2 Reyes 1:1-18
1 Nawena ga nax nayuxü̃ ga ãẽ̱xgacü ga Acáx rü nüma ga Moátanüxü̃ rü Iraéanecüã̱xgümaxã nanue rü tama nanaxütanügüchaü̃ ga yema diẽru ga Iraéanearü ãẽ̱xgacü nagu unetaxü̃.
2 Rü ĩane ga Chamáriawa rü wüxi ga ngunexü̃gu ga Iraéanearü ãẽ̱xgacü ga Ocochía rü nachiü̃arü daxũwa yexmaxü̃ ga beü̃tánawa narüngu. Rü poraãcüma nanapi̱x. Rü yexguma rü ĩane ga Ecróü̃wa nanamugü ga norü orearü ngeruü̃gü nax yema duü̃xü̃güarü tupana ga Baá-chebúna yacagüxü̃ca̱x rü naxca̱x tá yataane rüe̱xna tama.
3 Natürü Cori ya Tupanaarü orearü ngeruxü̃ i dauxü̃cüã̱x rü Ería ga Tibécüã̱xü̃ ñanagürü: —¡Ngéma naxũ rü nape̱xegügu yangu i ngẽma Chamáriaarü ãẽ̱xgacüarü orearü ngeruü̃gü rü nüxna nacagü rü ñacurügü nüxü̃: “¿Ẽ̱xna nataxuma ya Tupana i Iraéanewa rü ngẽmaca̱x Baá-chebú i Ecróü̃arü tupananetana peyaca?”
4 ¡Rü ngẽxgumarüxü̃ ta rü ngẽma ãẽ̱xgacüarü orearü ngeruü̃gümaxã nüxü̃ ixu rü choma ya Cori ya Tupana rü ñachagürü nüxü̃ i Ocochía: “Cuma rü marü taxũtáma ícurüda nawa i curü pechicaxü̃ erü tá cuyu” —ñachagürü! Rü nüma ga Ería rü yéma naxũ rü yemaacü nüxü̃ nayarüxu.
5 Rü yexguma ãẽ̱xgacüca̱x nawoegu̱xgu ga yema orearü ngeruü̃gü rü ãẽ̱xgacü nüxna naca rü ñanagürü nüxü̃: —¿Ta̱xacüca̱x pewoegu? —ñanagürü.
6 Rü nümagü nanangãxü̃gü rü ñanagürügü: —Erü wüxi i yatü toxü̃ inangau rü tomaxã nüxü̃ nixu nax naxca̱x tawoeguxü̃ca̱x i ngẽma ãẽ̱xgacü i toxü̃ muxü̃ rü namaxã nüxü̃ tixuxü̃ca̱x i Cori ya Tupanaarü ore i ñaxü̃: “¿Ẽ̱xna nataxuma ya Tupana i Iraéanewa rü ngẽmaca̱x toxü̃ cumu nax Baá-chebú i Ecróü̃arü tupananetana tayacaxü̃ca̱x? Rü ngẽma cuxüxü̃gagu rü taxũtáma ícurüda i cuxchiaxü̃wa rü tá cuyu” —ñanagürügü.
7 Rü yema orearü ngeruxü̃güna naca ga ãẽ̱xgacü rü ñanagürü: —¿Nañuxraxü̃xü̃ i ngẽma yatü i ngẽxma pexü̃ ngauxü̃ i ngẽmaxü̃ pemaxã ixuxü̃? —ñanagürü.
8 Rü nümagü nanangãxü̃gü rü ñanagürügü: —Wüxi i yatü i ngu̱xuxpümüxü̃maxã ãxchiruxü̃ nixĩ, rü ñu̱xũchi wüxi i goyexü̃ i naxcha̱xmünaxca̱xmaxã nigoye —ñanagürügü. Rü nüma ga ãẽ̱xgacü rü ñanagürü: —Ngẽma rü Ería i Tibécüã̱x nixĩ —ñanagürü.
9 Rü nüma ga ãẽ̱xgacü rü yexgumatama Eríaxü̃tawa nanamu ga wüxi ga churaragüeru namaxã ga 50 ga churaragü. Rü yexguma yéma nangugügu, rü Ería rü wüxi ga ma̱xpǘnechitaeruwa narüto. Rü yexguma ga yema churaragüeru rü ñanagürü nüxü̃: —Pa Tupanaarü Orearü Uruxü̃x, rü torü ãẽ̱xgacü toxü̃ namu nax ícurüxĩxü̃ i ngéma —ñanagürü.
10 Rü Ería nanangãxü̃ rü ñanagürü nüxü̃: —Ega Tupanaarü orearü uruxü̃ chixĩxgu i chomax ¡rü daxũwa rünguxü̃ i üxüema rü cuxü̃ nigu namaxã i ngẽma curü 50 i churaragü! —ñanagürü. Rü yexgumatama narünguema ga üxü rü nixae ga yema churaragü.
11 Rü yexguma ga ãẽ̱xgacü rü to ga churaragüeru yéma namu namaxã ga to ga 50 ga churaragü. Rü nüma rü yéma naxũ rü Eríaxü̃ ñanagürü: —Pa Tupanaarü orearü Uruxü̃x, rü ãẽ̱xgacüarü mu nixĩ nax ñu̱xmatama ícurüxĩxü̃ i ngéma —ñanagürü.
12 Rü Ería nanangãxü̃ rü ñanagürü nüxü̃: —Ega Tupanaarü orearü uruxü̃ chixĩxgu i chomax ¡rü daxũwa rünguxü̃ i üxüema rü cuxü̃ nigu namaxã i ngẽma curü 50 i churaragü! —ñanagürü. Rü yexgumatama daxũwa narünguema ga üxü rü nixae ga yema churaragü.
13 Rü yemawena nüma ga ãẽ̱xgacü rü norü tomaepü̱xcüna to ga churaragüeru yéma namu namaxã ga to ga 50 ga churaragü. Natürü yema churaragüeru rü dauxü̃ naxĩ ñu̱xmata Ería íyexmaxü̃wa nangu. Rü nape̱xegu nacaxã́pü̱xüãcüma nüxü̃ naca̱a̱xü̃ rü ñanagürü: —Pa Tupanaarü orearü Uruxü̃x, cuxü̃ chaca̱a̱xü̃ nax choxü̃́ nüxü̃ cungechaü̃xü̃ i chorü maxü̃ rü norü maxü̃ i ñaa 50 i curü puracütanüxü̃.
14 Erü marü nüxü̃ chacua̱x rü daxũwa rünguemaxü̃ ga üxüema rü ínanagu ga yema taxre ga churaragüeru namaxã ga norü churaragü. Rü choma rü cuxü̃ chaca̱a̱xü̃ nax choxü̃́ nüxü̃ cungechaü̃xü̃ i chorü maxü̃ —ñanagürü.
15 Rü ñu̱xũchi Cori ya Tupanaarü orearü ngeruxü̃ ga daxũcüã̱x rü Eríaxü̃ namu rü ñanagürü nüxü̃: —¡Nawe rüxũ rü taxṹ i nüxü̃ cumuü̃xü̃! —ñanagürü. Rü nüma ga Ería rü guma ma̱xpǘnewa ínarüxĩ rü guma churaragüeruwe narüxũ nax ãẽ̱xgacüxü̃ íyadauxü̃ca̱x.
16 Rü yexguma ãẽ̱xgacüxü̃tawa nanguxgu ga Ería rü ãẽ̱xgacüxü̃ ñanagürü: —Cori ya Tupana rü ñanagürü cuxü̃: “Yema nax Baá-chebú i Ecróü̃arü tupananetaxü̃tawa nax cunamugüxü̃ i orearü ngeruü̃gü nax nüxna yacagüxü̃ca̱x i curü da̱xawechiga, ñoma nataxuxü̃rüxü̃ ya Tupana i Iraéanewa nax nüxna cuca̱xü̃ca̱x, rü ngẽmaca̱x taxũtáma ícurüda i curü pechicaü̃wa, rü tá cuyu” —ñanagürü cuxü̃.
17 Rü nayu ga Ocochía, yema Cori ya Tupana Eríawa nüxü̃ ixuxü̃ãcüma. Rü nangene ga Ocochía rü yemaca̱x nachicüxü ãẽ̱xgacüxü̃ ningucuchi ga naenexẽ ga Yoráü̃. Rü yema naxüpetü ga yexguma taxre ga taunecü ãẽ̱xgacü yixĩxgu ga Yochapáx nane ga Yoráü̃ ga Yudáanewa.
18 Rü guxü̃ma ga yema Ocochíachiga rü yema naxüxü̃chiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
