2 Crónicas 34:1-33
34 Rü nüma ga Yochía rü nüxü̃́ nayexma ga 8 ga taunecü ga yexguma ãẽ̱xgacüxü̃ yangucuchigu. Rü 31 ga taunecü ãẽ̱xgacü nixĩ ga Yerucharéü̃wa.
2 Rü nüma ga Yochía rü Tupanape̱xewa mexü̃ naxü. Rü nũxcümaü̃cü ga norü o̱xi ga Dabícümagu nixũ. Rü taguma ta̱xacüca̱x nüxna nixũgachi ga yema nacüma ga mexü̃.
Yochía rü ínanawoxü̃ ga tupananetachicünaxãgü
3 Rü yexguma marü 8 ga taunecü ãẽ̱xgacü yixĩxgu rü woo nax nangextü̱xüxü̃ ga Yochía, rü inanaxügü nax nũxcümaü̃cü ga norü o̱xi ga Dabíarü Tupanaca̱x nadauxü̃. Rü yexguma marü 12 ga taunecü ãẽ̱xgacü yixĩxgu rü Yudáanewa rü Yerucharéü̃wa inanaxügü nax nagu napogüxü̃ ga yema nachicagü ga ma̱xpǘnegüwa yexmagüxü̃ ga nawa tupananetagüxü̃ yacua̱xüü̃güxü̃. Rü ínanawogü ga Acheráchicüna̱xãgü, rü yema togü ga naxchicüna̱xãgü rü yema naxchicüna̱xãgü ga bróũchewa naxügüxü̃.
4 Rü ñu̱xũchi nüma ga Yochía rü norü duü̃xü̃güxü̃ namu nax nagu napogüexü̃ca̱x ga yema Baáxarü ãmarearü guruü̃gü rü nagu napogüexü̃ ga yema guruü̃gü ga pumarate̱xe naétüwa yagugüxü̃. Rü ñu̱xũchi íxraxü̃gu nanapoü̃gü ga yema Acheráchicüna̱xãgü. Rü íxraxü̃gu nanapo ga yema naxchicüna̱xãgü ga bróũche naca rü yema togü ga naxchicüna̱xãgü ñu̱xmata naxãte̱xe. Rü yemawena rü yema ü̃pa ãmare naxca̱x íguxü̃chiqu̱e̱xegu nayagügü ga yema nachicute̱xe.
5 Rü ñu̱xũchi yema tupananetagüarü chacherdótegü ga marü yuexü̃china̱xã rü nawa ínanagu ga yema ãmarearü guruü̃gü. Rü yemaacü inayanaxoxẽxẽ ga yema chixexü̃ ga Yudáanewa rü Yerucharéü̃wa yexmaxü̃.
6 Rü Yochía rü yematama naxü ga Manachéanearü ĩanegüwa, rü Efraíü̃anearü ĩanegüwa, rü Chimeóü̃anearü ĩanegüwa, rü Netaríanearü ĩanegüwa, rü ñu̱xũchi guxü̃nema ga ĩanexacügü ga ĩpemawa yexmagünewa.
7 Rü yema tupananetagüarü ãmarearü guruü̃gügu nipogügü. Rü Acheráchicüna̱xãgügu, rü yema togü ga naxchicüna̱xãgügu nipogügü ñu̱xmata yaxãchicute̱xe. Rü ñu̱xũchi nagu nipogügü ga guxü̃ma ga yema pumarate̱xearü guruü̃gü ga guxü̃ ga Iraéanewa yexmagüxü̃. Rü yemawena rü Yerucharéü̃ca̱x nataegu.
Nüxü̃ inayangaugü ga Tupanaarü mugüpane
8 Rü yexguma marü 18 ga taunecü ãẽ̱xgacü yixĩxgu ga Yochía, rü nawena ga nax marü yanaxoxẽẽãxü̃ ga yema chixexü̃ ga nachixü̃anewa yexmaxü̃ rü Tupanapata ga taxü̃newa yexmaxü̃, rü naxca̱x nangema ga Chapáü̃ ga Acharía nane, rü Amachía ga ĩanearü ãẽ̱xgacü, rü Yoá ga Yoacá nane ga ãẽ̱xgacüarü poperaarü ümatüruxü̃. Rü nüma ga Yochía rü yemagüxü̃ namu nax namexẽẽgüãxü̃ca̱x ga norü Cori ya Tupanapata ga taxü̃ne.
9 Rü yemaca̱x ga yema tomaepü̱x ga yatügü ga Yochía muxü̃ rü chacherdótegüarü ãẽ̱xgacü ga Irichíaxü̃tawa naxĩ. Rü nüxna ngĩxü̃ nayana ga guxcüma ga diẽru ga Tupanapata ga taxü̃newa yexmacü, wüxigu ngĩmaxã ga yema diẽru ga Lebítanüxü̃ rü ĩã̱xarü dauruü̃gü ngĩxü̃ decü natanüwa ga yema Manachétanüxü̃ rü Efraíü̃tanüxü̃ rü yema togü ga Iraétanüxü̃, rü yexgumarüxü̃ ta ga diẽru ga guxü̃ma ga Yudáanewa rü Bẽyamíü̃anewa rü Yerucharẽü̃wa ngĩxü̃ nayauxgücü. Rü guxcüma ga yema diẽru rü chacherdótegüarü ãẽ̱xgacü ga Irichíana ngĩxü̃ nayana.
10 Rü yemawena ga yema diẽru rü nüxna ngĩxü̃ naxã ga yema Tupanapata ga taxü̃nearü mexẽẽmaxã icua̱xgüxü̃. Rü nümagü rü yema diẽrumaxã nüxü̃́ nayaxügütanü ga norü puracütanüxü̃ ga Tupanapata ga taxü̃nearü mexẽẽwa puracüexü̃.
11 Rü yema diẽru rü nüxna ngĩxü̃ naxãgü ga yema corapinagü ga yema puracümaxã icua̱xgüxü̃ nax ngĩmaxã naxca̱x nataxegüxü̃ca̱x ga nutagü ga imexẽẽcüwagücü rü naixmena̱xãgü ga omütaruxü̃ naxca̱x ga guma Tupanapataarü ĩpatagü ga togü ga Yudáanearü ãẽ̱xgacügü chixri nüxna daugüne.
12 34:12-13 Rü yema yatügü rü aixcüma meama nanaxügü ga yema puracü. Rü yema namaxã icua̱xgüxü̃ nixĩ ga Lebítanüxü̃ ga Yáax rü Adía ga Merarítaagü, rü Chacaría rü Mechuráü̃ ga Queáxtaagü. Rü yemagü nixĩ ga namaxã icua̱xgüxü̃ ga yema nutagü rü naixmena̱xãgüarü nugüruxü̃ rü guxü̃ma ga yema togü ga puracütanüxü̃ ga Tupanapataarü mexẽẽwa puracüexü̃. Rü guxü̃ma ga yema Lebítanüxü̃ rü paxetaxü̃ nicua̱x. Rü ñuxre ga nümagü rü poperaarü ümatüruü̃gü nixĩgü, rü togü rü Tupanapataarü yemaxü̃güarü dauruü̃gü nixĩgü, rü togü rü ĩã̱xgüarü dauruü̃gü nixĩgü.
13 Nüü̃ nadau 34:12
14 Rü wüxi ga ngunexü̃gu ga yexguma ngĩxü̃ nayauxgügu ga yema diẽru ga Tupanapata ga taxü̃newa ngĩxü̃ nangegücü, rü nüma ga chacherdóte ga Irichía rü yexma nüxü̃ nayangau ga popera ga nagu naxümatüxü̃ ga Tupanaarü mugü ga Cori ya Tupana Moichéna ãxü̃.
15 Rü yexgumatama ga nüma ga Irichía rü gumá ãẽ̱xgacüarü poperaarü ümatüruxü̃ ga Chapáü̃maxã nüxü̃ nixu nax Cori ya Tupanapata ga taxü̃negu nüxü̃ yangauxü̃ ga yema iyarütaxuxü̃ ga Tupanaarü mugüpane. Rü Chapáü̃na nanaxã.
16 Rü nüma ga Chapáü̃ rü ãẽ̱xgacüxü̃tawa nanange rü namaxã nüxü̃ nixuchiga rü ñanagürü: —Ngẽma curü duü̃xü̃gü, Pa Ãẽ̱xgacüx, rü guxü̃ma i ngẽma puracü i nüxü̃ cuxüxẽẽxü̃ rü marü nawa ínapuracüe.
17 Rü marü ngĩxü̃ nanutaque̱xegü i ngẽma diẽru i Tupanapata ya taxü̃newa ngẽxmacü. Rü marü nüxna ngĩxü̃ naxã i ngẽma puracümaxã icua̱xgüxü̃ rü ñu̱xũchi ngẽma puracütanüxü̃ i Tupanapata ya taxü̃nearü mexẽẽwa puracüexü̃na —ñanagürü.
18 Rü nüma ga Chapáü̃ rü yexgumarüxü̃ ta ãẽ̱xgacümaxã nüxü̃ nixu rü chacherdóte ga Irichía rü nüxna nax naxããxü̃ ga wüxi ga popera ga Tupanapatagu nüxü̃ iyangauxü̃. Rü ñu̱xũchi nüma ga Chapáü̃ rü ãẽ̱xgacüca̱x nüxü̃ nadaumatü.
19 Rü yexguma ãẽ̱xgacü nüxü̃ ĩnügu ga yema Tupanaarü mugü ga poperagu ümatüxü̃, rü norü ĩ̱xãchiãẽmaxã nügü narügáutechiru.
20 Rü yexgumatama ga nüma ga ãẽ̱xgacü rü nanamu ga Irichía, rü Aicáü̃ ga Chapáü̃ nane, rü Axdóü̃ ga Micaía nane, rü Chapáü̃ ga poperaarü ümatüruxü̃, rü Achaía ga ãẽ̱xgacüarü ngü̃xẽẽruxü̃, rü ñanagürü nüxü̃:
21 —¡Ẽcü Cori ya Tupanana peyaca̱x chauégagu rü Iraéanecüã̱x i duü̃xü̃güégagu rü Yudáanecüã̱x i duü̃xü̃güégagu nax tüxü̃ nüxü̃ nacua̱xẽxẽxü̃ca̱x i ta̱xacü tá taxüe i ñu̱xma nax tüxü̃́ nangẽxmaxü̃ i norü ore i ñaa poperagu ümatüxü̃! Erü ngürüãchi ya Cori ya Tupana rü tamaxã nanu yerü tórü o̱xigü rü tama naga naxĩnüe i ngẽma Cori ya Tupana nüxü̃ ixuxü̃, rü tama mea nagu namaxẽ i ngẽma ñaa poperagu ümatüxü̃ —ñanagürü ga ãẽ̱xgacü ga Yochía.
22 Rü nümagü ga Irichía rü ñu̱xũchi yema ãẽ̱xgacü nüxü̃ unetagüxü̃ ga Aicáü̃, rü Axdóü̃, rü Chapáü̃, rü Achaía rü ngĩxü̃tawa naxĩ ga yema Tupanaarü orearü uruxü̃ ga Úda ga Charúü̃ naxma̱x. Rü nüma ga Charúü̃ rü Tibá nane nixĩ rü Arátaxa nixĩ. Rü nüma ga Ará rü chacherdótegüchiruarü dauruxü̃ nixĩ. Rü ngĩma ga Úda rü yema Yerucharéü̃arü naane ga yexwacax duü̃xü̃gü nagu ãpataxü̃gu ixãpata.
23 Rü yexguma ngĩxna nacagüegu rü ngĩma rü inangãxü̃ rü ngĩgürügü: —Ñaa nixĩ i norü ore ya Cori ya Iraétanüxü̃arü Tupana, rü nüma rü ñanagürü: “¡Namaxã nüxü̃ pixu i chorü ore ya yimá nua pexü̃ mugücü nax choxna peyaca̱xaxü̃ca̱x!
24 Rü choma i Cori ya Tupana rü nüxü̃ chixu rü taxü̃ i guxchaxü̃ tá naxca̱x íchananguxẽxẽ ya daa ĩane rü norü duü̃xü̃gü. Rü aixcüma tá naxca̱x íchananguxẽxẽ i guxü̃ma i ngẽma poxcu i ngẽma popera i Yudáanearü ãẽ̱xgacüpe̱xewa nüxü̃ pedaumatüxü̃wa nüxü̃ yaxuxü̃.
25 Yerü ñaa duü̃xü̃gü rü choxna nixĩgachi rü norü tupananetagüca̱x pumara ínagu. Rü yemaacü choxü̃ nanuxẽẽgü namaxã ga yema chixexü̃ ga naxügüxü̃. Rü ngẽmaca̱x nixĩ i chanuxü̃ namaxã ya daa ĩane rü taxũtáma namaxã icharüngüxmüxü̃.
26 34:26-27 ¡Natürü namaxã nüxü̃ pixu ya yimá Yudáanearü ãẽ̱xgacü ya nua pexü̃ mugücü nax choxna peyaca̱xaxü̃ca̱x, rü choma ya Cori ya Tupana rü ñachagürü nüxü̃! ‘Rü ngẽma nax poraãcü cungechaxü̃xü̃ rü chauga cuxĩnüxü̃ ga yexguma nüxü̃ cuxĩnügu ga yema poxcu ga namaxã chaxueguxü̃ ya daa ĩane rü norü duü̃xü̃gü, rü ngẽmaca̱x tá cuxü̃ charüngü̃xẽxẽxü̃. Rü ngẽma nax chope̱xegu cugü ícurüxíraxü̃ rü curü ngechaü̃maxã cugü curügáutechiruxü̃ rü chope̱xewa cuxaxuxü̃ rü ngẽmaca̱x i choma rü cumaxã nüxü̃ chixu rü marü cuxü̃ chaxĩnü rü tá cuxü̃ charüngü̃xẽxẽxü̃.
27 Nüü̃ nadau 34:26
28 Rü ñu̱xma nax ngẽma mexü̃ chope̱xewa cuxüxü̃gagu rü ngẽmaca̱x naxü̃pa nax ínanguxü̃ i ngẽma poxcu rü taãẽãcü tá cuyu rü naxü̃tawa cungu i ngẽma curü o̱xigü, rü taxũtáma nüxü̃ cudau i ngẽma poxcu i daa ĩaneca̱x rü norü duü̃xü̃güca̱x tá íchanguxẽẽxü̃’ ”, ñanagürü ya Tupana —ngĩgürügü. Rü yema ãẽ̱xgacüarü duü̃xü̃gü ga Údaxü̃tawa namugüxü̃ rü nawoegu nax ãẽ̱xgacümaxã nüxü̃ yaxugüexü̃ca̱x ga yema Tupanaarü ngãxü̃.
29 Rü yexguma ga nüma ga ãẽ̱xgacü ga Yochía rü naxca̱x nangema ga guxü̃ma ga Yudáanearü ãẽ̱xgacügü rü Yerucharéü̃arü ãẽ̱xgacügü nax namaxã nangutaque̱xegüxü̃ca̱x.
30 Rü ñu̱xũchi nüma ga ãẽ̱xgacü rü Cori ya Tupanapata ga taxü̃negu namaxã nangutaque̱xe ga guxü̃ma ga yema Yudáanearü ãẽ̱xgacügü, rü Yerucharéü̃cüã̱xgü, rü chacherdótegü, rü Lebítanüxü̃, rü guxü̃ma ga duü̃xü̃gü ga iyaxü̃ rü woo buxü̃gü. Rü nüma ga ãẽ̱xgacü rü yéma nape̱xewa tagaãcü nüxü̃ nadaumatü ga yema popera ga Tupanapata ga taxü̃negu nüxü̃ iyangauxü̃ ga Tupanaarü mugü nagu ümatüxü̃.
31 Rü yexguma yema poperaxü̃ nadaumatüguwena ga ãẽ̱xgacü rü Tupanapata ga taxü̃nearü caxtaxü̃tagu nayachi. Rü yéma Tupanape̱xewa nüxü̃ nixu nax aixcümaxü̃chi tá naga naxĩnüxü̃ rü nagu namaxü̃xü̃ i ngẽma Tupanaarü ucu̱xẽgü rü mugü i ngẽma poperagu ümatüxü̃. Rü nüxü̃ nixu rü tá nayanguxẽxẽ ga yema unetagü ga Tupanamaxã nüxü̃ yaxugüxü̃ ga Iraétanüxü̃.
32 Rü yemawena ga nüma ga ãẽ̱xgacü rü nanamu ga guxü̃ma ga yema duü̃xü̃gü ga Yerucharéü̃cüã̱xgü rü Bẽyamíü̃tanüxü̃ ga yéma yexmagüxü̃ nax yanguxẽẽgüãxü̃ca̱x ga yema mugü ga yema poperagu ümatüxü̃. Rü yema Yerucharéü̃cüã̱xgü ga duü̃xü̃gü rü nüxü̃ nixugüe nax aixcüma tá yanguxẽxẽgüãxü̃ ga yema nũxcümaü̃güxü̃ ga norü o̱xigüarü unetagü ga Tupanamaxã nüxü̃ yaxugüexü̃.
33 Rü nüma ga Yochía rü inayanaxoxẽxẽ ga yema chixexü̃ ga nacümagü ga nagu namaxẽxü̃ ga duü̃xü̃gü ga guxü̃ma ga Iraéanewa. Rü ñu̱xũchi nanamu nax guxü̃ma i ngẽma duü̃xü̃gü ga Iraéanewa yexmagüxü̃ rü norü Cori ya Tupanaxü̃ yacua̱xüü̃güxü̃ca̱x. Rü yexguma Yochía maxü̃gu rü yema duü̃xü̃gü rü taguma Cori ga norü o̱xigüarü Tupanana nixĩgachitanü.
