2 Crónicas 8:1-18
8 Rü 20 ga taunecü nixĩ ga Charomóü̃axü̃́ yanguxü̃ nax naxüaxü̃ ga guma Tupanapata ga taxü̃ne rü guma ãẽ̱xgacüpata.
2 Rü ñu̱xũchi nayamexẽxẽ ga guma ĩanegü ga ãẽ̱xgacü ga Iráü̃ woeguxẽẽne. Rü guma ĩanegügu nayanu ga Iraétanüxü̃ nax nawa namaxẽxü̃ca̱x.
3 Rü yemawena rü nanapu ga ĩane ga Amá ga Chobáanewa yexmane.
4 Rü nanamexẽxẽ ga ĩane ga Tamáx ga naxnecüanewa yexmane. Rü yexgumarüxü̃ ta nayamexẽxẽ ga guxü̃nema ga guma náigü ga ĩanegü ga nawemügü nagu nanutaque̱xegüne ga Amáarü naanewa.
5 Rü yexgumarüxü̃ ta wena nanamexẽxẽ ga guma ĩane ga Bex-oróü̃ ga ma̱xpǘnewa yexmane rü guma ĩane ga Bex-oróü̃ ga norü tuãchiwa yexmane. Rü guma ĩanegü rü ínayapoxegugü rü nananucu ga norü ĩã̱xgü namaxã ga norü chotaruü̃gü.
6 Rü yexgumarüxü̃ ta nanamexẽxẽ ga guma ĩane ga Baará rü ñu̱xũchi nayamexẽẽgü ga naigü ga ĩanegü ga nawemügü nagu nanutaque̱xegüne. Rü yexgumarüxü̃ ta nayamexẽẽgü ga guxü̃nema ga norü churaragüarü carupataü̃gü rü cowarupataü̃gü. Rü Yerucharéü̃wa rü Líbanuwa rü guxü̃ma ga naane ga namaxã inacuáxü̃wa nanaxü ta ga guxü̃nema ga ĩpatagü ga naxüchaxü̃ne.
7 8:7-8 Rü nayexma ta ga duü̃xü̃gü ga tama Iraétanüxü̃ ixĩgüxü̃. Rü yema nixĩ ga nataagü ga yema duü̃xü̃gü ga Iraétanüxü̃arü o̱xigü tama daixü̃ ga Itítanüxü̃, rü Amoréutanüxü̃ rü Ebéutanüxü̃, rü Ferechéutanüxü̃, rü Yebuchéutanüxü̃. Rü nüma ga Charomóü̃ rü yáxü̃ ga puracüwa nanapuracüexẽxẽ. Rü woo i ñu̱xma rü ta rü ngẽmaãcütama nixĩ. Rü nüma ga Charomóü̃ rü yáxü̃ ga puracüwa tüxü̃ napuracüexẽxẽ ga guxema yema naanewa yaxügüxe rü tama Iraétanüxü̃ tüxü̃ daixe ga Amuréutanüxü̃ rü Itítanüxü̃ rü Ferechéutanüxü̃ rü Ebéutanüxü̃ rü Yebuchéutanüxü̃. Rü yemaacü poraãcü tüxü̃ napuracüexẽxẽ rü woo i ñu̱xma rü ngẽmaãcütama nixĩ.
8 Nüü̃ nadau 8:7
9 Natürü nüma ga Charomóü̃ rü tama yema norü puracü ga yáxü̃wa nanapuracüexẽxẽ ga Iraétanüxü̃. Rü yema puracü ga nüxna naxãxü̃ nixĩ nax norü churaragüarü ãẽ̱xgacügü ga capitáü̃gü rü comandántegü yixĩgüxü̃ nax norü carugümaxã rü cowarugümaxã inacua̱xgüxü̃ca̱x.
10 Rü nüma ga Charomóü̃ rü nüxü̃́ nayexma ga 250 ga ãẽ̱xgacügü ga namaxã icua̱xgüxü̃ ga yema puracütanüxü̃.
11 Rü nüma ga Charomóü̃ rü ngĩmaxã naxãxma̱x ga Faraóü̃xacü. Natürü tama nanaxwa̱xe nax gumawa nayexmaxü̃ca̱x ga yema Yerucharéü̃arü üye ga Dabíarü Ĩanegu ãégaxü̃. Yerü noxri rü yéma nayexma ga yema baú ga Tupanaarü mugüchixü̃ rü yemaca̱x naxüüne ga yema nachica. Rü yemaca̱x nanaxü ga nai ga ãẽ̱xgacüpata nax gumawa namaxü̃xü̃ca̱x ga yema naxma̱x.
12 Rü nüma ga Charomóü̃ rü Tupanaca̱x ínanagu ga norü ãmaregü nawa ga yema ãmarearü guruxü̃ ga Tupanapata ga taxü̃nepe̱xegu naxüxü̃.
13 Rü yema ngunexü̃gü ga nagu yéma ínaguaxü̃ nixĩ ga yema ngunexü̃gü ga Moiché nüxü̃ unetaxü̃. Rü yema nixĩ ga ngü̃chigaarü ngunexü̃gu, rü tauemacü ya ngexwacaxü̃cügu, rü yema tomaepü̱x ga petagü ga wüxichigü ga taunecügu naxüchigagüxü̃gu. Rü yema nixĩ ga paũ i ngearü pu̱xẽẽruü̃ã́xü̃arü petachigagu, rü nanetüarü buxgüchigagu, rü düxenügüarü petachigagu.
14 Rü yexgumarüxü̃ ta yema nanatü ga Dabí namaxã nüxü̃ ixuxü̃ãcü rü Charomóü̃ rü nüxü̃ nayanu ga norü puracü ga yema chacherdótegü. Rü nüxü̃ nayanu ga norü puracü ga yema Lebítanüxü̃ nax wüxichigü ga ngunexü̃gu rü chacherdótegüxü̃ nangü̃xẽẽgüxü̃ca̱x rü namaxã inacua̱xgüxü̃ca̱x ga Tupanaarü cua̱xüxü̃gü. Rü yexgumarüxü̃ ta nüxü̃ nayanu ga norü puracü ga yema ĩã̱xarü dauruü̃gü ga wüxichigü ga ĩã̱xwa, yerü yemaacü nixĩ ga nüxü̃ yaxuxü̃ ga Tupanaarü duü̃ ga Dabí.
15 Rü yemaacü ga nümagü ga yema chacherdótegü, rü yema ĩã̱xarü dauruü̃gü rü yema diẽrumaxã icua̱xgüxü̃ rü guxü̃guma nayanguxẽẽgü ga yema mugü ga ãẽ̱xgacü ga Dabí nüxü̃ ixuxü̃.
16 Rü guxü̃ma ga yema puracü ga Charomóü̃ üxü̃ rü yexguma noxritama nanuxcuãgu ga guma nutagü ga namaxã inaxügücü ga guma Tupanapata ga taxü̃ne nixĩ ga inaxügüxü̃ ga yema puracü rü ñu̱xmata meama yangu ga guma Tupanapata ga taxü̃ne. Rü yemaacü ga guma Tupanapata ga taxü̃ne rü meama ningu.
17 Rü yemawena nüma ga Charomóü̃ rü ĩanegü ga Echióü̃-guébewa rü Eráxwa naxũ. Rü guma ĩanegü rü Edóü̃arü naanewa nayexmagü ga márcutüwa.
18 Rü nüma ga Tíruarü ãẽ̱xgacü ga Iráü̃ rü yéma nanamu ga wapurugü rü ñuxre ga norü churaragüarü ãẽ̱xgacügü namaxã ga yatügü ga meama nüxü̃ icuáxü̃ nax ñuxãcü wapurugu naxĩxü̃ ga márwa. Rü yema Iráü̃arü yatügü rü ñuxre ga Charomóü̃arü ngü̃xẽẽruü̃gümaxã Ofíarü naanewa naxĩ. Rü yéma nanayauxgü ga wixgu 15,000 quíru nagúxü̃ ga úiru. Rü ãẽ̱xgacü ga Charomóü̃xü̃tawa nanangegü.
