2 Reyes 10:1-36
10 Rü Acáx rü nüxü̃́ nayexma ga 70 ga nanegü ga Chamáriawa. Rü yemaca̱x ga Yeú rü nanaxümatü ga poperagü naxca̱x ga yema ãẽ̱xgacügü ga guma ĩanemaxã icua̱xgüxü̃, rü naxca̱x ga yema togü ga ãẽ̱xgacügü ga iyaxü̃, rü naxca̱x ga yema Acáx nanegüarü dauruü̃gü. Rü yema popera rü ñanagürü.
2 10:2-3 —Nüxü̃ chacua̱x rü petanüwa nangẽxmagü i perü cori ya Acáx nanegü, rü norü cowarugü, rü norü carugü ya daiwexü̃gü rü yima ĩane ya Chamária ya meama ípoxegune rü naxnegü. Rü ngẽxguma pexü̃tawa nanguxgu i ñaa popera, rü chanaxwa̱xe i perü cori ya Acáx nanetanüwa nüxü̃ pixuneta i ngẽma rüporamaexü̃ rü cua̱x nüxü̃́ ngẽxmaxü̃ nax nanatüchicüxü ãẽ̱xgacüxü̃ nüxü̃ pixunetaxü̃. Rü ñu̱xũchi chanaxwa̱xe nax nüxna pedauxü̃ rü ípenapoxü̃ ya perü Cori ya Acáxpata —ñanagürü.
3 Nüü̃ nadau 10:2
4 Rü yexguma naxü̃tawa nanguxgu ga yema popera rü poraãcü muü̃ nüxna naxãgü. Rü nügümaxã ñanagürügü: —Rü woo yema taxre ga ãẽ̱xgacügü ga Yoráü̃ rü Ocochía rü tama nüxü̃ narüporamaegü, ¿rü ñuxãcü tá i yixemagü i yigü nüxna ípoxü̃güxü̃? —ñanagürügü.
5 Rü yexguma nüma ga ãẽ̱xgacüpataarü yemaxü̃güarü dauruxü̃, rü yema ãẽ̱xgacü ga ĩanemaxã icuáxü̃, rü yema ãẽ̱xgacügü ga iyaexü̃, rü yema Acáx nanegümaxã icua̱xgüxü̃ rü Yeúcax nimugagü rü ñanagürügü: —Toma rü ítamemare nax cuga taxĩnüexü̃. Rü tá tayanguxẽxẽ i guxü̃ma i ngẽma toxü̃ cumuxü̃. Natürü taxúexü̃táma taxuneta torü ãẽ̱xgacüxü̃. Rü ngẽma ta̱xacü i cuxca̱x mexü̃ ¡rü tomaxã naxü! —ñanagürügü.
6 Rü norü taxre ga popera naxümatü ga Yeú rü ñaxü̃ ga ore naxümatü: —Ngẽxguma pema chowa pexügüchaü̃gu, rü ngẽma pexü̃ chamuxü̃ pinguxẽẽgüchaü̃gu, rü chanaxwa̱xe nax penadaü̃eruxü̃ ya ãẽ̱xgacü nanegü, rü moxü̃ pa̱xmama ñaa oragu nua Yereéwa chauxü̃tawa pexĩ nax choxü̃ ípeyadaugüxü̃ca̱x —ñaxü̃ ga ore. Rü yema 70 ga ãẽ̱xgacü nanegü, rü yema yatügü ga ítáxü̃ ga ĩanemaxã icua̱xgüxü̃ ga nayaexẽẽxü̃xü̃tawa nayexmagü.
7 Rü yexguma nayauxgüãgu ga yema popera, rü nanadai ga yema 70 ga ãẽ̱xgacü nanegü rü ñu̱xũchi ínanadaü̃eru. Rü yemawena rü pexchigügu nananucu ga naerugü rü ĩane ga Yereéwa nanamugü.
8 Rü yexguma Yeúxü̃tawa nanguxgu ga yema orearü ngeruxü̃ rü Yeúxü̃ ñanagürü: —Marü nua nanana i ãẽ̱xgacü nanegüeru —ñanagürü. Rü nüma ga Yeú rü nanamu rü ñanagürü: —¡Ĩanearü ĩã̱x i nawa ixücuxü̃gu rü taxrechitaãcü ngẽxma penanu! Rü nüe ngéma nangẽxmagü ñu̱xmata moxü̃arü ngunexü̃wa nangu —ñanagürü.
9 Rü moxü̃ãcü pa̱xmama ínaxũxũ ga Yeú, rü guxü̃ma ga duü̃xü̃güpe̱xewa ñanagürü: —Tama nixĩ ga pema ga ãẽ̱xgacüxü̃ pimáxü̃. Yerü choma nixĩ ga chorü corimaxã charüxuanüxü̃ rü chayamáxü̃. ¿Natürü texé tanadai i ngẽma nanegü? —ñanagürü.
10 Rü aixcüma guxü̃ma ga yema Cori ya Tupana Acáxtanüxü̃maxã ueguxü̃ ga poxcu rü ningu. Rü nümatama ya Cori ya Tupana rü marü nayanguxẽxẽ ga yema norü orearü uruxü̃ ga Eríawa nüxü̃ yaxuxü̃.
11 Rü nüma ga Yeú rü ĩane ga Yereégu nanadai ga yema íyaxügüxü̃ ga Acáxtanüxü̃, rü guxü̃ma ga yema yatügü ga ãẽ̱xgacüarü ngü̃xẽẽruü̃gü, rü namücügü ga nüxna nayoexü̃, rü norü chacherdótegü. Rü taxuxü̃ma namaxẽxẽ.
12 Rü yemawena rü ĩane ga Chamáriawa naxũ. Rü yema nama ga nagu yaxũxü̃ rü Bex-equéxwa nangu. Rü yema nachica ga Carnérugüarü Dauruü̃güarü Ngutaque̱xechicawa nangu.
13 Rü yexguma yema nachicawa nanguxgu ga Yeú, rü yexma nüxü̃ nangau ga naenexẽgü ga Ocochía ga Yudáanearü ãẽ̱xgacü. Rü nüma ga Yeú rü nüxna naca rü ñanagürü: —¿Texé pixĩgü i pemax? —ñanagürü. Rü nümagü rü nanangãxü̃ rü ñanagürügü: —Toma rü Ocochíaenexẽgü tixĩgü. Rü nua taxĩ nax ãẽ̱xgacü nanegüxü̃ tarümoxẽgüxü̃ca̱x rü nüxü̃ tarümoxẽgüxü̃ca̱x i ngĩtanüxü̃ i ãẽ̱xgacüma̱x —ñanagürügü.
14 Rü yexguma ga nüma ga Yeú rü namücügüxü̃ namu rü ñanagürü: —¡Ípenayauxü̃! —ñanagürü. Rü yema Yeúmücügü rü maxẽãcü Ocochía naenexẽgüxü̃ ínayauxü̃. Rü Bex-equéxwa ga naxü̃nagüarü dauruü̃güarü puchuxü̃tagu nanadai ga yema 42 ga yatügü ga Ocochía naenexẽgü. Rü bai ga wüxi ga maxü̃xü̃.
15 Rü yexguma nüma ga Yeú rü inixũchigü. Rü namagu nüxü̃ nangau ga Yonadá ga Recáx nane ga Yeúxü̃ íyadauxü̃. Rü Yeú rü nüxü̃ narümoxẽ rü ñanagürü: —¿Namexü̃ i ngẽma chomaxã nagu curüxĩnüxü̃ i ngẽma choma cumaxã mexü̃gu charüxĩnüxü̃rüxü̃? —ñanagürü. Rü nüma ga Yonadá rü nanangãxü̃ rü ñanagürü: —Ngẽmáacüx, mexü̃gu cumaxã charüxĩnü —ñanagürü. Rü yexguma nüma ga Yeú rü ñanagürü: —Ega ngẽxguma ngẽmaãcü yixĩxgu rü choxna naxãxme̱x —ñanagürü ga Yeú. Rü yexguma ga Yonadá rü nüxna naxãxme̱x rü nüma ga Yeú rü norü carugu Yonadáxü̃ naxĩnagüxẽxẽ.
16 Rü ñu̱xũchi ñanagürü: —¡Choxü̃ naxümücü nax nüxü̃ cudauxü̃ca̱x nax ñuxãcü poraãcü Cori ya Tupanaxü̃ changechaü̃xü̃! —ñanagürü. Rü yemaacü norü caru ga cowarugü itúchigünegu Yonadáxü̃ nigae.
17 Rü yexguma ĩane ga Chamáriawa nangugügu rü nagu nachocu. Rü nüma ga Yeú rü nanadai ga guxü̃ma ga Acáxtanüxü̃ ga maxẽxü̃ ga yéma yaxǘgüxü̃. Rü yemaacü nanagu̱xẽẽxü̃chi ga yema Acáxtanüxü̃ yerü yemaacü nixĩ ga Cori ya Tupana Eríawa namaxã naxueguxü̃.
Yeú inayanaxoxẽxẽ ga guxü̃ma ga yema duü̃xü̃gü ga Baáxü̃ icua̱xüü̃güxü̃
18 Rü yemawena ga Yeú rü guxü̃ma ga ĩanecüã̱xmaxã nangutaque̱xe, rü ñanagürü: —Acáx rü ñuxguacürica Baáca̱x ngutaque̱xe naxü, natürü i chomax rü tá guxü̃gutáma Baáca̱x ngutaque̱xe chaxü.
19 Rü ngẽmaca̱x chanaxwa̱xe nax naxca̱x peca i guxü̃ma i Baáarü orearü uruü̃gü rü ngẽma Baáxü̃ icua̱xüü̃güxü̃ rü norü chacherdótegü i Baá. Rü chanaxwa̱xe nax taxúxetáma taxuxü̃, erü Baáca̱x tá chanadai i muxũchixü̃ i naxü̃nagü nax ngẽmamaxã nüxü̃ chicua̱xüü̃xü̃ca̱x. Rü ngẽma tauxexü̃ i duü̃xü̃gü rü tá nayue —ñanagürü. Rü nüma ga Yeú rü marü ñuxgumama nagu narüxĩnü ga yema womüxẽxẽ nax yemaacü yema Baáxü̃ icua̱xüü̃güxü̃ ga duü̃xü̃güxü̃ nada̱i̱xü̃ca̱x.
20 Rü yemaca̱x duü̃xü̃güxü̃ namu nax naxunagügüãxü̃ca̱x ga wüxi ga peta ga Baáca̱x ixĩxü̃. Rü yemaacü nanaxunagü.
21 Rü yemawena rü orearü ngeruü̃güxü̃ namu nax guxü̃ma ga Iraéanewa nüxna naxugüexü̃ca̱x ga yema duü̃xü̃gü ga Baáxü̃ icua̱xüü̃güxü̃. Rü guxü̃ma ga yema Baáaxü̃́ yaxõgüxü̃ rü ínangugü ga Baáxarü ngutaque̱xepataü̃wa, rü taxuxü̃ma nataxu. Rü guma Baáxarü ngutaque̱xepataxü̃ rü meama naxããcu.
22 Rü yexguma ga nüma ga Yeú rü nanamu ga yema Baáxarü ngutaque̱xechiruarü dauruxü̃ nax inanuãxü̃ca̱x ga yema naxchirugü ga ixãpáxü̃ nax nagu yacu̱xgüxü̃ca̱x ga guxü̃ma ga yema duü̃xü̃gü ga Baáaxü̃́ cua̱xüü̃güxü̃. Rü nüma ga yema naxchiruarü dauruxü̃ rü yemaacü nanaxü.
23 Rü yemawena ga Yeú rü Yonadá rü Baáxarü ngutaque̱xepataü̃gu nachocu. Rü nüma ga Yeú rü guxü̃ma ga yema duü̃xü̃gü ga Baáaxü̃́ yaxõgüxü̃xü̃ ñanagürü: —Tama chanaxwa̱xe nax duü̃xü̃gü i Cori ya Tupanaaxü̃́ yaxõgüxü̃ nua ngẽxmagüxü̃. Rü chanaxwa̱xe nax duü̃xü̃gü i Baáaxü̃́ yaxõgüxü̃xica nua ngẽxmagüxü̃ —ñanagürü.
24 Rü guxü̃ma ga duü̃xü̃gü ga Baáaxü̃́ yaxõgüxü̃ rü norü ngutaque̱xepataü̃gu nachocu nax Baána ãmare naxuaxü̃güxü̃ca̱x, rü naxü̃nagü nape̱xegu nada̱i̱xü̃ca̱x rü ínagugüaxü̃ca̱x. Rü yexgumayane ga Yeú rü guma ngutaque̱xepataü̃arü düxétügu nanamugü ga 80 ga yatügü. Rü ñaa oremaxã nayaxucu̱xẽ: —Yíxema wüxi i ñaxexẽ́ẽ i ngẽma pexme̱xgu chamugüxü̃ rü tá tümaarü maxü̃maxã tanaxütanü —ñanagürü.
25 10:25-26 Rü nüma ga Yeú rü yexguma yagúegu nax norü ãmare ínaguxü̃, rü nanamu ga norü churaragüerugü namaxã ga norü churaragü rü ñanagürü: —¡Pichocu, rü penadaix! ¡Rü taxuxü̃táma piñaxẽxẽ! —ñanagürü. Rü nüma ga yema Yeúarü churaragü rü taramaxã nanadai ga yema duü̃xü̃gü. Rü guma ngutaque̱xepataü̃arü düxétügu ínanawoxü̃. Rü yemawena rü guma Baáxarü ngutaque̱xepataü̃arü aixepegu nachocu rü nanayauxgü ga yema tupananetachicüna̱xãgü ga naixmena̱xãnaxca̱x rü ínanagu.
26 Nüü̃ nadau 10:25
27 Rü nagu napogüe ga Baáxarü ãmarearü guruxü̃. Rü yexgumarüxü̃ ta nagu napogüe ga guma norü ngutaque̱xepataxü̃. Rü guxchirechicaxü̃ nayaxĩxẽxẽ ga yema nachica, rü ñu̱xma rü ta rü ngéma nangẽxma.
28 Rü yemaacü ga Yeú rü Iraéanewa inayanaxoxẽxẽ ga yema tupananeta ga Baá.
29 Natürü nüma ga Yeú rü tama nüxü̃ narüxo ga yema chixexü̃ ga Nabáx nane ga Yeruboáü̃ üxü̃ ga yexguma Iraéanecüã̱xgüxü̃ chixexü̃gu nayixẽẽgu. Yerü nüma ga Yeú rü nayadaxẽẽãma nax nüxü̃ yacua̱xüü̃xü̃ ga yema úirunaxca̱x ga wocaxacüchicüna̱xãgü ga Dáü̃wa rü Betéwa yexmagüxü̃.
30 Rü nüma ga Cori ya Tupana rü Yeúmaxã nidexa rü ñanagürü: —Rü ngẽma nax chauga cuxĩnüxü̃ rü chauxetüpe̱xewa mexü̃ cuxüxü̃ rü ngẽma nax cuyanguxẽẽxü̃ ga yema Acáxtanüxü̃maxã chaxueguxü̃ ga poxcu, rü ngẽmaca̱x i cutanüxü̃ rü tá Iraéanearü ãẽ̱xgacüwa nangugü ñu̱xmatáta cutaxa nanegüwa nangu —ñanagürü ga Tupana.
31 Rü woo ga nax yemaxü̃ namaxã yaxuxü̃ ga Cori ya Tupana, rü nüma ga Yeú rü tama aixcüma Cori ya Iraétanüxü̃arü Tupanaarü mugü ninguxẽxẽ, yerü tama nüxna nixũgachi ga yema chixexü̃ ga Yeruboáü̃ Iraétanüxü̃xü̃ nagu yixẽẽxü̃.
32 Rü yexgumaü̃cüxü ga Cori ya Tupana rü ínanaxíraãchi ga Iraégüarü naane. Yerü Chíriaanearü ãẽ̱xgacü ga Achaé rü guxü̃ma ga Iraéanearü üyeanewa nixücu nax Iraéanecüã̱xgüxü̃ nayada̱i̱xü̃ca̱x.
33 Rü natü ga Yudáü̃arü éstewa yexmagüxü̃ ga naanegüwa inanaxügü ga nax nagu nachocuxü̃. Rü Achaé rü guxü̃ma ga Garaáxane, rü Gáxtanüxü̃ane, rü Rubéü̃tanüxü̃ane, rü Manachétanüxü̃ane nügüxü̃́ nanayaxu. Rü yema naane ga nayaxuxü̃ rü Aroéwa inaxügü rü ñu̱xmata ngate ga Arnóü̃wa nangu. Rü yemaacü namaxã nanangauxẽxẽ ga guxü̃ma ga Garáane rü Bacháü̃ane nax nügüxü̃́ naya̱u̱xãxü̃.
34 Rü guxü̃ma ga yema Yeúchiga rü yema naxüxü̃chiga rü norü daichiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
35 Rü yexguma nayu̱xgu ga Yeú rü ĩane ga Chamáriagu nanata̱xgü, rü nawena rü nachicüxü ãẽ̱xgacüxü̃ nixücu ga nane ga Yoacá.
36 Rü Yeú rü 28 ga taunecü Iraéanearü ãẽ̱xgacü nixĩ ga ĩane ga Chamáriawa.
