2 Crónicas 5:1-14
5 Rü yexguma marü yanguxgu ga guma Tupanapata ga taxü̃ne, rü nüma ga Charomóü̃ rü yéma nanana ga yema Tupanapata ga taxü̃nearü yemaxü̃gü ga úirunaxca̱x rü diẽrumünaxca̱x ga nanatü ga Dabí Cori ya Tupanana naxü̃. Rü Tupanapata ga taxü̃nearü diẽrutanügu namaxã nanguxü̃.
Yema baú ga Tupanaarü mugü nagu nuxü̃ rü guma yexwaca̱xü̃ne ga Tupanapata ga taxü̃newa nanangegü
2 Rü nüma ga Charomóü̃ rü Yerucharéü̃gu nanangutaque̱xexẽxẽ ga yema Iraéanearü ãẽ̱xgacütücumü, rü guxü̃ma ga yema 12 ga Iraétücumügüarü ãẽ̱xgacügü, rü guxü̃ma ga papagü ga natanüxü̃maxã icua̱xgüxü̃. Rü yemaacü nanangutaque̱xexẽxẽ nax ma̱xpǘne ga Chióü̃wa yayauxgüãxü̃ca̱x ga yema baú ga Tupanaarü mugü nagu nuxü̃, rü guma yexwaca̱xü̃ne ga Tupanapata ga taxü̃newa nangegüaxü̃ca̱x.
3 Rü yema ngunexü̃ ga Iraétanüxü̃ nagu naxüchigagüãxü̃ nax düxenügütüü̃wa nayexmagüxü̃ ga meama norü 7 ga tauemacügu* rü yexguma nixĩ ga Charomóü̃maxã nangutaque̱xegüxü̃ ga yema Iraétanüxü̃arü ãẽ̱xgacügü.
4 Rü yéma ma̱xpǘne ga Chióü̃wa nangugü ga guxü̃ma ga yema Iraétanüxü̃arü ãẽ̱xgacügü. Rü yema Lebítanüxü̃ rü nanangenagü ga yema baú ga Tupanaarü mugü nagu nucuxü̃.
5 Rü guma yexwaca̱xü̃ne ga napatawa nanangegü ga yema baú wüxigu namaxã ga guma nüxíraxü̃ne ga napata ga naxchirunaxca̱x rü guxü̃ma ga norü yemaxü̃gü. Rü yema chacherdótegü rü Lebítanüxü̃ nixĩ ga yéma nanaxü̃.
6 Rü nüma ga ãẽ̱xgacü ga Charomóü̃ rü guxü̃ma ga Iraétanüxü̃ rü guma yexwaca̱xü̃ne ga Tupanapata ga taxü̃nearü düxétügu nangutaque̱xegü nape̱xe ga yema baú ga Tupanaarü mugü nagu nucuxü̃. Rü yexma Tupanaca̱x nanadai rü ínanagu ga muxü̃ma ga carnérugü rü wocaxacügü ga iyatüxü̃. Rü yema nax namuxũchixü̃ ga yema carnérugü rü wocaxacügü ga Tupanana naxãgüxü̃ rü taxucürüwa texé tayaxugü.
7 Rü yemawena ga yema chacherdótegü rü guma Tupanapata ga taxü̃nearü aixepewa nanangegü ga yema baú ga Tupanaarü mugü nagu nucuxü̃. Rü yema Naxmachiã i Üünexüchixü̃gu nayaxǘgü natüü̃gu ga guma naxpe̱xatügü ga yema taxre ga daxũcüã̱xchicüna̱xã ga Charomóü̃ üxü̃.
8 Rü yema taxre ga daxũcüã̱xchicüna̱xãgü rü guma naxpe̱xatügü rü baú íxüxü̃étügu narüxunü rü nayadüxétügü ga yema baú rü naxpawerugü.
9 Natürü guma naxpawerugü rü nima̱x, rü yemaca̱x ga yema nape̱xegü rü nüxü̃ tadauama ga yexguma yema taxü̃ ga nachiãwa idawenügu, natürü yema nachiã ga nawa ixücuxü̃wa rü tama nüxü̃ tadau.
10 Rü yema baúwa rü nüxicatama nayexma ga yema taxre ga nutatachinügü ga nawa naxümatüxü̃ ga Tupanaarü uneta ga Iraétanüxü̃gümaxã naxüxü̃. Rü yexguma Equítuanewa ínachoxü̃gu rü Ma̱xpǘne ga Oréxwa nayexmagu rü yexguma nixĩ ga Moiché ga yema baúgu nanucuãxü̃ ga yema taxre ga nutatachinü.
11 Rü nüma ga chacherdótegü rü ínachoxü̃ nawa ga yema naxmachiã ga üünexü̃ rü Tupanapata ga taxü̃nearü düxétüwa naxĩ. Rü guxü̃ma ga yema chacherdótegü ga yéma yexmagüxü̃ rü marü Tupanape̱xewa nügü nimexẽẽgü woo marü nagu̱xgu nax yema ngunexü̃gu napuracüxü̃ rüe̱xna tama nagu nagu̱xgu.
12 Rü guxü̃ma ga yema Lebítanüxü̃ ga wiyaetanüxü̃ ga Achá rü Emáü̃ rü Yedutúü̃ rü nanegümaxã rü togü ga natanüxü̃maxã ãmarearü guruü̃arü ésteguama nachigü. Rü naxchiru ga línuchinaxca̱xgu nicu̱xgü. Rü nüxü̃́ nayexma ga norü platíyugü rü árpaxacügü rü árpagü. Rü namaxã nayexmagü ga 120 ga chacherdótegü ga cornétagu icuegüxü̃.
13 Rü yema wiyaetanüxü̃ rü paxetatanüxü̃ rü wüxigu nawiyaegü rü Tupanaxü̃ nicua̱xüü̃gü rü Cori ya Tupanana moxẽ naxãgü. Rü yemaacü napaxetagü namaxã ga norü cornétagü rü norü platíyugü rü togü ga paxetaruü̃gü. Rü yema norü wiyaewa rü ñanagürügü: —¡Nüxü̃ picua̱xüü̃gü ya Cori ya Tupana erü nüma rü namecüma rü ngẽma norü ngechaü̃ rü taguma inayagu̱x! —ñanagürügü. Rü yexgumatama ga guma Cori ya Tupanapata ga taxü̃ne rü caxixü̃maxã nanapá.
14 Rü yema caxixü̃gagu rü nüma ga chacherdótegü rü taxucürüwama yexma narücho nax yadaxẽẽgüãxü̃ca̱x ga yema cua̱xüxü̃ ga yéma Tupanaca̱x naxügüxü̃. Yerü Tupanaarü üünemaxã nanapá ga guma napata ga taxü̃ne.
Notas
^ 5:3 Octúbre.
