2 Timoteo 4:1-22
4 4:1-2 Nüma ya Ngechuchu ya Cristu ya núma tá ũcü nax nüxü̃ yacagüxü̃ca̱x i ngẽma duü̃xü̃gü i maxẽxü̃ rü ngẽma marü yuechiréxü̃, rü yimápe̱xewa rü Tupanape̱xewa cuxü̃ chamu nax nüxü̃ quixuxü̃ca̱x i ngẽma ore i mexü̃. Rü ngẽxguma cuxü̃́ natauxchagu rü woo tama cuxü̃́ natauxchagu, ¡rü nayoxnie nax nüxü̃ quixuamaxü̃ i ngẽma ore! Rü ngẽmaãcü chanaxwa̱xe nax icuyanawe̱xãchixẽẽgüxü̃ rü mea cuyaxucu̱xẽgüxü̃ rü nüxü̃́ cunangúchaü̃xẽẽxü̃ i duü̃xü̃gü. Rü name nixĩ i yáxna namaxã cuxĩnüãcüma mea cunangúexẽxẽ.
2 Nüü̃ nadau 4:1
3 Erü yixcüra i duü̃xü̃gü rü taxũtáma nüxü̃ naxĩnüechaü̃ i ngẽma ngu̱xẽẽtae i mexü̃. Erü ngẽma duü̃xü̃gü rü nichixecüma, rü ngẽmaca̱x naxca̱x nadaugü i norü ngúexẽẽruü̃gü i nüma nanaxwa̱xegüxü̃ãcüma nangúexẽẽxü̃.
4 Rü taxũtáma nüxü̃ naxĩnüechaü̃ i ngẽma ore i aixcüma ixĩxü̃. Rü ngẽma ore i doramare ixĩxü̃guama tá narüxĩnüe.
5 ¡Natürü cuma rü mea cugüna nadau, rü ínaxuãxẽ! ¡Rü namaxã napora i ngẽxguma ngúxü̃ cuxca̱x ínguxgu! ¡Rü nüxü̃ ixuama i ngẽma ore i mexü̃ i tüxü̃ maxẽxẽxẽxü̃! ¡Rü mea yanguxẽxẽ i ngẽma puracü ya Tupana cuxna ãxü̃!
6 Rü choma rü taxũtáma muxü̃ i ngunexü̃ ñoma i naanewa changexma erü marü choxü̃ ningaica nax Tupanaarü puracügagu choxü̃ nax yama̱xgüxü̃.
7 Rü choma rü marü chayanguxẽxẽ i ngẽma puracü ya Tupana choxna ãxü̃. Rü ñu̱xma nax chayanguxẽẽxü̃ i ngẽma puracü i choxna naxãxü̃ rü tama nüxü̃ charüxo nax chayaxõxü̃.
8 Rü ñu̱xma rü marü ínamemare i ngẽma ãmare i mexẽchixü̃ ya tórü Cori ya Ngechuchu ya ãẽ̱xgacü ya mecü tá choxna ãxü̃ i ngẽxguma wenaxarü ñoma i naanewa naxũxgu. Rü taxũtáma chaxica choxna nanaxã i ngẽma ãmare, natürü tá tüxna nanaxã ya guxãma ya yíxema tümaarü ngúchaü̃maxã ínangu̱xuxẽẽgüxe nax wenaxarü núma naxũxü̃.
Timutéuxü̃ naxuxcu̱xẽ ga Pauru
9 Cumaxã nüxü̃ chixu rü chanaxwa̱xe i paxa nua cuxũ, rü choxü̃ ícuyadau.
10 Dema rü ñoma i naanearü ngẽmaxü̃gügu narüxĩnü rü choxna nixũ, rü ĩane ga Techarónicawa naxũ, Rü Crechénte rü Gárataanewa naxũ, rü Títo i Damáchiaanewa naxũ.
11 Rü Lucaxicatama nixĩ i nua chauxü̃tawa ngẽxmaxü̃. Rü chanaxwa̱xe i naxca̱x cudau i Márcu nax nua cunagaxü̃ca̱x. Erü nüma rü cha̱u̱xca̱x name nax choxü̃ nangü̃xẽẽxü̃ i ñaa puracüwa.
12 Rü Tíquicu rü ĩane ya Epéchiuwa chanamu.
13 Ngẽxguma nua cuxũxgu ¡rü nua nange i chorü gáuxü̃chiru i ĩane ya Tróawa chatáxü̃ ga Cárpupatawa! Rü chanaxwa̱xe i nua cunana i chorü poperagü. Rü guxü̃arü yexera chanaxwa̱xe nax nua cunanaxü̃ i ngẽma Tupanaarü ore i naxcha̱xmüü̃gu ümatüxü̃.
14 Areyándru i buetare i cobrenaxca̱xarü üwa puracüxü̃ rü poraãcü guxchaxü̃ cha̱u̱xca̱x ínanguxẽxẽ. Natürü Tupana rü tá nüxü̃ nanaxütanü naxca̱x ga yema chixexü̃ ga naxüxü̃.
15 ¡Mea cugüna nadau nax tama guxchaxü̃ cuxca̱x ínanguxẽẽxü̃ca̱x! Erü poraãcü naxchi naxai i Tupanaarü ore i nüxü̃ ixugüxü̃.
16 Yexguma noxrixüchima ãẽ̱xgacügüpe̱xewa chaugüétüwa chidexagu rü taxúema choxü̃ tarüngü̃xẽxẽ. Guxü̃ma choxna nibuxmü. Natürü tama chanaxwa̱xe ya Tupana rü nagu narüxĩnü i ngẽma.
17 Natürü tórü Cori choxü̃ naporaxẽxẽ rü choxü̃́ nanatauxchaxẽxẽ nax mea nüxü̃ chixuxü̃ca̱x ga norü ore i mexü̃ i tüxü̃ maxẽxẽẽxü̃. Rü yemaacü guxü̃ma ga yema duü̃xü̃gü ga tama Yudíugü ixĩgüxü̃ ga yéma yexmagüxü̃ rü nüxü̃ naxĩnüe ga yema ore. Rü yemaacü tórü Cori ya Ngechuchu choxna nadau nax tama yu chomaxã naxueguxü̃ca̱x.
18 Rü nüma ya tórü Cori tá choxü̃ ínanguxuchixẽxẽ nawa i guxü̃ma i guxchaxü̃gü. Rü tá choxna nadau nax nüma ãẽ̱xgacü íyixĩxü̃wa choxü̃ nagaxü̃ca̱x. Rü name i guxü̃guma nüxü̃ ticua̱xüü̃gü. Rü ngẽmaãcü yixĩ.
Pauru rü wenaxarü Timutéuxü̃ narümoxẽ rü naxca̱x ínaca nax Cori ya Ngechuchu ya Cristu nüxü̃ rüngü̃xẽẽxü̃
19 Chanaxwa̱xe i chauégagu nüxü̃ curümoxẽ i Prichíra, rü Aquíra, rü Onechíferutanüxü̃.
20 Erástu rü ĩane ga Coríntiugu narüxã̱ũ̱x. Rü Trófimu rü ida̱xawexü̃ma ĩane ga Mirétuwa chanata̱x.
21 Rü naxü̃pa i gáuanexü̃ rü chanaxwa̱xe i nua cuxũ. Rü cuxü̃ narümoxẽgü i Eubúru, rü Pudénte, rü Línu, rü Cáuria, rü guxü̃ma i taenexẽgü i yaxõgüxü̃.
22 Rü chanaxwa̱xe i tórü Cori ya Ngechuchu ya Cristu cumaxã nangẽxma. ¡Rü Tupana pexü̃ rüngü̃xẽxẽ ya guxãma i pemax!
