2 Crónicas 28:1-27
28 Rü nüma ga Acháx rü 20 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 16 ga taunecü ãẽ̱xgacü nixĩ ga Yerucharéü̃wa. Natürü yema nacüma ga nagu yaxũxü̃ ga Acháx rü tama Tupanape̱xewa name. Rü tama norü o̱xi ga Dabí nagu ixũxü̃ ga nacüma ga mexü̃gu nixũ.
2 Rü nagu nixũ ga yema Iraéanetanüxü̃arü ãẽ̱xgacügücüma ga chixemarexü̃, rü ñu̱xũchi bróũchewa nanaxü ga Baáchicüna̱xãgü.
3 Rü doxonexü̃ ga Ben-inóü̃wa Baáca̱x ínanagu ga pumarate̱xegü. Rü ñu̱xũchi Baáca̱x tüxü̃ ínagu ga naxacügü. Rü yemaacü nagu nixũ ga yema nacümagü ga chixexü̃ ga nagu naxĩxü̃ ga yema duü̃xü̃gü ga nüxíra yema naanewa maxẽxü̃ ga Cori ya Tupana ü̃pa Iraétanüxü̃pe̱xewa íwoxü̃xü̃.
4 Rü ñu̱xũchi yema tupananetagüca̱x ãmaregü rü pumarate̱xe ínagu nawa ga yema ngutaque̱xechicaxü̃gü ga ma̱xpǘnegüwa rü naigü ga itaetaxü̃tüxü̃wa yexmagüxü̃wa.
5 Rü yemagagu ga Cori ya Tupana rü Chíriaanearü ãẽ̱xgacüme̱xẽgu nananguxẽxẽ. Rü yema Chíriaanearü churaragü rü nüxü̃ narüporamae rü ñu̱xũchi muxü̃ma ga Yudáanecüã̱xgüxü̃ ínayauxü̃, rü ĩane ga Damácuwa nanagagü. Rü yexgumarüxü̃ ta ga nüma ga Cori ya Tupana rü Iraéanearü ãẽ̱xgacüme̱xẽgu nananguxẽxẽ ga Acháx, rü yemaacü nüxü̃ narüporamaegü rü nayue ga muxü̃ma ga Yudáanecüã̱xgü.
6 Rü wüxitama ga ngunexü̃gu rü Chíriaanearü ãẽ̱xgacü ga Péca ga Remaría nane rü 120,000 ga Yudáanearü churaragü ga tama muü̃wa̱xegüxü̃xü̃ nadai. Rü yemaacü nangupetü yerü Acháx rü yima Cori ga norü o̱xigüarü Tupanana nixũgachi.
7 Rü Chicrí ga wüxi ga Efraíü̃tanüxü̃ ga tama muü̃wa̱xexü̃ rü ãẽ̱xgacü ga Acháx nane ga Maachíaxü̃ nima̱x. Rü yexgumarüxü̃ ta nayama̱x ga Aricáü̃ ga Acháxpatamaxã icuácü. Rü nayama̱x ta ga Ercaná ga Acháxarü ngü̃xẽẽruü̃gümaxã icuácü.
8 Rü ñu̱xũchi ga yema Iraéanearü churaragü rü 200,000 ga Yudáanecüã̱xgü ga duü̃xü̃gü ga ingexü̃ rü ibuxü̃ ínayauxü̃ rü Chamáriawa nanagagü. Rü yexgumarüxü̃ ta Yudáanewa nanade ga muxü̃ma ga yemaxü̃gü rü Chamáriawa nanana.
9 Rü yéma Chamáriawa nayexma ga wüxi ga Cori ya Tupanaarü orearü uruxü̃ ga Odégu ãégaxü̃. Rü nüma rü yema churaragüca̱x nixũ ga yexguma Chamáriagu nachocuxgu. Rü ñanagürü nüxü̃: —Yimá Cori ga perü o̱xigüarü Tupana rü Yudáanecüã̱xgümaxã nanu, rü ngẽmaca̱x nixĩ i pexme̱xgu nayixẽẽãxü̃. Natürü i pemax rü poraãcü namaxã penue i ngẽma duü̃xü̃gü rü penadai i muxü̃ma. Rü ngẽmaca̱x ya Tupana rü tá pexna naxca̱x naca i ngẽma pexüxü̃, erü tama pexü̃́ nangechaü̃tümüxü̃gü i ngẽma duü̃xü̃gü.
10 Rü ñu̱xũchi penaxwa̱xe nax ngẽma Yudáanecüã̱xgü rü Yerucharéü̃cüã̱xgü rü perü puracütanüxü̃ nax yaxĩgüxü̃. Natürü ¿tama ẽ̱xna i pema rü ta Cori ya perü Tupanape̱xewa chixexü̃ pexüxü̃?
11 ¡Rü ngẽmaca̱x, chauga pexĩnüe rü penamuegutanü i ngẽma peenexẽgü i ípeyauxü̃xü̃! Erü Cori ya Tupana rü poraãcü pemaxã nanu —ñanagürü.
12 Rü yemaca̱x ga Acharía ga Yoanáü̃ nane rü Berequía ga Mechiremóx nane, rü Echequía ga Charúü̃ nane, rü Amachá ga Axraí nane ga Efraíü̃tanüxü̃maxã icuáxü̃, rü yexguma orearü uruxü̃ ga Obéxü̃ naxĩnüegu rü yema churaragü ga daiwa ne ĩxü̃pe̱xegu nayachigü rü nayangagü.
13 Rü ñanagürügü nüxü̃: —¡Taxṹ i nua penagagüxü̃ i ngẽma ípeyauxü̃xü̃! Erü tá nitaguãchi i Cori ya Tupanape̱xewa. Erü ngẽma pema nagu perüxĩnüexü̃ rü Tupanape̱xewa tá nanayexeraxẽxẽ i tórü chixexü̃gü rü torü pecadugü i ñu̱xma marü ngupetüxü̃. Rü nüma ya Cori ya Tupana rü tá poraãcü tamaxã nanu i yixema i Iraéanecüã̱xgü —ñanagürügü.
14 Rü yexguma ga yema churaragü rü tüxü̃ ninge̱xgü ga guxema tüxü̃ ínayauxü̃xe. Rü ñu̱xũchi yema ãẽ̱xgacügüpe̱xewa rü guxü̃ma ga yema duü̃xü̃güpe̱xewa ínanagü ga yema yemaxü̃gü ga napuxü̃güchiréxü̃.
15 Rü yemawena ga yema ãgümücü ga ãẽ̱xgacügü rü tümamaxã inacua̱xgü ga guxema tüxü̃ ínayauxü̃xe. Rü yema yemaxü̃gü ga napuxü̃xü̃wa nanadegü ga naxchiru nax yemamaxã tüxü̃ yaxüchirugüxü̃ca̱x ga guxema ingexchiruxe. Rü ñu̱xũchi tüxü̃ nichapatuã̱x, rü tüxü̃ nachibüexẽxẽ rü tüxü̃ nixaxegüxẽxẽ, rü nayaxüxü̃gü ga tümaarü o̱xrigü. Rü ñu̱xũchi búrugu tüxü̃ nitoü̃xẽxẽ ga guxema íchixeparaxe. Rü guma ĩane ga Yericú ga morunecümaxã naxugünegu tüxü̃ nayamugü ga tümatanüxü̃gütanüwa. Rü yemawena Chamáriaca̱x nawoegu.
16 Rü yema ngunexü̃gügu ga Yudáanearü ãẽ̱xgacü ga Acháx rü norü duü̃xü̃güxü̃ namu nax Achíriaanearü ãẽ̱xgacüxü̃tawa ngü̃xẽẽca̱x íyacagüxü̃ca̱x.
17 Yerü ga Edóü̃cüã̱xgü rü wenaxarü Yudáanegu nachocu, rü Yudácüã̱xgüxü̃ nadai. Rü ñuxre ga duü̃xẽgü tüxü̃ ínayauxü̃.
18 Rü yexgumarüxü̃ ta ga Firitéugü rü tóxnamana ga Yudáanewa nanadeãcu ga guma ĩanegü ga doxonexü̃wa yexmagüne rü guma ĩanegü ga Négueanewa yexmagüne. Rü nanapuxü̃ ga ĩanegü ga Bex-chemé, rü Ayaróü̃, rü Guederóx. Rü ñu̱xũchi nanapuxü̃gü ta ga ĩanegü ga Chocó rü Tiná, rü Guimchó namaxã ga norü ĩanexacüchigü. Rü ñu̱xũchi nawa namaxẽ.
19 Rü nüma ga Cori ya Tupana rü Yudáanecüã̱xgüxü̃ naxãnexẽxẽ nagagu ga yema Yudáanearü ãẽ̱xgacü ga Acháx. Yerü nüma nixĩ ga Yudáanearü duü̃xü̃gümaxã naxüaxü̃ ga naguxü̃raü̃xü̃ ga chixexü̃gü, rü ñu̱xũchi tama Tupanaga naxĩnüxü̃.
20 Natürü ga Tigáx-piréche ga Achíriaanearü ãẽ̱xgacü rü Acháxca̱x ínayagoõchi. Rü yemaacü tama norü ngü̃xẽẽwa naxũ, natürü yexera ga guxchaxü̃ naxca̱x ínanguxẽxẽ.
21 Rü woo ga Acháx nax Tupanapata ga taxü̃newa, rü ãẽ̱xgacüpatawa, rü norü ngü̃xẽẽruü̃güxü̃tawa nadexü̃ ga yemaxü̃gü ga itatanüxü̃ nax yemaacü Achíriaanearü ãẽ̱xgacüaxü̃́ naxütanüãxü̃ca̱x nax nüxü̃ nangü̃xẽẽxü̃ca̱x, natürü woo yemamaxã rü taxuxü̃ma ga ngü̃xẽxẽ nayaxu.
22 Rü woo nax yema guxchaxü̃ naétüwa yexmaxü̃, natürü tama Cori ya Tupanaga naxĩnü. Rü yemaacü nixĩ ga guma ãẽ̱xgacü ga Acháx.
23 Rü yema nax Chíriaanearü churaragü rü ü̃pa Acháxü̃ rüporamaegüxü̃ ga yexguma namaxã nügü nadaixgu, rü yemaca̱x Acháx nagu narüxĩnü nax naporaxü̃ ga yema Damácuarü tupanagü. Rü yemaca̱x naxca̱x ãmaregü ínagu yerü nagu narüxĩnü nax nümagü rü tá nüxü̃ nangü̃xẽxẽxü̃ ega naxca̱x ãmare ínaguxgu. Natürü yema tupananetagügagu nixĩ ga guxchaxü̃ Acháxca̱x rü guxü̃ma ga Iraétanüxü̃ca̱x ínguxü̃.
24 Rü nüma ga Acháx rü Tupanapata ga taxü̃newa nanade ga guxü̃ma ga naxpáxü̃gü rü ñu̱xũchi nayapuexẽxẽ. Rü nanawãta ga guma Tupanapata ga taxü̃nearü ĩã̱xgü. Rü ñu̱xũchi norü duü̃xü̃güxü̃ namu nax guxü̃ma ga Yerucharéü̃arü namagüarü poõchixü̃gügu naxügüã̱xü̃ca̱x ga tupananetachicüna̱xãgüarü ãmarearü guruü̃gü.
25 Rü guxü̃ma ga Yudáanearü ĩanegüwa ínanaxüxü̃ ga ãmarearü guruü̃gü nax yemawa duü̃xü̃gü togü ga tupanagüca̱x pumarate̱xe ga iyixichixü̃ ínagugüxü̃ca̱x. Rü yemaacü nananuxẽxẽ ga Cori ya norü o̱xigüarü Tupana.
26 Rü guxü̃ma ga naxüxü̃ ga ãẽ̱xgacü ga Acháx rü norü ügüwa inaxügü rü ñu̱xmata norü gu̱xwa nangu rü yema popera ga Yudáanearü ãẽ̱xgacügüchiga rü Iraéanearü ãẽ̱xgacügüchiga nagu ümatüxü̃gu naxümatü.
27 Rü yexguma nayu̱xgu ga ãẽ̱xgacü ga Acháx rü gumá norü o̱xigü íta̱xgüxü̃gu nanata̱xgü ga ĩane ga Yerucharéü̃wa. Natürü tama Iraéanearü ãẽ̱xgacügü íta̱xgüxü̃gu nanata̱xgü. Rü nawena rü nachicüxü ãẽ̱xgacüxü̃ ningucuchi ga nane ga Echequía.
