2 Reyes 14:1-29
14 Rü yexguma marü taxre ga taunecü ãẽ̱xgacü yixĩxgu ga Yoá ga Yoacá nane ga Iraéanewa, rü Amachía ga Yoá nane rü Yudáanewa ãẽ̱xgacüxü̃ ningucuchi.
2 Rü nüma ga Amachía rü 25 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 29 ga taunecü nixĩ nax ĩane ga Yerucharéü̃wa ãẽ̱xgacü yixĩxü̃. Rü naé rü Yoadáü̃ nixĩ ga ngĩéga, rü ngĩma rü Yerucharéü̃cüã̱x iyixĩ.
3 Rü nüma ga Amachía rü Cori ya Tupanape̱xewa mexü̃ naxü, natürü tama norü o̱xi ga Dabí üxü̃ ga mexü̃maxã nawüxigu. Yerü yema nanatü ga Yoá üxü̃tama naxü.
4 Rü tama nagu nipogügü ga yema nachicagü ga duü̃xü̃gü norü tupananetaca̱x naxü̃nagü nagu daixü̃ rü pumarate̱xe ga yixichixü̃ nawa ínaguxü̃.
5 Rü yexguma Amachía marü ãẽ̱xgacü yixĩxgu ga Yudáanewa, rü nanadai ga guxü̃ma ga yema churaragüerugü ga nanatüxü̃ ima̱xgüxü̃.
6 Natürü tama nanadai ga nanegü ga yema nanatüxü̃ ima̱xgüxü̃, yerü nayanguxẽxẽ ga yema ore ga Cori ya Tupana Moichémaxã nüxü̃ ixuxü̃ ga ñaxü̃: —Ngẽma papagü rü taxucürüwama nanegü üxü̃ i chixexü̃gagu napoxcue rü nayue, rü ngẽxgumarüxü̃ ta i ngẽma nanegü rü taxucürüwama norü papagü üxü̃ i chixexü̃gagu napoxcue rü nayue. Erü wüxichigü rü noxrütama chixexü̃gagu tá napoxcu rü nayu —ñaxü̃.
7 Rü Amachía rü 10,000 ga Edóü̃tanüxü̃xü̃ nadai nagu ga yema doxonexü̃ ga Yucüragu ãégaxü̃. Rü yemawena rü nanapu ga guma ĩane ga Cherá. Rü nüma rü Yoxteégu nanaxüéga. Rü ngẽmatama nixĩ i naéga i ñu̱xma.
8 Rü yemawena ga nüma ga Amachía rü Iraéanearü ãẽ̱xgacü ga Yoá ga Yoacá nane ga Yeú nataxaca̱x nimuga rü ñanagürü: —¡Nua naxũ! Rü nua tá yigü tadaugü —ñanagürü.
9 Natürü nüma ga Yoá rü ñaxü̃ ga ore naxca̱x namuegu: —Wüxi ga chuchuxü̃ ga Líbanucüã̱x rü ocayiwa ga Líbanucüã̱xca̱x nimuga rü ñanagürü nüxü̃: “Cuxacü chaunena ngĩxü̃ namu nax ngĩmaxã naxãmaxü̃ca̱x”, ñanagürü. Natürü wüxi ga ngo̱xo rü yema chuchuxü̃ ínaxüxü̃wa naxüpetü rü nawa nanga rü yexma nayapuxcuchi ga yema chuchuxü̃ rü nayu.
10 Rü choma rü nüxü̃ chacua̱x nax Edóü̃tanüxü̃xü̃ nax cuda̱i̱xü̃, rü ngẽmaca̱x cugü quicua̱xüüxü̃ i ñu̱xmax. Rü name nixĩ nax cugü quicua̱xüxü̃, natürü narümemae nixĩ nax ngéma cupatawatama cungexmaxü̃. ¿Rü tü̱xcüü̃ naxca̱x cudau nax cugütama chixexü̃gu cunguxẽxẽxü̃ rü chixexü̃gu cunanguxẽxẽxü̃ i Yudáane? —ñanagürü.
11 Natürü nüma ga Amachía rü tama naga naxĩnü. Rü yemaca̱x ga Yoá rü norü churaragümaxã inaxũãchi nax Amachíamaxã nügü yadaixü̃ca̱x. Rü ĩane ga Bex-chemé ga Yudáanewa yexmanegu nügü nadai.
12 Rü yema Iraéanecüã̱xgü rü Yudáanecüã̱xgüxü̃ narüporamaegü. Rü yemaca̱x ga Yudáanecüã̱xgü rü nibuxmü, rü wüxichigü rü napataca̱x nawoegu.
13 Rü Yoá ga Iraéanearü ãẽ̱xgacü rü ĩane ga Bex-chemégu Amachía ga Yudáanearü ãẽ̱xgacüxü̃ niyaxu. Rü nüma ga Amachía rü to ga Yoá nane nixĩ rü Ocochía nixĩ ga norü o̱xi. Rü yemawena rü Yerucharéü̃wa naxũ ga gumá Iraéanearü ãẽ̱xgacü, rü nagu napogü ga 180 metru ga norü poxeguxü̃tápü̱x nax yéma yaxücuxü̃ca̱x. Rü ĩã̱x ga Efraíü̃wa inanaxügü rü ñu̱xmata naxtapü̱x íyapoxü̃arü ĩã̱xwa nangu nax nagu napogüxü̃.
14 Rü nanade ga guxü̃ma ga yema úiru rü diẽrumü rü guxü̃ma ga yemaxü̃gü ga Cori ya Tupanapata ga taxü̃newa yexmagüxü̃. Rü yexgumarüxü̃ ta nanade ga yemaxü̃gü ga ãẽ̱xgacüpatawa yexmagüxü̃. Rü yemawena rü ínanayauxü̃ ga ñuxre ga duü̃xü̃gü rü namaxã Chamáriaca̱x nataegu.
15 Rü guxü̃ma ga yema Yoáchiga, rü yema naxüxü̃chiga rü norü daichiga rü ñuxãcü Amachía ga Yudáanearü ãẽ̱xgacümaxã nax nügü nada̱i̱xü̃chiga, rü popera i Iraéanearü ãẽ̱xgacügüchiga nagu ümatüxü̃gu naxümatü.
16 Rü yexguma nayu̱xgu ga Yoá rü yema Iraéanearü ãẽ̱xgacügü íta̱xgüxü̃gu nixĩ ga nata̱xgüãxü̃ ga Chamáriawa. Rü nawena rü nane ga Yeruboáü̃ nachicüxü ãẽ̱xgacüxü̃ ningucuchi
17 Rü Yudáanearü ãẽ̱xgacü ga Amachía ga Yoá nane rü 15 ga taunecü namaxü̃ nawena ga nax nayuxü̃ ga Iraéanearü ãẽ̱xgacü ga Yoá ga Yoacá nane.
18 Rü guxü̃ma ga yema Amachíachiga, rü yema popera ga Yudáanearü ãẽ̱xgacügüchiga nagu ümatüxü̃gu naxümatü.
19 Rü ĩane ga Yerucharéü̃wa rü duü̃xü̃gü rü Amachíamaxã nanue. Rü yemaca̱x ga nüma rü ĩane ga Láquiwa naña. Natürü nawe nangegüama, rü yexma nayama̱xgü.
20 Rü yema naxü̃ne rü wüxi ga cowaruétügu nayaxüegü, rü Yerucharéü̃wa nanangegü. Rü norü o̱xigü íta̱xgüxü̃gu nayata̱xgü ga Dabíarü Ĩanewa.
21 Rü yexguma ga guxü̃ma ga duü̃xü̃gü ga Yudáanecüã̱xgü rü Amachía nane ga Acharíaxü̃ nanatüchicüxü ãẽ̱xgacüxü̃ nimucuchigü. Rü yexguma ga nüma ga Acharía rü nüxü̃́ nayexma ga 16 ga norü taunecü.
22 Rü nüma ga Acharía rü nanatü yuxguwena nanapu ga ĩane ga Eráx nax wenaxarü Yudáanearü yixĩxü̃ca̱x. Rü ñu̱xũchi nanamexẽxẽ.
Yeruboáü̃ ga Yoá nane rü Iraéanearü ãẽ̱xgacü nixĩ
23 Rü yexguma 15 ga taunecü Yudáanewa ãẽ̱xgacü yixĩxgu ga Amachía ga Yoá nane, rü Yeruboáü̃ ga Yoá nane rü inanaxügü nax Iraéanewa ãẽ̱xgacü yixĩxü̃. Rü 41 ga taunecü nixĩ nax Chamáriaarü ĩanewa ãẽ̱xgacü yixĩxü̃.
24 Natürü guxü̃ma ga yema Tupanape̱xewa naxüxü̃ rü nachixe. Yerü tama nüxna nixũgachi ga yema chixexü̃ ga Yeruboáü̃ ga Nabáx nane üxü̃ ga Iraécüã̱xgüxü̃ nagu nayixẽẽxü̃.
25 Rü nüma ga Yeruboáü̃ rü noxritamaarü üyeanegu nanayaxu ga nax yapuyeaneãxü̃ ga Iraéane. Rü ĩane ga Amáca̱x íxücuxü̃wa inanaxügü rü ñu̱xmata Már Arabágu nayacua̱xẽxẽ nax Iraéanecüã̱xgüarü yixĩxü̃. Rü yemaacü ningu ga yema Cori ga norü Tupana nüxü̃ ixuxü̃ nawa ga norü orearü uruxü̃ ga Yoná ga Amitái nane ga ĩane ga Gax-éfecüã̱x.
26 Yerü nüma ga Cori ya Tupana rü nüxü̃ nadau nax poraãcü ngúxü̃ yangegüxü̃ ga guxü̃ma ga yema Iraéanecüã̱xgü. Rü woo yema coriã̱xgüxü̃ rü woo yema tama coriã̱xgüxü̃ rü taxúema nawa iñaxü̃ ga ngúxü̃ ningegü, yerü taxuxü̃ma Iraéanecüã̱xgüxü̃ narüngü̃xẽxẽ.
27 Rü yemaca̱x ga nüma ga Cori ya Tupana rü Yoá nane ga Yeruboáü̃xü̃ namu nax Iraéanecüã̱xgüxü̃ nangü̃xẽẽxü̃ca̱x nax tama iyanaxoxüchixü̃ca̱x ga naéga ga Iraétanüxü̃ ga ñoma ga naanewa.
28 Rü guxü̃ma ga yema Yeruboáü̃chiga rü yema naxüxü̃chiga, rü norü porachiga, rü norü dai ga togü ga nachixü̃anegümaxã naxüxü̃chiga, rü ñuxãcü Iraéaneca̱x yapuãxü̃ ga guma ĩanegü ga Damácu rü Amá, rü guxü̃ma ga yema rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
29 Rü yexguma nayu̱xgu ga Yeruboáü̃, rü yema Iraéanearü ãẽ̱xgacügü íta̱xgüxü̃gu nanata̱xgü. Rü nawena rü nane ga Chacaría nachicüxü ãẽ̱xgacüxü̃ ningucuchi.
