2 Crónicas 3:1-17
3 Rü nüma ga Charomóü̃ rü inanaxügü nax naxüaxü̃ ya Cori ya Tupanapata ga taxü̃ne ga Yerucharéü̃wa nagu ga nachica ga Yebuchéutanüxü̃ ga Onáü̃ trigu nawa púxü̃ ga ma̱xpǘne ga Moríawa. Rü guma ma̱xpǘnewa nixĩ ga Charomóü̃ nanatü ga Dabíca̱x nangóxü̃ ga Cori ya Tupana. Rü yema nixĩ ga nachica ga Dabí nüxü̃ unetaxü̃ nax nagu tá naxüxü̃ ya Tupanapata ya taxü̃ne.
2 Rü yexguma marü ãgümücü ga taunecü marü ãẽ̱xgacü yixĩxgu ga Charomóü̃ rü meama norü taxre ga tauemacüarü taxre ga ngunexü̃gu* nixĩ ga inaxügüxü̃ nax naxüxü̃ ga guma Tupanapata ga taxü̃ne.
3 Rü yema naxma̱xü̃ ga nagu nanuxü̃ ga gumá nutagü ga namaxã inaxügücü ga guma Tupanapata ga taxü̃ne ga Charomóü̃ üxü̃ne rü 27 metru nixĩ ga norü ma̱x. Rü norü tachiã ga guma Tupanapata ga taxü̃ne rü 9 metru nixĩ.
4 Rü yema nachiã ga nawa íxücuxü̃ ga guma Tupanapata ga taxü̃ne rü 9 metru nixĩ ga norü ma̱x. Rü yemaacü Tupanapata ga taxü̃nearü taxmachiãmaxãtama nawüxigu. Rü naxtapü̱xarü máxchane ga guma Tupanapata ga taxü̃ne rü 9 metru nixĩ. Rü yema nachiã ga nawa íxücuxü̃ rü nüma ga Charomóü̃ rü úirumaxã nanapexchiã.
5 3:5-6 Rü guma Tupanapata ga taxü̃nearü aixepetapü̱x rü mürapewagü ga pínunaxca̱x nixĩ. Rü ñu̱xũchi úiru ga marü ngemataxü̃maxã nayapexgü ga yema mürapewagü. Rü palmerachicüna̱xãgü rü cadénachicüna̱xãgü nagu nixüagü. Rü ñu̱xũchi nutagü ga ngã̱xãẽruü̃gü nawa nadexcu.
6 Nüü̃ nadau 3:5
7 Rü guxü̃ma ga guma Tupanapata ga taxü̃nearü aixepewa rü úirumaxã nanapexchiãgü. Rü norü omütagü, rü norü ĩã̱xgüchina̱xãgü, rü guxü̃ma i naxtapü̱xgü, rü norü ĩã̱xgü nayapexgü. Rü ñu̱xũchi daxũcüã̱xgüchicüna̱xã nagu nixüagü.
8 Rü yema Tupanapata ga taxü̃nearü üyemachiã ga Üünexüchixü̃ rü 9 metru nixĩ ga norü ma̱x, rü 9 metru ta nixĩ ga norü taxmachiã. Rü yemaacü norü ma̱x rü norü taxmachiãmaxã nawüxigumare. Rü 20,000 quíru nagúxü̃ ga úiru nixĩ ga namaxã napexmachiãgüãxü̃ ga yema naxmachiã ga Üünexüchixü̃.
9 Rü wüxichigü ga yema itapua ga namaxã íyapotagüaxü̃ rü 550 gramu nixĩ ga norü ya. Rü yema naxmachiãgü ga dauxü̃wa üxü̃ rü ta rü úirumaxã nanapexmachiãgü.
10 Rü yema naxmachiã ga üünexü̃chixü̃gu nüxü̃ nanaxüxẽxẽ ga taxre ga daxũcüã̱xchicüna̱xãgü ga nainaxca̱x. Rü yema rü ta úirumaxã nanatüxünegü.
11 Rü yema taxre ga daxũcüã̱xchicüna̱xãgü rü 2 metru rü 25 chentímetru nixĩ ga norü ma̱x ga wüxichigü ga naxpe̱xatü. Rü yemaacü ga yema ãgümücü ga naxpe̱xatügü rü guxü̃wama 9 metruwa nangu. Rü yema nüxíraxü̃xü̃ ga daxũcüã̱xchicüna̱xã rü wüxi ga naxpe̱xatü rü yema naxmachiãarü naxtapü̱xwa nayaxũ̱x. Rü guma norü náixpe̱xatü rü naxpe̱xewa nayaxũ̱x ga yema to ga daxũcüã̱xchicüna̱xãpe̱xatü.
12 Rü yema to ga daxũcüã̱xchicüna̱xã rü wüxi ga guma naxpe̱xatü rü yema naxmachiãarü tocüwatapü̱xwa nayaxũ̱x. Rü guma norü náixpe̱xatü rü naxpe̱xewa nayaxũ̱x ga yema nüxíraxü̃xü̃ ga daxũcüã̱xchicüna̱xãpe̱xatü.
13 Rü yema taxre ga daxũcüã̱xchicüna̱xãgü rü yexma nachigü rü naxmachiã ga ngãxü̃wa üxü̃gu narüdaunü.
14 Rü Charomóü̃ rü nanaxü ta ga wüxi ga tüyemachixü̃ ga línuchinaxca̱x. Rü wanütane rü yauxnütane rü daunütane ga tümaxã nananga̱xãẽtachinü. Rü daxũcüã̱xchicüna̱xãgümaxã nananga̱xãẽtachinü.
Charomóü̃ nanaxü ga taxre ga caxtagü ga itaxü̃ne
15 Charomóü̃ rü nüxü̃ nanaxüxẽxẽ ga taxre ga caxta ga itaxü̃ne ga 16 metrugu ixügüne ga norü máxchane. Rü ñu̱xũchi Tupanapata ga taxü̃ne ixücuxü̃wa nananucu. Rü guma caxtagütape̱xearü ngã̱xãẽruü̃gü rü 2 metru rü 25 chentímetru nixĩ ga norü ta.
16 Rü nanaxü ta ga cadénagü nax guma caxtatape̱xearü nga̱xãẽruü̃gügu ínabaeguãchixẽẽãxü̃ca̱x. Rü nanaxü ta ga 100 ga ibopü̱xüxü̃. Rü guma cadénagüwa nananucu ga yema ibopü̱xüxü̃.
17 Rü guma caxtagü rü Tupanapata ga taxü̃nepe̱xewa nananucu. Rü wüxi rü norü tügünecüwawa nayaxǘcuchi, rü guma nai rü norü to̱xwecüwawa nayaxǘcuchi. Rü guma tügünecüwawa üxü̃ne rü Yaquíü̃gu nanaxüéga. Rü guma to̱xwecüwawa üxü̃ne rü Boágu nanaxüéga.
Notas
^ 3:2 17 abrilarü.
