2 Crónicas 23:1-21
23 Rü norü 7 ga taunecügu rü nüma ga Yoiadá rü naxca̱x nangema ga yema churaragüerugü ga Acharía ga Yeruáü̃ nane, rü Ismaé ga Yoanáü̃ nane rü Acharía ga Obéx nane rü Maachía ga Adaía nane rü Erichapáx ga Chicrí nane. Rü nügü nade nax nügümaxã nagu naxĩnüexü̃ca̱x nax nügü nangü̃xẽẽgüxü̃.
2 Rü nüma ga yemagü rü guxü̃nema ga Yudáanearü ĩanegüwa naxĩ. Rü nayaxĩtaque̱xexẽẽtanü ga guxü̃ma ga yema Lebítanüxü̃ rü yema Iraétanüxü̃maxã icua̱xgüxü̃. Rü guxü̃ma ga yemagü rü Yerucharéü̃wa naxĩ.
3 Rü guxü̃ma ga yema Yerucharéü̃gu ngutaque̱xexü̃ rü ãẽ̱xgacü ga Yoámaxã wüxi ga uneta naxügü ga Tupanapata ga taxü̃newa. Rü yexguma ga nüma ga Yoiadá rü ñanagürü nüxü̃: —Dücax, daa nixĩ ya nane ga tórü ãẽ̱xgacü ya Ocochía. Rü ñu̱xmax rü daa nane tá nixĩ ya tórü ãẽ̱xgacü ixĩcü, yerü nüma ya Tupana rü Dabímaxã nanaxuegu nax ngẽma nataagü rü tá ãẽ̱xgacü yaxĩgüxü̃.
4 Rü chanaxwa̱xe nax tomaepü̱xtücumügu pegü pitoyexü̃ i pema i chacherdótegü rü Lebítanüxü̃. Rü ngü̃chigaarü ngunexü̃gu rü wüxitücumü rü tá pedauxü̃taegü i Tupanapata ya taxü̃nearü ĩã̱xgüwa.
5 Rü ngẽma totücumü rü ãẽ̱xgacüpatawa tá nadauxü̃taegü. Rü ngẽma totücumü rü tá nadauxü̃taegü i ngẽma Tupanapata ya taxü̃nea̱xtüarü ĩã̱x i Chimiẽ́tugu ãégaxü̃wa. Rü yoxni i guxü̃ma i duü̃xü̃gü rü tá Tupanapata ya taxü̃nea̱xtügügu nangutaque̱xegü.
6 Rü ngẽma chacherdótegü rü Lebítanüxü̃xica tátama nixĩ i nagu chocuxü̃ ya yima Tupanapata ya taxü̃ne, erü nümagü nixĩ i marü Tupanape̱xewa nügü yamexẽẽgüxü̃ nax Tupanapata ya taxü̃newa naxügüã̱xü̃ca̱x i ngẽma norü puracü. Natürü ngẽma togü i duü̃xü̃gü rü tá ĩã̱xtüwa tátama Tupanape̱xewa nadauxü̃taegü.
7 Rü ngẽma Lebítanüxü̃ tá nixĩ i ãẽ̱xgacüxü̃ íchomaeguãchixü̃ nax nüxna nadaugüxü̃ca̱x. Rü nümagü rü tá nixãxne rü tá ínamegümare nax tüxü̃ yama̱xgüxü̃ca̱x ya texé ya yíxema Tupanapata ya taxü̃negu ücuchaü̃xe. Rü ngextá nüma ya ãẽ̱xgacü ínaxũxchaü̃xü̃wa rü nümagü tá nixĩ i nüxna nadaugüxü̃ —ñanagürü ga Yoiadá.
8 Rü yexguma ga guxü̃ma ga yema Lebítanüxü̃ rü guxü̃ma ga yema Yudáanecüã̱x ga duü̃xü̃gü rü yema chacherdóte ga Yoiadá nüxü̃ ixuxü̃ãcü nanaxügü. Rü wüxichigü ga yema Lebítanüxü̃arü ãẽ̱xgacü rü meama norü duü̃xü̃gümaxã inacua̱x. Rü nüma ga Yoiadá rü namaxã nüxü̃ nixu nax tama íyaxĩxü̃ca̱x ga yema marü rüngü̃güxü̃ ga nax nadauxü̃taegüxü̃ rü yexmatama narücho naxü̃tagu ga yema yexwacax ngü̃chigaarü ngunexü̃gu ichocuxü̃ nax nadauxü̃taegüxü̃ca̱x.
9 Rü yemawena nüma ga chacherdóte ga Yoiadá rü yema capitáü̃güna nanana ga yema wocaegü rü poxü̃ruü̃gü ga ü̃pa ãẽ̱xgacü ga Dabíarü ixĩgüxü̃ ga yexma Tupanapata ga taxü̃negu nuxü̃.
10 Rü yemawena rü yema ĩã̱xgügu nayanu ga yema churaragü ga wocaemaxã ixãxnexü̃. Rü guma Tupanapata ga taxü̃nearü súrwaama inaxügü rü ñu̱xmata norü nórteguama yacuá. Rü yema ãmarearü guruü̃cüwagu nayanu rü ñu̱xũchi ãẽ̱xgacüxü̃ ínachomaeguãchi nax nüxna nadaugüxü̃ca̱x.
11 Rü yexguma nüma ga Yoiadá rü nanegü rü duü̃xü̃güpe̱xewa nanagagü ga Yoá, rü nayanga̱xcuchigü ga norü nga̱xcueruxü̃ rü nüxna nanaxãgü ga wüxi ga popera ga mugü nagu ümatüxü̃. Rü yemawena rü chíxü̃maxã nanabaerugü, rü yemaacü ãẽ̱xgacüxü̃ nayangucuchixẽẽgü. Rü guxü̃ma ga yema duü̃xü̃gü ga yéma yexmagüxü̃ rü tagaãcü ñanagürügü: —¡Namaxü̃ ya ãẽ̱xgacü! —ñanagürügü.
12 Rü yexguma yemaxü̃ naxĩnügu ga Ataría nax íyacuxcuxü̃ ga yema duü̃xü̃gü rü yéma Tupanapata ga taxü̃newa ixũ.
13 Rü Yoáxü̃ idau nax gumá caxta ga Tupanapataca̱x íxücuxü̃wa yexmanexü̃tagu nachixü̃. Rü yexgumarüxü̃ ta nüxü̃ idau ga yema churaragüerugü ga nacüwagu chigüxü̃ rü yema paxetatanüxü̃ ga nacüwawa yexmagüxü̃. Rü guxü̃ma ga yema duü̃xü̃gü rü nataãẽgü rü norü cornétagügu nicuegü. Rü yema wiyaetanüxü̃ rü norü paxetaruü̃gümaxã napaxetagü rü norü wiyaegümaxã Tupanaxü̃ nicua̱xüü̃gü. Rü yexguma yemaxü̃ nada̱u̱xgu ga ngĩma ga Ataría rü ngĩgü irügáutechiru rü aita ixü rü ngĩgürügü: —¡Taechitawa̱xegüxü̃. Taechitawa̱xegüxü̃! —ngĩgürügü.
14 Rü yexguma nüma ga chacherdóte ga Yoiadá rü yema churaragüerugüxü̃ namu rü ñanagürü: —¡Ngĩxü̃ ípegaxüchi rü taxṹ tá i nuxã Tupanapata ya taxü̃negu ngĩxü̃ pimáxü̃ rü yexa düxétügu ngĩxü̃ peyarümá! Rü texé ya yixema ngĩxü̃ ípoxü̃chaü̃xe rü ngẽxgumarüxü̃ tá ta tüxü̃ pima̱x —ñanagürü.
15 Rü yexguma rü ngĩxü̃ niyauxgü rü yema cowarugü nagu mugüxü̃waama yexmaxü̃ ga ĩã̱xwa ngĩxü̃ ínagaxüchigü rü ãẽ̱xgacüpatawaama ngĩxü̃ nagagü rü yexma ngĩxü̃ nima̱xgü.
16 Rü yemawena ga Yoiadá rü nüma ga ãẽ̱xgacü rü ñu̱xũchi yema duü̃xü̃gü rü wüxi ga uneta nügümaxã naxügü nax nümagü rü guxü̃gutáma Tupanaga naxĩnüexü̃.
17 Rü yemawena rü Baáarü ngutaque̱xepataü̃wa naxĩ rü nagu napogüe. Rü yexgumarüxü̃ ta nagu napogüe ga yema Baáarü ãmarearü guruü̃gü rü yema Baáchicüna̱xãgü. Rü yema Baáarü chacherdóte ga Matáü̃ rü yema norü ãmaregüarü guruü̃güpe̱xegu nayama̱xgü.
18 Rü yemawena ga nüma ga Yoiadá rü Tupanapata ga taxü̃negu nanamugü ga churaragü nax nüxna nadaugüxü̃ca̱x. Rü yema churaragü rü chacherdótegüme̱xẽwa rü Lebítanüxü̃me̱xẽwa nayexmagü. Rü yema chacherdótegü rü Lebítanüxü̃ ga ü̃pa ga Dabí woetama marü nüxü̃ nayanuxũ ga norü ngunexü̃gü ga nagu tá Tupanaca̱x ínaguaxü̃ ga ãmaregü ga Moiché ümatüxü̃ ga mugüwa nüxü̃ yaxuxü̃rüxü̃. Rü Dabí rü yemaacü nanamu nax wiyaemaxã taãẽãcü Tupanaxü̃ yacua̱xüü̃güxü̃ca̱x.
19 Rü nüma ga Yoiadá rü yexgumarüxü̃ ta yexma nanamugü ga ĩã̱xarü dauruü̃gü nax nüxna nadaugüxü̃ca̱x ga Tupanapata ga taxü̃nearü ĩã̱xgü nax taxúxema ixücuxü̃ca̱x ya wüxíe ya tama Tupanape̱xewa tügü mexeẽ́xe.
20 Rü yemawena rü naxca̱x nangema ga churaragüarü capitáü̃gü, rü yatügü ga tachigaxü̃, rü duü̃xü̃güarü ãẽ̱xgacügü rü ñu̱xũchi guxü̃ma ga duü̃xü̃gü. Rü guxü̃ma ga yemagü rü ãẽ̱xgacüxü̃ ínixümücügü nax Tupanapata ga taxü̃newa ínachoxü̃xü̃ ñu̱xmata ãẽ̱xgacüpatawa nangugü. Rü guma ãẽ̱xgacüpataarü ĩã̱x ga taxü̃wa namaxã nachocu. Rü ñu̱xũchi yema ãẽ̱xgacüarü tochicaxü̃wa nanatoxẽẽgü.
21 Rü yemaacü ga guxü̃ma ga duü̃xü̃gü rü nataãẽgü rü nanaxüchigagü. Rü Ataría yuxguwena rü taãẽwa nayexma ga guma ĩane.
