2 Crónicas 31:1-21
31 Rü yexguma marü nagu̱xgu ga guxü̃ma ga yema peta, rü guxü̃ma ga yema Iraétanüxü̃ ga yéma yexmagüxü̃, rü Yudáanearü ĩanegüwa naxĩ. Rü nagu nayapogüe ga gumá nutagü ga duü̃xü̃gü namaxã tupanaã̱xgücü, rü nagu napogüe ga yema Acheráchicüna̱xãgü, rü ñu̱xũchi nagu napogüe ta ga yema tupananetagüarü ãmarearü guruü̃gü ga ma̱xpǘnegüwa yexmagüxü̃. Rü yemaacü nanaxügü rü ñu̱xmata nagu̱xẽẽgüã ga guxü̃ma ga yema nüxü̃ yacua̱xüü̃güxü̃ ga Yudáanewa rü Bẽyamíü̃anewa yexmagüxü̃, rü ñu̱xũchi Efraíü̃anewa rü Manachéanewa yexmagüxü̃. Rü yemawena ga guxü̃ma ga yema Iraéanecüã̱xgü rü wüxichigü norü ĩanegüca̱x nawoegu.
2 Rü yemawena ga Echequía rü nüxü̃ nayanu ga yema puracü ga nüxna ixüchigüxü̃ ga yema chacherdótegü rü Lebítanüxü̃. Rü yexgumarüxü̃ ta nüxü̃ nayanu ga norü ngunexü̃gü ga nagu tá naxügüãxü̃ ga norü puracü. Rü chacherdótegüna nanaxã ga puracü nax wüxichigü ga ngunexü̃gu ãmarearü guruü̃wa ãmaregü ínagugüxü̃, rü yexgumarüxü̃ ta nax yagugüãxü̃ ga yema ãmaregü ga Tupanaarü ngüxmüxẽẽruü̃gü. Rü yema Lebítanüxü̃na nanaxã ga norü puracü nax Tupanana moxẽ naxãgüxü̃ rü nüxü̃ yacua̱xüü̃güxü̃. Rü yema totücumü ga Lebítanüxü̃ rü nüxna nanaxã ga norü puracü nax Tupanapata ga taxü̃neaarü ĩã̱xgüna nadaugüxü̃.
3 Rü ñu̱xũchi nüma ga ãẽ̱xgacü rü yema noxrütama naxü̃nagüwa inanamugü ga carnérugü ga Tupanaca̱x yagugüxü̃ruxü̃ ga pa̱xmama rü yáuanecü rü ngü̃xchigaarü ngunexü̃gu rü yexwaca̱xü̃cü ga tauemacü ngo̱xgu, rü to ga petagü ga Tupanaca̱x naxüchigagüxü̃gu yema Cori ya Tupanaarü mugü ga ümatüxü̃wa nüxü̃ yaxuxü̃rüxü̃.
4 Rü ñu̱xũchi nüma ga ãẽ̱xgacü rü yema duü̃xü̃gü ga Yerucharéü̃wa maxẽxü̃xü̃ namu nax chacherdótegüna rü Lebítanüxü̃na naxãgüãxü̃ca̱x ga yema ãmaregü rü diẽru ga nüxna üxü̃, nax yemaacü aixcüma mea naxügüã̱xü̃ca̱x rü yanguxẽẽgüãxü̃ca̱x ga yema puracü ga Cori ya Tupana nagu namugüxü̃.
5 Rü yexguma guxü̃wama nanguxgu ga yema ãẽ̱xgacüarü mu, rü yema Iraétanüxü̃ rü guxü̃ma ga norü ngúchaü̃maxã inanaxãgü ga yema rümemaegüxü̃ ga tríguarü o, rü bínu, rü chíxü̃, rü berure, rü naguxü̃raü̃xü̃ ga yema nanetügü ga naanewa inatogüxü̃arü o. Rü naétü yéma nanana ta ga norü diésmu ga nanetügüarü o. Rü yemaacü namuxũchi.
6 Rü yexgumarüxü̃ ta ga yema Iraéanecüã̱xgü rü yema naigü ga Yudáanearü ĩanegüwa maxẽxü̃ rü Yerucharéü̃wa nanagagü ga norü diésmu ga norü wocagü rü carnérugü ga Tupanana ügüxü̃. Rü ñu̱xũchi yéma nanana ga norü diésmu ga norü yemaxü̃güwa ga Cori ya norü Tupanana ügüxü̃. Rü guxü̃ma ga yema rü wüxigu nananutaque̱xegü.
7 Rü gumá norü tomaepü̱x ga tauemacügu nixĩ ga inaxügüãxü̃ nax nanutaque̱xegüãxü̃ ga yema norü diésmugü. Rü gumá norü 7 ga tauemacügu nixĩ ga nüxü̃ nachauexü̃ nax nanutaque̱xegüãxü̃.
8 Rü yexguma Echequía rü yema norü ngü̃xẽẽruü̃gü íyadaugügu ga yema nanutaque̱xegüxü̃ rü Cori ya Tupanana moxẽ naxãgü, rü mexü̃ namaxã naxuegugü ga yema duü̃xü̃gü ga Iraétanüxü̃.
9 Rü yexguma ga nüma ga Echequía rü yema chacherdótegüna rü Lebítanüxü̃na naca nachiga ga yema yexma nanutaque̱xegüxü̃.
10 Rü gumá chacherdótegüarü ãẽ̱xgacü ga Acharía ga Chadóxtanüxü̃ ixĩcü rü nanangãxü̃ rü ñanagürü: —Yexguma inaxügüãgucürüwa nax nua Tupanapata ya taxü̃newa nanaaxü̃ ga ãmaregü rü meama toxü̃́ ningu nax tanangṍxü̃ rü woo i ñu̱xma rü muxü̃ toxü̃́ ínayaxüama. Rü guxü̃ma i ñaa nua nüxü̃ cudauxü̃ rü toxü̃́ ínayaxüama, erü nüma ya Cori ya Tupana rü poraãcü norü duü̃xü̃güxü̃ narüngü̃xẽxẽ —ñanagürü ga Acharía.
11 31:11-12 Rü yemaca̱x ga Echequía rü norü duü̃xü̃güxü̃ namu nax Cori ya Tupanapata ga taxü̃negu naxügüã̱xü̃ca̱x ga ucapugü nax nagu nanuãxü̃ca̱x ga yema nawemügü. Rü yexguma marü yanguxgu ga yema ucapugü, rü yexma nananucugü ga yema nanutaque̱xegüxü̃ ga ãmaregü ga õnagü rü yemaxü̃gü ga Cori ya Tupanana naxãgüxü̃. Rü Lebítanüxü̃ ga Conaníaxü̃ naxunetagü nax yemamaxã inacuáxü̃ca̱x. Rü ñu̱xũchi nüxü̃ naxuneta ga naenexẽ ga Chimí nax norü ngü̃xẽẽruxü̃ yixĩxü̃ca̱x.
12 Nüü̃ nadau 31:11
13 Rü nüma ga ãẽ̱xgacü ga Echequía rü namaxã ga Tupanapata ga taxü̃nearü ãẽ̱xgacü ga Acharía rü nüxü̃ naxunetagü ga dauxü̃taeruü̃gü ga Conaníame̱xẽwa rü Chimíme̱xẽwa yexmagüxü̃. Rü yemagü nixĩ ga Yeié, rü Achachía, rü Náax, rü Achaé, rü Yerimóx, rü Yochabá, rü Erié, rü Imaquía, rü Máax, rü Benaía.
14 Rü Coré ga Iná nane ga yema ĩã̱x ga éstewaama yexmaxü̃arü dauruxü̃chire̱x nixĩ ga namaxã icuáxü̃ ga yema ãmaregü ga duü̃xü̃gü norü ngúchaü̃maxã Cori ya Tupanaca̱x inaxü̃. Rü nüma ga Coré nixĩ ga chacherdótegüxü̃ rü Lebítanüxü̃güxü̃ yanuaxü̃ ga yema ãmaregü rü õnagü ga duü̃xü̃gü Tupanapatawa naxũ.
15 Rü yema chacherdótegüarü ĩanegüwa Coré nüxü̃́ nayexma ga norü ngü̃xẽẽruü̃gü. Rü nümagü rü Edéü̃, rü Miniamíü̃, rü Yechúa, rü Chemaía, rü Amaría, rü Checanía nixĩgü. Rü yemagü nixĩ ga meama natanüxü̃ ga chacherdótegüxü̃ rü Lebítanüxü̃xü̃ yanuaxü̃ ga yema ãmaregü rü õnagü ga yexguma nawa nangugügu nax Tupanaca̱x napuracüexü̃. Rü woo ga yema yaexü̃ rü yema buxü̃gü rü nanayaxu ga õna.
16 Rü guxü̃ma ga yema chacherdótetücumü ga Tupanapata ga taxü̃negu chocuxü̃ nax naxügüãxü̃ca̱x ga Tupanaarü puracü, rü name nax natanüxü̃ ga iyatüxü̃ nayauxgüxü̃ ga yema õna. Natürü nanaxwa̱xe nax tomaepü̱x ga taunecü rüe̱xna yexera nüxü̃́ yexmaxü̃ rü ñu̱xũchi natanüxü̃arü poperawa nango̱xégaxü̃ nax nayauxgüãxü̃ca̱x ga yema õna.
17 Rü yema chacherdótegü rü natanüxü̃arü poperagu nixĩ ga yawǘgüxü̃. Rü yema Lebítanüxü̃ ga 20 ga taunecü rüe̱xna yexera nüxü̃́ yexmagüxü̃ rü yema Tupanapataarü puracüpanegu nixĩ ga yawǘgüxü̃. Rü yéma nango̱x ga norü ngunexü̃gü ga nagu tá napuracüexü̃.
18 Rü guxü̃ma ga yema Lebítanüxü̃ ga iwǘgüxü̃ tümamaxã ga naxma̱xgü, rü nanegü rü naxacügü nixĩ ga nayauxgüxü̃ ga õna. Yerü yema Lebítanüxü̃ nixĩ ga guxü̃guma ímemaregüxü̃ nax naxügüã̱xü̃ca̱x ga Tupanaarü puracü.
19 Rü guxü̃nema ga gumá chacherdótegüarü ĩanegüwa rü norü ĩanexacügüwa nayexmagü ga yatügü ga nüxü̃ naxunetagüxü̃ nax yanuaxü̃ca̱x ga õna nüxü̃ ga yema chacherdótegü ga Aróü̃tanüxü̃. Rü natanüwa rü guxü̃ma ga iyatüxü̃ rü nanayauxgü ga yema õna. Rü guxü̃ma ga yema Lebítanüxü̃ ga iwǘgüxü̃ rü guma ĩanexacügüarü wocachitaü̃gu ãpatagüxü̃ rü ta nanayauxgü ga yema õna.
20 Rü nüma ga Echequía rü guxü̃ ga Yudáanewa rü yemaacü nanaxü. Rü guxü̃ma ga yema naxüxü̃ rü Cori ya Tupanape̱xewa rü aixcüma name rü nawe̱xgu.
21 Rü guxü̃ma ga yema puracü ga Tupanapata ga taxü̃neca̱x naxüxü̃ rü Tupanaarü mugü nüxü̃ ixuxü̃ãcüma nanaxü. Rü guxü̃guma Tupanaarü ucu̱xẽca̱x nadau, rü yemaca̱x mea nüxü̃́ ínanguxuchi ga yema puracü.
