2 Crónicas 26:1-23
26 26:1-3 Rü yexguma Amachía yuxguwena rü guxü̃ma ga Yudáanecüã̱xgü rü nane ga Uchíaxü̃ naxunetagü nax ãẽ̱xgacü yixĩxü̃ca̱x. Rü yexguma Yudáanearü ãẽ̱xgacüxü̃ yangucuchigu ga Uchía rü 16 ga taunecü nüxü̃́ nayexma. Rü 52 ga taunecü nixĩ ga ãẽ̱xgacü yixĩxü̃ ga Yerucharéü̃wa. Rü naé rü Yerucharéü̃cüã̱x iyixĩ, rü Yecuría nixĩ ga ngĩéga. Rü nüma ga Uchía rü nanatü yuxguwena rü nanapu ga ĩane ga Eráx nax wenaxarü Yudáanearü yixĩxü̃ca̱x. Rü ñu̱xũchi wenaxarü nanamexẽxẽ.
2 Nüü̃ nadau 26:1
3 Nüü̃ nadau 26:1
4 Rü nüma ga Uchía rü Cori ya Tupanaga naxĩnü rü nape̱xewa mexü̃ naxü naxrüxü̃ ga nanatü ga Amachía ga noxri mexü̃ ücü.
5 Rü yexguma namaxü̃gu ga Chacaría ga Tupanaarü orearü uruxü̃ rü nüma ga Uchía rü mea Tupanaga naxĩnü, yerü ga Chacaría rü nanangu̱xẽxẽ nax Tupanaxü̃ nangechaü̃xü̃ca̱x. Rü yexguma Tupanaga naxĩnügu ga nüma ga Uchía, rü nüma ga Tupana rü poraãcü nüxü̃ narüngü̃xẽxẽ.
6 Rü nüma ga Uchía rü Firitéugümaxã nügü nadai. Rü nayawa̱xgüxẽxẽ ga ĩane ga Gáxarü poxeguxü̃, rü ĩane ga Yaníaarü poxeguxü̃, rü ĩane ga Adúxarü poxeguxü̃. Rü yemawena rü Firitéugüarü ĩane ga Adúxarü naanegu nanaxü ga ñuxre ga ĩanegü.
7 Rü yemaacü ga nüma ga Tupana rü nüxü̃ narüngü̃xẽxẽ nax nüxü̃ naporamaexü̃ca̱x ga yema Firitéugü rü yema Arábiaanecüã̱x ga Gux-baáwa maxẽxü̃ rü yema Maóü̃tanüxü̃.
8 Rü yema Amóü̃tanüxü̃ rü Uchíaaxü̃́ nanaxütanügü ga yema diẽru ga Uchía ngĩgu unetacü. Rü nüma ga Uchía rü natachiga yerü naporaxüchi. Rü yemaca̱x guxü̃wama nangu ga nachiga ñu̱xmata Equítuanearü üyeanewa nangu.
9 Rü Yerucharéü̃arü poxeguxü̃étüwa ínanaxüxü̃ ga daxũtaechicaxü̃gü. Rü wüxi nixĩ ga yema ĩã̱x ga nacüwawa yexmaxü̃étügu naxüxü̃. Rü to nixĩ ga yema ĩã̱x ga doxonexü̃waama üxü̃étügu naxüxü̃. Rü yexgumarüxü̃ ta yema naxtapü̱x ínapoxü̃étüxü̃gu nanaxü ga to. Rü yemaacü meama nüxna nadaugü ga guma ĩane ga Yerucharéü̃.
10 Rü yexgumarüxü̃ ta yexma naxnücüanegu nanaxü ga daxũtaechicaxü̃gü. Rü nanaxü ta ga mucüma ga puchugü ga ínadoxonexü̃wa rü ínamáxpü̱xanexü̃wa yerü namuxũchi ga norü wocagü. Rü nüma ga Uchía rü nüxü̃́ nayexma ga ñuxre ga yatügü ga norü naanegüwa puracüexü̃ rü úbanecügü ga ínamáxpü̱xanexü̃wa puracüexü̃ rü naxa̱xtügüwa puracüexü̃. Yerü norü me nixĩ ga naanewa nax napuracüxü̃.
11 Rü nüma ga Uchía rü nüxü̃́ nayexma ga muxü̃ma ga norü churaragü ga meama daica̱x ngúexü̃ rü ímemaregüxü̃ nax daiwa naxĩxü̃. Rü yema ãẽ̱xgacüarü poperaarü ümatüruxü̃ ga Yeié rü norü ngü̃xẽẽruxü̃ ga Maachíamaxã nixĩ ga yawǘgüãxü̃ ga yema churaragü rü ñu̱xũchi nayaxütücumügu rü yemaacü nixĩ ga iyanuãxü̃. Rü ãẽ̱xgacüarü churaragüeru ga Ananía nixĩ ga namaxã icuáxü̃ ga yema taxre ga duü̃xü̃güarü puracü.
12 Rü yema Ananíatüxü̃wa yexmagüxü̃ ga churaragüerugü ga natanüxü̃maxã icua̱xgüxü̃ rü guxü̃wama 2,600 ga churaragüerugü ga tama muü̃wa̱xegüxü̃ nixĩgü.
13 Rü naxme̱xwa nayexmagü ga 307,500 ga churaragü ga iporaexü̃ rü tama muü̃wa̱xegüxü̃ ga daica̱x ímemaregüxü̃. Rü nümagü nixĩ ga ãẽ̱xgacüxü̃ nangü̃xẽẽgüxü̃ ga yexguma norü uanügümaxã nügü nadaixgu.
14 Rü nüma ga Uchía rü guxü̃ma ga yema churaragüca̱x nanamexẽxẽ ga naxnegü ga poxü̃ruü̃gü rü wocaegü rü napate̱xegü rü naremüarü poxü̃ruü̃gü rü würagü rü maxgütaeruü̃gü.
15 Rü nüma ga Uchía rü Yerucharéü̃wa nanaxü ga máquinagü ga chuxchiarü ma̱xruü̃gü rü nuta ga itapütacüarü ma̱xruü̃gü. Rü yema máquinagü rü daxũtaechicaxü̃gügu rü Yerucharéü̃arü poxeguxü̃étügügu nananugü. Rü naporaxüchi ga Uchía yerü Tupana nüxü̃ narüngü̃xẽxẽ. Rü yemaacü guxü̃wama nangu ga yema nachiga.
16 Rü nüma ga Uchía rü yexguma naporaxüchigu rü nügü ínarüta. Rü yema nax nügü ínataxü̃gagu rü chixexü̃gu nangu. Rü wüxi ga ngunexü̃gu rü nagu naxücu ga Tupanapata ga taxü̃ne rü yema pumarate̱xearü guruü̃wa nümatama pumarate̱xe nigu woo nüxna nax nachu̱xuxü̃ ga yema.
17 Natürü nawe nixücu ga chacherdótearü ãẽ̱xgacü ga Acharía namaxã ga 80 ga Tupanaarü chacherdótegü ga tama muü̃ewa̱xegüxü̃.
18 Rü ãẽ̱xgacü ga Uchíaxü̃ ñanagürügü: —Pa Ãẽ̱xgacüx, ¡ínaxũxũ i nua! Erü cuma nax woo ãẽ̱xgacü quixĩxü̃ rü taxuacüma pumarate̱xe nua quigu erü chacherdótegüxicatama nixĩ i mexü̃ nax nua pumarate̱xe yagugüxü̃. Erü nümagü nixĩ i Aróü̃taagü yixĩgüxü̃ rü Tupana yadexechixü̃ nax naxügüã̱xü̃ca̱x i ngẽma puracü. ¡Rü ngẽmaca̱x paxa ínaxũxũ i nua! Erü tama naga cuxĩnü ya Tupana. Rü nüma ya Tupana rü ngẽmaca̱x taxũtáma cumaxã nataãxẽ —ñanagürügü.
19 Rü nüma ga Uchía rü naxme̱xwa nanange ga wüxi ga pumarate̱xearü guruxü̃. Rü yexguma yema chacherdótegüxü̃ naxĩnügu rü namaxã nanu. Natürü yexgumatama Tupanapata ga taxü̃newa yema pumarate̱xearü guruü̃xü̃tawa rü chacherdótegüpe̱xewa rü Uchíacatüwa inarüyi ga chaxüne.
20 Rü yexguma nüma ga chacherdóte ga Acharía rü guxü̃ma ga yema togü ga chacherdótegümaxã rü napaxaãẽgü nax ínagaxüchigüãxü̃ ga Tupanapata ga taxü̃newa. Rü nümatama ga Uchía rü napaxaãxẽ nax ínaxũxũxü̃, yerü nüxü̃ nacua̱x nax Tupana napoxcuxü̃.
21 Rü yexgumacürüwa ga nüma ga ãẽ̱xgacü ga Uchía rü yema da̱xawemaxã nidawe ñu̱xmata nax nayuxü̃. Rü yemaca̱x nüxrüwama namaxü̃ nawa ga wüxi ga ucapu ga ãẽ̱xgacüpatawa yexmaxü̃. Rü nüxna nanachu̱xgü nax Tupanapata ga taxü̃newa naxũxü̃ ñu̱xmata nayu̱xgu. Rü yemaca̱x ga nane ga Yotáü̃ rü nüxí namaxã inacua̱x ga Yudáane.
22 Rü guxü̃ma ga nachiga ga ãẽ̱xgacü ga Uchía, rü norü ügüwa inaxügü rü ñu̱xmata norü gu̱xwa nangu rü nagu naxümatü ga yema popera ga Amú nane ga Ichaía ümatüxü̃.
23 Rü yexguma nayu̱xgu ga Uchía rü norü o̱xigü íta̱xgüxü̃gu nanata̱xgü nagu ga yema tauxque ga ãẽ̱xgacügü íta̱xgüxü̃arü ngaicamawa yexmaxü̃. Rü tama yema ãẽ̱xgacügü íta̱xgüxü̃gu nanata̱xgü yerü chaxünemaxã nayu. Rü nawena rü ãẽ̱xgacüxü̃ ningucuchi ga nane ga Yotáü̃.
