2 Timoteo 1:1-18
1 Pa Timutéux, choma i Pauru nixĩ i cuxca̱x chanaxümatüxü̃ i ñaa popera. Rü choxü̃ nixĩ ga namuxü̃ ga Ngechuchu ya Cristu, yerü yemaacü nanaxwa̱xe ga Tupana. Rü nüma choxü̃ namu nax nüxü̃ chixuxü̃ca̱x nax aixcüma tüxü̃́ nangẽxmaxü̃ i maxü̃ i taguma gúxü̃, ega Ngechuchu ya Cristuaxü̃́ yaxõgügu.
2 Pa Chaune, Pa Timutéux, cuxü̃ changechaü̃ rü chanaxwa̱xe nax Tanatü ya Tupana rü Ngechuchu ya Cristu ya tórü Cori cuxü̃ nangü̃xẽẽgüxü̃ rü nüxü̃́ cungechaü̃tümüü̃güxü̃ rü cuxü̃ nataãẽxẽẽgüxü̃.
Tama name nax taxãneexü̃ nax Cristuchigaxü̃ ixuxü̃
3 Guxü̃guma i chütacü rü ngunecü rü cuxna chacua̱xãchixü̃ i chorü yumüxẽwa, rü poraãcü cuxca̱x moxẽ Tupanana chaxã. Rü nüxü̃́ nixĩ i chapuracüxü̃ i mexü̃ i chauãẽmaxã, yexgumarüxü̃ ga nũxcümaü̃güxü̃ ga chorü o̱xigü naxügüxü̃rüxü̃.
4 Choma rü nüxna chacua̱xãchi nax poraãcü cha̱u̱xca̱x cungechaü̃xü̃ rü cha̱u̱xca̱x cuxaxuxü̃ ga yexguma cuxna íchixũxgu. Rü wenaxarü cuxü̃ chadauxchaü̃ nax aixcüma chataãẽxü̃ca̱x.
5 Erü nüxna chacua̱xãchi nax ñuxãcü aixcüma Tupanaaxü̃́ cuyaxõxü̃. Rü curü noxẽ ga Lóida rü cué ga Euníchia rü tüma rü woetama tüxíra Tupanaaxü̃́ tayaxõgü. Rü nüxü̃ chacua̱x nax cuma rü ta aixcüma cuyaxõxü̃.
6 Rü ngẽmaca̱x cumaxã nüxü̃ chixu nax cugü cuporaxẽẽxü̃ nax yexeraãcü cunaxüamaxü̃ca̱x i ngẽma Tupanaarü puracü ga naxca̱x cuxna naxããxü̃ ga cua̱x ga yexguma noxri cuétü chaxǘxme̱xãcüma cumaxã chayumüxẽgu.
7 Yerü Tupana rü tama tüxna nanamu ga wüxi ga naãxẽ i muü̃ tüxna ãxü̃, natürü tüxna nanamu ga Naãxẽ ya Üünexü̃ nax tüxü̃ naporaexẽẽxü̃ca̱x nax duü̃xü̃güxü̃ íngechaü̃güxü̃ca̱x rü taãẽxü̃ icuáxü̃ca̱x.
8 Rü tama chanaxwa̱xe nax cuxãnexü̃ nax nüxü̃ quixuxü̃ i tórü Corichiga. Rü ngẽxgumarüxü̃ ta tama chanaxwa̱xe nax cha̱u̱xca̱x cuxãnexü̃ i ñu̱xma nax chapoxcuxü̃ naxca̱x i Tupanaarü ore. Rü name nixĩ i yáxna namaxã cuxĩnü i ngẽma ngúxü̃ i cuxca̱x ínguxü̃ nagagu i ngẽma ore i mexü̃ i nüxü̃ quixuxü̃. Rü Tupana tá cuxü̃ naporaxẽxẽ.
9 Rü Tupana tüxü̃ namaxẽxẽxẽ rü tüxü̃ nade nax naxca̱xicatama imaxẽxü̃ca̱x. Natürü tama ta̱xacürü mexü̃ nax ixügüxü̃gagu nixĩ ga yemaacü tamaxã namecümaxü̃ ga Tupana. Natürü tamaxã namecüma yerü woetama yema nixĩ ga norü ngúchaü̃ rü naxü̃pa nax naane naxüxü̃ rü Ngechuchu ya Cristugagu tüxü̃ nangechaxü̃.
10 Rü yexguma ínanguxgu ga tórü Maxẽxẽẽruxü̃ ga Ngechuchu ya Cristu, rü yexguma nixĩ ga Tupana tüxü̃ nüxü̃ dauxẽẽxü̃ nax ñuxãcü poraãcü tüxü̃ nangechaü̃xü̃. Rü Cristu nixĩ ga iyanaxoxẽẽcü ga yuarü pora, rü norü orewa tüxü̃ nüxü̃ nacua̱xẽxẽ nax yixema rü ta tüxü̃́ nangẽxmaxü̃ i maxü̃ i taguma gúxü̃ ega nüxü̃́ yaxõgügu.
11 Rü Tupana choxü̃ naxuneta nax nüxü̃ chixuxü̃ca̱x i norü ore. Rü choxü̃ namu nax ngẽma oremaxã chanangúexẽẽxü̃ca̱x i duü̃xü̃gü.
12 Rü ngẽmaca̱x nixĩ i ngúxü̃ chingexü̃ rü chapoxcuxü̃ i ñu̱xmax. Natürü tama naxca̱x chaxãne i ngẽma, erü choma nüxü̃ chacua̱x nax texéaxü̃́ chayaxõxü̃. Rü nüxü̃ chacua̱x nax naporaxü̃ i nüma nax nüxna nadauxü̃ca̱x i ngẽma puracü i choxna naxãxü̃ ñu̱xmatáta ngẽma ngunexü̃ i nagu wena núma naxũxü̃.
13 Rü chanaxwa̱xe i meama nagu quixũ i ngẽma ngu̱xẽẽtae i mexü̃ ga chauxü̃tawa naxca̱x cungúxü̃. Rü name nixĩ i cuyaxõõma rü nüxü̃ cungechaü̃ i guxü̃ma i duü̃xü̃gü, erü Ngechuchu ya Cristuarü duü̃xü̃ quixĩ.
14 Rü name nixĩ i Tupanaãxẽ ya Üünecü i tawa maxü̃xü̃arü ngü̃xẽẽmaxã ícunapoxü̃ i ngẽma ngu̱xẽẽtae i mexü̃ ya Tupana cuxna ãxü̃.
15 Cuma marü nüxü̃ cucua̱x rü guxü̃ma ga yema yaxõgüxü̃ ga Áchiacüã̱x rü marü choxna naxĩgü. Rü yematanüwa nayexma ga Figuéru rü Emóquene.
16 Onechíferu rü mue̱xpü̱xcüna choxü̃ nataãẽxẽxẽ, rü tama cha̱u̱xca̱x naxãne i ngẽma nax chapoxcuxü̃. Rü ngẽmaca̱x chanaxwa̱xe i tórü Coriaxü̃́ nangechaü̃tümüü̃gü i guxü̃ma i natanüxü̃ i Onechíferu.
17 Rü yexguma noxritama Rómawa nanguxgu ga nümax, rü cha̱u̱xca̱x nadauecha rü ñu̱xmata choxü̃ iyangau.
18 Cuma meama nüxü̃ cucua̱x nax poraãcü tüxü̃ nangü̃xẽẽxü̃ ga Onechíferu ga Epéchiuarü ĩanewa. Rü ngẽmaca̱x chorü yumüxẽwa naxca̱x íchaca nax Tupanaaxü̃́ nangechaü̃tümüxü̃xü̃ca̱x i ngẽxguma wena ñoma i naanewa naxũxgu ya tórü Cori ya Ngechuchu.
