2 Tesalonicenses 1:1-12
1 Pa Toenexẽgü i Yaxõgüxü̃ i Techarónicawa Ngẽxmagüxü̃, choma i Pauru namaxã i taenexẽgü i Chilbánu rü Timutéu nixĩ i tanaxümatüxü̃ i ñaa popera pexca̱x i pema i Tanatü ya Tupana rü tórü Cori ya Ngechuchu ya Cristuarü duü̃xü̃gü ixĩgüxü̃.
2 Rü tanaxwa̱xe i Tanatü ya Tupana rü tórü Cori ya Ngechuchu ya Cristu pexü̃ rüngü̃xẽxẽ rü pexü̃ nataãẽxẽxẽ.
Ngẽma chixexü̃ ügüxü̃ rü Tupana tá nanapoxcue i ngẽxguma wenaxarü núma naxũxgu ya Cristu
3 Pa Toenexẽgüx, guxü̃guma Tupanana moxẽ pexca̱x taxã. Rü name nixĩ nax ngẽmaãcü tanaxüxü̃, erü pema rü yexeraãcü peyaxõgüetanü, rü wüxichigü i pema rü yexeraãcü pegü pingechaü̃güetanü.
4 Rü ngẽmaca̱x tomatama taãẽãcüma pechigaxü̃ tixu natanüwa i ngẽma togü i Tupanaaxü̃́ yaxõgüxü̃. Rü namaxã nüxü̃ tixu nax aixcüma mea peyaxõgüxü̃, rü ñuxãcü namaxã peporaexü̃ woo pewe yangexü̃tanügu i ngẽma Yudíugü rü woo namuxgu i ngẽma ngúxü̃ i pexca̱x íngugüxü̃.
5 Rü ngẽma guxchaxü̃gü i pexca̱x ínguxü̃wa nüxü̃ tacua̱x nax Tupana pexü̃ íyamexẽẽgüxü̃ nax pichocuxü̃ca̱x i ngextá nüma ãẽ̱xgacü íyixĩxü̃wa. Rü ngẽmaca̱x nixĩ i ngúxü̃ pingegüxü̃ i ñu̱xmax.
6 Rü name nax Tupana ngúxü̃ nüxü̃ yangexẽẽgüxü̃ i ngẽma duü̃xü̃gü i ngúxü̃ pexü̃ ingegüxẽẽxü̃.
7 Rü pema i ñu̱xma ngúxü̃ pingegüxü̃ rü Tupana tá tüxü̃ inarüngü̃güxẽxẽ. Rü ngẽma tá nanaxü ya Tupana i ngẽxguma üxüemagu daxũwa ne naxũxgu ya tórü Cori ya Ngechuchu ya Cristu wüxigu namaxã i norü orearü ngeruü̃gü i poraexü̃.
8 Rü núma tá naxũ i nüma ya tórü Cori ya Ngechuchu nax napoxcueãxü̃ca̱x i ngẽma duü̃xü̃gü i tama Tupanaxü̃ cua̱xgüchaü̃xü̃ rü tama naga ĩnüexü̃ i ngẽma ore i mexü̃ i tórü Cori ya Ngechuchu ya Cristuchiga.
9 Rü ngẽma duü̃xü̃gü rü poxcu i taguma guxü̃gu tá inarütauxe, rü tórü Cori ya Ngechuchuarü yáxü̃wa tá nawogü. Rü ngéma rü tagutáma nüxü̃ nadaugü i tórü Cori ya Ngechuchuarü mexü̃ rü norü pora.
10 Rü ngẽmaãcü tá ngẽma duü̃xü̃gümaxã nangupetü i ngẽxguma tórü Cori ya Ngechuchu núma ũxgu nax norü duü̃xü̃gü i üünexü̃ nüxü̃ icua̱xüü̃güxü̃ca̱x. Rü guxü̃ma i yaxõgüxü̃ rü tá naba̱i̱xãchiãẽgü rü nataãẽgü i ngẽxguma nüxü̃ nadaugügu. Rü pema rü tá ta ngéma pengẽxmagü, yerü peyaxõgü ga yema Tupanaarü ore ga pemaxã nüxü̃ tixuxü̃.
11 Rü ngẽmaca̱x guxü̃guma pexca̱x tayumüxẽgü. Rü Tupanana taca nax nüma pexü̃ nadauxü̃ nax mexü̃ i norü duü̃xü̃gü pixĩgüxü̃ i ñu̱xma nax pexü̃ nadexü̃. Rü ngẽxgumarüxü̃ ta nüxna taca nax nümatama norü poramaxã yanguxẽẽãxü̃ca̱x i guxü̃ma i ngẽma mexü̃ i peãẽwa nagu perüxĩnüexü̃ rü guxü̃ma i ngẽma puracügü i perü õgagu pexüxü̃.
12 Rü ngẽxguma Tupana ngẽmaãcü pexü̃ rüngü̃xẽẽgu, rü perü maxü̃ i mexü̃gagu rü duü̃xü̃gü tá nüxü̃ nicua̱xüü̃gü ya tórü Cori ya Ngechuchu ya Cristu. Rü nümatama ya tórü Cori rü tá pemaxã nataãxẽ, erü nüma rü wüxigu Tanatü ya Tupanamaxã pexü̃ nangechaü̃gü.
