yochapáx rü 35 ga taunecü nüxü̃́ nayexma. Rü 25 ga taunecü nixĩ ga ãẽ̱xgacü nax yixĩxü̃ ga Yerucharéü̃wa. Rü naé rü Achubá nixĩ ga ngĩéga. Rü ngĩma ga Achubá rü Chiríxacü iyixĩ.
32 Rü nüma ga Yochapáx rü nanatü ga Achárüxü̃ meama we̱xgu norü duü̃xü̃gümaxã inacua̱x. Rü guxü̃ma ga yema naxüxü̃ rü Tupanape̱xewa rü name.
33 Natürü tama inayanaxoxẽẽgü ga yema ngutaque̱xechicagü ga ma̱xpǘnegüwa yexmagüxü̃ ga nawa tupananetachicüna̱xagüxü̃ yacua̱xüü̃güxü̃ ga duü̃xü̃gü. Yerü tama guxü̃ma ga yema duü̃xü̃gü rü aixcüma norü o̱xigüarü Tupanawe narüxĩ.
34 Rü guxü̃ma ga nachiga ga ãẽ̱xgacü ga Yochapáx, rü nagu naxümatü ga yema popera ga Ananí nane ga Yeú ümatüxü̃. Rü noxri yangucuchigu nax ãẽ̱xgacü yixĩxü̃wa inaxügü rü ñu̱xmata norü yuwa nangu. Rü yexgumarüxü̃ ta nagu nanaxümatü ga yema popera ga Iraéanearü ãẽ̱xgacügüchiga nagu ümatüxü̃.
35 Rü yemawena nüma ga Yochapáx ga Yudáanearü ãẽ̱xgacü rü Ocochía ga Iraéanearü ãẽ̱xgacümaxã nanamexẽxẽ nax nügü nangü̃xẽẽgüxü̃ca̱x. Natürü nüma ga Ocochía rü poraãcü chixexü̃gu rüxĩnüxü̃ nixĩ.
36 Rü wüxigu nügümaxã nanaxügü ga wapurugü nax Tárchixwa naxĩxü̃ca̱x. Rü gumá wapurugü rü Echióü̃-guébearü türewa nixĩ ga naxügüãxü̃.
37 Rü yexguma ga Eriéche ga Marechácüã̱x ga Dodabá nane rü Yochapámaxã nüxü̃ nixu ga Tupanaarü ore ga ñaxü̃: —Yimá wapurugü ya cuxüxü̃ne rü Cori ya Tupana rü tá nagu napogü nagagu nax Ocochíamaxã cuxãmücüxü̃ —ñaxü̃. Rü yemaacü ningu ga yema ore, rü nipue rü nayi ga gumá wapurugü, rü yemaacü taxucürüwama Tárchixwa naxĩ.
