2 Crónicas 27:1-9
27 Rü yexguma Yotáü̃ ingucuchigu nax Yerucharéü̃wa Yudáanearü ãẽ̱xgacü yixĩxü̃ rü nüxü̃́ nayexma ga 25 ga taunecü. Rü 16 ga taunecü nixĩ ga ãẽ̱xgacü yixĩxü̃. Rü naé rü Yeruchá nixĩ ga ngĩéga, rü Chadóxacü iyixĩ.
2 Rü nüma ga Yotáü̃ rü Tupanaga naxĩnü, nanatü ga Uchíarüxü̃, natürü tama nanatürüxü̃ Tupanapata ga taxü̃negu naxücu nax pumarate̱xe nawa yaguxü̃ca̱x. Natürü yema duü̃xü̃gü rü chixexü̃ naxügü yerü nüxü̃ nicua̱xüü̃güama ga yema tupananetachicüna̱xãgü.
3 Rü Yotáü̃ nixĩ ga naxüxü̃ ga Tupanapata ga taxü̃nearü ĩã̱x ga taxü̃ ga nawa yachocuxü̃. Rü nanamexẽxẽ ta ga yema naxtapü̱x ga Ma̱xpǘne ga Ófewa nadaxü̃.
4 Rü Yudáanearü ma̱xpǘneanegüwa nanaxü ga ĩanegü. Rü naixnecüanegügu nanaxü ta ga norü poxü̃xü̃chicagü rü daxũtaechicagü.
5 Rü Amóü̃anearü ãẽ̱xgacümaxã nügü nadai rü Amóü̃tanüxü̃xü̃ narüporamae. Rü gumá taunecügu rü yema Amóü̃tanüxü̃xü̃ nanaxütanüxẽxẽ ga 3,300 quíru ga diẽrumü rü 2’200,000 litrugü ga trigu Rü yexgumaepü̱x ta nixĩ ga chebáda. Rü gumá norü taxre ga taunecügu rü norü tomaepü̱x ga taunecügu rü yexgumaepü̱xtama nanaxütanü.
6 Rü Yotáü̃ rü nawa nangu nax naporaxü̃ yerü Tupanaga naxĩnü. Rü yema naxüxü̃ rü Tupanape̱xewa name.
7 Rü guxü̃ma ga yema Yotáü̃arü daichiga, rü norü puracüchiga, rü ngẽma popera ga Iraéanearü ãẽ̱xgacügüchiga rü Yudáanearü ãẽ̱xgacügüchiga nagu ümatüxü̃gu naxümatü.
8 Rü yexguma Yotáü̃ inaxügügu nax Yudáanearü ãẽ̱xgacü yixĩxü̃ rü nüxü̃́ nayexma ga 25 ga taunecü. Rü 16 ga taunecü nixĩ ga Yerucharéü̃wa ãẽ̱xgacü yixĩxü̃.
9 Rü yexguma nayu̱xgu ga Yotáü̃ rü norü o̱xigü íta̱xgüxü̃gu nanata̱xgü ga Dabíarü Ĩanewa. Rü nawena rü ãẽ̱xgacüxü̃ ningucuchi ga nane ga Acháx.
