2 Crónicas 36:1-23
36 Rü nüma ga duü̃xü̃gü rü Yoacá ga Yochía nanexü̃ nimucuchigü nax Yerucharéü̃wa ãẽ̱xgacü yixĩxü̃ nanatüchicüxü.
2 Rü nüma ga Yoacá rü 23 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü tomaepü̱xtama ga tauemacü Yerucharéü̃wa ãẽ̱xgacü nixĩ.
3 Rü Equítuanearü ãẽ̱xgacü rü Yoacáxü̃ ínata̱xüchi nax Yerucharéü̃wa ãẽ̱xgacü yixĩxü̃. Rü ñu̱xũchi Iraéanemaxã nanaxuegu nax naxütanügüãxü̃ca̱x ga 3,300 quíru nagúxü̃ ga diẽrumü rü 33 quíru nagúxü̃ ga úiru.
4 Rü ñu̱xũchi nüma ga Equítuanearü ãẽ̱xgacü rü Eriaquíü̃xü̃ nimucuchi nax Yudáanearü ãẽ̱xgacü yixĩxü̃ca̱x. Rü nüma ga Eriaquíü̃ rü Yoacá naenexẽ nixĩ. Rü Equítuanearü ãẽ̱xgacü rü nanaxüchicüxü ga naéga ga Eriaquíü̃, rü Yoaquíü̃gu nanaxüéga. Rü ñu̱xũchi Yoacáxü̃ niyaxu rü Equítuanewa nanaga.
Yudáanearü ãẽ̱xgacü nixĩ ga Yoaquíü̃
5 Rü Yoaquíü̃ rü 25 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü 11 ga taunecü ãẽ̱xgacü nixĩ ga Yerucharéü̃wa. Natürü guxü̃ma ga yema naxüxü̃ rü Cori ya norü Tupanape̱xewa nachixe.
6 Rü Nabucudonochó ga Babiróniaanearü ãẽ̱xgacü naxca̱x ínayagoõchi. Rü nayayaxu, rü cadéna ya bróũchenaxca̱x ixĩcümaxã nayana̱i̱x. Rü yemaacü Babiróniawa nanaga.
7 Rü Nabucudonochó ga Babiróniaanearü ãẽ̱xgacü rü ñuxre ga Tupanapata ga taxü̃nearü yemaxü̃gü rü Babiróniawa nanana. Rü norü tupanapatagu nananu.
8 Rü guxü̃ma ga nachiga ga Yoaquíü̃ rü yema chixexü̃ ga naxüxü̃, rü yema ngupetüxü̃ ga yexguma ãẽ̱xgacü yixĩxgu, rü yema popera ga Iraéanearü ãẽ̱xgacügüchiga rü Yudáanearü ãẽ̱xgacügüchiga nagu ümatüxü̃gu naxümatü. Rü nachicüxü ãẽ̱xgacüxü̃ ningucuchi ga nane ga Yoaquíü̃.
Yoaquíü̃ rü Babiróniawa nanagagü
9 Rü Yoaquíü̃ rü 18 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü tomaepü̱x ga tauemacü rü naétü 10 ga ngunexü̃ Yerucharéü̃wa ãẽ̱xgacü nixĩ. Natürü guxü̃ma ga yema naxüxü̃ rü Tupanape̱xewa rü nachixe.
10 Rü yexguma inaxügügu ga gumá taunecü, rü nüma ga ãẽ̱xgacü ga Nabucudonochó rü norü churaragüxü̃ namu nax Yoaquíü̃xü̃ Babiróniawa nagagüxü̃. Rü wüxigu namaxã nayana ga Tupanapata ga taxü̃nearü yemaxü̃gü ga itatanüxü̃. Rü Yoaquíü̃chicüxü nüxü̃ naxuneta ga Chedequía ga Yoaquíü̃ nanepü nax Yudáanewa rü Yerucharéü̃wa ãẽ̱xgacü yixĩxü̃ca̱x.
Yudáanearü ãẽ̱xgacü nixĩ ga Chedequía
11 Nüma ga Chedequía nüxü̃́ nayexma ga 21 ga norü taunecü ga yexguma inaxügüãgu nax ãẽ̱xgacü yixĩxü̃. Rü 11 ga taunecü nixĩ nax ãẽ̱xgacü yixĩxü̃ ga Yerucharéü̃wa.
12 Natürü nüma rü wüxi ga ãẽ̱xgacü ga Tupanape̱xewa poraãcü chixexü̃ ücü nixĩ. Rü tama inarüxĩnüẽchaü̃ nüxü̃́ ga guma orearü uruxü̃ ga Yeremía ga Cori ya Tupana nawa namaxã idexacü.
13 Rü naétü tama nayanguxẽxẽ ga norü uneta ga Tupanaégagu Babiróniaanearü ãẽ̱xgacü ga Nabucudonochómaxã nüxü̃ yaxuxü̃ nax nüxü̃ tá nangü̃xẽẽxü̃. Rü nüma ga Chedequía rü poraãcü nügü nanuxẽxẽ nax tama Cori ya Iraétanüxü̃arü Tupanaga naxĩnüxü̃ca̱x.
14 Rü yexgumarüxü̃ ta ga guxü̃ma ga Yudáanecüã̱xarü ãẽ̱xgacügü rü norü duü̃xü̃gü rü chacherdótegü rü ta, rü poraãcü chixri namaxẽ. Rü yema togü ga nachixü̃anegü ga tama Tupanaxü̃ cua̱xgüxü̃arü tupananetachicüna̱xãxü̃ nicua̱xüxü̃gü. Rü yemaacü chixexü̃ nawa naxügü ga guma Tupanapata ga taxü̃ne ga nüma ga Tupana nüxü̃ unetane nax napata yixĩxü̃ca̱x ga Yerucharéü̃wa.
15 Rü nüma ga Cori ya Iraétanüxü̃arü o̱xigüarü Tupana rü guxü̃guma yéma nanamugü ga norü orearü uruü̃gü nax yaxucu̱xẽgüãxü̃ca̱x, yerü nüma ga Tupana rü nüxü̃́ nangechaü̃tümüxü̃gü ga norü duü̃xü̃gü rü nüxü̃ nangechaü̃ ga guma napata ga nawa nayexmane.
16 Natürü nümagü ga yema duü̃xü̃gü rü nüxü̃ nacugüeama ga yema Tupanaarü orearü uruü̃gü rü tama nüxü̃́ inarüxĩnüechaü̃ ga yema namaxã nüxü̃ yaxugüxü̃ rü nagu nidauxcüraxü̃gü. Rü yemaca̱x ga nüma ga Tupana rü düxwa namaxã nanu ga yema norü duü̃xü̃gü rü taxúema Tupanaxü̃ ítayachaxãchixẽxẽ.
Norü uanügü rü to ga nachixü̃anewa nanagagü ga Yudáanecüã̱xgü
17 Rü yemaca̱x nüma ga Cori ya Tupana rü Cadéugüarü ãẽ̱xgacüxü̃ namu nax nadaiaxü̃ca̱x ga yema Yudáanecüã̱xgüarü ngextü̱xüxü̃gü ga Tupanapata ga taxü̃newa yexmagüxü̃. Rü tama nüxü̃́ nangechaü̃tümüxü̃gü ga yema ngextü̱xüxü̃gü, rü paxü̃gü, rü yaxguã̱xgü, rü yema ichixeparaxü̃. Rü yemaacü ga nüma ga Cori ya Tupana rü guxü̃ma ga Yudáanecüã̱xgüxü̃ Cadéugüme̱xẽgu nayixẽxẽ.
18 Rü guxü̃ma ga Tupanapata ga taxü̃nearü yemaxü̃gü ga ítáxü̃ rü ixíraxü̃ rü nayana. Rü Tupanapata ga taxü̃nearü diẽrugü, rü guma ãẽ̱xgacüpataarü diẽrugü rü yema norü ngü̃xẽẽruü̃güarü diẽrugü, rü nüma ga Cadéugüarü ãẽ̱xgacü rü Babiróniawa nanana.
19 Rü guma Tupanapata ga taxü̃ne rü nayagugü. Rü yema Yerucharéü̃arü poxeguxü̃ rü nagu napogüe. Rü guma ãẽ̱xgacüpatagü ínanagu. Rü guxü̃ma ga ta̱xacü ga tatanüxü̃ ga guma ĩanewa yexmaxü̃ rü nagu napogüe.
20 Rü yemawena rü yema Yudáanecüã̱xgü ga íyaxügüxü̃ rü Babiróniawa nanagagü nax ãẽ̱xgacüarü rü nanegüarü puracütanüxü̃ yixĩgüxü̃ca̱x. Rü yemaacü yéma namaxẽ rü ñu̱xmata Pérchiaanearü ãẽ̱xgacüme̱xẽgu nayi ga Cadéugü.
21 Rü yemaacü nixĩ ga yanguxü̃ ga yema Tupanaarü ore ga Yeremíawa nüxü̃ yaxuxü̃ ga ñaxü̃: —Ngẽma naane rü tá inarüngü̃ —ñaxü̃. Rü aixcüma yemaacü nangupetü yerü yema 70 ga taunecü ga Cadéugüme̱xẽwa nax nayexmaxü̃ ga yema Yudáanecüã̱xgü rü inarüngü̃ ga yema naane, yerü nataxuma ga duü̃xü̃gü ga nawa puracüexü̃.
Pérchiaanearü ãẽ̱xgacü ga Chíru nanaxunagü nax wena naxüaxü̃ ga Tupanapata
22 Rü gumá taunecü ga nagu inaxügüãcü ga Chíru nax Pérchiaanearü ãẽ̱xgacü yixĩxü̃ca̱x, rü nüma ga Tupana rü Chíruãẽwa nananguxẽxẽ ga ĩnü nax naxunagüãxü̃ca̱x ga wüxi ga mu ga Yudáanecüã̱xgüétüwa idexaxü̃ nax nüxü̃ nangü̃xẽẽgüxü̃ca̱x. Rü nanaxümatü ga yema mu rü guxü̃ ga norü naanewa nanamu nax yemaacü yanguxü̃ca̱x ga Cori ya Tupanaarü ore ga Yeremíawa nüxü̃ yaxuxü̃.
23 Rü nüma ga Chíru ga Pérchiaanearü ãẽ̱xgacü rü nanaxunagü ga yema ore ga ñaxü̃: —Nüma ya Cori ya daxũguxü̃ i naanearü Tupana, rü cho̱xme̱xwa nanangexmagüxẽxẽ i guxü̃ma i ãẽ̱xgacügü i ñoma i naanewa ngẽxmagüxü̃. Rü Tupana choxü̃ namu nax Yerucharéü̃gu chanaxüxü̃ca̱x ya napata ya taxü̃ne i Yudáanewa. Rü ngẽmaca̱x ya ngexerǘxe i pemax nax Cori ya Tupanaarü duü̃xü̃gü pixĩgüxü̃ ¡rü ẽcü pechixü̃aneca̱x pewoegu! ¡Rü nüma ya Cori ya perü Tupana pexü̃ rüngü̃xẽxẽ! —ñanagürü.
