2 Pedro 3:1-18
3 Pa Chauenexẽgü ya Pexü̃ Changechaü̃güxe, ñaa nixĩ i ngẽma norü taxre i popera i pexca̱x chaxümatüxü̃. Rü ñaa taxre i poperawa wena pexü̃ chixucu̱xẽgü nax mea Tupanaarü oregu perüxĩnüexü̃ca̱x.
2 Rü chanaxwa̱xe i nüxna pecua̱xãchie i ngẽma ore ga nũxcümaü̃güxü̃ ga Tupanaarü orearü uruü̃gü ga ixüünexü̃ nüxü̃ ixugügüxü̃. Rü ngẽxgumarüxü̃ ta chanaxwa̱xe i nüxna pecua̱xãchie i ngẽma tórü Cori ya Ngechuchu ya tórü Maxẽxẽẽruü̃arü mugü ga pexü̃ nangúexẽẽxü̃ ga norü orearü uruü̃gü ga nüma pexü̃tawa namugüxü̃.
3 3:3-4 Natürü guxü̃arü yexera chanaxwa̱xe i nagu perüxĩnüe i ñaa ore i pemaxã tá nüxü̃ chixuxü̃. Rü ngẽxguma nagúxchaü̃gu i ñoma i naane, rü tá ínangugü i duü̃xü̃gü i nagu ĩxü̃ i naxü̃nearü ngúchaü̃gü. Rü nümagü rü tá nacugüeãcüma ñanagürügü: “Dücax, Cristu inaxuneta nax wena núma naxũxü̃. ¿Rü ta̱xacü namaxã nangupetü i ñu̱xma nax tama ínanguxü̃? Rü marü düxwa nayue ga tanatügü, natürü noxri naane üxgumama rü nanaxairügumaraü̃echa i guxü̃ma”, ñanagürügü tá.
4 Nüü̃ nadau 3:3
5 3:5-6 Natürü ngẽma duü̃xü̃gü i ngẽmaãcü idexagüxü̃ rü tama nüxü̃ nacua̱xgüchaü̃ nax nũxcümaxü̃chima nayexmaxü̃ i guxü̃ma i daxũwa nüxü̃ idauxü̃ rü marü nayexmaxü̃ ga ñoma ga naane ga Tupana dexáwa ngo̱xẽẽxü̃ ga yexguma namuãgu. Rü ñu̱xma rü ta i ñoma i naane rü dexáarü ngãxü̃tüchíüwa nangẽxma, yerü yemaacü namaxã nanaxuegu ga Tupana. Rü gumá mucü ga tacüarü dexámaxã narüxo ga guxü̃ma ga ta̱xacü ga ñoma ga naanewa yexmaxü̃.
6 Nüü̃ nadau 3:5
7 Natürü ngẽma ñu̱xma daxũwa ngẽxmaxü̃ rü ñoma i naane i ñu̱xma ngẽxmaxü̃ rü Tupana marü namaxã nanaxuegu nax üxüwa tá yaxaexü̃. Rü ngẽma ngunexü̃ ya Tupana nagu unetaxü̃ nax duü̃xü̃güxü̃ yacagüxü̃ rü napoxcueãxü̃ i ngẽma duü̃xü̃gü i chixexü̃gu maxẽxü̃, rü ngẽma ngunexü̃gu rü yima üxüwa tá nixĩ i ínaguxü̃ i ñoma i naane rü ngẽma daxũwa ngẽxmagüxü̃.
8 Rü ñu̱xmax, Pa Chauenexẽgü ya Pexü̃ Changechaü̃güxex, tama chanaxwa̱xe i nüxü̃ ipeyarüngümae nax wüxitama i ngunexü̃ rü tórü Corica̱x rü 1,000 ya taunecürüxü̃ yixĩxü̃. Rü ngẽxgumarüxü̃ ta, 1,000 ya taunecü rü tórü Corica̱x rü wüxitama i ngunexü̃rüxü̃ yixĩxü̃.
9 Rü ñuxre i duü̃xü̃gü rü nagu narüxĩnüe nax tórü Cori tama paxa yangu̱xẽẽãxü̃ i norü uneta. Natürü ngẽmaãcü nixĩ erü yáxna pemaxã naxĩnü. Rü nüma rü tama nanaxwa̱xe nax texé iyarütaxuxü̃, natürü nanaxwa̱xe nax guxãma nüxü̃ rüxoexü̃ i tümacüma i chixexü̃ rü nüxü̃́ tayaxõgüxü̃.
10 Natürü ngẽma ngunexü̃ i tórü Cori nagu ínguxü̃, rü ngürüãchimare tá ínangu ñoma wüxi i ngĩ́ta̱xaxü̃ ínguxü̃rüxü̃. Rü ñu̱xũchi guxü̃ma i ta̱xacü i daxũguxü̃ i naanewa ngẽxmagüxü̃ rü tá tagaãcü niwã̱ĩ̱xgü rü ngẽmaãcü tá üxüwa inayarütauxe. Rü yimá üa̱xcü rü tauemacü rü ẽxtagü rü woramacurigü rü tá nixae rü ngẽxma tá nayarüxogü. Rü ngẽxgumarüxü̃ ta i ñoma i naane rü tá nixa namaxã i guxü̃ma i ta̱xacü i nawa ngẽxmagüxü̃.
11 Rü ñu̱xma nax ngẽmaãcü tá namaxã nangupetüxü̃ i guxü̃ma i ta̱xacü i ngẽxmaxü̃, rü yexeraãcü penaxwa̱xe nax naxüünexü̃ i perü maxü̃ rü Tupana nanaxwa̱xexü̃ãcüma nax pemaxẽxü̃.
12 Rü name nixĩ i mea ípenangu̱xẽxẽ i ngẽma ngunexü̃ i nagu tá ínanguxü̃ ya tórü Cori. Rü ngẽma ngunexü̃gu rü guxü̃ma i daxũwa nüxü̃ idauxü̃ rü tá nixa rü tá inachaxichigü. Rü ñoma i naane rü üa̱xcü rü tauemacü rü ẽxtagü rü woramacurigü rü yima üxümaxã tá inachaxichigü.
13 Natürü yixema nax yaxõgüxü̃ rü ítanangu̱xẽxẽ i ngẽma ngexwaca̱xü̃xü̃ i daxũguxü̃ i naane rü ngexwaca̱xü̃xü̃ i ñoma i naane ga Tupana tamaxã ixunetaxü̃. Rü ngéma rü guxü̃táma Tupanape̱xewa name.
14 Rü ngẽmaca̱x, Pa Chauenexẽgü ya Pexü̃ Changechaü̃güxe, rü ñu̱xma nax ípenangu̱xẽẽxü̃ i ngẽma, rü name nixĩ i pora pexüe nax Tupanape̱xewa taxuwama nachixexü̃ca̱x i perü maxü̃ rü Tupanamaxã petaãẽgüxü̃ca̱x i ngẽxguma wena núma naxũxgu.
15 Rü name nixĩ i nüxna pecua̱xãchie nax yáxna tamaxã naxĩnüxü̃ ya tórü Cori, erü nanaxwa̱xe nax tüxü̃́ nangẽxmaxü̃ i maxü̃ i taguma gúxü̃. Rü ngẽmatama ucu̱xẽ i pexca̱x chaxümatüxü̃rüxü̃ nixĩ ga pexca̱x naxümatüaxü̃ ga taenexẽ ya nüxü̃ ingechaü̃gücü ya Pauru ga yexguma Tupana cua̱x nüxna ãxgu nax pexca̱x naxümatüaxü̃ca̱x.
16 Rü guxü̃ma ga norü poperawa rü ñaa pexca̱x chaxümatüxü̃chiga nanaxümatü ga Pauru woo yema pexca̱x naxümatüxü̃wa rü nangẽxma i ñuxre i ore i guxchaxü̃ nax nüxü̃ icuáxü̃ nax ta̱xacüchiga yixĩxü̃. Rü ngẽma duü̃xü̃gü i tama aixcüma Tupanaarü orexü̃ cua̱xgüxü̃ rü ngẽma tama aixcüma yaxõgüxü̃ rü ínayatoxẽẽgü i ngẽma ore ngẽxgumarüxü̃ nax ínayatoxẽẽgüãxü̃ i ngẽma togü i Tupanaarü ore i ümatüxü̃. Natürü ngẽma chixexü̃ nax naxügüxü̃gagu rü nügü tátama inayarütauxexẽxẽ.
17 Rü ngẽmaca̱x, Pa Chauenexẽgü ya Pexü̃ Changechaü̃güxe, rü ñu̱xma nax nüxü̃ pecuáxü̃ i ta̱xacü tá nax ngupetüxü̃, rü name nixĩ i pexuãẽgü nax tama pexü̃ nawomüxẽẽgüxü̃ca̱x i ngẽma chixexü̃ i duü̃xü̃gü rü tama nüxü̃ perüxoexü̃ca̱x nax mea peyaxõgüxü̃.
18 Rü ngẽmaca̱x, Pa Chauenexẽgüx, penaxwa̱xe nax pegü peporaexẽẽxü̃ nax wüxichigü i ngunexü̃ yexeraãcü tórü Cori ya Ngechuchu ya Cristu ya tórü Maxẽxẽẽruü̃xü̃ pecuáxü̃ca̱x rü yexeraãcü nüxü̃ picuáetanüxü̃ca̱x nax aixcüma pexü̃ nangechaü̃xü̃. ¡Rü ngẽmaca̱x name i ñu̱xma rü guxü̃gutáma nüxü̃ ticua̱xüxü̃gü! Rü ngẽmaãcü yixĩ.
