2 Crónicas 22:1-12
22 Rü nüma ga Yerucharéü̃cüã̱xgü rü Yoráü̃chicüxü ãẽ̱xgacüxü̃ nayangucuchixẽẽgü ga nane ga rübumaecü ga Ocochía. Yerü yexguma yema ngĩ́xta̱xagüxü̃ ga wüxigu Arábiaanecüã̱xmaxã Yudáanegu chocugu rü nanadai ga guxü̃ma ga Yudáanearü ãẽ̱xgacü ga Yoráü̃ nanegü ga rüyamaegüxü̃. Rü yemaca̱x Yudáanearü ãẽ̱xgacü ga Yoráü̃ nane ga Ocochíaxü̃ ningucuchixẽẽgü.
2 Rü nüma ga Ocochía rü 22 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü wüxi ga taunecü nixĩ nax Yerucharéü̃wa ãẽ̱xgacü yixĩxü̃. Rü naé ga Ataría rü Iraéanearü ãẽ̱xgacü ga Acáxacü iyixĩ. Rü ngĩrü o̱xi rü ãẽ̱xgacü ga Omrí nixĩ.
3 22:3-4 Rü nüma ga Ocochía rü yema norü o̱xi ga Acáxtaagürüxü̃ chixexü̃ naxü. Yerü yema naé rü chixexü̃maxã inaxucu̱xẽ, rü ñu̱xũchi Acáxtanüxü̃maxã naxãmücü ga Ocochía rü yemagagu tama name ga yema Cori ya Tupanape̱xewa naxüxü̃. Rü yexguma nanatü yuxguwena rü yemagü nixĩ ga Ocochíaarü ucu̱xẽruü̃gü ixĩgüxü̃ rü chixexü̃wa nagagüxü̃.
4 Nüü̃ nadau 22:3
5 Rü yema nax chixexü̃ ga ucu̱xẽgügu yaxũxü̃ ga Ocochía, rü yemaca̱x Acáx nane ga Yoráü̃ ga Iraéanearü ãẽ̱xgacümaxã nügü nanutaque̱xegü nax Ramóx i Garaáxanegu Chíriaarü ãẽ̱xgacü ga Achaémaxã nügü nada̱i̱xü̃ca̱x. Natürü ga yema Chíriacüã̱xgü rü Yoráü̃xü̃ nayapi̱xẽẽgü.
6 Rü yemaca̱x ga nüma ga Yoráü̃ rü Yereéca̱x nataegu nax yaxüxü̃ãxü̃ca̱x ga yema nax napíxü̃ ga yexguma Ramóxgu Chíriaanearü ãẽ̱xgacü ga Achaémaxã nügü nadaixgu. Rü yema nax yadawexü̃ ga Yoráü̃, rü yemaca̱x ga Ocochía rü naxü̃tawa naxũ nax íyadauãxü̃ca̱x.
Yeú rü Ocochíaxü̃ nima̱x
7 Rü nüma ga Tupana rü marü Ocochíamaxã nanaxuegu nax nayuxü̃ tá i ngẽxguma Yoráü̃xü̃tawa naxũxgu. Rü yexguma yexwacax Yoráü̃xü̃tawa nanguxgu rü Nimchí nane ga Yeúxü̃tawa ínayadaugü. Natürü ga Tupana rü marü Yeúxü̃ naxuneta nax Acáxtanüxü̃xü̃ nada̱i̱xü̃ca̱x.
8 Rü yexguma Acáxtanüxü̃xü̃ nadaixgu ga Yeú rü yéma namaxã inayarüxũ ga yema Yudáanearü ãẽ̱xgacügü rü ñu̱xũchi yema Ocochíatanüxügü ga norü ngü̃xẽẽruü̃gü ixĩgüxü̃. Rü nanadai ga guxü̃ma.
9 Rü ñu̱xũchi norü duü̃xü̃güxü̃ namu nax Ocochíaca̱x yadaugüxü̃ ga Chamáriagu yarücúxü̃. Rü yexma nayayauxgü. Rü Yeúxü̃tawa nanagagü rü nayama̱xgü. Rü nüxü̃ nacua̱xgü nax Yochapáx nataxa nax yixĩxü̃ rü yemaca̱x mea inanata̱xgü. Rü nüma ga Yochapáx rü aixcüma Cori ya Tupanaga naxĩnü. Rü yemaacü taxuxü̃ma ga Ocochíatanüxü̃ ínayaxü nax ãẽ̱xgacüxü̃ yangucuchixü̃ca̱x.
Ataría rü ngĩxchama Yudáanearü ãẽ̱xgacüxü̃ ngĩgü iyangucuchixẽxẽ
10 Rü yexguma ngĩma ga Ataría ga Ocochía naé nüxü̃ cua̱xgu ga ngĩne rü marü nax nayuxü̃, rü duü̃xü̃güxü̃ imu nax nadaiaxü̃ca̱x ga guxü̃ma ga Ocochía nanegü.
11 Natürü ga Yochebá ga ãẽ̱xgacü ga Yoráü̃acü ga Ocochíaeya̱x rü wüxi ga ucapugu Ataríacha̱xwa iyacu̱x ga Yoá ga Ocochía nane ngĩmaxã ga norü dauruxü̃. Rü yemaca̱x tama nayama̱xgü. Rü yema nixĩ ga naxüxü̃ ga Yochebá ga ãẽ̱xgacü ga Yoráü̃acü ga Ocochíaeya̱x ga chacherdóte ga Yoiadá naxma̱x ixĩcü.
12 Rü ngĩma ga Yoáarü dauruxü̃ rü 6 ga taunecü Tupanapata ga taxü̃negu namaxã iyacu̱x. Rü yexgumayane ga Ataría rü Yudáanewa ãẽ̱xgacü iyixĩ.
