2 Tesalonicenses 3:1-18
3 Rü ñu̱xma Pa Chauenexẽgüx, rü chanaxwa̱xe nax toxca̱x peyumüxẽgüxü̃ nax paxa guxü̃wama nanguxü̃ca̱x i tórü Cori ya Ngechuchuarü ore, rü duü̃xü̃gü norü ngúchaü̃maxã nax nayauxgüxü̃ca̱x yema pema nax penayauxgüxü̃rüxü̃.
2 ¡Rü ngẽxgumarüxü̃ ta toxca̱x peyumüxẽgü nax tama naxme̱xgu tayixü̃ca̱x i ngẽma duü̃xü̃gü i chixexü̃gu maxẽxü̃! Erü tama guxü̃ma i duü̃xü̃gü nayaxõgü.
3 Rü nüma ya tórü Cori ya Ngechuchu rü aixcüma nayanguxẽxẽ i ngẽma tamaxã inaxunetaxü̃. Rü nüma tá pexü̃ naporaexẽxẽ rü pexna nadau nax tama chixexü̃gu peyixü̃ca̱x.
4 Rü tórü Cori ya Ngechuchu toxü̃ nüxü̃ nacua̱xẽxẽ nax aixcüma penaxüxü̃ i ngẽma pexü̃ tamuxü̃, rü guxü̃gutáma penaxüechaxü̃ i ngẽma pemaxã nüxü̃ tixuxü̃.
5 Rü tanaxwa̱xe i tórü Cori ya Ngechuchu pexü̃ narüngü̃xẽxẽ nax pegü pengechaü̃güxü̃ca̱x, ngẽma Tupana tüxü̃ ngechaü̃xü̃rüxü̃. Rü naxca̱x ítaca nax pexü̃ naporaexẽẽxü̃ca̱x nax Cristurüxü̃ namaxã peporaexü̃ca̱x i ngẽma ngúxü̃gü i pexca̱x íngugüxü̃.
Name nixĩ nax ipuracüexü̃ i wüxichigü
6 Pa Chauenexẽgüx, tórü Cori ya Ngechuchu ya Cristuégagu pexü̃ tamu nax nüxna pixĩgachixü̃ca̱x i ngẽma yaxõxü̃ i tama nagu ixũxü̃ i ngẽma pexü̃ tangúexẽẽxü̃.
7 Erü pema rü marü nüxü̃ pecua̱x nax mea pemaxẽxü̃ nax nagu pexĩxü̃ca̱x i tocüma. Yerü toma ga yexguma petanüwa tayexmagügu rü tapuracüe, rü tama yexma tarüchomare.
8 Rü toma rü taguma texéarü õna ngetanüãcüma tangõ̱x. Natürü ngunecü rü chütacü rü torü õnaca̱x tapuracüe nax tama wüxi ga guxchaxü̃ pexü̃́ tixĩgüxü̃ca̱x.
9 Rü woochire̱x Tupanape̱xewa rü name nax perü ngü̃xẽẽca̱x ítaca̱xaxü̃, natürü tama yemaacü tanaxü. Rü torü õnaca̱x tapuracüe, yerü pexü̃ nüxü̃ tadauxẽẽchaü̃ ga tocüma nax pema rü ta nagu pexĩxü̃ca̱x.
10 Yerü yexguma petanüwa tayexmagügu, rü pemaxã nüxü̃ tixu rü ñatarügügü: “Yíxema tama puracüchaü̃xẽ, rü noxtacüma ngexrüma nixĩ nax tachibüxü̃”, ñatarügügü.
11 Rü ngẽmaca̱x pexca̱x tanaxümatü i ngẽmachiga, erü nüxü̃ tacuáchiga nax petanüwa nangẽxmaxü̃ i ñuxre i duü̃xü̃gü i oexü̃ i tama puracüechaü̃xü̃ rü ngẽma togue üxü̃gu rüxĩnüexü̃.
12 Rü tórü Cori ya Ngechuchu ya Cristuégagu tanamu rü tanaxucu̱xẽ nax napuracüexü̃ca̱x i ngẽma duü̃xü̃gü nax nümatama norü õnaca̱x nataxegüxü̃ca̱x.
13 Natürü i pemax, Pa Chauenexẽgüx, tama name nax nüxü̃ perüchauexü̃ nax mexü̃ pexügüxü̃.
14 Rü ngẽxguma texé tama naga ĩnügu i ñaa ore i poperawa pemaxã nüxü̃ tixuxü̃, rü name i penangugü nax texé tixĩxü̃. Rü tama name i tümamaxã pexãmücü nax taxãneexü̃ca̱x i tümax.
15 ¡Natürü taxũtáma tümamaxã perüxuanü! Rü name nixĩ i ñoma peenexẽxü̃ pexucu̱xẽxü̃rüxü̃ mea tüxü̃ pexucu̱xẽ.
Pauru rü naxca̱x ínaca nax Cori ya Ngechuchu nüxü̃ rüngü̃xẽẽxü̃ ga yema yaxõgüxü̃
16 Rü chanaxwa̱xe i nümatama ya tóxrü Cori ya tóxrü ngüxmüxẽẽruxü̃ guxü̃guma i guxü̃wama pexna nanaxã i norü taãxẽ. Rü chanaxwa̱xe nax petanüwa nangẽxmaxü̃ i guxãma i pemax.
17 Choma i Pauru rü cho̱xme̱xmaxãtama pexca̱x chanaxümatü i ñaa chorü moxẽ. Rü ngẽmaãcü nixĩ i chanaxümatüxü̃ rü chaugü nagu chaxümatüégaxü̃ i guxü̃ma i chorü popera.
18 Rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ i guxãma i pemax.
