2 Timoteo 3:1-17
3 Rü chanaxwa̱xe i nüxü̃ cucua̱x rü ngẽxguma nagúxchaü̃gu i naane rü tá ínangugü i ãũcümaxü̃gü rü guxchaxü̃gü naxca̱x i duü̃xü̃gü.
2 Rü duü̃xü̃gü rü tá nügüguxicatama narüxĩnüe, rü norü diẽruguama tá narüxĩnüe. Rü tá nügü nicua̱xüü̃gü, rü chixexü̃gu tá namaxẽ. Rü chixri Tupanachiga tá nidexagü, rü taxũtáma nanatüga rü naéga naxĩnüe. Rü taxũtáma moxẽ inaxã i ngẽxguma Tupana nüxü̃ rüngü̃xẽẽgu, rü ngẽmaãcü tá nüxü̃ naxo i Tupanaarü ore.
3 Rü taxúexü̃ tá nangechaü̃gü, rü taxúe tá nüxü̃́ nangechaü̃tümüü̃gü. Rü tá naxoregüta̱a̱xgü, rü taxũtáma yáxna namaxã naxĩnüe i naxü̃nearü ngúchaü̃gü. Rü tá nichixecüma, rü tá naxchi naxaie i guxü̃ma i ngẽma mexü̃.
4 Rü duü̃xü̃güechitawa̱xegüxü̃ tá nixĩgü, rü nuewa̱xexü̃ tá nixĩgü, rü chixexü̃gu maxẽxü̃ tá nixĩgü. Rü norü ngúchaü̃ca̱xama tá nadaugü, rü taxũtáma Tupanaxü̃ nacua̱xgüchaü̃.
5 Rü tá nügü nayaxõgünetaxẽxẽ natürü ngẽma norü chixexü̃ i naxügüxü̃wa tá nango̱xoma nax tama aixcüma yaxõgüãxü̃ i ngẽma ore i mexü̃. Rü ngẽma duü̃xü̃gü i ngẽmaãcü maxẽxü̃, rü tama name nax namaxã cuxãmücüxü̃ rü natanügu cuxãxü̃.
6 3:6-7 Erü ngẽma duü̃xü̃gütanüwa nangẽxmagü i nümaxü̃ i ĩpatagu ichocuetanüxü̃. Rü norü ngu̱xẽẽtaemaxã nayawomüxẽẽgü i ngẽma ngexü̃gü i ngéma ngẽxmagüxü̃ i tama naãẽxü̃ icuáxü̃ rü chixri maxẽxü̃. Rü ngẽma ngexü̃gü, rü norü ngúchaü̃gütama chixexü̃wa nanagagü, rü woo guxü̃guma nangúe natürü taguma aixcüma nüxü̃ nacua̱xgü i ngẽma ore i aixcüma ixĩxü̃.
7 Nüü̃ nadau 3:6
8 Rü ngẽma duü̃xü̃gü i chixexü̃maxã ngẽma ngexü̃güxü̃ womüxẽẽgüxü̃, rü chixexü̃guxicatama narüxĩnüe, rü tama aixcüma nayaxõgü i Tupanaarü ore. Rü naxchi naxaie i ngẽma ore i aixcüma ixĩxü̃, naxrüxü̃ ga yema yuüxü̃gü ga Yane rü Yambré ga tama Moichéga ĩnüechaü̃xü̃.
9 Natürü taxũtáma muxü̃ i duü̃xü̃gü nüxü̃́ nayaxõgü i ngẽma duü̃xü̃gü i chixexü̃. Erü guxü̃wama i duü̃xü̃gü rü tá nüxü̃ nicua̱xãchitanü nax wüxi i duü̃xü̃gü i chixexü̃gu rüxĩnüexü̃ rü ngeãẽmarexü̃ yixĩgüxü̃ naxrüxü̃ ga yema taxre ga tama Moichéga ĩnüechaü̃xü̃.
Timutéuxü̃ naxuxcu̱xẽ ga Pauru
10 Natürü cumax, Pa Timutéux, marü nüxü̃ cucua̱x i ngẽma chorü ngu̱xẽẽtae, rü chaucüma, rü ngẽma nagu charüxĩnüxü̃, rü ngẽma chorü õ, rü ñuxãcü nüxü̃ changechaü̃xü̃ ga yema yaxõgüxü̃ rü yáxna namaxã chaxĩnüxü̃.
11 Rü cuma nüxü̃ cucua̱x ga ñuxãcü chowe ningẽxü̃tanü ga duü̃xü̃gü rü ñuxãcü ngúxü̃ chinge ga yexguma Antioquíawa rü Icóniowa rü Lístrawa chayexmagu. Natürü yáxna namaxã chaxĩnü ga guxü̃ma ga yema ngúxü̃ ga chingexü̃. Rü tórü Cori ya Tupana rü choxü̃ ínapoxü̃ na̱xcha̱xwa i guxü̃ma i ngẽma ngúxü̃.
12 Rü aixcüma cumaxã nüxü̃ chixu rü guxãma ya yíxema naxwa̱xegüxe nax Ngechuchu ya Cristuca̱x tamaxẽxü̃, rü duü̃xü̃gü rü tá tümawe ningẽxü̃tanü rü guxchaxü̃ tá tümaca̱x ínangugü.
13 Natürü ngẽma yatügü i chixexü̃gu maxẽxü̃ rü ngẽma idorata̱a̱xgüxü̃ rü yexeraxü̃ i chixexü̃ tá naxügü. Erü nümagü rü tá togüxü̃ nawomüxẽẽgü, rü ngẽxgumarüxü̃ ta i ngẽma togü rü tá nayawomüxẽxẽgü.
14 Natürü i cuma rü name nixĩ i guxü̃guma mea nagu quixũ i ngẽma ore i marü naxca̱x cungúxü̃. Erü cumatama rü nüxü̃ cucua̱x nax aixcüma yixĩxü̃ i ngẽma ore, rü nüxü̃ cucua̱x nax texégü tixĩgüxü̃ ga guxema namaxã cuxü̃ ngu̱xẽẽgüxe.
15 ¡Rü nüxna nacua̱xãchi rü cubuxgumamatama nüxü̃ cucua̱x i Tupanaarü ore i üünexü̃! Rü ngẽma orewa nüxü̃ cucua̱x rü ngẽxguma Ngechuchu ya Cristuaxü̃́ yaxõgügu nixĩ i tüxü̃́ nangẽxmaxü̃ i maxü̃ i taguma gúxü̃.
16 Rü guxü̃ma i ngẽma Tupanaarü ore i ümatüxü̃ rü nügüãẽwatama nanayaxu ga Tupana. Rü ngẽma ore rü name nax duü̃xü̃güxü̃ namaxã ingúexẽẽxü̃, rü namaxã yaxucu̱xẽgüxü̃ rü namaxã iyanawe̱xãchixẽẽgüxü̃, rü namaxã nangúexẽẽxü̃ nax mea Tupanape̱xewa namaxẽxü̃ca̱x.
17 Rü ngẽma ore rü Tupanaarü duü̃xü̃na nanaxã i cua̱x nax mea naxüaxü̃ca̱x i ngẽma Tupana naxwa̱xexü̃ rü ínamemarexü̃ nax naxüaxü̃ i naguxü̃raü̃xü̃ i mexü̃.
