2 Crónicas 4:1-22
4 Rü nüma ga Charomóü̃ rü nanaxü ta ga wüxi ga ãmarearü guruxü̃ ga bróũchenaxca̱x ga 9 metrugu ixüxü̃ ga norü ma̱x, rü 9 metru ga norü tatachinü, rü 4 metruarü ngãxü̃ ga norü máchane.
2 Rü ñu̱xũchi nanaxü ta ga wüxi ga taxüchixü̃ ga dexáchixü̃ ga bróũchenaxca̱x. Yema rü nabopütüwe rü 4 metruarü ngãxü̃ nixĩ ga norü taxü̃ma. Rü 2 metru 25 chentímetrugu nixĩ ga norü máchane. Rü yema naberaarü bo rü 13 metruarü ngãxü̃ nixĩ.
3 Rü yema dexáchixü̃ rü taxrechimüü̃ ga woca ga iyatüxü̃chicüna̱xãmaxã nananga̱xãxẽ ga naberatüxü̃wa. Rü wüxichigü ga 45 chentímetruwa nayexma ga 10 ga wocachicüna̱xãgü. Rü yema wocachicüna̱xãgü rü yema dexáchixü̃ünewatama nanaxüxüchigü.
4 Rü yema dexáchixü̃ rü 12 ga woca ga iyatüxü̃chicüna̱xãgü ga bróũchenaxca̱xétügu naxǘnagü. Rü tomaepü̱x ga yema wocachicüna̱xãgü rü nórteguama narüdaunü, rü tomaepü̱x rü súrguama, rü tomaepü̱x rü ésteguama, rü tomaepü̱x rü oésteguama. Rü guma naparagü ga naweama ügüne ga yema wocachicüna̱xãgü rü dexáchixü̃tüü̃waama naxügü. Rü yemaétügu nixĩ ga naxǘnagüxü̃ ga yema dexáchixü̃.
5 Rü norü yaxcü ga yema dexáchixü̃ rü 8 chentímetru nixĩ. Rü nabera rü nabipetü ñoma wüxi i putürachacu i iboxüxü̃rüxü̃. Rü 66,000 litru ga dexá nagu name.
6 Rü nüma ga Charomóü̃ rü yexgumarüxü̃ ta nanaxü ga 10 ga ya̱u̱xme̱xü̃páxü̃gü ga bróũchenaxca̱x. Rü yema wüxime̱e̱xpü̱x rü Tupanapata ga taxü̃nearü tügünecüwagu nananu rü yema to ga wüxime̱e̱xpü̱x rü norü to̱xwecüwagu nananu. Rü yemawa nixĩ ga yayauxgüãxü̃ ga guxü̃ma ga yema ãmare namaxã ínagugüü̃xü̃. Natürü yema dexáchixü̃ ga taxü̃wa nixĩ ga chacherdótegü ga nügü yayauxgüxü̃.
7 Rü ñu̱xũchi Tupana nüxü̃ ixuxü̃ãcüma nanaxü ta ga 10 ga omügü ga úirunaxca̱x. Rü yemagü rü Tupanapata ga taxü̃negu nananu, rü wüxime̱e̱xpü̱x ga to̱xweguama rü to ga wüxime̱e̱xpü̱x ga tügüneguama.
8 Rü nanaxü ta ga 10 ga mechagü rü ñu̱xũchi Tupanapata ga taxü̃negu nananu. Rü wüxime̱e̱xpü̱x nixĩ ga to̱xweguama nuxü̃, rü wüxime̱e̱xpü̱x ga tügüneguama. Rü ñu̱xũchi nanaxü ta ga 100 ga naxpáü̃gü ga úirunaxca̱x ixĩgüxü̃.
9 Rü ínanapoxegu ga yema naa̱xtü ga chacherdótegüarü ixĩxü̃. Rü yexgumarüxü̃ ta ínanapoxegu ga yema naa̱xtü ga taxü̃ ga Tupanapata ga taxü̃ne. Rü ñu̱xũchi nanaxü ga norü ĩã̱xgü. Rü yemagü rü bróũchemaxã nayatügü.
10 Rü yema dexáchixü̃ ga taxü̃ rü Tupanapata ga taxü̃nearü tügünecüwagu nanaxǘ ga norü súr-éstewaama.
11 Rü ñu̱xũchi ga Iráü̃ rü nanaxü ta ga buetaregü, rü paragü, rü naxpáü̃gü. Rü yemaacü nanagu̱xẽxẽ ga yema puracü ga Charomóü̃ca̱x naxüxü̃ ga Tupanapata ga taxü̃newa.
12 Rü yema puracü ga naxüxü̃ rü ñaagü nixĩ: taxre ga caxtagü, rü taxre ga guma caxtagütape̱xearü ngã̱xãẽruü̃gü, rü yema cadénagü ga caxtatape̱xearü ngã̱xãẽruü̃gu íbaeguãchigücü.
13 Rü nanaxü ta ga 400 ga ibopü̱xüxü̃ ga gumá cadénagüwa nucuxü̃. Rü wüxichigü ga cadénawa rü taxrechimüxü̃ ga ibopü̱xüxü̃ nanucu. Rü yemachimüxü̃maxã nananga̱xãẽgü ga yema caxtatape̱xearü ngã̱xãẽruü̃gü.
14 Rü yexgumarüxü̃ ta nanaxü ga 10 ga natamügü naxca̱x ga yema 10 ga ya̱u̱xme̱xü̃páxü̃gü.
15 Rü nanaxü ta ga yema dexáchixü̃ ga taxü̃ ga bróũchenaxca̱x rü yema 12 ga woca ga iyatüxü̃chicüna̱xãgü ga yema dexáchiü̃paragü ixĩgüxü̃.
16 Rü yexgumarüxü̃ ta ínanaxüxü̃ ga Tupanapata ga taxü̃nearü nawechigü rü tanimacaarü düxüchiruü̃gü rü choxbüxü̃gü. Rü guxü̃ma ga yema Tupanapataarü yemaxü̃gü ga Charomóü̃ Iráü̃xü̃ íxüxü̃xẽẽxü̃ rü bróũche ga meama ba̱i̱xtachinüxü̃wa ínanaxüxü̃.
17 Rü yemagü rü marü üxü̃ ga naxchicüna̱xã ga waixü̃müwa nixĩ ga ínaxüxü̃ãxü̃ ga Yudáü̃anewa ga ĩanegü ga Chucóx rü Charetáü̃arü ngaxü̃wa.
18 Rü nüma ga Charomóü̃ rü yema nax namuxũchixü̃ ga yema naxpáü̃gü ga bróũchenaxca̱x ga ínaxüxü̃xü̃, rü tama naxca̱x naxoegaãxẽ nax nüxü̃ nacuáxü̃ca̱x ga norü ya.
19 Rü ñu̱xũchi nüma ga Charomóü̃ rü nüxü̃ ínanaxüxü̃xẽxẽ ga guxü̃ma ga yema togü ga Tupanapata ga taxü̃nearü yexmaxü̃gü ga pumarate̱xearü guruxü̃ ga úirunaxca̱x, rü yema mecha ga nagu nanuxü̃ ga yema paũ ga Tupanaca̱x ixĩxü̃.
20 Rü yexgumarüxü̃ ta nüxü̃ ínanaxüxü̃xẽxẽ ga yema omüpawerugü ga 7 chacüxü ga úiru ga mexẽchixü̃wa üxü̃ namaxã ga norü omügü ga naxmachiã ga üünexüchixü̃pe̱xegu nuxü̃ nax yéma nanaigüxü̃ca̱x yema Tupana nüxü̃ ixuxü̃rüxü̃.
21 4:21-22 Rü úiru ga mexẽchixü̃wa nüxü̃ ínanaxüxü̃xẽxẽ ga yema putürachicüna̱xãgü, rü yema omügü, rü yema naixü̃arü yoruxü̃gü, rü pirañagü ga omüchiraü̃arü mexẽẽruü̃gü, rü tacháũgü, rü cuyeragü ga itacü, rü pumarate̱xearü guruü̃gü i naxme̱xgu yangexü̃. Rü yexgumarüxü̃ ta úiru ga imexẽchixü̃maxã nanatü ga yema ĩã̱xgü ga Tupanapata ga taxü̃nearü ücuchica, rü yema norü ĩã̱xgü ga aixepewa ügüxü̃, rü yema naxmachiã ga üünexü̃chixü̃arü ĩã̱x, rü yema norü ĩã̱xgü ta ga guma Tupanapata ga taxü̃ne.
22 Nüü̃ nadau 4:21
