2 Tesalonicenses 2:1-17
2 2:1-2 Rü ñu̱xma Pa Chauenexẽgüx, rü pemaxã nüxü̃ tixuxchaü̃ i nachiga ya tórü Cori ya Ngechuchu ya Cristu i ngẽxguma wena núma naxũxgu rü tüxü̃ nangutaque̱xexẽẽgügu nax wüxiwa namaxã ingexmagüxü̃ca̱x. Rü pexü̃ taca̱xaxü̃ nax tama penaxüchicüüxü̃ca̱x i perü ĩnü rü tama paxa peyaxõgüxü̃ i ta̱xacürü to i ore i tama toma pemaxã nüxü̃ tixuxü̃ ixĩxü̃. Erü tama tanaxwa̱xe nax peba̱i̱xãchiãẽgüxü̃ ega texé pemaxã idoraegu rü pemaxã nüxü̃ ixuxgu nax marü ínanguxü̃ ya tórü Cori ya Ngechuchu. Rü ngẽxguma texé pemaxã nüxü̃ ixuxgu nax nagu taxãnegüxü̃ nax Cristu rü marü ínanguxü̃, rü tama name i tümaga pexĩnüe. Rü woo pemaxã nüxü̃ tixugügu nax tanayauxgüxü̃ i wüxi i torü popera i nawa nüxü̃ ixuxü̃ nax marü wena ínanguxü̃ ya tórü Cori ya Ngechuchu, ¡rü taũtáma tüxü̃́ peyaxõgü!
2 Nüü̃ nadau 2:1
3 ¡Rü taũtáma naga pexĩnüe i ngẽma duü̃xü̃gü i ngẽmaãcü pexü̃ womüxẽẽgüchaü̃xü̃! Erü naxü̃pa nax Ngechuchu núma ũxü̃ rü tá ínangu i ngẽma yatü i Tupanaarü uanü ixĩxü̃, rü tá nananuexẽxẽ i muxü̃ma i duü̃xü̃gü i yaxõgüchiréxü̃. Natürü Tupana marü ngẽma yatümaxã nanaxuegu rü tá nax napoxcuxü̃.
4 Rü ngẽma Tupanaarü uanü rü tá Tupanamaxã rü guxü̃ma i ngẽma Tupanaarü ixĩgüxü̃maxã narüxuanü. Rü tá naxchi naxai i guxü̃ma i ngẽmaxü̃gü i namaxã Tupanaxü̃ icua̱xüü̃güxü̃. Rü Tupanapata ya taxü̃newa tá nayarüto ñoma Tupana yixĩxü̃rüxü̃. Rü nüma rü tá nügü nixu nax Tupana yixĩxü̃.
5 ¿Tama ẽ̱xna nüxna pecua̱xãchie ga yexguma petanüwa chayexmagu, rü marü meama pemaxã nüxü̃ chixu nachiga ga yema?
6 Rü pema marü nüxü̃ pecua̱x nax ta̱xacüca̱x yixĩxü̃ i tauta núma naxũxü̃ i ngẽma Tupanaarü uanü. Tauta núma naxũ, erü tauta nawa nangu i ngẽma ngunexü̃ i nagu nua naxũxü̃.
7 Rü ngẽma chixexü̃ i bexma nagu naxĩnüxü̃ i Tupanaarü uanü, rü marü inaxügü nax nagu namaxẽxü̃ i duü̃xü̃gü. Natürü nümatama i ngẽma uanü rü taxũtá nango̱x ñu̱xmatáta ngẽma ínachaxãchixẽẽxü̃ nüxna ixũgachi.
8 Rü ngẽxguma ngẽma ínachaxãchixẽẽxü̃ nüxna ixũgachigu, rü tá ínangu i ngẽma Tupanaarü uanü. Natürü nüma ya tórü Cori ya Ngechuchu rü ngẽxguma ínanguxgu rü wüxi i “cue”, ñaxü̃maxã tá nayama̱x. Rü norü ya̱u̱xracüümaxã tá inayanaxoxẽxẽ i ngẽma norü uanü.
9 Rü ngẽma Tupanamaxã rüxuanüã́xü̃, rü Chatanáarü ngü̃xẽẽmaxã tá ínangu rü ngẽmaca̱x tá naporaxüchi. Rü tá nanaxü i naguxü̃raü̃xü̃ i cua̱xruü̃gü i Chatanáarü poramaxã naxüxü̃ i namaxã duü̃xü̃güxü̃ nawomüxẽẽxü̃.
10 Rü naguxü̃raü̃xü̃ i chixexü̃ tá naxü nax nawomüxẽẽãxü̃ca̱x i ngẽma duü̃xü̃gü i poxcuwa ĩxü̃. Rü ngẽmaãcü tá nüxü̃ naxüpetü i ngẽma duü̃xü̃gü, yerü tama nanayauxgüchaü̃ rü tama nüxü̃ nangechaü̃gü i ngẽma Tupanaarü ore i aixcüma ixĩxü̃ i tüxü̃ maxẽxẽẽxü̃.
11 Rü ngẽmaca̱x ya Tupana rü nanangexrü i ngẽma duü̃xü̃gü nax ínatüexü̃ca̱x rü yaxõgüãxü̃ca̱x i ngẽma doramare ixĩxü̃.
12 Rü ngẽmaca̱x düxwa Tupana tá poxcu namaxã naxuegu i guxü̃ma i ngẽma duü̃xü̃gü i tama yaxõgüchaü̃xü̃ i ngẽma ore i aixcüma ixĩxü̃ rü ñu̱xũchi namaxã taãẽgüxü̃ i ngẽma chixexü̃ nax naxügüxü̃.
Tupana tüxü̃ nade nax tüxü̃́ nangẽxmaxü̃ca̱x i maxü̃ i taguma gúxü̃
13 Natürü, Pa Chauenexẽgüx i Tórü Cori ya Ngechuchu Pexü̃ Ngechaü̃güxex, rü guxü̃guma Tupanana moxẽ pexca̱x taxã yerü nüma ga Tupana rü noxritama naane ixügügumama pexü̃ nade nax pexíra penayauxgüxü̃ca̱x i maxü̃ i taguma gúxü̃ ga yexguma pexü̃ nangü̃xẽẽgu ga Naãxẽ ya pexü̃ üünexẽẽxü̃ rü peyaxõgügu i ngẽma ore i aixcüma ixĩxü̃.
14 Rü yemaca̱x Tupana pexca̱x naca ga yexguma pemaxã nüxü̃ tixuxgu ga norü ore i mexü̃ i tüxü̃ maxẽxẽẽxü̃. Erü nüma nanaxwa̱xe nax pexü̃́ nangẽxmaxü̃ca̱x i pechica i tórü Cori ya Ngechuchu ya Cristuxü̃tawa i ngextá ínamexẽchixü̃wa.
15 Rü ngẽmaca̱x, Pa Chauenexẽgüx, rü chanaxwa̱xe i mea peyaxõgüama rü tama nüxü̃ ipeyarüngümae ga yema ore ga tomatama pexü̃ tangúexẽẽxü̃ rü yema ore ga poperagu pexca̱x taxümatüxü̃.
16 Rü tórü Cori ya Ngechuchu ya Cristu rü Tanatü ya Tupana ya tüxü̃ ngechaü̃cü rü guxü̃guma taãxẽ tüxna ãcü rü marü tamaxã namecüma rü ngẽmaca̱x tamaxã inaxuneta nax guxü̃gutáma naxü̃tawa ingẽxmagüxü̃.
17 Rü ngẽmaca̱x tanaxwa̱xe nax nüma pexü̃ nangü̃xẽẽxü̃ nax guxü̃guma petaãẽgüxü̃ca̱x rü mexü̃ i oremaxã pidexagüxü̃ca̱x rü mexü̃ pexügüxü̃ca̱x.
