2 Crónicas 9:1-31
9 Rü ngĩma ga Chabáanearü ãẽ̱xgacü rü nüxü̃ ixĩnüchiga ga Charomóü̃ nax ñuxãcü ãẽ̱xgacü ga nüxü̃ cua̱xüchicü yixĩxü̃. Rü yemaca̱x Yerucharéü̃wa ixũ nax nüxü̃ yaxüxü̃ca̱x namaxã ga ñuxre ga cagü ga poraãcü iguxchaxü̃. Rü ngĩma rü yéma ingu namaxã ga muxü̃ma ga ngĩrü ngü̃xẽẽruü̃gü rü ngĩrü caméyugü ga pumaramaxã rü taxü̃ ga úirumaxã rü nutaxacügü ga ngã̱xãẽruü̃gümaxã ixãxwetaxü̃. Rü yexguma Charomóü̃xü̃tawa nanguxgu, rü nüxna ica namaxã ga guxü̃ma ga yema cagü ga nagu naxĩnüxü̃.
2 Rü nüma ga Charomóü̃ rü meama nanangãxü̃ ga guxü̃ma ga ngĩrü cagü. Rü bai ga wüxi ga ngĩrü ca ga tama mea nangãxü̃xü̃.
3 Rü ngĩma ga Chabáanearü ãẽ̱xgacü rü namaxã ibaixãchi ga yema cua̱x ga Charomóü̃axü̃́ rü namaxã ibaixãchi ta ga guma ãẽ̱xgacüpata ga nüma naxüxü̃ne.
4 Rü yexgumarüxü̃ ta namaxã ibaixãchi ga yema maixcuraxü̃gü ga norü mechawa inuagüxü̃, rü norü ucapugü ga norü ngü̃xẽẽruü̃gü, rü nacümagü rü naxchirugü ga nagu yacu̱xgüxü̃ ga naxü̃taxü̃gü rü norü baeruü̃gü. Rü yexgumarüxü̃ ta namaxã ibaixãchi ga guma toxṍõne ga nawa Tupanapata ga taxü̃negu naxĩnagüne rü yema ãmaregü ga Tupanapata ga taxü̃newa yexmagüxü̃ ga Charomóü̃ Tupanana ãxü̃.
5 Rü yexguma ga ngĩma rü Charomóü̃xü̃ ngĩgürügü: —Pa Ãẽ̱xgacüx, guxü̃ma i ngẽma curü puracüchiga rü curü cuáchiga i chauchixü̃anegu nüxü̃ chaxĩnüxü̃ rü aixcümaxü̃chi nixĩ.
6 Rü noxri rü tama chayaxõ ga yema chomaxã nüxü̃ yaxugüexü̃ ga cuchiga, natürü i ñu̱xma nax nua chaxũxü̃ rü chauxetümaxã nüxü̃ chadauxü̃ i ngẽma cuxüxü̃, rü nüxü̃ chacua̱x nax aixcüma yixĩxü̃ i guxü̃ma i ngẽma nüxü̃ yaxugüexü̃. Rü bai i norü ngãxü̃wa nanguxü̃ ga yema chomaxã nüxü̃ yaxugüexü̃ ga curü cuáchiga, erü ngẽma nüxü̃ chaxĩnüxü̃arü yexeraxüchi nixĩ i ngẽma cua̱x i cuxü̃́ ngẽxmaxü̃.
7 Rü aixcüma nataãẽgü i ngẽma cuxma̱xgü rü curü duü̃xü̃gü, rü curü ngü̃xẽẽruü̃gü i cucüwawa ngẽxmagüxü̃ rü guxü̃guma mexü̃ i curü ucu̱xẽxü̃ ĩnüexü̃.
8 Rü name ya Cori ya curü Tupana ya cumaxã taãẽcü, rü ãẽ̱xgacüxü̃ cuxü̃ imucuchicü nax cuma namaxã icucuáxü̃ca̱x i Iraétanüxü̃. Rü nüma ya Tupana rü poraãcü nüxü̃ nangechaxü̃ i Iraétanüxü̃, rü guxü̃guma nüxü̃ narüngü̃xẽẽchaü̃, rü ngẽmaca̱x norü ãẽ̱xgacüxü̃ cuxü̃ ningucuchixẽxẽ nax aixcüma we̱xgu namaxã icucuáxü̃ca̱x —ngĩgürügü.
9 Rü yemawena rü ñu̱xũchi ga ngĩmax ga Chabáanearü ãẽ̱xgacü rü Charomóü̃na ínana ga 3,960 quíru ga úiru, rü muxü̃ma ga pumaragü rü nutaxacügü ga nga̱xãẽruü̃gü. Rü yema muxũchixü̃ ga pumaragü ga Chabáanearü ãẽ̱xgacü Charomóü̃na nanaxü̃, rü ü̃paacü rü taguma yexgumaepü̱x ga pumara Iraéanewa nangugü.
10 Rü yexgumarüxü̃ ta ga ãẽ̱xgacü ga Iráü̃arü duü̃xü̃gü rü wüxigu Charomóü̃arü duü̃xü̃gümaxã yéma Ofíanewa ne nanana ga úiru rü nai ga cháü̃darupütagü rü nutaxacügü ga ngã̱xãẽruü̃gü.
11 Rü yema cháü̃darupütagüwa nixĩ ga Charomóü̃ naxüaxü̃ ga Tupanapata ga taxü̃nearü toxṍõnegü rü barándagü, rü ãẽ̱xgacüpataarü toxṍõnegü rü barándagü, rü ñu̱xũchi árpagü rü árpaxacügü ga paxetatanüxü̃ namaxã paxetagüxü̃. Rü Yudáanewa rü taguma texé nüxü̃ tadau ga ta̱xacü ga yexgumarüxü̃ ixĩxü̃.
12 Rü nüma ga ãẽ̱xgacü ga Charomóü̃ rü Chabáanearü ãẽ̱xgacüna nanaxã ga guxü̃ma ga yema ngĩma naxca̱x ínaca̱xü̃ naétü ga yema marü ngĩxna naxãxü̃ naxca̱x ga yema ngĩma nüxna nanaxü̃. Rü yemawena ga ngĩma ga Chabáanearü ãẽ̱xgacü rü ngĩchixü̃aneca̱x itaegu namaxã ga guxü̃ma ga ngĩrü ngü̃xẽẽruü̃gü.
Charomóü̃ rü natachiga nagagu ga norü cua̱x rü norü yemaxü̃gü
13 Rü wüxichigü ga taunecügu ga ãẽ̱xgacü ga Charomóü̃ nanayaxu ga 22,000 quíru ga úiru.
14 Rü yemaétü ngĩxü̃ nayaxu ga yema diẽru ga nüma ga ãẽ̱xgacü ngĩxü̃ unetacü nax naxütanügüãxü̃ca̱x ga taxepataxü̃arü yoragü rü yema togü ga taxetanüxü̃. Rü yexgumarüxü̃ ta ga guxü̃ma ga Arábiaanearü ãẽ̱xgacügü, rü yema ãẽ̱xgacügü ga Iraéanearü üyechigümaxã icua̱xgüxü̃, rü Charomóü̃xü̃tawa nanana ga úiru rü diẽrumü.
15 Rü nüma ga ãẽ̱xgacü ga Charomóü̃ rü norü puracütanüxü̃xü̃ namu nax yema úiru ga ipomüxü̃wa naxügüã̱xü̃ca̱x ga 200 ga poxü̃ruü̃gü ga ítáxü̃. Rü 6 quíru ga úiru nagu naxücu ga wüxichigü.
16 Rü ñu̱xũchi nüma ga Charomóü̃ rü nüxü̃ nanaxüxẽxẽ ta ga 300 ga poxü̃ruü̃gü ga ixíxraxü̃ ga úiru ga ipomüxü̃wa. Rü wüxitachinüwachigü rü tomaepü̱x ga quíru nagu name. Rü ñu̱xũchi guma napata ga Líbanuarü Naixnecügu ãéganegu nananucu.
17 Rü ñu̱xũchi norü puracütanüxü̃xü̃ namu nax naxügüã̱xü̃ca̱x ga wüxi ga toruxü̃ ga marfímaxã ngã̱xãẽxü̃. Rü úiru ga nüxica ixĩxü̃maxã nanatüxünegü.
18 Rü guma norü toxṍõne ga yema toruxü̃ rü 6 nixĩ ga norü chinagüchigüruxü̃. Rü yema ãẽ̱xgacü nagu cuaixcutüxü̃ rü úirunaxca̱x nixĩ. Rü wüxicüwawachigü rü nüxü̃́ nayexma ga norü ngü̃chacüüruü̃gü. Rü wüxichigü ga nacüwawa nayexma ga wüxi ga leóü̃chicüna̱xã ga yexma chíxü̃.
19 Rü ñu̱xũchi nayexma ta ga 12 ga leóü̃chicüna̱xãgü ga wüxichigü ga yema 6 ga chinagücutüruü̃cüwagu chíxü̃. Rü nataxuma ga to ga ãẽ̱xgacü ga nüxü̃́ yexmaxü̃ ga wüxi ga toruxü̃ ga yemarüxü̃ mexẽchixü̃.
20 Rü guxü̃ma ga ãẽ̱xgacü ga Charomóü̃arü axepáxü̃gü rü úiruxica nixĩgü. Rü guxü̃ma ga yema poratugü ga napata ga Líbanuarü Naixnecügu ãéganewa yexmagüxü̃ rü úirunaxca̱x nixĩgü. Rü nataxuma ga diẽrumünaxca̱x ixĩxü̃, yerü yexguma Charomóü̃ ãẽ̱xgacü ixĩxgu rü diẽrumü rü naxítanüxü̃chi.
21 Rü nüma ga ãẽ̱xgacü ga Charomóü̃ rü nüxü̃́ nayexma ga norü wapurugü ga Tárchixwa ĩĩxü̃ne. Rü Iráü̃arü duü̃xü̃gü nixĩ ga namaxã icua̱xgüxü̃. Rü wüxichigü ga tomaepü̱x ga taunecüguwena ínangugüxü̃ rü yéma ne nanana ga úiru, rü diẽrumü, rü marfí, rü naeü̃gü rü pirugü ga meruxü̃gü.
22 Rü nüma ga ãẽ̱xgacü ga Charomóü̃ rü norü cua̱xwa rü norü yemaxü̃güwa rü nüxü̃ narüyexeramae ga guxü̃ma ga togü ga ãẽ̱xgacügü ga ñoma ga naanewa yexmagüxü̃.
23 Rü guxü̃ma ga ãẽ̱xgacügü ga ñoma ga naanewa yexmagüxü̃ rü naxü̃tawa ínayadaugüchaü̃ nax nüxü̃ naxĩnüexü̃ca̱x ga yema cua̱x ga Tupana nüxna ãxü̃.
24 Rü ñu̱xũchi wüxichigü ga taunecügu rü guxü̃ma ga yema duü̃xü̃gü ga íyadaugüxü̃ rü norü ãmaregümaxã yéma naxĩĩxü̃, rü nüxna nanaxãgü ga meruxü̃gü ga diẽrumünaxca̱x rü úirunaxca̱x, rü naxchiru i máxcharaxü̃, rü naxnegü, rü pumaragü, rü cowarugü rü mulagü.
Charomóü̃ rü naxca̱x nataxe rü namaxã nataxe ga cowarugü rü carugü ga daiwexü̃gü
25 Rü nüma ga ãẽ̱xgacü ga Charomóü̃ rü nüxü̃́ nayexma ga 4,000 ga cowarugüarü mugüchicaxü̃ rü carugüarü nuchicaxü̃. Rü nüxü̃́ nayexma ga 12,000 ga norü churaragü ga cowarugu ĩxü̃. Rü guma carugü ga daiwexü̃pataxü̃gu nayanu ga yema churaragü. Rü togü rü ãẽ̱xgacüpataarü dauruü̃gü nixĩgü ga Yerucharéü̃wa.
26 Rü nüma ga ãẽ̱xgacü ga Charomóü̃ rü namaxã inacua̱x ga guxü̃ma ga yema ãẽ̱xgacügü ga natü ga Eufrátewa yexmagüxü̃ rü ñu̱xmata Firitéugüarü naanewa nangu rü ñu̱xmata Equítuanearü üyeanewa nangu.
27 Rü nüma ga ãẽ̱xgacü rü Yerucharéü̃gu nananutaque̱xe ga taxü̃ ga diẽrumü, rü yemaca̱x ñoma nutagürüxü̃ namuxũchi. Rü yexgumarüxü̃ ta inanato ga ocayiwagü rü yemaca̱x namuxũchi ñoma igu ga naixnecüwa rüxügüxü̃rüxü̃.
28 Rü yema Charomóü̃arü cowarugü rü Equítuanewa rü guxü̃ma ga yema togü ga nachixü̃anegüwa nixĩ ga ne nagagüãxü̃.
Nayu ga Charomóü̃
29 Rü guxü̃ma ga nachiga ga ãẽ̱xgacü ga Charomóü̃, rü nagu naxümatü ga yema popera ga Tupanaarü orearü uruxü̃ ga Natáü̃ ümatüxü̃. Rü norü ügüwa inaxügü rü ñu̱xmata norü gu̱xwa nangu. Rü yexgumarüxü̃ ta yema Tupanaarü orearü uruxü̃ ga Aía ga Chilócüã̱x nüxü̃ ixuxü̃ ga Charomóü̃chiga rü poperawa nango̱x. Rü ñu̱xũchi yema Charomóü̃ üxü rü nawa nango̱x ga yema popera ga naxümatüxü̃ ga Tupanaarü orearü uruxü̃ ga Idú. Rü nüma ga Idú nixĩ ga nüxü̃ ixuxü̃ ga ore ga Yeruboáü̃ ga Nabáx nanechiga.
30 Rü nüma ga Charomóü̃ rü 40 ga taunecü nixĩ ga Yerucharéü̃wa ãẽ̱xgacü yixĩxü̃ rü guxü̃ma ga Iraéanemaxã inacuáxü̃.
31 Rü yexguma nayu̱xgu rü nanatü ga Dabíarü Ĩanegu nanata̱xgü. Rü nawena rü nane ga Roboáü̃ nachicüxü ãẽ̱xgacü nixĩ.
