2 Crónicas 24:1-27
24 Rü yexguma inaxügüãgu ga Yoá nax ãẽ̱xgacü yixĩxü̃ rü nüxü̃́ nayexma ga 7 ga norü taunecü. Rü 40 ga taunecü nixĩ nax Yerucharéü̃wa ãẽ̱xgacü yixĩxü̃. Rü naé rü ĩane ga Bechébacüã̱x tixĩ rü ngĩéga rü Chibiá nixĩ.
2 Rü yexguma namaxü̃gu ga chacherdóte ga Yoiadá rü guxü̃ma ga yema Yoá üxü̃ rü Cori ya Tupanape̱xewa rü name.
3 Rü Yoiadá rü taxre ga ngecümaxã Yoáxü̃ naxüxma̱x. Rü yema ngecügüwa rü nüma ga Yoá rü nüxü̃́ nayexma ga nanegü rü naxacügü.
4 Rü yemawena rü wüxi ga ngunexü̃gu ga Yoá rü nagu narüxĩnü nax namexẽẽãxü̃ ga Tupanapata ga taxü̃ne.
5 Rü yemaca̱x yema chacherdótegümaxã rü Lebítanüxü̃maxã nangutaque̱xe rü ñanagürü nüxü̃: —¡Yudáanewa ngẽxmagüne ya ĩanegüwa pexĩ, rü guxü̃ma ga Iraétanüxü̃tanüwa penade i diẽru nax wüxichigü ya taunecü ngẽma diẽrumaxã namexẽxẽxü̃ca̱x ya Tupanapata ya taxü̃ne! ¡Rü pepaxaãxẽgü nax penaxüxü̃ i ngẽma pexü̃ chamuxü̃! —ñanagürü. Natürü ga Lebítanüxü̃ rü tama paxa nanaxügü ga yema puracü.
6 Rü yemaca̱x ga ãẽ̱xgacü rü chacherdótegüarü ãẽ̱xgacü ga Yoiadáca̱x nangema rü ñanagürü nüxü̃: —¿Tü̱xcüü̃ tama icunamuãchitanü i Lebítanüxü̃ nax Yudáanewa rü Yerucharéü̃wa naxĩxü̃ nax ngĩxü̃ yadexü̃ca̱x i ngẽma diẽru ga Moiché ya Tupanaarü duü̃xü̃ rü Iraétanüxü̃maxã ngĩxü̃ unetagücü nax ngĩxü̃ nadexü̃ca̱x nax Tupanapata ngĩmaxã namexẽxẽgüxü̃ca̱x? —ñanagürü.
7 Yerü Ataría ga chixexü̃arü ürüxü̃ ixĩcü rü ngĩrü duü̃xü̃gümaxã Tupanapata ga taxü̃negu ixücu rü ngĩrü tupananetagüaxü̃́ inade ga guxü̃ma ga yemaxü̃gü ga Cori ya Tupanapata ga taxü̃newa yexmagüxü̃.
8 Rü yexguma ga ãẽ̱xgacü rü norü duü̃xü̃güxü̃ namu nax wüxi ga baú ga diẽruchixü̃ naxügüxü̃. Rü yema baú ga diẽruchixü̃ rü Tupanapata ga taxü̃nearü ĩã̱x ga nawa ixücuxü̃xü̃tagu nanaxǘgü.
9 Rü yemawena ga yema Lebítanüxü̃ rü guxü̃ma ga Yudáanewa rü Yerucharéü̃wa nüxü̃ narüxugü nax Cori ya Tupanaxü̃ta ga taxü̃newa ngĩxü̃ nangegüxü̃ca̱x ngĩxe̱xpü̱x ga yema diẽru ga Moiché ga Tupanaarü duü̃ ga nachica ga chianexü̃wa Iraétanüxü̃maxã ngĩgu unetacü nax Tupanana ngĩxü̃ naxãgüxü̃ca̱x.
10 Rü guxü̃ma ga ãẽ̱xgacügü rü guxü̃ma ga duü̃xü̃gü rü wüxichigü taãẽãcü yema baúgu ngĩxü̃ nayanu ga norü diẽru ñu̱xmata naxããcu ga yema baú.
11 Rü yema Lebítanüxü̃ rü yexguma marü nüxü̃ nadaugügu nax marü naxããcuxü̃ rü ãẽ̱xgacüarü ngü̃xẽẽruü̃xü̃tawa nanangegü ga yema baú ga diẽru nagu nucuxü̃ nax ngĩxü̃ nadaugüxü̃ca̱x nax ñuxre yixĩxü̃. Rü yexguma marü nüxü̃ nadaugügu nax marü naxããcuxü̃, rü yéma naxĩ ga ãẽ̱xgacüarü poperaarü ümatüruxü̃ rü chacherdótegüarü ngü̃xẽẽruxü̃. Rü yemagü nixĩ ga nadeãcugüxü̃ ga yema baú. Rü yexguma marü nangeãcugu rü wenaxarü nachicagu nayaxǘgü ga yema baú. Rü yemaacü ga wüxichigü ga ngunexü̃gu rü mucü ga diẽru ngĩxü̃ nanutaque̱xegü.
12 Rü nüma ga ãẽ̱xgacü rü chacherdóte ga Yoiadá rü yema Tupanapata ga taxü̃nearü mexẽẽmaxã icuáxü̃na ngĩxü̃ naxã ga yema diẽru nax naxca̱x nadaugüxü̃ca̱x ga yema nutaarü mexẽẽcüwaruü̃gü rü corapinagü nax Tupanapata ga taxü̃ne namexẽẽgüxü̃ca̱x. Rü yexgumarüxü̃ ta naxca̱x nadaugü ga yema nüxü̃ icuáxü̃ nax fieruwa rü bróũchewa ta̱xacü naxüxü̃ nax yemagü ínaxüxüxü̃ca̱x ga Tupanapata ga taxü̃nearü yemaxü̃gü.
13 Rü yema Tupanapata ga taxü̃nearü mexẽẽmaxã icuáxü̃ rü inanaxügüe ga nax napuracüexü̃. Rü nümagü aixcüma mea napuracüe ñu̱xmata nagú ga yema puracü. Rü yemaacü meama nayamexẽẽgü ga guma Tupanapata ga taxü̃ne rü noxrirüü̃tama nixĩ.
14 Rü yexguma marü meama nüxü̃́ yangugügu ga yema puracü ga naxügüxü̃, rü ãẽ̱xgacü ga Yoáxü̃tawa rü chacherdóte ga Yoiadáxü̃tawa ngĩxü̃ nangegü ga yema diẽru ga íyaxücü. Rü yemamaxã nanaxü ga nawechigü ga Tupanapata ga taxü̃neca̱x ixĩxü̃. Rü nanaxü ga yema yemaxü̃gü ga namaxã Tupanaxü̃ yacua̱xüü̃güxü̃ rü yema ãmarearü guruü̃arü yemaxü̃gü. Rü yemaacü nanaxü ga cuyeragü rü axepáxü̃gü rü poratugü ga úirunaxca̱x rü diẽrumünaxca̱x. Rü yexguma namaxü̃gu ga Yoiadá rü Tupanapata ga taxü̃newa guxü̃guma Cori ya Tupanaca̱x ãmare ínagugüxü̃.
15 Rü Yoiadá rü marü naya, rü yexguma marü nayaxüchigu rü nayu. Rü yexguma nayu̱xgu rü 130 ga taunecü nüxü̃́ nayexma.
16 Rü Dabíarü Ĩanearü tauquegu nanata̱xgü ga ãẽ̱xgacügü nagu ta̱xgüxü̃gu, yerü nüma ga Yoiadá rü Iraétanüxü̃pe̱xewa rü Cori ya Tupanape̱xewa rü ñu̱xũchi Tupanapata ga taxü̃newa mexü̃ naxü.
17 Rü nawena nax nayuxü̃ ga Yoiadá rü ãẽ̱xgacü ga Yoáxü̃tawa naxĩ ga Yudáanearü ãẽ̱xgacügü rü Yoáxü̃ narümecugü. Rü nüma ga ãẽ̱xgacü rü nanayaxu ga norü ucu̱xẽgü ga nüxna naxãgüxü̃.
18 Rü yemaca̱x ga nüma ga ãẽ̱xgacü rü yema Yudáanearü ãẽ̱xgacügü rü Tupanana nixĩgachi rü yéma nanata̱xgümare ga guma napata ga norü o̱xigüarü Tupanapata ga taxü̃ne. Rü inanaxügüe nax Acheráchicüna̱xãxü̃ yacua̱xüü̃güxü̃ rü ñu̱xũchi togü ga tupananetachicüna̱xãgüxü̃ yacua̱xüü̃güxü̃. Rü Cori ya Tupana rü yema chixexü̃ ga naxügüxü̃ca̱x rü Yudáanecüã̱xgümaxã rü Yerucharéü̃cüã̱xgümaxã nanu.
19 Natürü woo yema chixexü̃gu nax namaxẽxü̃ ga duü̃xü̃gü, rü nüma ga Cori ya Tupana rü natanüwa nanamugüama ga norü orearü uruü̃gü nax naxca̱x nawoeguxü̃ca̱x. Natürü nüma ga duü̃xü̃gü rü tama yema Tupanaarü orearü uruü̃güga naxĩnüe.
20 Rü yemaca̱x ga Tupanaãxẽ rü chacherdóte ga Yoiadá nane ga Chacaríana nangu. Rü nüma ga Chacaría rü wüxi ga nachica ga daxũgu ünagüxü̃gu nachinagü, rü guxü̃ma ga duü̃xü̃güxü̃ ñanagürü: —Cori ya Tupana rü ñanagürü pexü̃: “¿Tü̱xcüü̃ tama naga pexĩnüe i chorü mugü? ¿Tü̱xcüü̃ pematama naxca̱x pedau i perü poxcu? Pema rü choxna pixĩgachitanü, rü ngẽmaca̱x i choma rü tá ta pexna chixũgachi” —ñanagürü.
21 Natürü ga yema duü̃xü̃gü rü nügü nixucu̱xẽgü nax Chacaríaxü̃ yama̱xgüxü̃ca̱x. Rü nüma ga ãẽ̱xgacü rü yema duü̃xü̃güxü̃ namu nax Tupanapata ga taxü̃nea̱xtügu nutamaxã ínamuxũchigüãxü̃ca̱x. Rü yemaacü nayu.
22 Rü nüma ga ãẽ̱xgacü ga Yoá rü nüxü̃ inarüngüma nax ñuxãcü Chacaría nanatü ga Yoiadá poraãcü nüxü̃ rüngü̃xẽẽxü̃. Natürü woo yemaacü nax nüxü̃ nangü̃xẽẽxü̃, rü nüma ga Yoá rü Yoiadá nane ga Chacaríaxü̃ nima̱x. Rü nüma ga Chacaría rü yexguma nayu̱xgu rü tagaãcü ñanagürü: —¡Nüxü̃ nadau, Pa Cori Pa Tupanax i ñaa naxüexü̃ i duü̃xü̃gü! Rü cuma tá nixĩ i nüxna cucaxü̃ naxca̱x nax choxü̃ yama̱xgüxü̃ —ñanagürü.
23 Rü yexguma marü wüxi ga taunecü ngupetügu nax Chacaríaxü̃ yama̱xgüxü̃, rü meama primaberagu rü Chíriaanearü churaragü rü Yoáca̱x ínayaxüãchi. Rü Yudáanegu rü Yerucharéü̃gu nachocu rü nanadai ga guxü̃ma ga guma ĩanearü ãẽ̱xgacügü. Rü nanadeãcu ga guma ĩane, rü ñu̱xũchi norü ãẽ̱xgacü ga Damácuwa yexmaxü̃xü̃tawa nanamugü ga yema nadexü̃.
24 Rü woo nax noxretama yixĩxü̃ ga yema Chíriaanearü churaragü, natürü Cori ya Tupana rü nüxü̃́ nanatauxchaxẽxẽ ga yema noxremarexü̃ ga churaragü nax nada̱i̱xü̃ca̱x ga yema muxü̃ma ga Yudáanearü churaragü. Rü yemaacü nangupetü yerü nüma ga Yoá rü yema Yudátanüxü̃ rü tama Cori ya norü o̱xigüarü Tupanaga naxĩnüe. Rü yemaacü ga Yoá rü yema taxü̃ ga poxcu ga nümatama naxca̱x nadauxü̃maxã napoxcu.
25 Rü yema Chíriaanearü churaragü rü poraãcü Yoáxü̃ nanapi̱xẽẽgü, rü yemaacü yéma nanata̱xgü rü nachiü̃ca̱x nawoegu. Rü noxrütama ngü̃xẽẽruü̃gü ga Yoá rü namaxã nanue. Rü norü pechicaxü̃gutama nayama̱xgü nax yemaacü yangutanüxẽẽãxü̃ca̱x nax chacherdóte ga Yoiadá nane ga Chacaríaxü̃ yamáxü̃. Rü yexguma yama̱xgüãguwena rü Dabíarü Ĩanegu nanata̱xgü. Natürü tama yema tauque ga ãẽ̱xgacügü nagu ta̱xgüxü̃gu nanata̱xgü.
26 Rü yema namaxã rüxuanügüxü̃ nixĩ ga wüxi ga Amóü̃tanüxü̃ ga Chabáx ga Chimáx nane, rü wüxi ga Moátanüxü̃ ga Yochabá ga Chimríx nane.
27 Rü guxü̃ma i Yoá nanegüchiga, rü yema Tupanaarü orearü uruü̃gü nüxü̃ ixugüxü̃chiga, rü ñu̱xũchi Tupanapata ga taxü̃nearü mexẽẽchiga rü popera ga ãẽ̱xgacügüchiga nagu ümatüxü̃gu naxümatü. Rü nawena rü ãẽ̱xgacüxü̃ ningucuchi ga nane ga Amachía.
