2 Pedro 2:1-22
2 Nũxcüma rü Yudíugütanüwa nayexma ga Tupanaarü orearü uruü̃güneta. Rü ngẽxgumarüxü̃ tá ta petanüwa nangẽxma i ngu̱xẽẽruü̃netagü. Rü nümagü rü cúãcü tá doramaxã nanaxüchicüxü i Tupanaarü ore, rü ngẽmaãcü tá nayaxã ya yimá tórü Cori ya norü Maxẽxẽẽruü̃chire̱x ixĩcü. Rü ngẽmagagu tá noxtacüma napoxcue i ngẽma duü̃xü̃gü i ngẽmaãcü maxẽxü̃, rü paxa tá inayarüxogü.
2 Rü muxü̃ma i duü̃xü̃gü rü tá nawe narüxĩ nawa i ngẽma chixexü̃ i naxügüxü̃. Rü ngẽma ngu̱xẽẽruü̃netagügagu rü duü̃xü̃gü rü tá chixri nachiga nidexagü i Tupanaarü ore i aixcüma ixĩxü̃.
3 Rü ngẽma ngu̱xẽẽruü̃netagü rü diẽruguxicatama narüxĩnüe, rü ngẽmaca̱x i ngẽma norü ngu̱xẽẽtae i doramare ixĩxü̃, rü tá pemaxã nanaxãtanü nax ngẽmaãcü petanüwa ngĩxü̃ nayauxgüxü̃ca̱x i perü diẽru. Natürü tá napoxcue i ngẽma duü̃xü̃gü, rü taxũtáma nibuxmü. Erü Tupana rü woetama nũxcümama poxcu namaxã naxuegu.
4 Rü nüma ya Tupana rü tama nüxü̃́ nüxü̃ narüngüma ga norü chixexü̃gü ga yema orearü ngeruü̃gü ga daxũcüã̱x ga pecadu ügüxü̃. Rü yemaca̱x yima üxü ya taguma ixoxü̃newa nanawogü, rü ínaxẽãnexü̃gu nanapoxcue. Rü cadénamaxã nayana̱i̱xgü nax ngéma nangẽxmagüxü̃ca̱x ñu̱xmatáta nawa nangu i ngẽma ngunexü̃ i nagu Tupana nüxna ca̱xaxü̃ i duü̃xü̃gü.
5 Rü yexgumarüxü̃ ta ga Tupana rü tama nüxü̃́ nüxü̃ narüngüma ga norü chixexü̃ ga yema nũxcümaü̃güxü̃ ga duü̃xü̃gü. Rü mucü ga taxüchicü naxca̱x yéma nanamu nax gumámaxã nadaiaxü̃ca̱x ga yema duü̃xü̃gü ga chixexü̃ ügüxü̃. Natürü ga Tupana rü Noéxü̃ nadau nax meama duü̃xü̃güxü̃ yaxucu̱xẽgüxü̃ nax nüxü̃ naxoexü̃ca̱x ga norü chixexü̃gü. Rü yemaca̱x ga Tupana rü Noéxü̃ namaxẽxẽ namaxã ga 7 ga natanüxü̃. Natürü nanadai ga guxü̃ma ga yema togü ga duü̃xü̃gü.
6 Rü Tupana rü yexgumarüxü̃ ta inayanaxoxẽxẽ ga gumá ĩanegü ga Chodóma rü Gomóra ga poraãcü chixexü̃gü nawa naxügüne. Rü ínanagu ga gumá ĩanegü ñu̱xmata norü tanimacaxicatama íyaxü. Rü yemaacü nanaxü nax gumá ĩanegü rü wüxi ga cua̱xruxü̃ yixĩxü̃ca̱x nüxü̃́ ga yema duü̃xü̃gü ga chixexü̃ ga yemawena maxẽxü̃.
7 Natürü Tupana nanamaxẽxẽ ga Lox ga wüxi ga yatü ga mecü ixĩcü ga poraãcü ngechaü̃cü ga yexguma nüxü̃ nada̱u̱xgu ga ñuxãcü chixexü̃ naxügüxü̃ ga yema duü̃xü̃gü ga natanüwa nayexmaxü̃.
8 Rü guxü̃ ga ngunexü̃gu rü nüma ga Lox ga mea maxü̃cü rü poraãcü naãxẽwa nangu̱x ga yexguma nüxü̃ nada̱u̱xgu rü nüxü̃ naxĩnügu ga yema chixexü̃gü ga naxügüxü̃ ga yema duü̃xü̃gü ga natanüwa nayexmaxü̃.
9 Rü nüma ya Tupana, rü nüxü̃́ natauxcha nax tüxü̃ ínanguxü̃xẽẽxü̃ i ngẽxguma Chataná tüxna ĩnügu ya yíxema mea maxẽxe. Rü ngẽma chixexü̃ ügüxü̃, rü Tupanaaxü̃́ natauxcha nax napoxcueãxü̃ i ngẽma ngunexü̃ i nagu duü̃xü̃güxü̃ yacagüxü̃.
10 2:10-11 Rü Tupana rü aixcüma tá nanapoxcue i ngẽma ngu̱xẽẽruü̃netagü i naxü̃nearü ngúchaü̃gu ĩxü̃ i tama naga ĩnüechaü̃xü̃ ya tórü Cori. Rü ngẽma ngu̱xẽẽruü̃netagü rü taxúegama naxĩnüechaü̃, rü nadauxcüraxü̃wa̱xegü. Rü tama namuü̃e nax namaxã naguxchigagüxü̃ i ngẽma ãẽ̱xgacügü i daxũcüã̱x. Rü ngẽmaãcü namaxẽ i ngẽma ngu̱xẽẽruü̃netagü. Natürü woo Tupanaarü orearü ngeruü̃gü i daxũcüã̱x i ngẽma ngu̱xẽẽruü̃netagüxü̃ rüyexeraxüchichiréxü̃, rü namuü̃e nax ngẽmaãcü namaxã naguxchigagüxü̃ i ngẽma ãẽ̱xgacügü i daxũcüã̱x.
11 Nüü̃ nadau 2:10
12 Rü ngẽma ngu̱xẽẽruü̃netagü, rü ñoma naeü̃gürüxü̃ nixĩgü, rü naeü̃gürüxü̃ taxuxü̃ma nacua̱xgü. Rü ngẽma naxü̃negü naxwa̱xexü̃ nixĩ i naxügüxü̃. Rü nabue nax ñoma naeü̃gü i yayauxgüxü̃ rü nada̱i̱xü̃rüxü̃ yixĩgüxü̃ca̱x. Rü chixri nachiga nidexagü i ngẽma tama nüxü̃ nacua̱xgüxü̃. Natürü ngẽma chixexü̃ i naxügüxü̃gagu tá ñoma naeü̃gürüxü̃ inayarütauxe.
13 Rü nümagü rü ngúxü̃ tá ningegü nagagu i ngẽma ngúxü̃ i toguã̱xü̃ yangexẽẽgüxü̃. Rü nümagü rü namaxã nataãẽgü i ngẽma naxü̃nearü ngúchaü̃ i ngunecütama naxügüxü̃. Rü ngẽxguma pemaxã nachibüegu, rü wüxi i chixexü̃chixü̃ rü ãnexü̃chi nixĩgü, erü ngéma rü ta nanaxügü i norü chixexü̃gü i namaxã pexü̃ nawomüxẽẽgüchaü̃xü̃.
14 Rü ngẽma ngu̱xẽẽruü̃netagü rü taxuacüma wüxi ya ngexexü̃ nadaugümare, erü naãxẽwa nüxü̃́ tangúchaü̃. Rü tama nüxü̃́ ningu nax nai i ngexü̃maxã namaxẽxü̃. Rü naxca̱x nadaugü nax ngẽma chixexü̃gu tüxü̃ nayixẽẽxü̃ ya yíxema duü̃xẽgü ya turaearü maxü̃ã̱xgüxe. Rü naxaü rü nügüna nananugüchaü̃ i guxü̃ma. Natürü marü chixexü̃ namaxã naxuegu.
15 Rü ngẽma ngu̱xẽẽruü̃netagü rü tama nagu naxĩ i ngẽma Tupana nüxü̃́ naxwa̱xexü̃, rü ngẽmaca̱x inayarütauxe. Rü nagu naxĩ ga yema chixexü̃ ga nagu yaxũxü̃ ga nũxcümaü̃xü̃ ga Balaáü̃ ga Bochú nane ga chixexü̃gu diẽru ngĩxü̃ yauxchaü̃xü̃.
16 Rü noxrütama búru ga woo taguma idexachirécü, rü wüxi ga duü̃xü̃rüxü̃ namaxã iyadexa rü inanga naxca̱x ga yema chixexü̃ ga naxüxchaü̃xü̃. Rü yemaacü Baráxü̃ íyachaxãchixẽxẽ nax tama naxüaxü̃ca̱x ga yema chixexü̃ ga naxüxchaü̃xü̃.
17 Rü ngẽma ngu̱xẽẽruü̃netagü rü taxuwama nime ñoma wüxi i puchu i ngearü dexáã́xü̃rüxü̃. Rü ñoma wüxi i caixanexü̃ i buanecü icuexü̃rüxü̃ nixĩgü nax taxuwama yamexü̃. Rü nümagü rü ẽanexü̃chixü̃gu guxü̃gutáma napoxcue.
18 Rü ngẽma ngu̱xẽẽruü̃netagü rü nügü yacua̱xüü̃güãcüma ore i taxuwama mexü̃maxã nidexagü. Rü tüxü̃ nixucu̱xẽgü nax tümaxü̃nearü ngúchaü̃gu taxĩxü̃ca̱x ya yíxema ngexwaca nüxü̃ rüxoexe i ngẽma chixexü̃ i nacüma.
19 Rü tümamaxã nüxü̃ nixu rü ngẽxguma nawe tarüxĩxgu rü tá tüxü̃ ínanguxü̃xẽxẽ nax tüma tanaxwa̱xexü̃ãcüma tamaxẽxü̃ca̱x. Natürü ngẽma ngu̱xẽẽruü̃netagü i ngẽmaãcü chixri idexagüxü̃, rü nümagütama rü norü chixexü̃tüxü̃wa nangẽxmagü. Erü guxü̃ma i duü̃xü̃gü, rü ngẽma nüxü̃ rüyexeramaexü̃tüü̃wa nügü nangẽxmagüxẽxẽ.
20 Rü guxãma ya yíxema marü tórü Cori ya Ngechuchu ya Cristu ya tórü Maxẽxẽẽruü̃xü̃ yauxgüxe, rü marü nawa ítanguxü̃ i ñoma i naanearü chixexü̃gü. Natürü ngẽxguma chi wenaxarü naxca̱x tawoegugu i ngẽma chixexü̃ i nawa ítanguxü̃chiréxü̃, rü aixcüma noxriarü yexera tichixe.
21 Erü ngẽxguma chi tanayauxgügu i ngẽma ore i mexü̃ ga marü tayauxgüxü̃, rü ñu̱xũchi nüxü̃ tarüxoegu, rü narümemae chi nixĩ ga noxtacüma taxũchima nüxü̃ nax tacua̱xgüxü̃ i ngẽma ore i üünexü̃ i noxri tüxna ãxü̃.
22 Rü aixcüma ngẽma duü̃xü̃gü i Tupanana woeguxü̃wa ningu i Tupanaarü ore i ümatüxü̃ i ñaxü̃:“Ngẽma airu i nügü oxgüxü̃, rü wenaxarü naxca̱x nataegu i norü oxü nax yawéaxü̃ca̱x.Rü ngẽma cuchi i norü yora meama aiyachiréxü̃, rü ngẽxgumatama wenaxarü norü aiyanewa nayayuxu”,
ñanagürü i ngẽma ore.
