2 Crónicas 7:1-22
7 7:1-2 Rü yexguma Charomóü̃ nüxü̃ rüchauxgu nax nayumüxẽxü̃ rü daxũguxü̃ ga naanewa narüngu ga üxüema rü yema ãmaregü ga Tupanaca̱x yéma nanaxü̃ rü yema naxü̃nagü ga Tupanaca̱x nada̱i̱xü̃étügu nangu rü nixae. Rü yema Tupanaarü üüne rü guma Tupanapata ga taxü̃ne namaxã nanapa rü yemaca̱x ga yema chacherdótegü rü taxucürüwama nagu nachocu.
2 Nüü̃ nadau 7:1
3 Rü yexguma yema Iraétanüxü̃ nüxü̃ daugügu ga yema üxüema rü Tupanaarü üünexü̃ nax Tupanapata ga taxü̃neétügu ínaxĩxü̃, rü guxü̃ma ga nümagü rü inacaxã́pü̱xügü rü waixü̃müanegu nanangücuchitanü. Rü Tupanaxü̃ nicua̱xüü̃gü rü moxẽ nüxna naxãgü rü ñanagürügü: —Nüma ya Tupana rü namecüma rü norü ngechaü̃ rü taguma inayacuã̱x —ñanagürügü.
4 Rü yemawena rü nüma ga ãẽ̱xgacü ga Charomóü̃ rü guxü̃ma ga yema togü ga Iraétanüxü̃ rü Tupanaca̱x nanadai rü nayagu ga muxü̃ma ga naxü̃nagü.
5 Rü nüma ga ãẽ̱xgacü ga Charomóü̃ rü Tupanaca̱x ínanagu ga 22,000 ga wocagü ga iyatüxü̃ rü 120,000 ga carnérugü. Rü yemaacü nixĩ ga ãẽ̱xgacü rü guxü̃ma ga yema Iraétanüxü̃ ga Tupanaaxü̃́ yaxãxü̃chigüãxü̃ ga guma napata ga taxü̃ne.
6 Rü yema chacherdótegü rü nachicawatama nayexmagü, rü yexgumarüxü̃ ta ga yema Lebítanüxü̃ namaxã ga norü paxetaruü̃gü ga ixüünexü̃ ga ãẽ̱xgacü ga Dabí íxüxü̃ne nax yemaacü napaxpe̱xegüãxü̃ca̱x ga yema wiyae ga ñaxü̃: —Tupanaarü ngechaü̃ rü guxü̃guma nangẽxmaecha —ñaxü̃. Rü yema chacherdótegü rü Lebítanüxü̃pe̱xewa nayacuegü ga norü cornétagü. Rü guxü̃ma ga yema Iraétanüxü̃ rü yexma nachigüecha.
7 Rü nüma ga Charomóü̃ rü Tupanana nanaxuaxü̃ ta ga yema naa̱xtü ga ngãxü̃wa üxü̃ ga Tupanapata ga taxü̃nepe̱xewa yexmaxü̃. Rü yéma nixĩ ga ínaguaxü̃ ga yema ãmaregü ga naxü̃nagü rü yema norü chíxü̃ ga Tupanana naxãmaregüxü̃. Yerü yema Charomóü̃ üxü̃ ga ãmarearü guruxü̃ rü tama nagu name ga yema ãmaregü ga naxü̃nagü rü trigugü rü chíxü̃gü ga Tupanana naxãgüxü̃.
8 Rü yema ngunexü̃gügu ga Charomóü̃ rü guxü̃ma ga Iraétanüxü̃ rü nanaxüchigagü ga düxenügüarü peta. Rü yemaca̱x yexma nangutaque̱xegü ga muxü̃ma ga Iraétanüxü̃ ga ĩane ga Amáca̱x íxücuxü̃wa ne ĩxü̃ ga nórtewa rü ñu̱xmata Equítuarü natüwa nangu ga súrwa.
9 Rü 14 ga ngunexü̃ nixĩ ga nagu yangegüxü̃ nax yaxãxü̃chigüãxü̃ ga Tupanapata. Yerü 7 ga ngunexü̃ nixĩ ga naxügüãxü̃ ga yema ãmarearü guruü̃arü ãxü̃chichiga, rü to ga 7 ga ngunexü̃ nixĩ ga naxügü ga yema düxenügüarü petachiga. Rü yemawena rü norü 15 ga ngunexü̃gu rü wüxi ga ngutaque̱xe ga taxü̃ naxügü nax Tupanaxü̃ yacua̱xüü̃güxü̃ca̱x.
10 Rü gumá taunecüarü 7 ga tauemacüarü 23 gu nixĩ ga ãẽ̱xgacü ga duü̃xü̃güxü̃ namoxẽxü̃ nax napataca̱x nawoeguxü̃ca̱x. Rü yemaacü taãẽãcü nawoegu. Rü Tupanaxü̃ nicua̱xüü̃gü naxca̱x ga yema mexü̃gü ga Dabíca̱x, rü Charomóü̃ca̱x rü yema norü duü̃xü̃gü ga Iraétanüxü̃ca̱x naxüxü̃.
Tupana rü Charomóü̃maxã inaxuneta
11 7:11-12 Rü yexguma Charomóü̃ yanguxẽxẽgu ga guma Tupanapata ga taxü̃ne rü guma ãẽ̱xgacüpata rü guxü̃ma ga yema togü ga yemaxü̃gü ga naxüxü̃, rü nüma ga Cori ya Tupana rü wüxi ga chütacü naxca̱x nango̱x rü ñanagürü nüxü̃: —Marü nüxü̃ chaxĩnü i ngẽma curü yumüxẽ rü marü nüxü̃ chaxuneta ya daa chopata ya taxü̃ne nax yimawa choxna penaxãmaregüxü̃ i ngẽma naxü̃nagü i cha̱u̱xca̱x pedaixü̃ rü ípeguxü̃.
12 Nüü̃ nadau 7:11
13 7:13-14 Rü ngẽxguma perü chixexü̃gagu íchananguxẽxẽgu nax yapagüanexü̃ rü íchayachaxãchixẽxẽgu nax napuxü̃, rü ngẽxguma munügü íchangugüxẽxẽgu nax penetügü nangṍxü̃ca̱x rüe̱xna pexca̱x da̱xaweane íchanguxẽxẽgu, natürü ngẽxguma chope̱xegu pegü íperüxíragügu i pemax nax chorü duü̃xü̃gü pixĩgüxü̃, rü ngẽxguma peyumüxẽgügu rü cha̱u̱xca̱x pewoeguxgu, rü nüxü̃ perüxoegu i ngẽma chixexü̃ i pecümagü, rü choma rü tá pexü̃ chaxĩnü i yea daxũguxü̃ i naanewa íchangexmaxü̃wa. Rü tá pexü̃́ nüxü̃ icharüngüma i perü chixexü̃gü rü tá ichayanaxoxẽxẽ i ngẽma guxchaxü̃ i perü naanewa ngẽxmaxü̃.
14 Nüü̃ nadau 7:13
15 Rü ñu̱xmacürüwa rü mea tá pexü̃́ nüxü̃ chaxĩnü i perü yumüxẽgü i daa chopatawa pexüxü̃.
16 Erü chomatama nüxü̃ chaxuneta rü chanaxüünexẽxẽ ya daa chopata ya taxü̃ne nax nawa tá guxü̃guma changexmaxü̃. Rü guxü̃gutáma chauãẽwa nangẽxma rü tá nüxna chadau.
17 7:17-18 Rü ñu̱xma i cumax, Pa Charomóü̃x, rü ngẽxguma tá cunatü ya Dabírüxü̃ mea chauga cuxĩnügu, rü nagu cumaxü̃gu i ngẽma chorü mugü rü chorü ucu̱xẽgü, rü choma rü tá chayanguxẽxẽ ga yema uneta ga cunatü ga Dabímaxã nüxü̃ chixuxü̃ nax cune rü cutaagü rü guxü̃gutáma Iraéanearü ãẽ̱xgacügü tá yaxĩgüxü̃.
18 Nüü̃ nadau 7:17
19 7:19-20 Natürü ngẽxguma pema rü choxna pixĩgachitanügu rü tama peyanguxẽẽgu i ngẽma mugü ga pexna chaxãxü̃ rü naxchicüna̱xãgüxü̃mare picua̱xüü̃gügu, rü choma rü tá nawa pexü̃ íchawoxü̃ i ñaa naane i pexna chaxãxü̃. Rü tá nüxna chixũgachi ya daa chopata ya taxü̃ne ya chaxüünexẽẽchiréne, rü tá wüxi i cugüruxü̃ pexü̃ chixĩxẽxẽ nape̱xewa i ngẽma togü i nachixü̃anegü.
20 Nüü̃ nadau 7:19
21 Rü daa chopata ya taxü̃ne ya mexẽchichiréne rü nachicaxica tá ngéma nayaxǘ. Rü ngẽxguma i guxü̃ma i duü̃xü̃ i nawa üpetüxü̃ i ñaa nachica rü nüxü̃ nadaugügu i ngẽma chopata ya taxü̃nechica rü tá namaxã naba̱i̱xãchie rü tá ñanagürügü: “¿Ta̱xacüca̱x ya Cori ya Tupana i nüxna yaxũgachixü̃ i ñaa nachixü̃ane rü daa napata ya taxü̃ne?” ñanagürügü tá.
22 Rü namücügü rü tá nanangãxü̃gü rü ñanagürügü tá: “Yemaacü namaxã nangupetü yerü yema duü̃xü̃gü rü nüxna nixĩgachi ga Cori ya norü o̱xigüarü Tupana ga Equítuanewa ínanguxü̃xẽẽcü, rü nawe narüxĩ ga yema naxchicüna̱xãgümare rü nüxü̃ nicua̱xüü̃gü. Rü yemaca̱x nixĩ ga Tupana ga naxca̱x ínanguxẽẽgüãxü̃ ga yema taxü̃ ga guxchaxü̃gü”, ñanagürügü tá —ñanagürü ga Tupana.
