2 Reyes 11:1-21
11 Rü yexguma ngĩma ga Ataría ga Ocochía naé nüxü̃ cua̱xgu ga ngĩne rü marü nax nayuxü̃, rü duü̃xü̃güxü̃ imu nax nadaiaxü̃ca̱x ga guxü̃ma ga Ocochíaxacügü.
2 Natürü ga Yochebá ga ãẽ̱xgacü ga Yoráü̃acü ga Ocochíaeya̱x rü wüxi ga ucapugu Ataríacha̱xwa iyacu̱x ga Yoá ga Ocochía nane ngĩmaxã ga norü dauruxü̃. Rü yemaacü tama nayama̱xgü.
3 Rü ngĩma ga Yoáarü dauruxü̃ rü 6 ga taunecü Tupanapata ga taxü̃negu namaxã iyacu̱x. Rü yexgumayane ga Ataría rü Yudáanewa ãẽ̱xgacü iyixĩ.
4 Rü yexguma marü 7 ga taunecü ngĩxü̃́ inguxgu ga ãẽ̱xgacü nax yixĩxü̃ ga Ataría, rü nüma ga chacherdóte ga Yoiadá rü naxca̱x nangema ga yema churaragüerugü ga Queretéugü ga ãẽ̱xgacüpatamaxã icua̱xgüxü̃ rü yema capitáü̃gü ga ãẽ̱xgacüna daugüxü̃, rü Cori ya Tupanapata ga taxü̃negu nanamucu ga yema nüma ínayexmaxü̃wa. Rü yéma Tupanaégagu yema churaragüerumaxã inaxüga nax tama nüxü̃ yaxugüexü̃ca̱x nax namaxü̃xü̃ ga Ocochía nane ga Yoá. Rü yemawena rü Yoáxü̃ nango̱xẽxẽ nax nüxü̃ nadaugüxü̃ca̱x.
5 Rü ñu̱xũchi nayaxugücu̱xẽ rü ñanagürü nüxü̃: —Ñaãcü tá nixĩ i pedauxü̃taegüxü̃. Rü ngẽxguma wüxichigü i yüxügu ãẽ̱xgacüpataarü dauwa pichocu̱xgu rü wüxitücumü i pema rü tá ngẽma ĩã̱x i ãẽ̱xgacüpatape̱xewa ngẽxmaxü̃na pedaugü.
6 Rü ngẽma totücumü rü ngẽma ĩã̱x i Súrgu ãégaxü̃wa tá nadauxü̃taegü. Rü ngẽma perü tomaepü̱xtücumü rü ãẽ̱xgacüpataca̱xwena üxü̃ i ĩã̱xwa tá nadauxü̃taegü. Rü ngẽmaãcü tá nixĩ i nüxna pedauxü̃ ya yima ãẽ̱xgacüpata.
7 Rü pema i ngü̃chigaarü ngunexü̃gu ãẽ̱xgacüpataarü dauwa ípechoxü̃xü̃, rü pema rü tá Tupanapata ya taxü̃newa pexĩ nax nüxna pedaugüxü̃ca̱x ya daa bucü ya ãẽ̱xgacü tá ixĩcü ngéma ngẽxmacü.
8 Rü ãxneãcü tá nüxü̃ ípechomaeguãchi ya ãẽ̱xgacü. Rü texé ya nagu ücuchaü̃xe i ãẽ̱xgacü íngẽxmaxü̃wa rü tá tüxü̃ pima̱x. Rü nawe tá pixĩxü̃tanü ya ãẽ̱xgacü i nüma ínaxũxü̃wa —ñanagürü.
9 Rü nüma ga yema churaragüeru rü chacherdóte ga Yoiadága naxĩnüe rü nanaxügü ga yema namaxã nüxü̃ yaxuxü̃. Rü wüxichigü ga yema churaragüeru rü norü churaragütücumümaxã inacua̱x. Rü yemaacü yema chocuxü̃ ga churaragü ga ãẽ̱xgacüpatawa dauxü̃taegüxü̃, rü yema churaragü ga yema puracüwa íchoxü̃xü̃, rü wüxichigü ga ngü̃chigaarü ngunexü̃gu guma chacherdótepe̱xewa naxĩĩxü̃.
10 Rü nüma ga chacherdóte ga Yoiadá rü yema churaragüeruna nanana ga guma wocaegü rü poxü̃ruü̃gü ga ãẽ̱xgacü ga Dabíarü ixĩgüxü̃ ga guma Tupanapata ga taxü̃negu nuxü̃
11 Rü nüma ga yema churaragü ga dauxü̃taegüxü̃ rü nachicagu nügü ininu ga Tupanapata ga taxü̃nearü tügünecüwawa rü norü to̱xwecüwawa. Rü yexgumarüxü̃ ta nüxü̃ ínachomaeguãchi ga yema ãmarearü guruxü̃ nax nüxna nadaugüxü̃ca̱x. Rü wüxichigü ga yema dauxü̃taexü̃ rü nixãxne nax nüxna nadaugüxü̃ ga guma ãẽ̱xgacü ga bucü.
12 Rü yexguma nüma ga Yoiadá rü ínanamuxũchi ga guma bucü ga ãẽ̱xgacü ga Ocochía nane rü naeruwa nayanga̱xcuchi ga nanatüarü ãẽ̱xgacüpate̱xe. Rü nüxna nanaxã ga yema popera ga nawa nüxü̃ yaxuxü̃ nax ãẽ̱xgacü yixĩxü̃. Rü chíxü̃maxã nanabaeru rü yemawena rü nanaxunagü nax ãẽ̱xgacü yixĩxü̃. Rü guxü̃ma ga duü̃xü̃gü rü nanapepünegü rü tagaãcü ñanagürügü: —Namaxü̱̃x ya ãẽ̱xgacü! —ñanagürügü.
13 Rü yexguma Ataría nüxü̃ ĩnügu ga nax ínapepünetaegüxü̃ rü tagaãcü nataãẽgüxü̃ ga yema churaragü rü duü̃xü̃gü, rü ngĩma ga Ataría rü Tupanapata ga taxü̃newa ixũ ga yema ínangutaque̱xegüxü̃wa.
14 Rü nüxü̃ idau ga gumá ãẽ̱xgacü ga Tupanapataarü caxtaxü̃tagu nax nachixü̃ yerü yema nixĩ ga nacüma ga yexguma ãẽ̱xgacüxü̃ yangucuchixẽẽgügu. Rü nüxü̃ idau ta nax naxü̃tagu nachigüxü̃ ga churaragüeru rü paxetaruü̃gü rü duü̃xü̃gü ga poraãcü taãẽgüxü̃ ga norü cornétagu icuegüxü̃. Rü yexguma ga Ataría rü ngĩgü irügáutechiru rü tagaãcü ngĩgürügü: —Taechitawa̱xegüxü̃. Taechitawa̱xegüxü̃ —ngĩgürügü.
15 11:15-16 Rü yexguma ga nüma ga Yoiadá rü tagaãcü yema churaragüeruxü̃ namu rü ñanagürü: —¡Ngĩxü̃ ípegaxüchi i nua! ¡Rü taxũtáma nuxã Tupanapata ya taxü̃nechiãgu ngĩxü̃ pima̱x! Rü ngẽxguma texé ngĩétüwa chogügu ¡rü peyama̱xama! —ñanagürü. Rü yema ãẽ̱xgacüpataarü ücuchichica ga cowarugümaxã ínanguxü̃güxü̃gu ngĩxü̃ iyauxgü. Rü yexma ngĩxü̃ nima̱xgü.
16 Nüü̃ nadau 11:15
17 Rü yemawena nüma ga chacherdóte ga Yoiadá rü Tupanamaxã inaxüga nax nüma ga ãẽ̱xgacü rü guxü̃ma ga duü̃xü̃gü rü Tupanaga tá naxĩnüexü̃. Rü yexgumarüxü̃ ta rü ãẽ̱xgacümaxã inaxügagü ga duü̃xü̃gü nax nümagü rü tá aixcüma ãẽ̱xgacüga naxĩnüexü̃ rü nüma ga ãẽ̱xgacü rü duü̃xü̃gümaxã inaxüga nax nüma rü tá mea duü̃xü̃gümaxã inacuáxü̃.
18 Rü ñu̱xũchi guxü̃ma ga duü̃xü̃gü rü Baáxarü ngutaque̱xepataü̃wa naxĩ rü nagu napogüe. Rü nagu napogüe ta ga guxü̃ma ga yema Baáxarü ãmarearü guruü̃gü rü naxchicüna̱xãgü. Rü guma Baáxarü chacherdóte ga Matáü̃ rü Baáxarü ãmarearü guruü̃xü̃tagu nayadaerugü. Rü yemawena rü Tupanapata ga taxü̃neca̱x nawoegu rü nüma ga chacherdóte ga Yoiadá rü yexma Tupanapata ga taxü̃negu nanamugü ga dauxü̃taeruü̃gü nax nüxna nadaugüxü̃ca̱x.
19 Rü ñu̱xũchi nüma ga chacherdóte ga Yoiadá rü naxca̱x naca ga yema churaragüeru ga Queretéugü ga ãẽ̱xgacüpatamaxã icua̱xgüxü̃ rü ga capitáü̃ ga ãẽ̱xgacüna daugüxü̃ rü guxü̃ma ga duü̃xü̃gü. Rü wüxigu guma Tupanapata ga taxü̃newa inaxĩãchi nax ãẽ̱xgacüpatawa nagagüãxü̃ca̱x ga guma ãẽ̱xgacü. Rü yema ĩã̱x ga ãẽ̱xgacüpatape̱xewaama yexmaxü̃wa namaxã nichocu. Rü nüma ga ãẽ̱xgacü ga Yoá rü norü tochicaxü̃wa nayarüto.
20 Rü guxü̃ma ga duü̃xü̃gü rü nataãẽgü. Rü yemaacü Ataríaarü yuwena rü guxü̃ma ga guma ĩanecüã̱x rü taxuxü̃ma ga guxchaxü̃gu narüxĩnüe.
21 Rü nüma ga Yoá rü 7 ga taunecü nüxü̃́ nayexma ga yexguma ãẽ̱xgacüxü̃ yangucuchigu.
