2 Crónicas 33:1-25
33 Manaché rü 12 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 55 ga taunecü Yerucharéü̃wa ãẽ̱xgacü nixĩ.
2 Natürü yema naxüxü̃ rü Tupanape̱xewa rü poraãcü nachixe, yerü nagu nixũ ga yema nacümagü ga chixexü̃gü ga nagu naxĩxü̃ ga yema nachixü̃anegü ga Cori ya Tupana Iraétanüxü̃arü o̱xigüpe̱xewa íwoxü̃xü̃.
3 Rü nüma rü wena nayamexẽẽgü ga yema nachicagü ga nawa tupananetachicüna̱xãgüxü̃ yacua̱xüü̃güxü̃ ga nanatü ga Echequía nagu ipogügüxü̃. Rü Baáca̱x ínanaxüxü̃ ga ãmarearü guruü̃gü. Rü tupananeta ga Acheráchicüna̱xãgü ínaxüxü̃. Rü ñu̱xũchi nüxü̃ nicua̱xüxü̃ ga guxcüma ga woramacurigü ga daxũwa ngẽxmagücü.
4 Rü Cori ya Tupanapata ga taxü̃negu ínanaxüxü̃ ga tupananetagüarü ãmarearü guruü̃gü woo nüma ga Cori rü ñanagürü: —Daa chopata ya Yerucharéü̃wa ngẽxmane rü guxü̃gutáma choxrütama nixĩ —ñanagürü.
5 Rü yema taxre ga naxa̱xtügü ga Tupanapata ga taxü̃ne rü yemagu ínanaxüxü̃ ga to ga ãmarearü guruü̃gü naxca̱x ga guxü̃ma ga woramacurigü ga daxũwa ngẽxmagüxü̃.
6 Rü nüma ga Manaché rü nanegüxü̃tama nigu nawa ga yema ãmarearü guruxü̃ ga doxonexü̃ ga Ben-inóü̃wa yexmaxü̃. Rü chixexü̃ ga naãẽgüca̱x nangema nax namaxã yadexaxü̃ca̱x, rü ngẽma ẽxü̃guxü̃ i chixexü̃wa nangu̱x, rü duü̃xü̃güxü̃ namu nax naxca̱x nangúexü̃ nax yuetaãẽgüca̱x nangemagüxü̃, rü nagu nixũ nax duẽxẽgüxü̃ nachixexẽẽgüxü̃. Rü yema taxü̃ ga chixexü̃gü ga Tupanape̱xewa naxüxü̃maxã poraãcü Tupanaxü̃ nanuxẽxẽ.
7 Rü yema tupananetachicüna̱xã ga naxüxü̃ rü Tupanapata ga taxü̃negu nayaxǘcuchi woo nüma ga Cori rü Dabíxü̃ rü nane ga Charomóü̃xü̃ ñanagürü: —Choma rü guxü̃nema ya Iraéanearü ĩanegütanüwa rü chanayaxu ya Yerucharéü̃ nax yimawa nangẽxmaxü̃ca̱x ya chopata ya taxü̃ne ya nawa guxü̃gutáma changexmane.
8 Rü ngẽxguma chorü duü̃xü̃gü i Iraétanüxü̃ rü yanguxẽẽgüãgu, rü nagu namaxẽgu i chorü mugü rü ngu̱xẽẽtaegü ga Moichéna chaxãxü̃, rü taxũtáma íchanawoxü̃ nawa i ngẽma naane ga norü o̱xigüna chaxãxü̃ —ñanagürü.
9 Natürü nüma ga Manaché rü chixexü̃gu nanayixẽxẽ ga yema duü̃xü̃gü ga Yudáanecüã̱xgü rü Yerucharéü̃cüã̱xgü. Rü yemaca̱x chixexü̃ ga nacümagu naxĩ. Rü yema duü̃xü̃gü ga noxri yema naanegu ãchiü̃güxü̃ ga Cori ya Tupana daixü̃ nape̱xegu ga Iraétanüxü̃arü o̱xigü rü yemagüarü yexeraxüchi chixexü̃ naxügü ga yema Yudáanecüã̱xgü rü Yerucharéü̃cüã̱xgü.
10 Rü Cori ya Tupana rü Manachémaxã rü norü duü̃xü̃gümaxã nidexa, natürü tama naga naxĩnüe.
11 Rü yemaca̱x ga Cori ya Tupana rü Achíriaanearü churaragüerugüxü̃ namu nax Manachéca̱x íyaxü̃ãchixü̃ca̱x. Rü yemagü nixĩ ga Manachéxü̃ iyauxgüxü̃. Rü nayachotamaraü̃gü, rü nayachotachacüxügü rü ñu̱xũchi cadéna ga bróũchenaxca̱xmaxã nanaxütü̱xügü. Rü yemaacü Babiróniaanewa nanagagü.
12 Natürü yexguma taxü̃ ga ĩ̱xãchiãxẽ naxca̱x ínguxgu, rü Cori ya norü Tupanana naca nax nüxü̃́ nüxü̃ iyanangümaxü̃ca̱x ga norü chixexü̃gü ga naxüxü̃. Rü norü o̱xigüarü Tupanape̱xegu nügü ínarüxíxra.
13 Rü yexguma nayumüxẽgu, rü Cori ya Tupana rü nüxü̃ naxĩnü ga norü yumüxẽ rü nanangãxü̃. Rü nüxü̃́ nanatauxchaxẽxẽ nax Yerucharéü̃ca̱x nataeguxü̃ rü wenaxarü ãẽ̱xgacü nax yixĩxü̃ca̱x. Rü yexguma ga Manaché rü nüxü̃ nicua̱xãchi nax nüma ya Cori rü aixcüma Tupana yixĩxü̃.
14 Rü guxü̃ma ga yema nüxü̃ ngupetüxü̃wena ga Manaché rü Dabíarü Ĩanearü poxeguxü̃arü düxétüwaama rü ínanapoxegu. Rü yema poxeguxü̃ rü namáchanexüchi. Rü natü ga Guióü̃arü oéstewa inaxügü. Rü wüxi ga ngatewa nadapetü rü ñu̱xmata Choxniarü ĩã̱xwa nangu rü ñu̱xũchi nagu ínadaeguãchi ga ma̱xpǘne ga Ófe. Rü guxü̃nema ga Yudáanearü ĩanegü ga ípoxegugünegu nayanu ga churaragüerugü nax nüxna nadaugüxü̃ca̱x.
15 Rü Tupanapata ga taxü̃newa ínanawoxü̃ ga yema togü ga nachixü̃anearü tupananetachicüna̱xãgü. Rü yexgumarüxü̃ ta ínanata̱x ga yema tupananetachicüna̱xã ga nüma naxüxü̃. Rü nagu napogüe ga yema ãmarearü guruü̃gü ga tupananetagüca̱x naxüxü̃ nagu ga guma ma̱xpǘne ga Tupanapata ga taxü̃ne nawa yexmane. Rü yexgumarüxü̃ ta nagu napogüe ga yema tupananetagüarü ãmarearü guruü̃gü ga Yerucharéü̃wa yexmagüxü̃. Rü ñu̱xũchi ĩanearü düxétüwa nayawogü.
16 Rü yemawena ga nüma ga Manaché rü Cori ya Tupanaarü ãmarearü guruxü̃ namexẽxẽ. Rü ñu̱xũchi yemawa Cori ya Tupanaca̱x ínanagu ga ãmaregü ga Cori ya Tupanaarü ngüxmüxẽẽruü̃gü rü ãmaregü ga namaxã Tupanana moxẽ naxãxü̃. Rü ñu̱xũchi Yudáanearü duü̃xü̃güxü̃ namu nax Cori ya Iraétanüxü̃arü Tupanaxü̃ yacua̱xüü̃güxü̃.
17 Natürü ga duü̃xü̃gü rü yema ãmarearü guruü̃gü ga noxri tupananetagüca̱x üxü̃watama Cori ya Tupanaca̱x ínanagu ga ãmaregü.
18 Rü guxü̃ma ga nachiga ga Manaché, rü yema norü yumüxẽ ga nawa Tupanaarü ngü̃xẽẽca̱x ínacaxü̃, rü yema orearü uruü̃güarü oregü ga Cori ya Iraétanüxü̃arü Tupanaégagu Manachémaxã nüxü̃ ixugüxü̃, rü yema popera ga Iraéanecüã̱xgüarü ãẽ̱xgacügüchiga nagu ümatüxü̃gu naxümatü.
19 Rü norü yumüxẽchiga, rü norü yumüxẽarü ngãxü̃chiga, rü ñuxãcü nax chixexü̃ naxüxü̃chiga, rü ñuxãcü ma̱xpǘnegügu tupananetagüca̱x ínaxüxü̃ãxü̃ ga ngutaque̱xechicagüchiga, rü ñuxãcü yemagu yanuaxü̃ ga Acheráchicüna̱xã rü togü ga tupananetachicüna̱xãgüchiga, rü yema naxü naxü̃pa ga nax Cori ya Tupanamaxã nüxü̃ yaxuxü̃ ga norü chixexü̃ rü nape̱xegu nügü ínaxíraxü̃, rü guxü̃ma i ngẽma rü Tupanaarü orearü uruü̃gü ümatüxü̃ i poperagu naxümatü.
20 Rü yexguma nayu̱xgu rü napata ga nawa ãẽ̱xgacü yixĩxü̃neã̱xtügu nanata̱xgü. Rü nawena rü nane ga Amóü̃ ãẽ̱xgacüxü̃ ningucuchi.
Amóü̃ rü ãẽ̱xgacü nixĩ
21 Rü Amóü̃ rü 22 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü taxre ga taunecü nixĩ ga Yerucharéü̃wa ãẽ̱xgacü yixĩxü̃.
22 Natürü guxü̃ma ga yema naxüxü̃ rü Cori ya Tupanape̱xewa poraãcü nachixe, yema nanatü ga Manaché üxü̃rüxü̃. Rü naxü̃nagü naxca̱x nadai rü nüxü̃ nicua̱xüxü̃ ga yema tupananetachicüna̱xãgü ga nanatü ga Manaché íxüxüxü̃.
23 Natürü nanatü ga Manaché rü Tupanape̱xegu nügü ínarüxíxra natürü nüma ga Amóü̃ rü taguma Tupanape̱xegu nügü ínarüxíxra rü yexeraxü̃ ga chixexü̃ nixüchigüama
24 Rü yema norü churaragümaxã icua̱xgüxü̃tama nixĩ ga namaxã rüxuanügüxü̃. Rü yemagü nixĩ ga napata ga nawa ãẽ̱xgacü yixĩnegu yama̱xgüxü̃.
25 Natürü guma ĩanearü duü̃xü̃gü rü nanadai ga yema churaragüerugü ga ãẽ̱xgacüxü̃ ima̱xgüxü̃. Rü ñu̱xũchi nachicüxü nüxü̃ naxunetagü ga nane ga Yochía nax ãẽ̱xgacü yixĩxü̃ca̱x.
