2 Crónicas 21:1-20
21 Rü nayu ga Yochapáx rü norü o̱xi ga Dabíarü Ĩanegu nanata̱xgü. Rü nawena rü nane ga Yoráü̃ nachicüxü ãẽ̱xgacüxü̃ ningucuchi.
2 Rü Yoráü̃ naenexẽgü ga Yochapáx nanegü ixĩgüxü̃ nixĩ ga Acharía, rü Yeié, rü Chacaría, rü Micaé, rü Chepatía. Rü guxü̃ma ga yemagü rü Yochapáx ga Yudáanearü ãẽ̱xgacü nanegü nixĩgü.
3 Rü nüma ga Yochapáx rü nüxü̃ nayanu ga muxü̃ma ga norü yemaxü̃gü ga úirunaxca̱x rü diẽrumünaxca̱x rü ñu̱xũchi togüama ga yemaxü̃gü ga itatanüxü̃. Rü yexgumarüxü̃ ta nüxü̃ nayanu ga ĩanegü ga ípoxegugüne ga Yudáanewa yexmagüne. Natürü Yoráü̃na nanaxã ga nachica nax nüxí Yudáanearü ãẽ̱xgacü yixĩxü̃ca̱x, yerü nüma nixĩ ga nane ga yacü yixĩxü̃.
4 Natürü nüma ga Yoráü̃ rü yexguma marü meama naxme̱xwa nayexmagu nax ãẽ̱xgacü yixĩxü̃, rü tüxü̃ nadai ga guxãma ga naenexẽgü. Rü yexgumarüxü̃ ta nanadai ga ñuxre ga Iraéanearü ãẽ̱xgacügü.
5 Rü nüma ga Yoráü̃ rü 32 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 8 ga taunecü ãẽ̱xgacü nixĩ ga Yerucharéü̃wa.
6 Natürü yema Iraéanearü ãẽ̱xgacügücümagu nixũ ga Yoráü̃ rü ñu̱xũchi yema Acáxtaagücümagu nixũ. Yerü naxma̱x ga Yoráü̃ rü Acáxacü iyixĩ. Rü yemaacü ga yema naxüxü̃ rü poraãcü nachixe ga Tupanape̱xewa.
7 Natürü nüma ga Cori ya Tupana rü tama inayanaxoxẽẽchaü̃ nax Dabítanüxü̃ rü Iraétanüxü̃arü ãẽ̱xgacügü yixĩgüxü̃. Yerü nüma ga Tupana rü marü Dabímaxã inaxuneta nax guxü̃gutáma Dabítaagü yixĩxü̃ i Iraétanüxü̃arü ãẽ̱xgacügü. Rü yexgumarüxü̃ ta Dabí nanegümaxã inaxuneta nax guxü̃gutáma nangẽxmaxü̃ i nataagü i ãẽ̱xgacüwa nguxü̃.
8 Rü yexguma Yudáanearü ãẽ̱xgacü yixĩxgu ga Yoráü̃ rü Edóü̃cüã̱xgü namaxã nanue, rü yemaca̱x yema Edóü̃cüã̱xgü rü nüxü̃ naxuneta ga noxrütama ãẽ̱xgacü.
9 Rü yemaca̱x ga Yoráü̃ rü yema norü churaragüarü capitáü̃gümaxã rü guxü̃nema ga norü carugü ga dairuü̃gümaxã yema naxĩ. Natürü yexguma yéma nangugügu rü yema Edóü̃tanüxü̃ rü marü nüxü̃ ínachomaeguãchi. Natürü chütacü rü ínarüdagü ga nüma ga Yoráü̃ rü yema norü churaragüarü capitáü̃gü ga carugümaxã icua̱xgüxü̃ rü yema Edóü̃tanüxü̃maxã nügü nadai rü nüxü̃ narüporamaegü.
10 Natürü ga Edóü̃tanüxü̃ rü Yudáanearü ãẽ̱xgacüme̱xẽwa ínanguxü̃. Rü ñomaü̃cüxü rü ta rü Iraétanüxü̃maxã nanue. Rü yexgumarüxü̃ ta nixĩ ga guma ĩane ga Lixná ga Yudáme̱xẽwa ínanguxuchixü̃, yerü nüma ga Yoráü̃ rü marü Cori ya norü o̱xigüarü Tupanana nixũgachi.
11 Rü ñu̱xũchi nüma ga Yoráü̃ rü Yudáanearü ma̱xpǘnegügu nayaxüchica ga tupananetachicüna̱xãgü nax yéma nüxü̃ yacua̱xüü̃güxü̃ca̱x. Rü nagagu nixĩ ga yema Yerucharéü̃cüã̱xgü ga tama Cori ya Tupanaca̱x nadaugüxü̃ rü chixexü̃gu nayixü̃ ga Yudáanecüã̱xgü.
12 Natürü yema ngunexü̃gügu rü nüma ga Yoráü̃ nanayaxu ga wüxi ga popera ga Tupanaarü orearü uruxü̃ ga Ería naxca̱x yéma muxü̃ ga ñaxü̃: —Yimá Cori ya curü o̱xi ga Dabíarü Tupana rü cuxü̃ ñanagürü: “Tama yema cunatü ga Yochapácümagu quixũ, rü bai i nagu quixũxü̃ ga nacüma ga Yudáanearü ãẽ̱xgacü ga Achá.
13 Natürü nagu quixũ i nacüma i chixexü̃ i ngẽma Iraéanearü ãẽ̱xgacügü nagu ĩxü̃. Rü cugagu nixĩ i ngẽma Yerucharéü̃cüã̱xgü rü Yudáanecüã̱xgü rü Cori ya Tupanaxü̃ nangümaexü̃ yema Acáxtanüxü̃rüxü̃. Rü ñu̱xũchi cunadai ga yema cuenexẽgü ga curü yexera mexü̃gu rüxĩnüexü̃.
14 Rü ngẽmaca̱x ya Cori ya Tupana rü curü duü̃xü̃güca̱x, rü cunegüca̱x, rü cuxma̱xgüca̱x, rü guxü̃ma i curü ngẽmaxü̃güca̱x tá ínananguxẽxẽ i wüxi i taxü̃ i guxchaxü̃.
15 Rü cuxca̱x tá ínananguxẽxẽ i muxü̃tama i da̱xaweanegü. Rü cuü̃nütawa tá namaxã quida̱xawe i wüxi i da̱xawe i ngearü üxü̃ã́xü̃, rü tá quiyixü̃nüta rü ngẽmagagu tá ínaxũxü̃ i cuü̃nüta”, ñanagürü ga Tupana —ñanagürü ga popera ga Tupanaarü orearü uruxü̃ ga Ería naxca̱x yéma muxü̃.
16 Rü nüma ga Cori ya Tupana rü Yoráü̃maxã nananuexẽxẽ ga yema Firitéugü rü ñu̱xũchi yema Arábiaanecüã̱x ga Etiopíaanearü ngaicamana yexmagüxü̃.
17 Rü yemaca̱x Yudáanewa naxĩ rü yexma nachocu rü nanade ga guxü̃ma ga yemaxü̃gü ga ãẽ̱xgacüpatawa nüxü̃ iyangaugüxü̃. Rü yexgumarüxü̃ ta nayagagü ga ãẽ̱xgacü nanegü rü naxma̱xgü. Natürü gumá nane ga rübumaecü ga Ocochíaxicatama yéma naxü̃tawa nayaxü.
18 Rü yemawena rü nüma ga Cori ya Tupana rü wüxi ga da̱xawe ga ngearü üxü̃ã́xü̃maxã nayada̱xawexẽxẽ ga naü̃nütawa.
19 Rü yexguma taxre ga taunecü inguxgu ga nax yadawexü̃ rü ínachoxü̃ ga naü̃nüta nagagu ga yema daawe. Rü yema norü daawearü ngu̱x i poraxü̃maxã nayu. Rü yema norü duü̃xü̃gü rü bai nax naégagu yanaixẽẽgüãxü̃ ga taxü̃ ga üxü yema norü o̱xigüca̱x naxügüãxü̃rüxü̃.
20 Rü 32 ga taunecü nüxü̃́ nayexma ga Yoráü̃ ga yexguma ãẽ̱xgacüxü̃ yangucuchigu. Rü 8 ga taunecü ãẽ̱xgacü nixĩ ga Yerucharéü̃wa. Rü yexguma nayu̱xgu rü taxuxü̃ma naxca̱x nangechaxü̃. Rü yexguma nayu̱xgu rü Dabíarü Ĩanegu nanata̱xgü. Natürü tama yema tauque ga ãẽ̱xgacügü nagu ta̱xgüxü̃gu nanata̱xgü.
