2 Crónicas 25:1-28
25 Rü nüma ga Amachía rü 25 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 29 ga taunecü nixĩ nax Yerucharéü̃wa ãẽ̱xgacü yixĩxü̃. Rü naé rü Yoadáü̃ nixĩ ga ngĩéga rü Yerucharéü̃cüã̱x iyixĩ.
2 Rü yema naxüxü̃ ga Amachía rü Cori ya Tupanape̱xewa name. Natürü tama aixcüma guxü̃guma mexü̃gu narüxĩnü.
3 Rü yexguma marü meama naxme̱xwa nayexmagu nax ãẽ̱xgacü yixĩxü̃, rü nüma ga Amachía rü nanadai ga guxü̃ma ga yema nanatüxü̃ ima̱xgüxü̃.
4 Natürü tama nanadai ga yema nanegü ga yema nanatüxü̃ ima̱xgüxü̃. Yerü naga naxĩnü ga yema Moichéarü mugüwa ümatüxü̃ ga ñaxü̃: —Yíxema papagü rü taxũtáma tapoxcue naxca̱x i ngẽma chixexü̃ i tümanegü ügüxü̃, rü yíxema nanegü rü taxũtáma tapoxcue naxca̱x i ngẽma chixexü̃ i tümanatügü ügüxü̃. Natürü wüxíechigü rü tá tayu naxca̱x i ngẽma tümaarütama chixexü̃ —ñaxü̃.
5 Rü nüma ga Amachía rü nananutaque̱xe ga guxü̃ma ga Yudáanearü rü Bẽyamíü̃anearü duü̃xü̃gü ga iyatüxü̃. Rü nügütanüxü̃wachigü mea inayanu ga yema duü̃xü̃gü. Rü nüxü̃ naxuneta ga churaragüerugü ga 1,000 ga churaragümaxã icuáxü̃ rü churaragüerugü ga 100 ga churaragümaxã icuáxü̃. Rü yema yatügü ga 20 ga taunecü rüe̱xna yexera nüxü̃́ yexmaxü̃wa nixĩ ga inaxügüãxü̃ nax yaxugüãxü̃. Rü guxü̃wama rü 300,000 wa nangu ga yema yadexechixü̃ ga churaragü ga mexü̃ nax daiwa naxĩxü̃ namaxã ga norü wocaegü rü poxü̃ruü̃gü.
6 Rü naétü naxca̱x nataxegü ga 100,000 ga Iraéanearü churaragü. Rü 3,300 quíru ga diẽrumümaxã nanaxütanü.
7 Natürü wüxi ga Tupanaarü orearü uruxü̃ rü naxü̃tawa naxũ rü nüxü̃ ñanagürü: —¡Pa Ãẽ̱xgacüx, taxṹ i Iraéanewa churaragüca̱x cungemaxü̃! Erü Cori ya Tupana rü tama natanüwa nangẽxma i guxü̃ma i ngẽma Efraíü̃tücumü.
8 Natürü ngẽxguma tá Iraéanearü churaragüarü ngü̃xẽẽca̱x ícuca̱xgu nax curü churaragümaxã daiwa naxĩxü̃ca̱x, rü nüma ya Tupana rü tá ngẽma curü uanügüme̱xẽgu cuxü̃ nanguxẽxẽ. Erü nüma ya Tupana rü nüxü̃́ nangẽxma i pora nax tüxü̃ nangü̃xẽẽxü̃ rüe̱xna tüxü̃ nada̱i̱xü̃ —ñanagürü.
9 Rü nüma ga Amachía rü yema Tupanaarü orearü uruxü̃na naca rü ñanagürü: —Natürü, ¿ta̱xacü tá nangupetü namaxã i ngẽma 3,300 quíru nagúxü̃ i diẽrumü i ngẽma Iraéanearü churarana chaxãxü̃? —ñanagürü. Rü yema Tupanaarü orearü uruxü̃ nanangãxü̃ rü ñanagürü: —Nüma ya Cori ya Tupana rü nüxü̃́ nangẽxma i pora nax ngẽma diẽrumüarü yexera cuxna naxãxü̃ —ñanagürü.
10 Rü yemaca̱x ga Amachía rü yema norü churaragüna nayamugachitanü ga yema churaragü ga Efraíü̃tücumüwa ne ĩxü̃, rü ñu̱xũchi napataca̱x nanamuegutanü. Natürü ga nümagü rü Yudáanecüã̱xmaxã nanue rü poraãcü nanueãcüma napatagüca̱x nawoegu.
11 Rü nüma ga Amachía rü nügü ínarüpora rü doxonexü̃ ga Yucüragu ãégaxü̃wa nanagagü ga norü churaragü, rü yexma 10,000 ga Cheíanearü churaragüxü̃ nadai.
12 Rü nüma ga Yudáanearü churaragü rü naétü ínanayauxü̃ ga to ga 10,000. Rü ñu̱xũchi wüxi ga ma̱xpǘnewa nanagagü. Rü yéma nanawoü̃ rü guxü̃ma inabüe rü yexma nayue.
13 Rü yema Iraéanearü churaragü ga Amachía napataca̱x woeguxẽẽxü̃ nax tama norü churaragütanügu naxãgüxü̃ca̱x ga daiwa, rü nümagü rü yoxni Yudáanearü ĩanegügu nachocu. Rü Chamáriawa inanaxügüe rü ñu̱xmata Bex-oróü̃wa nangugü, rü 3,000 ga duẽxẽgü tüxü̃ nadai. Rü ñu̱xũchi nayana ga muxü̃ma ga yemaxü̃gü ga naxca̱x nangĩ̱xgüxü̃.
14 Rü yexguma nataegu̱xgu ga Amachía nax Edóü̃cüã̱xgüxü̃ nada̱i̱xü̃, rü nayana ga yema Cheíarü tupanachicüna̱xãgü. Rü nüma ga Amachía rü ñu̱xũchi namaxã natupanaxã̱x. Rü nüxü̃ nicua̱xüxü̃ rü naxca̱x ínanagu ga pumara ga iyixichixü̃.
15 Rü yemaca̱x ga Cori ya Tupana rü Amachíamaxã nanu. Rü wüxi ga Tupanaarü orearü uruü̃xü̃ naxca̱x yéma nanamu nax namaxã nüxü̃ yanaxuxü̃ca̱x, rü ñanagürü nüxü̃: —¿Tü̱xcüü̃ nüxü̃ quicua̱xüxü̃ i ngẽma Edóü̃anearü tupananetagü i tama cuxme̱xwa ínanguxü̃xẽẽxü̃ i ngẽma Edóü̃cüã̱xgü? —ñanagürü.
16 Rü yexguma yemaxü̃ iyaxuxgu ga gumá Tupanaarü orearü uruxü̃, rü nüma ga ãẽ̱xgacü ga Amachía rü nanangãxü̃ga rü ñanagürü nüxü̃: —¿Rü texé cuxü̃ taxuneta nax ãẽ̱xgacüarü ucu̱xẽruxü̃ quixĩxü̃ca̱x? ¡Marütama i ngẽma nüxü̃ quixuxü̃! ¡Ẽ̱xna cunaxwa̱xe nax cuxü̃ yama̱xgüxü̃! —ñanagürü. Rü nüma ga gumá Tupanaarü orearü uruxü̃ rü marü tama nüxü̃ nica̱a̱xü̃chigü. Natürü nüxü̃ ñanagürü: —Choma rü nüxü̃ chacua̱x nax Tupana rü marü cumaxã naxueguãxü̃ nax cuyuxü̃ nagagu i ñaa cuxüxü̃ rü ngẽma nax tama cunayauxchaü̃xü̃ i chorü ucu̱xẽ —ñanagürü.
17 Natürü nüma ga Amachía ga Yudáanearü ãẽ̱xgacü rü tama inaxĩnü̃chaü̃, rü norü uxcuxẽruü̃güarü ucu̱xẽgu nixũama. Rü yemaca̱x norü duü̃xü̃güxü̃ namu nax Iraéanearü ãẽ̱xgacü ga Yoá ga Yoacá nane ga Yeútaamaxã nüxü̃ yanaxugüxü̃ca̱x ga ñaa ore: —¡Ẽcü ñu̱xma nua naxũ rü yigü tadauxchiwegü! —ñanagürü.
18 Natürü nüma ga Iraéanearü ãẽ̱xgacü ga Yoá rü ñaxü̃ ga ore Amachíaca̱x namuegu: —Wüxi ga chuchuxü̃ ga Líbanucüã̱x rü ocayiwa ga Líbanucüã̱xca̱x nimuga rü ñanagürü nüxü̃: “Cuxacü chaunena ngĩxü̃ namu nax ngĩmaxã naxãmaxü̃ca̱x”, ñanagürü. Natürü wüxi ga naeü̃ rü yema chuchuxü̃ ínaxüxü̃wa naxüpetü rü nawa nanga rü yexma nayapuxcuchi rü nayu.
19 Rü cumax, Pa Amachíax, rü nüxü̃ quixu nax Edóü̃tanüxü̃xü̃ cuda̱i̱xü̃. Rü ngẽmaca̱x cugü quicua̱xüxü̃ rü yexeraxü̃ i poraca̱x cudau. Rü name nixĩ i cupatawatama cungexmaxü̃. ¿Rü tü̱xcüü̃ curü guxchaxü̃ca̱xtama cudauxchaü̃ rü ñu̱xũchi Yudáanearü guxchaca̱x? —ñaxü̃.
20 Natürü nüma ga Amachía rü tama naga naxĩnüchaü̃, yerü Tupana rü marü yemaacü namaxã nanaxuegu nax Iraéanearü ãẽ̱xgacü ga Yoáme̱xẽgu nayixü̃ ga Yudátanüxü̃, nagagu nax Edóü̃anearü tupananetaxü̃ yacua̱xüü̃güxü̃.
21 Rü yexguma ga Yoá rü norü churaragümaxã inaxũãchi nax Yudáanearü ĩane ga Bex-chemégu Amachíamaxã nügü nada̱i̱xü̃ca̱x.
22 Rü nüma ga Iraéanecüã̱x rü yema Yudáanecüã̱xü̃ narüporamaegü. Rü yemaca̱x nibuxmü ga yema Yudáanecüã̱x rü wüxichigü rü napataca̱x nawoegu.
23 Rü Yoá ga Iraéanearü ãẽ̱xgacü rü Bex-chemégu nayayaxu ga Amachía ga Yudáanearü ãẽ̱xgacü. Rü ñu̱xũchi Yerucharéü̃wa nanaga. Rü ínanapogü ga 180 metru nagúxü̃ ga Yerucharéü̃arü poxeguxü̃. Rü Efraíü̃arü ĩã̱xwa inanaxügü ñu̱xmata yema naxtapü̱x ínapoxochixü̃wa yexmaxü̃ ga ĩã̱xwa nangu.
24 Rü ñu̱xũchi nüma ga Iraéanearü ãẽ̱xgacü rü nanade ga guxü̃ma ga yema úiru rü diẽrumü rü guxü̃ma ga yemaxü̃gü ga Tupanapata ga taxü̃newa yexmagüxü̃ ga Obéx-edóü̃ namaxã icuáxü̃. Rü yexgumarüxü̃ ta nanade ga guxü̃ma ga yema ãẽ̱xgacüpataarü yemaxü̃gü ga itatanüxü̃. Rü naétü ínanayauxü̃ ga ñuxre ga duü̃xü̃gü rü yemawena ĩane ga Chamáriaca̱x nataegu.
25 Rü Amachía ga Yudáanearü ãẽ̱xgacü ga Yoá nane rü 15 ga taunecü namaxü̃ nawena ga nax nayuxü̃ ga Yoá ga Iraéanearü ãẽ̱xgacü ga Yoacá nane.
26 Rü yema Amachíachiga rü norü ügüwa inaxügü rü ñu̱xmata norü gu̱xwa nangu rü guxü̃ma ga yema naxüxü̃ rü nagu naxümatü ga yema popera ga Yudáanearü ãẽ̱xgacügüchiga rü Iraéanearü ãẽ̱xgacügüchiga nagu ümatüxü̃.
27 Rü nawena nax Cori ya Tupanana yaxũgachixü̃ ga Amachía, rü Amachíamaxã narüxuanügü ga duü̃xü̃gü ga Yerucharéü̃wa. Rü yemaca̱x ga Amachía rü ĩane ga Láquiwa naña. Natürü nawe nangegüama rü ñu̱xmata guma ĩanewa nangugü. Rü yexma nayama̱xgü.
28 Yemawena rü wüxi ga cowarugu nayaxüegü ga naxü̃ne, rü ñu̱xũchi yema norü o̱xigü íta̱xgüxü̃gu nanata̱xgü ga Dabíarü Ĩanewa.
