2 Crónicas 29:1-36
29 Rü yexguma Yudáanearü ãẽ̱xgacüxü̃ yangucuchigu ga Echequía rü 25 ga taunecü nüxü̃́ nayexma. Rü 29 ga taunecü nixĩ ga ãẽ̱xgacü yixĩxü̃ ga Yerucharéü̃wa. Rü naé rü Abí nixĩ ga tümaéga. Rü ngĩma ga Abí rü Chacaríaacü iyixĩ.
2 Rü yema naxüxü̃ ga Echequía rü Tupanape̱xewa name, guxü̃ma ga norü o̱xi ga Dabí üxü̃rüxü̃.
3 Rü nüma ga Echequía rü gumá taunecü rü tauemacü ga nagu inaxügüãcü nax ãẽ̱xgacü yixĩxü̃ rü nayawãxnagü ga yema Tupanapata ga taxü̃nearü ĩã̱xgü rü ñu̱xũchi nayamexẽẽgü.
4 Rü yemawena rü naxca̱x nangema ga guxü̃ma ga chacherdótegü rü norü ngü̃xẽẽruü̃gü ga Lebítanüxü̃. Rü guma Tupanapataã̱xtü ga éstewaama yexmaxü̃gu nanangutaque̱xexẽẽgü.
5 Rü ñanagürü nüxü̃: —Pa Lebítanüxü̃x, ¡choxü̃́ iperüxĩnüe! ¡Rü ñu̱xmax rü Tupanape̱xewa pegü pimexẽxẽgü! ¡Rü ngẽxgumarüxü̃ ta penamexẽxẽ ya napata ya taxü̃ne ya Cori ya perü o̱xigüarü Tupana! ¡Rü ípenawoxü̃ i guxü̃ma i ta̱xacü i ãũãchixü̃ i ngéma ngẽxmaxü̃!
6 Rü yema tanatügü rü nüxü̃ narüxoe nax Tupanaga naxĩnüexü̃. Rü yema naxügüxü̃ rü tama Tupanape̱xewa name yerü nüxna nixĩgachi. Rü ínanata̱xgü ga guma Cori ya Tupanapata.
7 Rü nümagü rü nanawãxtagü ga Cori ya Tupanapataarü ĩã̱xgü rü nayaxogüxẽxẽ ga yema norü omügü. Rü nüxü̃ narüxoe nax pumarate̱xe yagugüxü̃, rü marü tama Iraétanüxü̃arü Tupanapataarü ãmarearü guruü̃wa ínanagu ga norü ãmaregü.
8 Rü yemaca̱x ga Tupana rü namaxã nanu rü poraãcü nanapoxcue ga yema Yudáanecüã̱xgü rü Yerucharéü̃cüã̱xgü. Rü yemaca̱x ga Tupana rü taxü̃ ga guxchaxü̃gü naxca̱x ínanguxẽxẽ. Rü yexguma yema togü ga duü̃xü̃gü nüxü̃ daugügu rü namaxã naba̱i̱xãchie rü namuü̃e yema pematama pexetümaxã nüxü̃ pedauxü̃rüxü̃.
9 Rü yemaca̱x ga tanatügü rü daigu nayue. Rü yema tórü uanügü rü tüxü̃ nigagü ga taxma̱xgü rü tanegü rü taxacügü.
10 Rü ngẽmaca̱x nagu charüxĩnü nax wüxi i uneta namaxã chaxüxü̃ ya Cori ya Iraétanüxü̃arü Tupana nax ngẽmaãcü tamaxã nangüxmüxü̃ca̱x.
11 Rü ngẽmaca̱x, Pa Chaunegüx, ¡rü taxṹ i nüxü̃ perüchauexü̃! Erü nüma ya Cori ya Tupana rü pexü̃ nidexechi nax ípememaregüxü̃ nax nüxü̃́ pepuracüexü̃ rü wenaxarü naxca̱x peyaguxü̃ i pumarate̱xe —ñanagürü ga Echequía.
12 Rü yexgumatama inanaxügüe ga nax napuracüexü̃ ga yema Lebítanüxü̃. Rü ñaagü nixĩ ga yemagü: Rü Queáxtanüxü̃wa rü Máax ga Amachái nane rü Yoé ga Acharía nane nixĩ. Rü Merarítanüxü̃wa rü Chíx ga Axdí nane nixĩ, rü Acharía ga Yexareé nane nixĩ. Rü Guerchóü̃tanüxü̃wa rü Yoá ga Chimá nane nixĩ rü Edéü̃ ga Yoá nane nixĩ.
13 Rü Erichapáü̃tanüxü̃wa rü Chimrí rü Yeié nixĩ. Rü Achátanüxü̃wa rü Chacaría rü Matanía nixĩ.
14 Rü Emáü̃tanüxü̃wa rü Yeié rü Chimí nixĩ. Rü Yedutúü̃tanüxü̃wa rü Chemaía rü Uchié nixĩ.
15 Rü guxü̃ma ga yemagü rü naxca̱x nangemagü ga natanüxü̃ ga Lebítanüxü̃. Rü Tupanape̱xewa nügü nimexẽẽgü. Rü yemawena rü nagu nachocu ga Tupanapata ga taxü̃ne rü inanaxügüe nax Tupanape̱xewa namexẽẽgüãxü̃ ga guma Tupanapata ga taxü̃ne yema ãẽ̱xgacü ga Echequía nüxü̃ ixuxü̃rüxü̃ rü Tupanaarü mugüwa nüxü̃ yaxuxü̃rüxü̃.
16 Rü yemawena ga nüma ga yema chacherdótegü rü Tupanapata ga taxü̃nearü aixepegu nachocu nax Tupanape̱xewa namexẽẽgüãxü̃ca̱x ga nachiãwa ga guma Tupanapata ga taxü̃ne. Rü ínanawoxü̃gü ga yema Tupana tama naxwa̱xexü̃ nax yéma nayexmagüxü̃ rü Tupanapata ga taxü̃nea̱xtügu ínananuxü̃. Rü nüma ga yema Lebítanüxü̃ rü Chedróü̃arü natüwa nayawoü̃gü.
17 Rü yema puracü rü inaxügü nagu ga guma nüxíraü̃cü ga tauemacüarü ügügu. Rü yexguma norü 8 ga ngunexü̃wa nanguxgu rü yexguma nixĩ ga nawa nanguxgüxü̃ ga yema nachiã ga nawa íxücuxü̃ ga guma Tupanapata ga taxü̃ne. Rü yema to ga naxmachiã rü yexgumaepü̱x ga ngunexü̃ ta nixĩ nax nagúxü̃ nax Tupanape̱xewa namexẽẽgüaxü̃. Rü guxü̃wama rü 16 ga ngunexü̃ nixĩ ga nüxü̃́ nagúxü̃ ga yema puracü.
18 Rü yemawena rü ãẽ̱xgacü ga Echequíaxü̃tawa naxĩ rü ñanagürügü: —Marü toxü̃́ nagu̱x nax Tupanape̱xewa tanamexẽẽxü̃ ya Tupanapata ya taxü̃ne, rü ngẽma ãmarearü guruxü̃ rü guxü̃ma i naxpáü̃gümaxã, rü ngẽma mecha i paũ nagu nuxü̃ rü guxü̃ma i naxpáü̃gümaxã.
19 Rü ñu̱xũchi marü tayayauxgü rü wena mea tananu i ngẽma Tupanapataarü naxpáü̃gü ga ãẽ̱xgacü ga Acháx íwoxü̃xü̃ ga yexguma tama Tupanaga naxĩnügu. Rü ñu̱xma rü wenaxarü Cori ya Tupanaarü ãmarearü guruü̃pe̱xewa nangẽxmagü —ñanagürügü.
20 Rü moxü̃ãcü pa̱xmamaxü̃chi ínarüda ga nüma ga ãẽ̱xgacü ga Echequía rü naxca̱x nangema ga guma ĩanearü ãẽ̱xgacügü rü namaxã Tupanapata ga taxü̃newa naxũ.
21 Rü yéma nanagagü ga norü ãmaregü ga 7 ga wocagü ga iyatüxü̃ rü 7 ga carnérugü ga iyatüxü̃, rü 7 ga carnéruxacügü ga iyatüxü̃, rü 7 ga chíbuxacügü ga iyatüxü̃ nax Tupanaca̱x ínagugüaxü̃ca̱x nax yemaacü Tupana nüxü̃́ nüxü̃ rüngü̃maxü̃ca̱x ga yema chixexü̃gü ga naxügüxü̃ ga natanüxü̃ ga ãẽ̱xgacü rü yema Yudátanüxü̃ rü yemaacü Tupanape̱xewa nax namexü̃ca̱x ga napata ga Tupana. Rü nüma ga ãẽ̱xgacü rü yema chacherdótegü ga Aróü̃tanüxü̃xü̃ namu nax Cori ya Tupanaarü ãmarearü guruü̃wa naxca̱x ínagugüaxü̃ca̱x ga yema ãmaregü.
22 Rü nümagü ga yema chacherdótegü rü nanadai ga yema wocagü rü nanayauxgü ga nagü. Rü gumá nagümaxã nanamaxcu ga yema ãmarearü guruxü̃. Rü yemawena rü yexgumarüxü̃ ta nanadai ga yema carnérugü rü yema carnéruxacügü rü gumá nagümaxã nanamaxcu ga yema ãmarearü guruxü̃.
23 Rü yemawena ga nüma ga ãẽ̱xgacü rü yema chacherdótegüxü̃ namu nax nape̱xewa rü yema Iraétanüxü̃pe̱xewa nagagüãxü̃ca̱x ga yema chíbuxacügü ga chixexü̃güarü ütanüruxü̃. Rü nümagü ga yema chacherdótegü rü yemaacü nanaxügü. Rü yexguma nüma ga ãẽ̱xgacü rü guxü̃ma ga duü̃xü̃gü rü naétügu naxǘxme̱xgü ga yema chíbuxacügü.
24 Rü yexguma ga nüma ga chacherdótegü rü nanadai ga yema chíbuxacügü. Rü gumá nagü rü yema ãmarearü guruü̃gu nanabagü nax guxü̃ma ga Iraétanüxü̃arü pecadugüarü ütanüruxü̃ yixĩxü̃ca̱x. Yerü nüma ga ãẽ̱xgacü rü nanamu nax yema ãmare rü guxü̃ma ga Iraétanüxü̃arü pecadugüca̱x nax yixĩxü̃.
25 Rü nüma ga Echequía rü guma Tupanapata ga taxü̃negu nanamugü ga Lebítanüxü̃ ga platíyugümaxã rü árpagümaxã rü árpaxacügümaxã paxetagüxü̃. Rü yemaacü nixĩ ga Dabímaxã rü Tupanaarü orearü uruü̃gü ga Gáxmaxã rü Natáü̃maxã nüxü̃ yaxuxü̃ ga Cori ya Tupana.
26 Rü yexguma ga yema Lebítanüxü̃ rü yema paxetaruü̃gü ga Dabí üxü̃maxã inachigü. Rü yexgumarüxü̃ ta ga yema chacherdótegü rü norü cornétagümaxã inachigü.
27 Rü yexguma nüma ga Echequía rü chacherdótegüxü̃ namu nax yema Tupanaarü ãmarearü guruü̃wa ínagugüaxü̃ca̱x ga yema ãmaregü. Rü yexgumayane ga yema Lebítanüxü̃ rü inanaxügü nax nawiyaegüxü̃ rü namaxã napaetagüxü̃ ga yema paxetaruü̃gü ga ãẽ̱xgacü ga Dabí üxü̃, rü yema chacherdótegü rü nagu yacuegüxü̃ ga cornétagü. Rü yemaacü Cori ya Tupanaxü̃ nicua̱xüü̃gü.
28 Rü guxü̃ma ga yema duü̃xü̃gü rü yexma nacaxã́pü̱xügü rü yemaacü Tupanaxü̃ nicua̱xüü̃gü. Rü yexgumayane ga yema Lebítanüxü̃ rü nawiyaegü rü nüma ga yema chacherdótegü rü nagu nicuegü ga cornétagü ñu̱xmata nagú ga yema ãmare nax yaxãxü̃.
29 Rü yexguma nagu̱xgu ga yema ãmare nax yaxãxü̃, rü nüma ga ãẽ̱xgacü rü guxü̃ma ga namücügü ga yéma yexmagüxü̃ rü nacaxã́pü̱xügü rü Tupanaxü̃ nicua̱xüü̃gü.
30 Rü yemawena ga nüma ga ãẽ̱xgacü ga Echequía rü yema Iraétücumügüarü ãẽ̱xgacügü rü Lebítanüxü̃xü̃ namu nax Cori ya Tupanaxü̃ yacua̱xüü̃güxü̃ca̱x namaxã ga yema wiyaegü ga Dabí ümatüxü̃ rü Tupanaarü orearü uruxü̃ ga Achá ümatüxü̃. Rü yexguma ga nüma ga yema Lebítanüxü̃ rü taãẽãcüma nanaxügü ga yema cua̱xüxü̃. Rü nacaxã́pü̱xügü rü yemaacü Tupanaxü̃ nicua̱xüü̃gü.
31 Rü yemawena ga nüma ga ãẽ̱xgacü ga Echequía rü yema duü̃xü̃güxü̃ ñanagürü: —Ñu̱xmax i pemax nax marü Tupanamaxã nüxü̃ pixuxü̃ nax naga tá pexĩnüexü̃ ¡rü nua Tupanapata ya taxü̃newa penagagü i perü naxü̃nagü rü nua penana i perü ãmaregü nax ngẽmamaxã Tupanana moxẽ pexãgüxü̃ca̱x! —ñanagürü. Rü nüma ga yema duü̃xü̃gü rü Tupanamaxã nixaicümagü. Rü yéma nanagagü ga naxü̃nagü rü yéma nanana ga norü ãmaregü ga namaxã Tupanana moxẽ naxãgüxü̃. Rü yema nüxü̃́ ngúchaü̃güxü̃ nax yéma nagagüãxü̃ ga naxü̃nagü nax Tupanaca̱x ínaguaxü̃ca̱x, rü yemaacü nanaxügü.
32 Rü norü mu ga yema naxü̃nagü ga Tupanaca̱x yéma nagagüxü̃ rü 70 ga woca ga iyatüxü̃ rü 100 ga carnérugü rü 200 ga carnéruxacügü. Rü guxü̃ma ga yema naxü̃nagü rü yéma nanagagü nax Tupanaca̱x ãmarearü guruü̃wa ínagugüaxü̃ca̱x.
33 Rü yexgumarüxü̃ ta Tupanana nanamugü ga 600 ga wocagü rü 3,000 ga carnérugü.
34 Natürü noxretama nixĩ ga yema chacherdótegü ga yéma yexmagüxü̃, yerü yema togü ga chacherdótegü rü tauxta Tupanape̱xewa nügü nimexẽẽgü. Rü yemaca̱x tama ningu ga chacherdótegü nax naca̱u̱xcha̱xmü̱xü̃güãxü̃ ga guxü̃ma ga yema wocagü rü carnérugü ga Tupanaca̱x ínaguchaü̃xü̃. Rü yemaca̱x ga natanüxü̃ ga Lebítanüxü̃ rü nüxü̃ narüngü̃xẽẽgü ga ca̱u̱xcha̱xmüxü̃wa nax nagúxü̃ca̱x ga yema puracü. Yerü yema Lebítanüxü̃ rü yema togü ga chacherdótegüarü yexera aixcüma nagu narüxĩnüe nax paxa Tupanape̱xewa nügü yamexẽẽgüxü̃. Rü yexgumayane ga yema togü ga chacherdótegü rü Tupanape̱xewa nügü nimexẽẽgü.
35 Rü yemaacü nayexma ga muxü̃ma ga naxü̃nagü nax Tupanaca̱x ãmarearü guruü̃wa ínagugüaxü̃ca̱x. Rü yexgumarüxü̃ ta nayexma ga muxü̃ma ga norü chíxü̃gü ga Tupanaarü ngüxmüxẽẽruxü̃. Rü nayexma ta ga muxü̃ma ga bínugü ga Tupanaca̱x yéma nanaxü̃, rü wüxigu yema ãmaregü ga ínaguxü̃maxã Tupanana naxãgüxü̃. Rü yemaacü nixĩ ga wena inaxügüãxü̃ ga Cori ya Tupanapata ga taxü̃newa nüxü̃ nax yacua̱xüü̃güxü̃.
36 Rü nüma ga Echequía rü guxü̃ma ga yema duü̃xü̃gü rü poraãcü namaxã nataãẽgü ga yema Tupana üxü̃. Yerü nüma ga Tupana rü nüxü̃ narüngü̃xẽxẽ nax paxãma naxüxü̃ ga guxü̃ma ga yema.
