2 Reyes 15:1-38
15 Rü yexguma marü 27 ga taunecü Iraéanearü ãẽ̱xgacü yixĩxgu ga Yeruboáü̃, rü ningucuchi ga Acharía nax Yudáanearü ãẽ̱xgacü yixĩxü̃ca̱x. Rü nüma ga Acharía rü Yudáanearü ãẽ̱xgacü ga Amachía nane nixĩ.
2 Rü yexguma inaxügüãgu ga Acharía nax ãẽ̱xgacü yixĩxü̃ rü 16 ga taunecü nüxü̃́ nayexma. Rü nüma rü 52 ga taunecü Yerucharéü̃wa ãẽ̱xgacü nixĩ. Naé rü Yecuría nixĩ ga ngĩéga rü Yerucharéü̃cüã̱x tixĩ.
3 Rü yema naxüxü̃ ga Acharía rü name ga Cori ya Tupanape̱xewa, gumá nanatü ga Amachía üxü̃rüxü̃.
4 Natürü nüma ga Acharía rü tama nagu nipogü ga yema nachicagü ga nawa duü̃xü̃gü tupananetagüxü̃ yacua̱xüü̃güxü̃. Rü duü̃xü̃gü rü yema nachicagügu tupananetagüca̱x naxü̃nagü nadaiama rü pumarate̱xe ga yixichixü̃ ínaguama.
5 Rü yemaca̱x ga Cori ya Tupana rü ãẽ̱xgacü ga Acharíaxü̃ chaxünemaxã nida̱xawexẽxẽ ñu̱xmata nayumare. Rü yemaca̱x ãẽ̱xgacüpatawa wüxi ga ucapuwa nüxicatama nayexmaecha. Rü yemaca̱x nane ga Yotáü̃ guma ãẽ̱xgacüpatamaxã rü yema nachixü̃anemaxã inacuáx.
6 Rü guxü̃ma ga Acharíachiga rü yema naxüxü̃chiga, rü yema popera ga Yudáanearü ãẽ̱xgacügüchiga nagu ümatüxü̃gu naxümatü.
7 Rü yexguma nayu̱xgu ga Acharía rü yema natanüxü̃ íta̱xgüxü̃gu nayata̱xgü ga Dabíarü Ĩanewa. Rü nawena rü nane ga Yotáü̃ nachicüxü ãẽ̱xgacüxü̃ ningucuchi.
Iraéanewa ãẽ̱xgacü nixĩ ga Chacaría
8 Rü yexguma 38 ga taunecü Yudáanearü ãẽ̱xgacü yixĩxgux ga Acharía, rü yexguma nixĩ ga Iraéanewa yexwacax yaxücuxü̃ ga Chacaría nax Iraéanearü ãẽ̱xgacü yixĩxü̃ca̱x. Rü nüma ga Chacaría rü Yeruboáü̃ nane nixĩ, rü 6 ga tauemacütama ãẽ̱xgacü nixĩ ga ĩane ga Chamáriawa.
9 Natürü nüma ga Chacaría rü Tupanape̱xewa chixexü̃ naxü yema nüxíraxü̃güxü̃ ga natanüxü̃rüxü̃. Yerü tama nüxna nixũgachi ga yema pecadugü ga Nabáx nane ga Yeruboáü̃ Iraéanecüã̱xgüxü̃ nagu nayixẽẽxü̃.
10 Rü nüma ga Charúü̃ ga Yabé nane rü Chacaríamaxã nanu rü ĩane ga Ibeáü̃gu nügü nadai rü yexma Chacaríaxü̃ nima̱x. Rü yemawena rü nachicüxü ãẽ̱xgacüxü̃ ningucuchi ga nüma ga Charúü̃.
11 Rü yema togüama ga Chacaría üxü̃ rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
12 Rü yemaacü ningu ga yema ore ga Cori ya Tupana Yeúmaxã nüxü̃ ixuxü̃ ga ñaxü̃: —Cunegü rü cutaagü rü cutaagüarü nanegü rü ñu̱xũchi cutaagüarü nanegüarü nanegü rü tá Iraéanearü ãẽ̱xgacü nixĩgü —ñaxü̃.
Iraéanewa ãẽ̱xgacü nixĩ ga Charúü̃
13 15:13-14 Rü yexguma marü 39 ga taunecü Yudáanearü ãẽ̱xgacü yixĩxgu ga Uchía, rü yexguma nixĩ ga yexwacax yaxücuxü̃ ga Charúü̃ ga Yabé nane nax Iraéanearü ãẽ̱xgacü yixĩxü̃ca̱x. Natürü wüxitama ga tauemacü ãẽ̱xgacü nixĩ ga Chamáriawa yerü nüma ga Menaéü̃ ga Gadí nane rü Tircháwa ne naxũ, rü Chamáriawa nangu rü yéma Charúü̃xü̃ nima̱x. Rü nawena ga nax yamáaxü̃ rü nachicüxü ãẽ̱xgacüxü̃ ningucuchi.
14 Nüü̃ nadau 15:13
15 Rü guxü̃ma ga Charúü̃ üxü̃chiga rü ñuxãcü Chacaríaca̱x nax íyagoõchixü̃chiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
16 Rü yexguma ga Menaéü̃ rü Tífchawa inaxũãchi rü Tircháwa naxũ. Rü yémacüã̱xgü rü tama naxca̱x nayawãxnagü ga guma ĩanearü poxeguxü̃arü ĩã̱xgü. Natürü nixücuama rü nanade ga guxü̃ma ga norü yemaxü̃gü ga guma ĩanewa rü norü naanewa yexmagüxü̃. Rü ñu̱xũchi tüxü̃ nawinapütüwegü ga guxema ngexegü ga itacharaü̃güxe.
Iraéanewa ãẽ̱xgacü nixĩ ga Menaéü̃
17 Rü yexguma 39 ga taunecü Yudáanearü ãẽ̱xgacü yixĩxgux ga Acharía, rü yexguma nixĩ ga yexwacax yaxücuxü̃ ga Menaéü̃ ga Gadí nane nax Iraéanearü ãẽ̱xgacü yixĩxü̃ca̱x. Rü nüma ga Menaéü̃ rü 10 ga taunecü ĩane ga Chamáriawa ãẽ̱xgacü nixĩ.
18 Natürü yema Menaéü̃ üxü̃ rü nachixe ga Cori ya Tupanape̱xewa yerü tama nüxna nixũgachi ga yema pecadugü ga Nabáx nane ga Yeruboáü̃ Iraéanecüã̱xgüxü̃ nagu yixẽẽxü̃.
19 Rü wüxi ga ngunexü̃gu rü nüma ga Púx ga Achíriaanearü ãẽ̱xgacü rü Iraéanegu nachocu. Rü yexguma ga Menaéü̃ rü 33,000 quíru ga diẽru nüxna naxã nax yemaacü Púx naétüwa üxü̃ca̱x rü naporaxẽẽãxü̃ca̱x nax ãẽ̱xgacü yixĩxü̃.
20 Rü yemaca̱x ga Menaéü̃ rü guxü̃ma ga yema Iraéanewa yexmagüxü̃ ga duü̃xü̃gü ga diẽruã̱xgüxü̃ca̱x nanaxunagü ga wüxi ga mu nax naxütanügüãxü̃ca̱x ga ngãxü̃ ga quíruarü yexera ga diẽrumü nax yemaacü Achíriaanearü ãẽ̱xgacüaxü̃́ naxütanüãxü̃ca̱x. Rü yemaacü ga Achíriaanearü ãẽ̱xgacü rü norü ĩaneca̱x nataegu rü tama marü Iraéanewa nayexma.
21 Rü guxü̃ma ga Menaéü̃chiga rü yema naxüxü̃chiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
22 Rü yexguma nayuxguwena rü nane ga Pecaxía nachicüxü ãẽ̱xgacüxü̃ ningucuchi.
Iraéanewa ãẽ̱xgacü nixĩ ga Pecaxía
23 Rü yexguma 50 ga taunecü Yudáanewa ãẽ̱xgacü yixĩxgu ga Acharía, rü yexguma nixĩ ga yexwacax Iraéanewa yaxücuxü̃ ga Pecaxía nax Iraéanearü ãẽ̱xgacü yixĩxü̃ca̱x. Rü nüma ga Pecaxía ga Menaéü̃ nane rü taxre ga taunecü Chamáriawa ãẽ̱xgacü nixĩ.
24 Natürü ga yema Pecaxía üxü̃ rü nachixe ga Cori ya Tupanape̱xewa yerü tama nüxna nixũgachi ga yema pecadugü ga Nabáx nane ga Yeruboáü̃ Iraéanecüã̱xgüxü̃ nagu yixẽẽxü̃.
25 Rü wüxi ga Pecaíaarü churaragüeru ga Remaría nane ga Pécagu ãégaxü̃ rü Pecaxíaca̱x nügü nanutaque̱xe nax yamáaxü̃ca̱x. Rü nüma ga Péca rü 50 ga Garaáxanecüã̱x ga yatügümaxã Chamáriawa naxũ, rü yexma ãẽ̱xgacüpatagu Pécaíaxü̃ nima̱xgü wüxigu namaxã ga Aríe rü Argóx. Rü yemawena ga Péca rü Pecaxíachicüxü Iraéanearü ãẽ̱xgacüxü̃ ningucuchi.
26 Rü yema Pecaxíachiga rü guxü̃ma ga yema naxüxü̃chiga rü yema poperagü ga Iraéanearü ãẽ̱xgacügüchiga nagu ümatüxü̃gu naxümatü.
Iraéanewa ãẽ̱xgacü nixĩ ga Péca
27 Rü yexguma 52 ga taunecü Yudáanearü ãẽ̱xgacü yixĩxgu ga Acharía, rü yexguma nixĩ ga yexwacax Iraéanewa yaxücuxü̃ ga Péca nax Iraéanearü ãẽ̱xgacü yixĩxü̃ca̱x. Rü nüma ga Péca ga Remaría nane rü 20 ga taunecü Chamáriawa ãẽ̱xgacü nixĩ.
28 Natürü yema Péca üxü̃ rü nachixe ga Tupanape̱xewa yerü tama nüxna nixũgachi ga yema pecadugü ga Nabáx nane ga Yeruboáü̃ Iraéanecüã̱xü̃ nagu yixẽẽxü̃.
29 Rü yexguma Péca rü Iraéanearü ãẽ̱xgacü yixĩxgu rü yéma nangu ga Achíriaanearü ãẽ̱xgacü ga Tigáx-piréche. Rü nayapu ga guma ĩanegü ga Ióü̃ rü Abé-béx-maacá, rü Yanóa, rü Quédex, rü Achóx, rü Garaáx rü Gariréa, rü ñu̱xũchi guxü̃ma ga yema Netaríarü naane. Rü guxü̃ma ga yema duü̃xü̃gü ga yéma maxẽxü̃ rü Achíriaanewa nanagagü.
30 Rü nüma ga Erá nane ga Ochéa rü naxca̱x nadau nax ñuxãcü Remaría nane ga Pécaca̱x íyagoõchixü̃. Rü yemaacü nayama̱x. Rü yexguma marü 20 ga taunecü Yudáanewa ãẽ̱xgacü yixĩxgu ga Uchía nane ga Yotáü̃, rü Iraéanewa nüma ga Ochéa rü Pécachicüxü ãẽ̱xgacüxü̃ ningucuchi.
31 Rü guxü̃ma ga yema Pécachiga rü ñu̱xũchi yema naxüxü̃chiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.
Yudáanewa ãẽ̱xgacü nixĩ ga Yotáü̃
32 Rü yexguma taxre ga taunecü ãẽ̱xgacü yixĩxgu ga Péca ga Remaría nane, rü yexguma nixĩ ga yexwacax Yudáanewa yaxücuxü̃ ga Yotáü̃ ga Uchía nane nax Yudáanearü ãẽ̱xgacü yixĩxü̃ca̱x.
33 Rü nüma ga Yotáü̃ rü 25 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 16 ga taunecü Yerucharéü̃wa ãẽ̱xgacü nixĩ. Rü naé rü Yeruchá nixĩ ga ngĩéga rü Chadóxacü iyixĩ.
34 15:34-35 Rü yema Yotáü̃ üxü̃ rü name ga Tupanape̱xewa, yema nanatü ga Uchía üxü̃rüü̃tama. Yerü nanaxü ga Cori ya Tupanapata ga taxü̃nearü ĩã̱x ga taxü̃. Natürü tama nagu nipogügü ga yema tupananetagüarü ãmarearü guruü̃gü ga ngextá duü̃xü̃gü nawa nayagugüama ga norü ãmaregü rü norü pumarate̱xegü.
35 Nüü̃ nadau 15:34
36 Rü guxü̃ma ga yema Yotáü̃chiga rü yema naxüxü̃chiga rü yema poperagü ga Yudáanearü ãẽ̱xgacügüchiga nagu ümatüxü̃gu naxümatü.
37 Rü yexgumaü̃cüxü nixĩ ga Cori ya Tupana inaxügüxü̃ nax Yudáanewa namuaxü̃ ga Chíriaanearü ãẽ̱xgacü ga Rechíü̃ rü ñu̱xũchi Remaría nane ga Péca nax Yudáanecüã̱xgüca̱x íyaxü̃ãchixü̃ca̱x.
38 Rü yexguma nayu̱xgu ga Yotáü̃ rü yema natanüxü̃ íta̱xgüxü̃gu nanata̱xgü ga Dabíarü Ĩanewa. Rü nawena rü nane ga Acháx ãẽ̱xgacüxü̃ ningucuchi.
